Winicob añoꞌ bʌ cabʌl i ñaꞌtyʌbal
2
Cheꞌ ñac ti chꞌocʌ Jesús ti Belén yaꞌ ti pañimil Judea bʌ i cꞌabaꞌ, cheꞌ ñac ti yorojlel an i yeꞌtyel ti ñuc bʌ yumʌl jini Herodes, ti tyʌliyob ti Jerusalén winicob muꞌ bʌ i wen ñaꞌtyañob i sujmlel tyac chaꞌan miꞌ qꞌuelob ecꞌ tyac. Yaꞌ chꞌoyolob ti pasoꞌ qꞌuin.2 Chʌncol i yʌlob: ¿Baqui an jini muꞌ bʌ quejel i chaꞌlen ñuc bʌ yumʌl i chaꞌan bʌ israelob tsaꞌ bʌ chꞌocʌ? Ti lojon quilʌ yaꞌ ti pasoꞌ qꞌuin jumpꞌej ecꞌ muꞌ bʌ i tsictisan. Ti tyʌliyon lojon chaꞌan lojon c chꞌujutisan. Cheꞌ ti yʌlʌyob.
3 Cheꞌ ñac ti yubi ili tꞌan Herodes ti wen queji ti pensal yicꞌot ti pejtyelelob añoꞌ bʌ ti Jerusalén jeꞌel.
4 Tiꞌ xiqꞌuiyob tyʌlel ti pejtyelel jini ñuc bʌ curajob yicꞌot ajcʌntisajob chaꞌan i mandar israelob. Tiꞌ cꞌajtibeyob baqui mi quejel i chꞌoc an jini Cristo, tsaꞌ bʌ yajcʌnti ti Dios chaꞌan i yumin quixtyañujob.
5 Jiñob tiꞌ subeyob: Yaꞌ ti Belén, yaꞌ ti pañimil Judea bʌ i cꞌabaꞌ. Como jini tsaꞌ bʌ i xiqꞌui yʌleꞌ Dios ti ñoj oniyix tiꞌ tyaja ti tꞌan Belén cheꞌ ñac ti yʌlʌ:
6 Más ñuc mi quejel i qꞌuejlel Belén yaꞌ ti pañimil Judá bʌ i cꞌabaꞌ cheꞌ bajcheꞌ baꞌical bʌ yambʌ lum,
como yaꞌ ti Belén mi quejel i loqꞌuel juntiquil ñuc bʌ yumʌl.
Jini mi quejel i cʌñʌtyʌbeñoñob israelob jini c chaꞌañoꞌ bʌ.
Cheꞌ ti yʌlʌ Dios tiꞌ tiꞌ jini tsaꞌ bʌ i xiqꞌui yʌleꞌ ti ñoj oniyix.
7 Cheꞌ jini, Herodes tiꞌ mucu pʌyʌyob tyʌlel jini muꞌ bʌ i wen ñaꞌtyañob i sujmlel tyac chaꞌan miꞌ qꞌuelob ecꞌ tyac. Tiꞌ wen cꞌajtibeyob baqui bʌ mero ora ti ñaxan tsictiyi jini ecꞌ.
8 Cheꞌ ñac jini Herodes tiꞌ ñaꞌtyʌ isujm, tiꞌ xiqꞌuiyob majlel yaꞌ ti Belén. Tiꞌ subeyob: Cucula. Sajcan jini alʌl. Cheꞌ tsaꞌix laꞌ tyaja, yom mi laꞌ subeñon chaꞌan mic majlel c chꞌujutisan jeꞌel. Cheꞌ ti lolon alʌ Herodes.
9 Cheꞌ ñac ti yubiyob i tꞌan jini ñuc bʌ yumʌl, ti majliyob. Jini ecꞌ tsaꞌ bʌ yilʌyob yaꞌ ti pasoꞌ qꞌuin tiꞌ pʌsbeyob majlel bij cꞌʌlʌ ti cꞌoti tiꞌ chañelel yaꞌ baꞌan jini alʌl. Yaꞌ tiꞌ cʌyʌ i xʌmbal jini ecꞌ.
10 Cheꞌ ñac ti yilʌyob baꞌ ti pʌsꞌentiyob ti ecꞌ, wen cꞌajacñayob i yoj ti yubiyob jini chꞌoyolob bʌ ti pasoꞌ qꞌuin.
11 Cheꞌ ñac ti ochiyob yaꞌ ti mal otyot yaꞌ tiꞌ tyajayob jini alʌl yicꞌot María i ñaꞌ. Ti ñocleyob ti lum. Tiꞌ chꞌujutisʌyob alʌl. Tiꞌ jamʌyob i caja tyac. Ti yʌqꞌueyob i majtyan tyac, oro, yicꞌot pom yicꞌot yowocña bʌ pimel i wentyʌlel perfume mirra bʌ i cꞌabaꞌ.
12 Cheꞌ jini, tiꞌ ñajleyob chaꞌan mach yom mi chaꞌ sujtyelob yaꞌ baꞌan Herodes. Ti chaꞌ sujtiyob majlel tiꞌ lumal ti yambʌ bij.
