2 Lajal tiꞌ tsꞌijbuyob bajcheꞌ ti cʌntisʌntiyonla ti jini tsaꞌ bʌ i yilʌyob tsaꞌ bʌ ujti cꞌʌlʌ ti tyejchibal yicꞌot tsaꞌ bʌ i yʌlʌyob ti i subtꞌan.

3 Ñaxan tic wen j cꞌajtibeyob pejtyelel bajcheꞌ ti ujti cꞌʌlʌ ti tyejchibal. Tic pensali weñʌch belecña mic tsꞌijbuben chʌ bʌ ti ujti

4 chaꞌan maꞌ wen ñaꞌtyan isujmʌch tsaꞌ bʌ i cʌntisʌyetyob.

5 Cheꞌ ñac chʌncol tyo i chaꞌlen yeꞌtyel ti yumʌl Herodes yaꞌ ti Judea an juntiquil cura i chaꞌan israelob Zacarías bʌ i cꞌabaꞌ. Jini Zacarías ti lajal bʌ ora tiꞌ chaꞌle troñel ti cura yicꞌot junmujchꞌ curajob muꞌ bʌ i pejcʌntyel ti Abías. I yijñam Zacarías i cꞌabaꞌ Elisabet. Jini Elisabet yaꞌ tyʌlem ti jiñʌjlelob cura jeꞌel i cꞌabaꞌ bʌ Aarón.

6 Tyoj añob tiꞌ qꞌuele Dios jini Zacarías yicꞌot Elisabet. Tiꞌ wen jacꞌʌyob i tyumbintyel yicꞌot i xicꞌol lac Yum. Mach chꞌujbi i yʌlob an i mul.

7 Pero maꞌañobix i yalobilob como i tyʌlelʌch maꞌan yalobil jini Elisabet yicꞌot jeꞌel lajal wen ñoxobix ti chaꞌticlelob.

8 Junyaj cheꞌ añʌch tiꞌ wenta jini junmujchꞌ curajob muꞌ bʌ i chaꞌlen troñel yicꞌot Zacarías,

9 ti cꞌoti yorojlel ti yajcʌnti Zacarías, cheꞌ bajcheꞌ i tyʌlel mi yajcʌntyelob chaꞌan ochic ti i templo lac Yum chaꞌan i puleꞌ pom.

10 Cheꞌ chʌncox i pulel pom yaꞌ tiꞌ templo pejteyelel quixtyañujob chʌncol ti oración yaꞌ tiꞌ pat templo.

11 Yaꞌi, ti tsictiyi yajtroñel i chaꞌan lac Yum chꞌoyol bʌ ti panchan ti tyojlel Zacarías. Yaꞌ waꞌal ti tsꞌejtyʌlel i yajñib baꞌ miꞌ pulob pom.

12 Cheꞌ ñac ti yilʌ jini ajtroñel i chaꞌan lac Yum chꞌoyol bʌ ti panchan machꞌan tiꞌ ñaꞌtyʌ Zacarías chʌ bʌ yom i chaꞌlen. Wen an i bʌqꞌuen.

13 Pero jini ajtronel i chaꞌan Dios chꞌoyol bʌ ti panchan ti yʌlʌ: Zacarías mach yom a chaꞌlen bʌqꞌuen. Como Dios tsaꞌix i yubibet a woración. Mi quejel i chꞌoc an yalobil a wijñam Elisabet. Mi quejel a wotsʌben i cꞌabaꞌ Juan.

14 Wen cꞌajacña a woj mi quejel a wubin. Cabʌl tijicñayob mi quejel i yubiñob cheꞌ mi chꞌoc an a walobil.

15 Como mi quejel i qꞌuejel ti ñuc tiꞌ wut Dios. Maꞌix mi quejel i japeꞌ vino melel ti tsꞌujsub mi lembalic. Mi quejel i bujtꞌel i pusicꞌal ti Chꞌujul bʌ i Chꞌujlel Dios cheꞌ max tyo chꞌoca.

16 Chaꞌan ti i troñel jini a walobil mi quejel i sutquin i bʌ cabʌl israelob chaꞌan i tꞌun majlel lac Yum Dios.

17 Jini Juan mi quejel i ñaxan ñumel ti subtꞌan. Ti wiꞌil mi quejel ti troñel lac Yum. An i chꞌejlel yicꞌot i pꞌʌtyʌlel ti subtꞌan Juan cheꞌ bajcheꞌ i chaꞌan Elías chaꞌan mi yʌcꞌ i yajñelob ti junchajb i pensalob tyatyʌlob yicꞌot yalobilob. Jini ñun tꞌañoꞌ bʌ mi quejel i ñaꞌtyañob i jacꞌben tꞌan. Cheꞌ jini miꞌ chajpʌbeñob i pusicꞌal quixtyañujob chaꞌan i chꞌujbiñob lac Yum. Cheꞌ ti yʌlʌ.

