2 Cꞌʌlʌ ti tyejchibal an yicꞌot Dios.

3 Chaꞌan ti jini muꞌ bʌ i tsictisan bajcheꞌ an Dios ti mejli pejtyel chʌ bʌ an. Machꞌan chʌ bʌ yes tyac melel mach bʌ baꞌan ti mejli chaꞌan ti jini muꞌ bʌ i tsictisan bajcheꞌ an Dios.

4 An i cuxtyʌlel jini muꞌ bʌ i tsictisan bajcheꞌ an Dios chaꞌan mi yʌqꞌuen quixtyañujob i cuxtyʌlel jeꞌel. Jini juntiquil jiñʌch i sʌclel mulawil.

5 Ili i sʌclel mi yʌcꞌ i cꞌʌcꞌal ti icꞌjowan bʌ mulawil. Pero jini i yicꞌjowanlel mulawil mach chꞌujbi i yʌpeꞌ i sʌclel.

6 Dios tiꞌ choco tyʌlel juntiquil winic Juan bʌ i cꞌabaꞌ.

7 Ti tyʌli chaꞌan i yʌcꞌ ti cʌjñel i sʌclel mulawil chaꞌan miꞌ luꞌ chꞌujbiñob chaꞌan tiꞌ tꞌan tsaꞌ bʌ i yʌlʌ Juan.

8 Mach i sʌclelic mulawil jini Juan. Tsaꞌ jach chojqui tyʌlel chaꞌan i yʌcꞌ ti cʌjñel i sʌclel mulawil jini yajcʌbil bʌ i chaꞌan Dios.

9 Ti wiꞌil tyo ti tyʌli ti mulawil jini yajcʌbil bʌ i chaꞌan Dios. Jiñʌch i sʌclel mulawil tsaꞌ bʌ tyʌli chaꞌan miꞌ pʌsꞌen i sʌclel ti jujuntiquil quixtyañu.

10 Jini muꞌ bʌ i tsictisan bajcheꞌ an Dios, ti ajni wʌꞌ ti mulawil. Jini mulawil i melbalʌch. Pero jini añoꞌ bʌ ti mulawil machꞌan tiꞌ cʌñʌyob mi jin tiꞌ mele ili mulawil.

11 Ti tyʌli wʌꞌ tiꞌ lumal pero i piꞌʌlob mach yom i qꞌuelob.

12 Pero an yom bʌ i qꞌuelob. Tiꞌ chꞌujbiyob chaꞌan jiñʌch i Yalobil Dios. Ti pejtyelel muꞌ bʌ i chꞌujbin ti aqꞌuentiyob ti jujuntiquil i yajñel tiꞌ yalobilob Dios.

13 Jini tsaꞌ bʌ i chꞌujbiyob chaꞌan yajcʌbil i chaꞌan Dios jini tsaꞌ bʌ tyʌli, ti chaꞌ chꞌocʌyob yubil mach chaꞌanic ti i tyat i ñaꞌ mi chaꞌanic cheꞌ yom quixtyañu mi chaꞌanic cheꞌ tiꞌ wʌ ñaꞌtyʌ winicob pero ti chaꞌ chꞌocʌyob yubil chaꞌan cheꞌ yom Dios.

14 Jini muꞌ bʌ i tsictisan bajcheꞌ an Dios tiꞌ chꞌʌmʌ i bʌcꞌtyal. Ti poj ajni wʌꞌ ti mulawil wʌꞌ baꞌañon lojon. Butꞌul i pusicꞌal ti i yutslel. Ñoj melelʌch i tꞌan. Ti lojon quilʌ i ñuclel, i ñuclel cojach bʌ i Yalobil tyʌlem yaꞌ baꞌan i Tyat ti panchan.

15 Juan ti yʌcꞌʌ ti cʌjñel jini yajcʌbil bʌ i chaꞌan Dios. Ti yʌlʌ ti cꞌam bʌ subtꞌan: Jiñʌch jini tsaꞌ bʌ c tyaja tic tꞌan cheꞌ ñac ti cʌlʌ: Jini muꞌ bʌ i tyʌlel tic pat más an i ñuclel como an ti ñaxan cꞌʌlʌ ti tyejchibal mulawil, cheꞌen.

