2 Jini tsaꞌ bʌ i xiqꞌui i yʌleꞌ Dios, Isaías bʌ i cꞌabaꞌ tiꞌ wʌ tsꞌujbu:

4 Cheꞌ jini, chʌꞌʌch ti queji ti troñel Juan yaꞌ ti tyʌquin bʌ joch lum bajcheꞌ ti wʌ ajli. Yaꞌ ti queji i subeñob chaꞌan yom i qꞌuextyan i pensal i cʌy i mul yicꞌot i chꞌʌmeꞌ jaꞌ chaꞌan mi ñusʌbentyelob i mul.

5 Ti luꞌ tyʌliyob baꞌan Juan chꞌoyoloꞌ bʌ ti pañimil Judea bʌ i cꞌabaꞌ yicꞌot ti lum Jerusalén bʌ i cꞌabaꞌ chaꞌan i ñʌchꞌtyʌbeñob i tꞌan. Cheꞌ ñac tiꞌ subuyob i mul, Juan ti yʌqꞌueyob chꞌʌm jaꞌ yaꞌ ti colem jaꞌ Jordán bʌ i cꞌabaꞌ.

6 I pislel Juan melel tiꞌ tsutsel camello yicꞌot pʌchij bʌ i cinturón. Muꞌ bʌ i cꞌuxeꞌ cheꞌ bʌ bajcheꞌ colem xtyopiꞌ yilal yicꞌot yaꞌlel chab.

7 Tiꞌ subu tꞌan. Ti yʌlʌ: Tyal tyo tic pat juntiquil más pꞌʌtyʌl bʌ bajcheꞌon. Mach saj jasʌl c ñuclel mi cubin chaꞌan mic wutstyʌl c ticꞌben i chꞌajñel i zapatos.

8 Joñon mi cʌqꞌuetla ti chꞌʌm jaꞌ. Tyal tyo muꞌ bʌ i yʌqꞌueñetla laꞌ chꞌʌm Chꞌujul bʌ i Chꞌujlel Dios. Cheꞌ ti yʌlʌ Juan.

9 Ti jim bʌ ora ti tyʌli Jesús yaꞌ bʌ loqꞌuem tyʌlel ti lum Nazaret bʌ i cꞌabaꞌ yaꞌ ti Galilea. Tiꞌ chꞌʌmʌ jaꞌ Jesús tiꞌ cꞌʌb Juan yaꞌ ti Jordán jaꞌ.

10 Cheꞌ ti loqꞌui ti jaꞌ ti yilʌ Jesús ti jajmi yaꞌ ti panchan. Ti jubi tyʌlei ti Jesús cheꞌ bajcheꞌ juncojt xꞌujcutsuꞌ yilal. Jiñʌch jini Chꞌujul bʌ i Chꞌujlel Dios.

11 Ti ubinti tꞌan loqꞌuem bʌ ti panchan tsaꞌ bʌ yʌlʌ: Calobiletyʌch. Mic pꞌuntyañet. Cꞌajacña coj chaꞌan ti jatyet. Cheꞌ ti subenti Jesús.

12 Jini Chꞌujul bʌ i Chꞌujlel Dios tiꞌ waꞌ pʌyʌ majlel Jesús ti tyʌquin bʌ joch lum.

13 I bajñel yaꞌan Jesús yicꞌot matyeꞌlel animal. Cuarenta quin ti jale yaꞌi. Satanás tiꞌ jopꞌo i yʌsan ti mulil. Ajtroñelob i chaꞌan Dios chꞌoyoloꞌ bʌ ti panchan ti tyʌli i cotyan Jesús.

14 Cheꞌ tsaꞌix cʌjchi Juan ti chaꞌ majli Jesús yaꞌ ti Galilea. Chʌncol i subeꞌ ñumel wen bʌ tꞌan chaꞌan i yumintyel Dios.

15 Ti yʌlʌ: Tsaꞌix tsꞌʌctiyi i yorojlel. Lʌcꞌʌlix i yorojlel mi quejel i yumintyel Dios. Qꞌuextyan laꞌ pensal, cʌyʌ laꞌ mul. Chꞌujbinla jini wen bʌ tꞌan chaꞌan laꞌ cotyʌntyel, cheꞌen.

