JINI WEN BɅ TꞌAN TSAꞌ BɅ I TSꞌIJBU MATEO
I cꞌabaꞌob i yumob Jesucristo tsaꞌ bʌ ñumiyob ti ñoj oniyix
1
Jiñʌch i cꞌabaꞌob i yumob ti ñoj oniyix jini Jesucristo. Jesucristo i jiñʌjlel David. David i jiñʌjlel Abraham. 2 Abraham jiñʌch i tyat Isaac. Isaac i tyat Jacob. Jacob i tyat Judá yicꞌot i yermañujob Judá.
3 Judá jiñʌch i tyat Fares yicꞌot Zara. I ñaꞌob ili chaꞌtiquil jiñʌch Tamar. Fares i tyat Esrom. Esrom jiñʌch i tyat Aram.
4 Aram jiñʌch i tyat Aminadab. Aminadab i tyat Naasón. Naasón i tyat Salmón.
5 Salmón i tyat Booz. I ñaꞌ Booz jiñʌch Rahab. Booz i tyat Obed. I ñaꞌ Obed jiñʌch Rut. Obed jiñʌch i tyat Isaí.
6 Isaí jiñʌch i tyat jini ñuc bʌ yumʌl David bʌ i cꞌabaꞌ. Jini ñuc bʌ yumʌl David jiñʌch i tyat Salomón. I ñaꞌ Salomón jiñʌch i mebaꞌ ꞌixic Urías tsaꞌ bʌ pʌjyi chaꞌan i yijñam David.
7 Salomón jiñʌch i tyat Roboam. Roboam i tyat Abías. Abías i tyat Asa.
8 Asa jiñʌch i tyat Josafat. Josafat i tyat Joram. Joram i tyat Uzías.
9 Uzías jiñʌch i tyat Jotam. Jotam i tyat Acaz. Acaz i tyat Ezequías.
10 Ezequías jiñʌch i tyat Manasés. Manasés i tyat Amón. Amón i tyat Josías.
11 Josías jiñʌch i tyat Jeconías yicꞌot i yermañujob Jeconías. Jiñʌch cheꞌ ti yorojlel cheꞌ ñac tiꞌ wersa pʌyʌyob majlel ti cʌchol pejtyelel israelob yaꞌ ti colem pañimil Babilonia bʌ i cꞌabaꞌ.
12 Cheꞌ ñac yaꞌix añob yaꞌ ti Babilonia ti chꞌocʌ i yalobil Jeconías. Salatiel bʌ i cꞌabaꞌ i yalobil Jeconías. Salatiel jiñʌch i tyat Zorobabel.
13 Zorobabel jiñʌch i tyat Abiud. Abiud i tyat Eliaquim. Eliaquim i tyat Azor.
14 Azor jiñʌch i tyat Sadoc. Sadoc i tyat Aquim. Aquim i tyat Eliud.
15 Eliud jiñʌch i tyat Eleazar. Eleazar i tyat Matán. Matán i tyat Jacob.
16 Jacob jiñʌch i tyat José. José jiñʌch i ñoxiꞌal María. María jiñʌch i ñaꞌ Jesús muꞌ bʌ i pejcʌntyel ti Cristo, jini tsaꞌ bʌ yajcʌnti ti Dios chaꞌan i yumin quixtyañujob.
17 Cheꞌ jini, cꞌʌlʌ cheꞌ ñac bʌ an Abraham cꞌʌlʌ cheꞌ ñac bʌ an David añob catorcejlel i yumob ti ñoj oniyix, cꞌʌlʌ cheꞌ ñac bʌ an David cꞌʌlʌ ti yorojlel cheꞌ ñac ti pʌjyiyob majlel ti cʌchol israelob ti pañimil Babilonia añob catorcejlel i yumob ti ñoj oniyix, cꞌʌlʌ ti pʌjyiyob majlel ti Babilonia cꞌʌlʌ ti chꞌocʌ Cristo añob catorcejlel i yumob ti ñoj oniyix.
Ti chꞌocʌ Jesucristo
18 Jiñʌch bajcheꞌ ti ujti cheꞌ ñac ti chꞌocʌ Jesucristo. Cꞌajtibilix i chaꞌan José jini María i ñaꞌ Jesús. Cheꞌ max tyo tiꞌ tyajayob i bʌ cʌñʌtyʌbilix i yalobil María, jiñʌch i chaꞌan Chꞌujul bʌ i Chꞌujlel Dios.
19 Ñoj tyoj i pusicꞌal José i ñoxiꞌal María. Mach yom i yʌcꞌ ti quisiñil. Jin chaꞌan ti queji i ñaꞌtyan mux quejel i chaꞌ bajñel mucul cʌyeꞌ.
20 Cheꞌ ñac chʌncol tyo i bajñel ñaꞌtyan jini, ti ñajal José ti yilʌ juntiquil ajtroñel i chaꞌan lac Yum chꞌoyol bʌ ti panchan. Tiꞌ sube: José, i jiñʌjlelet bʌ David, mach yom a bʌcꞌñan a pʌyeꞌ María chaꞌan a wijñam como jini cʌñʌtyʌbil bʌ i chaꞌan jiñʌch i chaꞌan Chꞌujul bʌ i Chꞌujlel Dios.
21 Mi quejel i chꞌoc an aloꞌ bʌ i yalobil. Mi quejel a wotsʌben i cꞌabaꞌ JESÚS, como jini mi quejel i locꞌsʌbeñob i mul i chaꞌañoꞌ bʌ. Cheꞌ ti subenti José ti jini ajtroñel i chaꞌan lac Yum chꞌoyol bʌ ti panchan.
22 Pejtyel iliyi ti luꞌ ujti chaꞌan mi tsꞌʌctiyel tsaꞌ bʌ i wʌ alʌ lac Yum cheꞌ ñac tiꞌ cꞌʌñʌ i tiꞌ juntiquil tsaꞌ bʌ i xiqꞌui yʌleꞌ Dios ti ñoj oniyix. Ti yʌlʌ:
23 Juntiquil yoque xcꞌalʌl tyo bʌ mi quejel i cʌñʌtyan i yalobil. Mi quejel i chꞌoc an aloꞌ bʌ i yalobil.
Mi quejel i yotsʌbeñob i cꞌabaꞌ Emanuel.
Cheꞌ ti yʌlʌ jini tsaꞌ bʌ i xiqꞌui yʌleꞌ Dios. I sujmlel jini Emanuel yom i yʌleꞌ ti lac tꞌan: Dios la quicꞌot. Chʌꞌʌch an i sujmlel.
24 Cheꞌ ñac ti pꞌixi José, tiꞌ chaꞌle bajcheꞌ ti subenti ti ajtroñel i chaꞌan lac Yum chꞌoyol bʌ ti panchan. Tiꞌ pʌyʌ María chaꞌan i yijñam.
25 Pero tsaꞌ jax tyo i cʌñʌtyʌ María jintyo ti chꞌocʌ jini ñaxan bʌ i yalobil. Tiꞌ yotsʌbe i cꞌabaꞌ JESÚS.