16 Ti lac pejtyelel muꞌ bʌ lac chꞌujbin ti aqꞌuentiyonla loqꞌuem bʌ ti ñuc bʌ i yutslel. Jiñʌch i yutslel muꞌ bʌ i bej más aqꞌueñonla.

17 Ti ñoj oniyix ti aqꞌuentiyob jini mandar i chaꞌan Dios ti Moisés. Ti aqꞌuentiyonla i yutslel yicꞌot jini ñoj melel bʌ i tꞌan Dios ti Jesucristo.

18 Machꞌan baꞌ bʌ ora an majch ti yilʌ Dios. Pero jin jach ti yilʌ cojach bʌ i Yalobil yaꞌ bʌ an yicꞌot i Tyat. Tsaꞌix i pʌsꞌeyonla bajcheꞌ an Dios.

19 Jini i piꞌʌlob israelob añoꞌ bʌ yeꞌtyel yaꞌ ti Jerusalén tiꞌ chocoyob majlel curajob i chaꞌañob yicꞌot levitajob muꞌ bʌ i cotyan curajob chaꞌan i cꞌajtiben Juan: ¿Majchetqui? cheꞌob.

20 Tiꞌ subu i bʌ ti wen tsiquil bʌ tꞌan. Machꞌan tiꞌ mucu Juan: Mach Cristojonic jini yajcʌbil bʌ, cheꞌen.

21 Cheꞌ jini, tiꞌ chaꞌ cꞌajtibe: ¿Majchetqui cheꞌ jini? ¿Jatyet ba Elíaset, jini tsaꞌ bʌ i xiqꞌui i yʌleꞌ Dios? cheꞌob. Juan tiꞌ subeyob: Mach joñonic, cheꞌen. Cheꞌ jini, tiꞌ chaꞌ cꞌajtibeyob: ¿Jatyet ba jini muꞌ bʌ quej i xiqꞌueꞌ i yʌleꞌ Dios? cheꞌob. Juan tiꞌ jacꞌʌ: Mach joñonic, cheꞌen.

22 Cheꞌ jini, tiꞌ subeyob: ¿Majchetqui, cheꞌ jini? Subu a bʌ chaꞌan mic chaꞌ suben tsaꞌ bʌ i xiqꞌuiyon lojon tyʌlel. ¿Chuqui yom mi lojon c subeñob? cheꞌob.

23 Juan tiꞌ jacꞌʌ: Joñon mucꞌon bʌ ti cꞌam bʌ subtꞌan ti tyʌquin bʌ joch lum: Pʌtbenla majlel tyoj bʌ i bijlel lac Yum, choꞌon. Cheꞌʌch mic subeñob cheꞌ bajcheꞌ tiꞌ tyajayon ti tꞌan tsaꞌ bʌ i xiqꞌui i yʌleꞌ Dios Isaías bʌ i cꞌabaꞌ ti ñoj oniyix. Cheꞌ ti yʌlʌ Juan.

24 Jini tsaꞌ bʌ i pejcʌyob Juan jiñʌch tsaꞌ chojqui majlel ti fariseojob.

25 Cheꞌ jini, tiꞌ cꞌajtibeyob: Mi mach Cristojetic jini yacʌbil bʌ i chaꞌan Dios mi Elíasetic mi jinic tsaꞌ bʌ i xiqꞌui i yʌleꞌ Dios, ¿chucoch maꞌ wʌcꞌ ti chꞌʌm jaꞌ quixtyañujob cheꞌ jini? cheꞌob.

26 Juan tiꞌ jacꞌʌ: Joñon mi cʌcꞌ chꞌʌm jaꞌ ti jaꞌ pero wʌꞌ baꞌ añonla an juntiquil mach bʌ baꞌan mi laꞌ cʌñeꞌ.

27 Tyal tyo tic pat más ñuc bʌ. Joñon mach saj jasʌl c ñuclel mi cubin chaꞌan mic ticben i chꞌajñal i zapatos. Cheꞌ ti yʌlʌ Juan.