16 Cheꞌ ñac chʌncol ti xʌmbal majlel Jesús yaꞌ ti tiꞌ colem joyol bʌ jaꞌ Galilea bʌ i cꞌabaꞌ ti yilʌ Simón yicꞌot i yijtsꞌin Andrés. Chʌncol i chocoyob ochel i chimol chʌy yaꞌ ti colem jaꞌ como ajchuc chʌyob.

17 Jesús tiꞌ subeyob: Laꞌ, tsʌcleñon majlel. Cheꞌ bajcheꞌ ti laꞌ sajcʌ chʌy mi quej cʌqꞌueñetla laꞌ sajcan quixtyañujob chaꞌan mi quej i chꞌujbiñob c tꞌan. Cheꞌ ti yʌlʌ Jesús.

18 Tiꞌ waꞌ cʌyʌyob i chimol chʌy Simón yicꞌot Andrés. Tiꞌ tsʌcleyob majlel Jesús.

19 Tsaꞌ tyo i tsꞌityaꞌ chaꞌle xʌmbal majlel. Ti queji i yilan Jacobo i yalobil Zebedeo yicꞌot yijtsꞌin Juan bʌ i cꞌabaꞌ. Chʌncol i lʌwob i chimol chʌy yaꞌ ti mal barco.

20 Cheꞌ jini, tiꞌ pʌyʌyob. Tiꞌ cʌyʌyob i tyat Zebedeo bʌ i cꞌabaꞌ yicꞌot i barco yicꞌot i yaj toñelob. Tiꞌ tsʌcleyob majlel Jesús.

21 Ti majliyob ti lum Capernaum bʌ i cꞌabaꞌ. Ti i qꞌuinilel cꞌaj oj Jesús tiꞌ chaꞌle cʌntisa ti i templo israelob.

22 Tyoj bʌcꞌñʌjel ti yilʌyob quixtyañujob bajcheꞌ tiꞌ chaꞌle cʌntisʌ Jesús como tsiquil añʌch i pꞌʌtyʌlel i tꞌan. Mach chʌꞌic mucꞌ ti cʌntisʌ bajcheꞌ ajcʌntisajob chaꞌan i mandar israelob.

23 Yaꞌan juntiquil winic tiꞌ templo israelob tyʌcꞌlʌbil bʌ ti xiba. Ti oñel ti yʌlʌ:

24 ¿Chucoch maꞌ tyʌlel wʌꞌ baꞌañon lojon, Jesús chꞌoyolet bʌ ti Nazaret? ¿Tsaꞌ ba tyʌliyet a jisañon lojon? Much j cʌñet majchetqui. Cujil isujm jatyet jini chꞌujulet bʌ i chaꞌan Dios. Cheꞌ ti yʌlʌ jini xiba.

25 Jesús tiꞌ tiqꞌui jini xiba. Ti yʌlʌ: Lajmen ti tꞌan. Loqꞌuenix wʌꞌ ti ili winic, cheꞌen.

26 Jini xiba ti yʌcꞌʌ ti jitsꞌcuyel jini winic. Tiꞌ chaꞌle cꞌam bʌ oñel. Cheꞌ jini ti loqꞌui xiba tiꞌ pusicꞌal.

27 Tyoj bʌcꞌñʌjelob ti yilʌ quixtyañujob. Ti queji i cꞌajtibeñob i bʌ: ¿Chuquiyes ti tꞌan iliyi? ¿Chuqui ti tsijiꞌ bʌ cʌntisa? cheꞌob. An I pꞌʌtyʌlei i tꞌan jini winic, como jinic tyo miꞌ xiqꞌueꞌ xibajob. Mux i jacꞌben i tꞌan jeꞌel, cheꞌob.