18 Zacarías tiꞌ cꞌajtibe jini ajtroñel i chaꞌan Dios chꞌoyol bʌ ti panchan: ¿Bajcheꞌqui chꞌujbi c ñaꞌtyan mi yoque melel jini tsaꞌ bʌ a subon? Jin cheꞌ ñoxonix. Xñejepꞌix quijñam jeꞌel, cheꞌen.

19 Jini ajtroñel i chaꞌan Dios chꞌoyol bʌ ti panchan tiꞌ jacꞌʌ: Joñon Gabrielon. Mic chaꞌliben i troñel Dios yaꞌ tiꞌ tyojlel. Ti chojquiyon tyʌlel chaꞌan c subeñet wen bʌ tꞌan.

20 Pero chaꞌan machꞌan ti a chꞌujbi tsaꞌ bʌ c subet mi quejel a waꞌ sujtyel ti xꞌumaꞌ. Maꞌix mi quejel a chaꞌlen tꞌan cꞌʌlʌl jintyo miꞌ chꞌoc an aloꞌ bʌ a walobil. Jiñʌch mi quejel i tsꞌʌctiyel cheꞌ ti yorojlel. Cheꞌ ti yʌlʌ.

21 Cheꞌ chʌncol tyo i pejcʌntyel Zacarías ti ajtroñel i chaꞌan Dios chꞌoyol bʌ ti panchan jini quixtyañujob yaꞌ waꞌalob ti pat templo chʌncol i pijtyañob Zacarías chaꞌan mi loqꞌuel tyʌlel. Tyoj bʌcꞌñʌjelob ti yubiyob chaꞌan chʌncol i wen jalijel Zacarías yaꞌ ti mal templo.

22 Cheꞌ ñac ti loqꞌui tyʌlel Zacarías yaꞌ ti templo mach chꞌujbi i chaꞌlen tꞌan. Cheꞌ jini ti queji i ñaꞌtyañob jini quixtyañujob an chʌ bʌ ti yilʌ Zacarías cheꞌ bajcheꞌ tiꞌ ñajal yaꞌ ti mal templo. Chaꞌan maꞌan ti loqꞌui i tꞌan tiꞌ pʌsꞌeyob i cꞌʌb chaꞌan cheꞌ bajcheꞌ tiꞌ cꞌʌb jach tiꞌ chaꞌle tꞌan.

23 Cheꞌ ñac ti tsꞌʌctiyi jini qꞌuin tyac cheꞌ tiꞌ chaꞌle cheꞌ bajcheꞌ i tyʌlel miꞌ chaꞌleñob troñel ti cura yaꞌ ti templo, Zacarías ti chaꞌ sujti ti yotytot.

24 Cheꞌ jini, Elisabet ti queji i cʌñʌtyan i yalobil. Machꞌan ti loqꞌui ti yotyot jopꞌej uw. Tiꞌ ñaꞌtyʌ Elisabet:

25 Wale tsaꞌix i yʌcꞌon calobil lac Yum chaꞌan maꞌix miꞌ bej qꞌuelon ti maꞌix i cꞌʌjnibal bʌ xꞌixic quixtyañujob. Chʌꞌʌch tiꞌ ñaꞌtyʌ Elisabet.

26 Ti wʌcpꞌejlel bʌ uw Dios tiꞌ choco majlel yaꞌ ti lum Nazaret bʌ i cꞌabaꞌ ti Galilea bʌ pañimil juntiquil ajtronel i chaꞌan chꞌoyol bʌ ti panchan Gabriel bʌ i cꞌabaꞌ.

27 Ti cꞌoti Gabriel yaꞌi chaꞌan i suben juntiquil yoque xcꞌalʌl tyo bʌ María bʌ i cꞌabaꞌ. Jini xcꞌalʌl cꞌajtibilix i chaꞌan juntiquil winic José bʌ i cꞌabaꞌ. Jini José tyʌlem ti i jiñʌjlel juntiquil ñuc bʌ yumʌl David bʌ i cꞌabaꞌ.

28 Jini ajtroñel i chaꞌan Dios chꞌoyol bʌ ti panchan ti ochi yaꞌ baꞌan María. Tiꞌ sube: Mi cʌqꞌueñet saludos. An i yutslel Dios a wicꞌot. Lac Yum wʌchꞌan a wicꞌot. Más mi yʌqꞌueñet Dios i yutslel i tꞌan bajcheꞌ pejtyelel yambʌ xꞌixicob, cheꞌen.

