2 Más wen tsʌꞌic cʌjchi tiꞌ bicꞌ yicꞌot jumpꞌej ñaꞌtyun chaꞌan chojquic ochel ti jaꞌ jini muꞌ bʌ i yʌqꞌuen i yotsan i mul juntiquil saj bʌ chʌncol bʌ i chꞌujbiñon.

3 Qꞌuele laꞌ bʌ. Mi tiꞌ chaꞌle mulil a piꞌʌl ti a tyojlel, yom maꞌ tiqꞌueꞌ. Mi tiꞌ qꞌuextyʌ i pensal i cʌyeꞌ i mul, yom maꞌ ñusʌben i mul.

4 Aunque cꞌʌlʌl siete veces miꞌ chaꞌlen mulil ti a tyojlel ti jumpꞌej qꞌuin, mi ti jujunyaj mi tyʌlel baꞌañet i sub i bʌ i cꞌajtibeñet maꞌ ñusʌben i mul, chʌꞌʌch yom maꞌ ñusʌben i mul, cheꞌ jini. Cheꞌ ti yʌlʌ Jesús.

5 Jini yajcʌbiloꞌ bʌ ajsubtꞌañob ñumel tiꞌ subeyob lac Yum: C Yum, cotyañon lojon chaꞌan más xucꞌul mi lojon c chꞌujbin. Cheꞌ ti yʌlʌyob.

6 Cheꞌ jini Jesús tiꞌ subeyob: Mi ti laꞌ chꞌujbiyon chʌꞌcach tsꞌintyʌl bajcheꞌ i bʌcꞌ mostaza i wentyʌlel, chꞌujbi laꞌ suben ili sicómoro bʌ tyeꞌ: Laꞌ bojquiquet. Laꞌ pʌjquiquet yaꞌ ti colem jaꞌ, cheꞌetla. Mi quejel i chꞌujbibeñetla laꞌ tꞌan ili tyeꞌ, cheꞌ ti yʌlʌ Jesús.

7 Mi an juntiquil an ajtroñel i chaꞌan, mi ti juli ti troñel ti pic lum o mi tiꞌ cʌñʌtyʌ animal machꞌan mi quejel laꞌ waꞌ suben: Ochen, buchiꞌ chaꞌlen uchꞌel, cheꞌetla.

8 Mach cheꞌiqui. Pero mi quejel laꞌ ñaxan suben: Chajpʌbeñon i bʌl c ñʌcꞌ. Chajpan a bʌ a wʌqꞌueñon cuchꞌel. Ti wiꞌil chꞌujbi a chaꞌlen uchꞌel jeꞌel, cheꞌetla.

9 ¿Muꞌ ba i subentyel wocox i yʌlʌ cheꞌ tsaꞌix i chꞌujbibeyet a tꞌan? Machꞌan, como jiñʌch i troñel.

10 Chʌꞌʌch jeꞌel jatyetla. Cheꞌ mi yujtyel laꞌ luꞌ meleꞌ chʌ bʌ miꞌ xiqꞌuetla a chaꞌlen Dios yom mi laꞌ wʌleꞌ: Maꞌix c ñuclel, ajtroñelon jach. Tsaꞌ jach c chaꞌle am bʌ tic wenta chaꞌan mic chaꞌlen. Cheꞌ yom mi laꞌ wʌleꞌ. Cheꞌ ti yʌlʌ Jesús.

11 Cheꞌ chʌncol tyo i bej majlel chaꞌan mi cꞌotyel ti Jerusalén, Jesús ti ñumi yaꞌ ti xinil pañimil Samaria yicꞌot Galilea bʌ i cꞌabaꞌ.

12 Cheꞌ chʌncol i cꞌotyel Jesús ti jumpꞌej saj lum tiꞌ tyajayob ti bij diez winicob añoꞌ bʌ i cꞌamꞌan luꞌ pasem bʌ ti pʌchʌlel muꞌ bʌ i pʌcꞌmisʌben majlel i bʌcꞌtyal. Pero ñajt ti waꞌleyob.