28 Ti waꞌ pujqui i tꞌʌñʌlel i cʌntisʌ Jesús tiꞌ pettyʌlel Galilea.

29 Cheꞌ ti loqꞌui Jesús tiꞌ templo israelob ti majli ti yotyot Simón yicꞌot Andrés tyʌpꞌʌl yicꞌot Jacobo yicꞌot Juan.

30 Yaꞌan i nijꞌañaꞌ Simón. Wen mucꞌ ti cꞌajc. Tyotsꞌol ti wʌyib. Tiꞌ waꞌ subeyob Jesús chaꞌan cꞌam.

31 Cheꞌ jini, Jesús ti majli i chucben i cꞌʌb chaꞌan i tyejcheꞌ. Tsaꞌix waꞌ lajmi ti cꞌajc. Ti queji i weꞌsañob.

32 Cheꞌ ti pꞌʌjqui qꞌuin, acꞌbʌlelix quejel ti queji i pʌyob majlel yaꞌ baꞌan Jesús pejtyel cꞌamoꞌ tyac bʌ yicꞌot tyʌcꞌlʌbiloꞌ bʌ ti xiba.

33 Pejtyel quixtyañu tiꞌ muchꞌquiyob i bʌ yaꞌ ti tiꞌ otyot.

34 Tiꞌ lajmisʌ cabʌl cꞌamoꞌ bʌ an leco tyac bʌ i cꞌamꞌan. Tiꞌ choco loqꞌuel cabʌl xibajob. Pero machꞌan ti yʌcꞌʌyob ti tꞌan como tsaꞌix i cʌñʌyob majchqui Jesús.

35 Cheꞌ jal tyo mach sʌcꞌa ti tyejchi Jesús. Ti bajñel loqꞌui majlel ti lum chaꞌan miꞌ chaꞌlen oración.

36 Simón yicꞌot i piꞌʌlob ti majli i sʌclañob.

37 Yaꞌ tiꞌ tyajayob. Tiꞌ subeyob: Pejtyel miꞌ pijtyañetyob, cheꞌob.

38 Pero Jesús tiꞌ subeyob: Conla ti yambʌ lum, yaꞌ ti lʌcꞌʌl tyac chaꞌan mic chaꞌlen subtꞌan jeꞌel. Jin chaꞌan ti tyʌliyon, cheꞌ ti yʌlʌ Jesús.

39 Ti ñumi ti subtꞌan tiꞌ templo tyac israelob yaꞌ tiꞌ pettyʌlel Galilea. Tiꞌ choco loqꞌuel cabʌl xibajob.

40 Tiꞌ lʌcꞌʌ Jesús juntiquil am bʌ chʌ bʌ yes pasem tiꞌ pʌchʌlel muꞌ bʌ i pʌcꞌmisʌben majlel i bʌcꞌtyal. Ti ñocle ti yebal yoc Jesús chaꞌan miꞌ cꞌajtiben. Tiꞌ sube: Mi a wom chꞌujbiyʌch a lajmisañon, cheꞌ ti subenti Jesús.

41 Jesús tiꞌ pꞌuntyʌ chaꞌan yom i cotyan. Tiꞌ tyʌlʌ. Ti yʌlʌ: Comʌch. La lajmiquet, cheꞌ yʌlol jini winic.

42 Saj ora ti lajmi. Wenix ti cʌyle.

43 Jesús tiꞌ sube chaꞌan majlic jini winic.

44 Tiꞌ wen sube: Qꞌuele maꞌ majch maꞌ saj suben. Cucu, pʌsꞌen a bʌ cura. Yaꞌi maꞌ wʌqꞌuen i majtyan Dios cheꞌ bajcheꞌ ti yʌlʌ Moisés ti mandar chaꞌan mi yilañob tsʌꞌʌch lajmiyet. Cheꞌ jini, miꞌ tsictiyel ti wutyob chaꞌan tsaꞌix lajmiyet, cheꞌ ti yʌlʌ Jesús.

45 Pero jini winic ti majli. Ti queji i yʌleꞌ ñumel tsaꞌ bʌ ujti. Jin chaꞌan maꞌix ti mejli ti ochel Jesús yaꞌ ti lum tyac cheꞌ miꞌ qꞌuelob. Ti ajni yaꞌ baꞌ machꞌan quixtyañu. Ti tyʌliyob baꞌan Jesús tyʌlemoꞌ bʌ ti pejtyel yambʌ lum tyac.