Ti putsꞌiyob majlel ti Egipto
13 Cheꞌ ñac majlemobix jini winicob muꞌ bʌ i wen ñaꞌtyañob i sujmlel tyac chaꞌan miꞌ qꞌuelob ecꞌ tyac, ti ñajal jini José tiꞌ qꞌuele juntiquil ajtroñel i chaꞌan lac Yum chꞌoyol bʌ ti panchan. Jini tiꞌ sube José: Tyejchen. Pʌyʌx majlel jini alʌl yicꞌot i ñaꞌ. Pʌyʌ majlel ti putsꞌel cꞌʌlʌ ti Egipto. Cʌylen yaꞌyaꞌi jintyo mic chaꞌ subeñet. Como Herodes mi quejel i sʌclan jini alʌl chaꞌan i tsʌnsan. Cheꞌ ti subenti José.
14 Cheꞌ jini, ti tyejchi José. Ti acꞌbʌlel tiꞌ pʌyʌ majlel jini alʌl yicꞌot i ñaꞌ. Yaꞌ ti majliyob ti Egipto.
15 Yaꞌ ti poj chumleyob jintyo ti sajti Herodes. Pejtyel iliyi ti luꞌ ujti chaꞌan mi tsꞌʌctiyel tsaꞌ bʌ i yʌlʌ lac Yum cheꞌ ñac tiꞌ cꞌʌñʌ i tiꞌ juntiquil tsaꞌ bʌ i xiqꞌui yʌleꞌ Dios ti ñoj oniyix. Ti yʌlʌ: Yaꞌ ti Egipto tic pʌyʌ loqꞌuel calobil. Cheꞌ ti yʌlʌ.
Herodes ti yʌcꞌʌ ti sajtyel alobob
16 Jini Herodes tiꞌ wen michꞌʌ cheꞌ ñac tiꞌ ñaꞌtyʌ chaꞌan mach chaꞌ tyalob jini tsaꞌ bʌ subenti i wen sʌclan jini alʌl. Tiꞌ ñaꞌtyʌ chaꞌan ti lotinti. Cheꞌ jini ti yʌcꞌʌ mandar chaꞌan yaꞌ ti Belén yicꞌot ti pejtyelel ajchumtyʌl tyac ti joytyʌlel miꞌ tsʌnsañob ti pejtyelelob jini saj alob am bʌ chaꞌpꞌej i jabilel yicꞌot más i saj tyac. Tiꞌ pensali jaypꞌej i jabilel Jesús chaꞌan bajcheꞌ ti yʌlʌyob jini winicob muꞌ bʌ i wen ñaꞌtyan i sujmlel tyac chaꞌan miꞌ qꞌuelob ecꞌ tyac cheꞌ ñac tiꞌ ñaxan subeyob Herodes.
17 Chʌꞌʌch ti tsꞌʌctiyi ñoj cabʌl i chꞌʌjyemlel quixtyañu cheꞌ bajcheꞌ tiꞌ wʌ tsꞌijbu juntiquil tsaꞌ bʌ i xiqꞌui yʌleꞌ Dios ti ñoj oniyix, Jeremías bʌ i cꞌabaꞌ.
18 Jini ti yʌlʌ:
Yaꞌ ti Ramá ti ubinti cꞌam bʌ uqꞌuel,
cabʌl uqꞌuel yicꞌot woꞌocña bʌ uqꞌuel;
chʌncox i yucꞌtyañob i yalobilob jini israeloꞌ bʌ xꞌixicob.
Maꞌan majch chꞌujbi i lajmisʌben i chꞌʌjyemlel, como sajtyemobix i yalobilob.
Cheꞌ tiꞌ wʌ tsꞌijbu jini tsaꞌ bʌ i xiqꞌui yʌleꞌ Dios.
19 Pero cheꞌ ñac sajtyemix Herodes, juntiquil ajtroñel i chaꞌan lac Yum chꞌoyol bʌ ti panchan tiꞌ pejcʌ José ti ñajal yaꞌ baꞌ chumul yaꞌ ti Egipto. Tiꞌ sube:
20 Tyejchen. Pʌyʌ majlel jini alʌl yicꞌot i ñaꞌ. Chaꞌ cucux yaꞌ ti i lumal Israel. Como tsaꞌix sajtiyob jini tsaꞌ bʌ i jopꞌoyob i tsʌnsan jini alʌl. Cheꞌ ti subenti José.
21 Ti pꞌixi José. Tiꞌ pʌyʌ majlel jini alʌl yicꞌot i ñaꞌ cheꞌ bajcheꞌ ti subenti. Ti cꞌotiyob yaꞌ ti i lumal Israel.
22 Pero José ti yubi tꞌan chaꞌan chʌncox ti yumʌl jini Arquelao yaꞌ ti pañimil Judea, como jini tiꞌ chꞌʌmbe i yeꞌtyel i tyat. Herodes i tyat jini Arquelao. Jin chaꞌan tiꞌ bʌcꞌñʌ majlel José yaꞌi. Tiꞌ chaꞌle yambʌ ñajal José. Ti subenti ti ñajal chaꞌan mi majlel yaꞌ ti Galilea bʌ i cꞌabaꞌ bʌ pañimil.
23 Cheꞌ ñac ti cꞌotiyob yaꞌ ti Galilea ti majliyob ti chumtyʌl ti jumpꞌej saj lum Nazaret bʌ i cꞌabaꞌ. Pejtyel iliyi ti luꞌ ujti chaꞌan mi tsꞌʌctiyel tsaꞌ bʌ i wʌ alʌyob jini tsaꞌ bʌ i xiqꞌui yʌleꞌ Dios ti ñoj oniyix, como ti yʌlʌyob chaꞌan mi quejel i pejcʌntyel Jesús ti nazareno.