13 Tiꞌ cꞌam bʌ tꞌan ti yʌlʌyob: Jesús, Maestro, qꞌueleyon ti pꞌumpꞌun chaꞌan a cotyañon lojon, cheꞌob.

14 Cheꞌ ñac ti yilʌ Jesús, tiꞌ subeyob: Cucuxla, pʌsʌ laꞌ bʌ yaꞌ baꞌan cura, cheꞌen. Cheꞌ chʌncol tyo i majlelob ti waꞌ lajmiyob.

15 Cheꞌ jini juntiquil tsaꞌ bʌ i yilʌ lajmenix ti chaꞌ sujti yaꞌ baꞌan Jesús. Ti cꞌam bʌ tꞌan tiꞌ sube i ñuclel Dios.

16 Tiꞌ pʌcꞌ choco i bʌ yaꞌ baꞌan Jesús cꞌʌlʌ tiꞌ tyaja lum i ñiꞌ i wut chaꞌan i suben wocox i yʌlʌ. Chꞌoyol ti Samaria jini winic.

17 Cheꞌ jini Jesús ti yʌlʌ: ¿Machꞌa baꞌan diez ti lajmisʌnti? ¿Baqui an jini yambʌ nueve? cheꞌen.

18 ¿Jin jach ba jini ñajt bʌ chꞌoyol bʌ winic ti chaꞌ sujti tyʌlel chaꞌan i subeꞌ i ñuclel Dios? cheꞌen.

19 Cheꞌ jini Jesús tiꞌ sube jini winic. Tyejchen. Cucux. Tsaꞌix lajmiyet chaꞌan ti a chꞌujbiyon ti a pusicꞌal. Cheꞌ ti yʌlʌ Jesús.

20 Jini fariseojob tiꞌ cꞌajtibeyob Jesús baqui bʌ ora mi quejel i chaꞌlen yumʌl Dios. Jesús tiꞌ subeyob: Mach tsiquil ti laꞌ wut mi quejel i chaꞌlen yumʌl Dios.

21 Machꞌan mi quejel i yʌleꞌ: Wʌꞌan wʌꞌwʌꞌi o mi yaꞌan yaꞌyaꞌi. Como chʌncol ti yumʌl Dios wʌꞌ baꞌ añetla, cheꞌ ti yʌlʌ Jesús.

22 Cheꞌ jini Jesús tiꞌ sube ajcʌntꞌañob i chaꞌan: Tyal i yorojlel cheꞌ laꞌ wom laꞌ wersa qꞌuelon i Piꞌʌlon bʌ Quixtyañujob aunque jumpꞌej jach qꞌuin. Pero machꞌan mi quejel laꞌ waꞌ ilañon, cheꞌen.

23 Mi quejel laꞌ subentyel: Wʌꞌan wʌꞌwʌꞌi o mi yaꞌan yaꞌyaꞌi, cheꞌob. Pero mach yom mi laꞌ lolon majlel laꞌ qꞌueleꞌ. Mach yom mi laꞌ lolon tsʌclen majlel.

24 Como cheꞌ bajcheꞌ ñoj tsiquil mi lejmel i cꞌʌcꞌal chajc cꞌʌlʌ ti junwejl chan cꞌʌlʌ ti yambʌ junwejl chʌꞌʌch wen tsiquil cheꞌ mic chaꞌ tyʌlel Joñon i Piꞌʌlon bʌ Quixtyañujob cheꞌ ti jini qꞌuin cheꞌ mic chaꞌ tyʌlel.