28 Jiñʌch ti ujti yaꞌ ti lum Betábara bʌ i cꞌabaꞌ yaꞌ ti jumpatlel colem jaꞌ Jordán bʌ i cꞌabaꞌ. Jiñʌch jini jaꞌ baꞌ ti yʌcꞌʌ chꞌʌm jaꞌ Juan.

29 Ti yijcꞌʌlel Juan ti yilʌ Jesús cheꞌ chʌncol i lʌqꞌueꞌ tyʌlel. Juan tiꞌ tyaja ti tꞌan Jesús. Ti yʌlʌ: Qꞌuelela jiñʌch muꞌ bʌ i pejcʌntyel ti i Tiñʌmeꞌ Dios como mi quejel i ñusʌben i mul quixtyañujob, cheꞌen. [Como i tyʌlel mi tsʌnsʌntyel tiñʌmeꞌ yom bʌ yʌleꞌ oveja ti ñoj oniyix chaꞌan i ñusʌbentyelob i mul.]

30 Jiñʌch jini tsaꞌ bʌ c tyaja ti tꞌan cheꞌ ñac ti cʌlʌ: Tyal tyo tic pat más ñuc bʌ bajcheꞌ joñon como an cꞌʌlʌ ti tyejchibal mulawil, cheꞌen.

31 Ti ñaxan max tyo tij cʌñʌ pero ti tyʌliyon cʌcꞌ chꞌʌm jaꞌ chaꞌan mi cʌcꞌ ti cʌjñel tiꞌ tyojlel israelob, cheꞌen.

32 Juan ti yʌlʌ jeꞌel: Ti quilʌ ti jubi tyʌlel ti panchan Chꞌujul bʌ i Chꞌujlel Dios cheꞌ bajcheꞌ xꞌujcutsꞌuꞌ yilal. Ti cʌyle tiꞌ jol.

33 Max tyo tij cʌñʌ mi jiñʌch tsaꞌ bʌ i choco tyʌlel Dios. Pero Dios tsaꞌ bʌ i xiqꞌuiyon cʌcꞌ chꞌʌm jaꞌ tiꞌ subon: Cheꞌ maꞌ wilan yaꞌ jubel Chꞌujul bʌ i Chꞌujlel Dios, ti jini winic baꞌ mi cʌytyʌl tiꞌ jol jiñʌch muꞌ bʌ quejel i yʌqꞌueñetla laꞌ chꞌʌm Chꞌujul bʌ i Chꞌujlel Dios, cheꞌen. Cheꞌ ti yʌlʌ Juan.

34 Wale tsaꞌix quilʌ. Jin chaꞌan mic subeñetla tsaꞌ bʌ quilʌ chaꞌan jiñʌch i Yalobil Dios. Cheꞌ ti yʌlʌ Juan.

35 Ti yijcꞌʌlel chaꞌ yaꞌan Juan tiꞌ tiꞌ jaꞌ yicꞌot chaꞌtiquil ajcʌntꞌañob i chaꞌan.

36 Cheꞌ ñac ti yilʌ Juan chʌncol i ñumel Jesús, ti yʌlʌ: Qꞌuelela jiñʌch i Tiñʌmeꞌ Dios yubil, cheꞌen.

37 Chaꞌtiquil ajcʌntꞌañob i chaꞌan Juan ti yubi tsaꞌ bʌ i yʌlʌ Juan. Ti queji i tsʌclen majlel Jesús.

38 Cheꞌ jini, Jesús tiꞌ qꞌuele i pat. Tiꞌ sube jini chaꞌtiquil chʌncol bʌ i tsʌclen: ¿Chuqui chʌncol laꞌ sajcan? cheꞌen. Tiꞌ jacꞌʌyob: Maestro, ¿baqui chumulet? cheꞌob.

39 Jesús tiꞌ jacꞌʌ: Conla, qꞌuele, cheꞌen. Cheꞌ jini ti majliyob yicꞌot. Tiꞌ qꞌueleyob baqui chumul. Yaꞌ ti cʌyleyob yicꞌot Jesús chaꞌan ochix qꞌuin.