29 Pero cheꞌ ñac María ti yilʌ jini ajtroñel i chaꞌan Dios chꞌoyol bʌ ti panchan tsijcꞌ cheꞌ i pusicꞌal. Tiꞌ bajnel pensali tiꞌ pusicꞌal chʌ bʌ yes i sujmlel tsaꞌ bʌ subenti cheꞌ ñac ti yubibe i tꞌan.

30 Cheꞌ jini, ajtroñel i chaꞌan Dios chꞌoyol bʌ ti panchan tiꞌ sube: María, mach yom a chaꞌlen bʌqꞌuen. Weñʌch miꞌ qꞌuelet Dios.

31 Wale mi quejel a cʌñʌtyan a walobil. Mi quejel i chꞌoc an aloꞌ bʌ a walobil. Mi quejel a wotsʌben i cꞌabaꞌ Jesús.

32 Mi quejel i yajñel ti ñuc. Mi quejel i pejcʌntyel ti Yalobil Dios machꞌʌ baꞌan i pꞌisol i ñuclel. Dios lac Yum mi quejel i yotsan ti yumʌl cheꞌ bajcheꞌ i yum David ti ñoj oniyix.

33 Pejtyel loqꞌuemoꞌ bʌ tiꞌ tyojlel Israel mi quejel i yumiñob ti beleꞌ ora. Maꞌix baꞌ bʌ ora mi quejel i lajmel i chaꞌlen yumʌl. Cheꞌ ti yʌlʌ jini ajtroñel i chaꞌan Dios chꞌoyol bʌ ti panchan.

34 Cheꞌ jini María tiꞌ cꞌajtibe jini ajtroñel i chaꞌan Dios chꞌoyol bʌ ti panchan: ¿Bajcheꞌqui chꞌujbi i yujtyel bajcheꞌ chʌncol a waleꞌ? Como max tyo baꞌan tyaja c chaꞌan winic. Cheꞌ ti yʌlʌ María.

35 Jini ajtroñel i chaꞌan Dios chꞌoyol bʌ ti panchan tiꞌ jacꞌʌ: Jini Chꞌujul bʌ i Chꞌujlel Dios mi quejel i tyʌlel baꞌanet. Mi quejel i moset ti i pꞌʌtyʌlel Dios machꞌʌ baꞌan i pꞌisol i ñuclel. Jin chaꞌan jini alob muꞌ bʌ quejel i chꞌoc an i chaꞌañʌch Dios. Mi quejel i yʌlob tiꞌ Yalobil Dios.

36 Cheꞌ jeꞌel, Elisabet bʌ a piꞌʌl aunque ñejepꞌix pero chʌncox i cʌñʌtyan aloꞌ bʌ i yalobil jeꞌel. Anix wʌcpꞌej uw chʌncol i cʌñʌtyan i yalobil tsaꞌ bʌ pejcʌnti ti i tyʌlelʌch maꞌan yalobil bʌ xꞌixic.

37 Dios machꞌan machꞌʌ baꞌan chꞌujbi i meleꞌ. Luꞌ chꞌujbiyʌch i meleꞌ. Cheꞌ ti yʌlʌ jini ajtroñel i chaꞌan Dios chꞌoyol bʌ ti panchan.

38 Cheꞌ jini María ti yʌlʌ: Lʌchꞌañoni ajtroñelon i chaꞌan lac Yum. Laꞌ i melbeñon bajcheꞌ ti a subon, cheꞌen. Cheꞌ jini ti loqꞌui majlel yaꞌ baꞌan María jini ajtroñel i chaꞌan Dios chꞌoyol bʌ ti panchan.

39 Cheꞌ tsaꞌix ñumi chaꞌpꞌej uxpꞌej qꞌuin, ti ora jach ti majli María ti jumpꞌej lum yaꞌ ti wits ti Judea bʌ pañimil i cꞌabaꞌ.

40 Ti ochi María tiꞌ yotyot Zacarías. Ti yʌqꞌue saludo Elisabet.

41 Cheꞌ ñac Elisabet ti yubi i saludo María, tiꞌ nijcʌ i bʌ yalobil Elisabet max tyo baꞌan chꞌocʌjem.

42 Ti bujtꞌi ti Chꞌujul bʌ i Chꞌujlel Dios i pusicꞌal Elisabet. Cheꞌ jini, chaꞌan cꞌajacña yoj ti cꞌam bʌ tꞌan ti queji ti tꞌan Elisabet. Ti yʌlʌ: Dios ti más aqꞌueyet i yutslel i tꞌan bajcheꞌ pejtyelel yañoꞌ bʌ xꞌixicob. Tsaꞌix i más yʌqꞌue i yutslel i tꞌan jini alʌl chʌncol bʌ a cʌñʌtyan.