25 Pero ñaxan wersa mic wen ñusan wocol yicꞌot mi quejel i michꞌqꞌueloñob quixtyañujob añoꞌ bʌ wale iliyi.

26 Cheꞌ lajal bajcheꞌ ti ujti cheꞌ ñac wʌꞌan ti mulawil Noé bʌ i cꞌabaꞌ, chʌꞌʌch jeꞌel mi quejel i yujtyel ti yorojlel cheꞌ mic chaꞌ tyʌlel Joñon i Piꞌʌlon bʌ Quixtyañujob.

27 Tiꞌ chaꞌleyob uchꞌel. Tiꞌ pʌyʌyob i yijñamob. Tiꞌ sijiñob yalobilob cꞌʌlʌ jintyo ti ochi Noé ti barco bʌ otyot. Ti queji butꞌ jaꞌ. Ti luꞌ jiliyob ti jaꞌ.

28 Chʌꞌʌch jeꞌel ti ujti cheꞌ ñac wʌꞌan ti mulawil jini winic Lot bʌ i cꞌabaꞌ. Tiꞌ chaꞌleyob uchꞌel. Tiꞌ chaꞌleyob mʌñoñel choñoñel. Tiꞌ chaꞌleyob pacꞌ. Tiꞌ meleyob i yotyot tyac.

29 Pero cheꞌ ñac ti loqꞌui majlel Lot ti jini lum Sodoma bʌ i cꞌabaꞌ ti yajli cꞌajc yicꞌot azufre ti chan. Ti luꞌ tsʌnsʌntiyob.

30 Chʌꞌʌch mi quejel i yujtyel jeꞌel cheꞌ mi quejel c tyʌlel Joñon i Piꞌʌlon bʌ Quixtyañujob, cheꞌen.

31 Ti jim bʌ qꞌuin mi an majch yaꞌan ti pam pamacña bʌ i jol otyot mach yom jubic chaꞌan i chꞌʌmeꞌ loqꞌuel chʌ bʌ an i chaꞌan. Mi an majch an ti cholel mach yom i chaꞌ sujtyel ti yotyot chaꞌan i chꞌʌmeꞌ loqꞌuel chʌ bʌ an i chaꞌan yaꞌ ti yotyot.

32 Cꞌajtisanla bajcheꞌ ti ujti yicꞌot yijñam Lot bajcheꞌ ti waꞌ aqꞌuenti i xoteꞌ i mul.

33 Jini yom bʌ i chaꞌlen chʌ bʌ bajñel yom i pusicꞌal chaꞌan chʌncol i bajñel pꞌuntyan i bʌ mi quejel i sʌt i bʌ. Jini machꞌʌ baꞌan miꞌ bajñel pꞌuntyan i bʌ muꞌ bʌ i yʌcꞌ i bʌ chaꞌan i meleꞌ chʌ bʌ yom Dios mi quejel i cʌñʌtyʌntyel.

34 Mic subeñetla: Ti jim bʌ acꞌbʌlel cheꞌ mic chaꞌ tyʌlel an chaꞌtiquil ti jumpꞌej wʌyibʌl. Juntiquil mi quejel i pʌjyel majlel. Yambʌ mi quejel i cʌytyʌl.

35 Ti jim bʌ ora an chaꞌtiquil xꞌixicob chʌncol bʌ i motin chaꞌleñob juchꞌbal. Juntiquil mi quejel i pʌjyel majlel. Yambʌ mi quejel i cʌytyʌl.

36 Chaꞌtiquil winicob añob ti jumpꞌej cholel. Juntiquil mi quejel i pʌjyel majlel. Yambʌ mi quejel i cʌytyʌl.

37 Cheꞌ ñac ti yubiyob jini tꞌan tiꞌ cꞌajtibeyob: C Yum, ¿baqui ora mi quejel i yujtyel jini? cheꞌob. Jesús tiꞌ jacꞌbeyob: Yaꞌ baꞌan bʌcꞌtyalʌl yaꞌi mi quejel i muchꞌquiñob i bʌ xtyaꞌjol. Cheꞌ tiꞌ chaꞌle lajoñel Jesús.