40 Juntiquil tsaꞌ bʌ i yubi i tꞌan Juan jiñʌch Andrés. Ti queji i tsʌclen Jesús. Jini Andrés i yijtsꞌin Simón Pedro.

41 Jini Andrés ñaxan ti majli i pʌy i yʌscun Simón bʌ i cꞌabaꞌ. Tiꞌ sube: Ti lojon c tyaja jini Mesías, cheꞌen. Mesías yom i yʌl ti lac tꞌan Cristo yajcʌbil bʌ i chaꞌan Dios.

42 Wiꞌil tyo Andrés tiꞌ pʌyʌ majlel Simón yaꞌ baꞌan Jesús. Cheꞌ ñac ti yilʌ Jesús tiꞌ sube: Jatyet Simón, i yalobilet Jonás. Pero mi quejel a pejcʌntyel ti Cefas, cheꞌen. Cefas yom i yʌl ti lac tꞌan Pedro.

43 Ti yijcꞌʌlel yom majlel Jesús yaꞌ ti pañimil Galilea bʌ i cꞌabaꞌ. Tiꞌ tyaja Felipe. Tiꞌ sube: Tsʌcleñon majlel, cheꞌen.

44 Loqꞌuem ti lum Betsaida bʌ i cꞌabaꞌ jini Felipe. Yaꞌ chumul jeꞌel jini Andrés yicꞌot Pedro.

45 Cheꞌ jini, Felipe ti majli i sajcan Natanael. Tiꞌ sube: Ti lojon quilʌ jini winic tsaꞌ bʌ i ñaꞌtyʌ Moisés cheꞌ tiꞌ wʌ tsꞌijbu jini mandar ti ñoj oniyix yicꞌot tsaꞌ bʌ i xiqꞌui i yʌleꞌ Dios. Jiñʌch jini Jesús i yalobil bʌ José chꞌoyol ti lum Nazaret bʌ i cꞌabaꞌ, cheꞌen.

46 Ti yʌlʌ Natanael: ¿Am ba chʌ bʌ wen chꞌoyol bʌ ti Nazaret? cheꞌen. Felipe tiꞌ jacꞌʌ: Laꞌ, qꞌuele, cheꞌen.

47 Cheꞌ ñac ti yilʌ Jesús chʌncol i lʌqꞌueꞌ tyʌlel jini Natanael tiꞌ tyaja ti tꞌan Natanael. Ti yʌlʌ: Qꞌuele awilan, wʌꞌ mi tyʌlel juntiquil yoque israel bʌ mach bʌ baꞌan miꞌ chaꞌlen lot. Cheꞌ ti subenti Natanael ti Jesús.

48 Cheꞌ jini, Natanael tiꞌ jacꞌbe: ¿Bajcheꞌqui ti a cʌñʌyon? cheꞌen. Jesús tiꞌ sube: Ti quilʌyet cheꞌ ñac max tyo i pʌyʌyet Felipe cheꞌ ñac yaꞌ tyo buchulet ti yeꞌ tyeꞌ higuera bʌ i cꞌabaꞌ, cheꞌen.

49 Cheꞌ jini, Natanael tiꞌ sube: Maestro, i yalobilet bʌ Dios. Ñuquet bʌ yumʌl i chaꞌan israelob, cheꞌen.

50 Jesús tiꞌ jacꞌʌ: ¿Muꞌ jach ba a chꞌujbiñon chaꞌan jach tic subeyet ti quilʌyet ti yeꞌ higuera bʌ tyeꞌ? Mi quejel a wilan más ñuc tyac bajcheꞌ iliyi, cheꞌen.

51 Jesús ti yʌlʌ jeꞌel: Melel mic subeñet: Mi quej laꞌ qꞌueleꞌ cheꞌ bajcheꞌ jamʌl jini panchan. Mi quej laꞌ qꞌueleꞌ ajtroñel i chaꞌan Dios chꞌoyol bʌ ti panchan mi letsel mi jubel tic tyojlel Joñon i Piꞌʌlon bʌ Quixtyañujob, cheꞌen.