43 Añʌch c ñuclel yubil chaꞌan tyʌlic i ñaꞌ c Yum i julaꞌ añon.

44 Ora jach tiꞌ nijcʌ i bʌ jini alʌl max tyo bʌ chꞌoca cheꞌ ñac ti cubi a saludo.

45 Ñoj cꞌajacña a woj maꞌ wubin chaꞌan chʌncol a chꞌujbin i tꞌan lac Yum. Como mi quejel i tsꞌʌctiyel bajcheꞌ ti yʌlʌ lac Yum. Cheꞌ ti yʌlʌ Elisabet ti subenti María.

46 Cheꞌ jini María ti yʌlʌ:

56 Yaꞌ ti cʌyle María yicꞌot Elisabet cheꞌ bajcheꞌ uxpꞌej uw. Cheꞌ jini, ti chaꞌ sujti ti yotyot María.

57 Ti cꞌoti yorojlel chaꞌan mi chꞌoc an i yalobil Elisabet. Ti chꞌocʌ aloꞌ bʌ yalobil.

58 I piꞌʌlob ti chumtyʌl Elisabet yicꞌot i piꞌʌlob ti cꞌotiyob i suben chaꞌan tijicña mi yubin jeꞌel cheꞌ ñac ti yubiyob chaꞌan Dios tiꞌ pꞌuntyʌ Elisabet chaꞌan ti yʌqꞌue ti chꞌoc an i yalobil.

59 Cheꞌ ocho días i chꞌoc an i yalobil, ti cꞌotiyob i tsepben i pʌchʌlel jini alʌl cheꞌ bajcheꞌ i tyʌlel miꞌ chaꞌleñob israelob. I piꞌʌlob yom i yotsʌbeñob i cꞌabaꞌ Zacarías jini alʌl cheꞌ bajcheꞌ i cꞌabaꞌ i tyat.

60 Pero i ñaꞌ tiꞌ jacꞌʌ: Mach yom i yochel i cꞌabaꞌ ti Zacarías pero wersa yom mi yochel i cꞌabaꞌ ti Juan, cheꞌen.

61 I piꞌʌlob tiꞌ jacꞌʌyob: ¿Chucoch jini? Maꞌan a piꞌʌlob jim bʌ i cꞌabaꞌ, cheꞌob.

62 Cheꞌ jini tiꞌ pejcʌyob tiꞌ cꞌʌb i wentyʌlel. Tiꞌ pʌsʌyob tiꞌ cꞌʌb i tyat bajcheꞌ yom i yotsʌben i cꞌabaꞌ.

63 I tyat alʌl tiꞌ cꞌajti jun chaꞌan i tsꞌijbuben i jacꞌbal. Tiꞌ tsꞌijbu: Jiñʌch Juan i cꞌabaꞌ, cheꞌ tiꞌ tsꞌijbu. Luꞌ tyoj bʌcꞌñʌjelob ti yubiyob.

64 Ti mismo jini jach bʌ ora ti chaꞌ queji ti tꞌan Zacarías. Ti queji i subeꞌ i ñuclel Dios.

65 Cheꞌ jini pejtyelel i piꞌʌlob ti chumtyʌl tyoj bʌcꞌñʌjelob ti yubiyob. Ti pejtyelel pañimil yaꞌ ti wits tyac ti Judea ti ajli chʌ bʌ ti ujti.

66 Pejtyelel tsaꞌ bʌ i yubiyob tiꞌ pensaliyob. Tiꞌ cꞌajtibeyob i bʌ i piꞌʌlob: ¿Chuqui mi quejel i chaꞌlen jini alob cheꞌ ñuquix? cheꞌob. Como melelʌch Dios tiꞌ tsictisʌbeyob an i yutslel Dios yicꞌot jini alʌl.

67 Butꞌul i pusicꞌal ti Chꞌujul bʌ i Chꞌujlel Dios jini Zacarías i tyat alʌl. Ti queji i yʌleꞌ tꞌan tsaꞌ bʌ aqꞌuenti ti Dios. Ti yʌlʌ:

76 Zacarías ti bej alʌ:

78 Zacarías ti bej alʌ:

80 Ti bej coli majlel jini Juan. Tiꞌ xucꞌchoco i pusicꞌal ti lac Yum. Cheꞌ jini ti ajni ti tyʌquin bʌ joch lum cꞌʌlʌ jintyo ti queji i chaꞌliben i troñel lac Yum yaꞌ baꞌan israelob.