Juan tsaꞌ bʌ yʌcꞌʌ chꞌʌm jaꞌ miꞌ chaꞌlen subtꞌan
3
Ti jim bʌ ora cheꞌ ñac yaꞌ tyo an ti Nazaret Jesús, jini Juan tsaꞌ bʌ i yʌcꞌʌ chꞌʌm jaꞌ ti cꞌoti ti subtꞌan yaꞌ ti tyʌquin bʌ joch lum yaꞌ ti Judea bʌ pañimil. 2 Ti yʌlʌ: Qꞌuextyan laꞌ pensal, cʌyʌx laꞌ mul como lʌcꞌʌlix i tyʌlel jini tsaꞌ bʌ chojqui tyʌlel ti Dios, jini muꞌ bʌ i chaꞌlen yumʌl yaꞌ ti panchan. Cheꞌ ti yʌlʌ Juan.
3 Jini Juan, jiñʌch tsaꞌ bʌ i tyaja ti tꞌan tsaꞌ bʌ i xiqꞌui yʌleꞌ Dios ti ñoj oniyix, Isaías bʌ i cꞌabaꞌ. Tiꞌ tsꞌijbu:
Ti ubinti i tꞌan juntiquil muꞌ bʌ ti cꞌam bʌ tꞌan yaꞌ ti tyʌquin bʌ joch lum. Mi yʌl:
Tyoj isʌbenla majlel i bijlel lac Yum.
Pʌtbenla majlel tyoj bʌ i bijlel.
Cheꞌ ti yʌlʌ Dios. Cheꞌ tsꞌijbubil i chaꞌan Isaías.
4 Jini Juan melel i pislel ti i tsutsel bʌ camello yicꞌot pʌchij bʌ i cinturón. Miꞌ cꞌuxeꞌ cheꞌ bʌ bajcheꞌ colem xtyopiꞌ yilal yicꞌot yaꞌlel chab.
5 Cabʌl ti cꞌotiyob baꞌan Juan chaꞌan mi yubiñob tꞌan. Ti cꞌotiyob tyʌlemoꞌ bʌ ti Jerusalén yicꞌot ti pejtyelel añoꞌ bʌ ti pañimil Judea bʌ i cꞌabaꞌ yicꞌot ti cꞌotiyob tyʌlemoꞌ bʌ ti ajchumtyʌl tyac yaꞌ lʌcꞌʌl jini colem jaꞌ Jordán bʌ i cꞌabaꞌ.
6 Cheꞌ ñac tiꞌ subuyob i mul, Juan ti yʌcꞌʌyob ti chꞌʌm jaꞌ yaꞌ ti Jordán.
7 Pero cheꞌ ñac jini Juan ti yilʌ chaꞌan chʌncol i tyʌlelob cabʌl fariseojob yicꞌot saduceojob chaꞌan mi yʌqꞌuentyelob chꞌʌm jaꞌ tiꞌ subeyob: Jatyetla lajaletla bajcheꞌ lucum tyac yom bʌ i putsꞌtyan cꞌajc. ¿Majchqui tiꞌ subeyetla chaꞌan mi laꞌ putsꞌtyan jini ñoj tsʌts bʌ xotꞌmulil mach bʌ jal mi quejel i tsictiyel?
8 Ajñenla ti wen chaꞌan mi tsictiyel tsaꞌix laꞌ qꞌuextyʌ laꞌ pensal, tsaꞌix laꞌ cʌyʌ laꞌ mul.
9 Mach yom laꞌ lolon ñaꞌtyan chaꞌan machꞌan chʌ bʌ mi mejlel i tyumbeñetla. Joñonla i jiñʌjlelonla Abraham, cheꞌetla. Mach yom mi laꞌ bajñel loꞌlon laꞌ bʌ. Como mic subeñetla Dios chꞌujbi i pʌntisan ti jiñʌjlel Abraham jini tyun tyac mi yom. Cheꞌ ti yʌlʌ Juan.
10 Jatyetla cheꞌ bajcheꞌ tyeꞌ tyac machꞌʌ baꞌan mi yʌcꞌ i wut. Pero wale i yorojlelix mi sejqꞌuel i wiꞌ tyeꞌ tyac ti hacha. Mi machꞌan ti yʌcꞌʌ wen bʌ i wut jini tyeꞌ mi quejel i luꞌ sejqꞌuel jubel. Mi quejel i pulel ti cꞌajc.
11 Melel, joñon mi cʌqꞌuen chꞌʌm jaꞌ ti jaꞌ chaꞌan i señʌjlel tiꞌ qꞌuextyʌ i pensal tiꞌ cʌyʌ i mul quixtyañu. Pero más pꞌʌtyʌl bajcheꞌon jini muꞌ tyo bʌ quejel i tyʌlel. Jini mi quejel i yʌqꞌueñetla laꞌ chꞌʌm Chꞌujul bʌ i Chꞌujlel Dios yicꞌot cꞌajc yubil. Maꞌix ñucon chaꞌan mi jinic mi cotsan c bʌ ti ajtroñel jach bʌ i chaꞌan yubil chaꞌan mic locꞌsʌben i zapatos, cheꞌen.
12 Añʌch i wejlʌjib chaꞌan i wejlan loqꞌuel i sujl trigo. Mi quejel i muchꞌquin jini trigo ti i yotyotlel chaꞌan miꞌ cʌñʌtyan, pero mi quejel i puleꞌ i sujl ti cꞌajc machꞌʌ yujil yajpel. Cheꞌ ti yʌlʌ Juan. Chʌꞌʌch tiꞌ chaꞌle lajoñel Juan chaꞌan i sujl trigo.
Tiꞌ chꞌʌmʌ jaꞌ Jesús
13 Cheꞌ jini ti loqꞌui Jesús ti Galilea. Ti cꞌoti yaꞌ baꞌan Juan yaꞌ ti Jordán bʌ jaꞌ chaꞌan miꞌ chꞌʌmeꞌ jaꞌ Jesús.
14 Pero Juan tiꞌ jopꞌo i tiqꞌueꞌ Jesús. Tiꞌ sube: Jini yom bʌ, jiñʌch chaꞌan jatyet maꞌ wʌqꞌueñon chꞌʌm jaꞌ. ¿Chucoch maꞌ tyʌlel baꞌañon chaꞌan maꞌ chꞌʌmeꞌ jaꞌ? Cheꞌ ti yʌlʌ Juan.
15 Jesús tiꞌ jacꞌʌ: Pero wale, yom maꞌ wʌqꞌueñon chꞌʌm jaꞌ. Como chʌꞌʌch yom chaꞌan mi lac chaꞌlen pejtyelel bajcheꞌ miꞌ xicꞌonla Dios, cheꞌen. Cheꞌ jini Juan tiꞌ jacꞌʌ i yʌqꞌuen chꞌʌm jaꞌ Jesús.
16 Cheꞌ ñac ti ujti i chꞌʌmeꞌ jaꞌ, Jesús ti loqꞌui ti jaꞌ. Cheꞌ jini, ti waꞌ jajmi yaꞌ ti panchan. Jesús ti yilʌ Chꞌujul bʌ i Chꞌujlel Dios chʌncox i jubel tyʌlel ti chañelel i jol. Cheꞌ yilal bajcheꞌ xꞌujcutsuꞌ.
17 Cheꞌ jini ti yubiyob ajtꞌan yaꞌ bʌ loqꞌuem ti panchan. Ti yʌlʌ: Jiñʌch calobil pꞌuntyʌbil bʌ c chaꞌan. Tijicñayon chaꞌan bajcheꞌ miꞌ chaꞌlen. Cheꞌ ti yʌlʌ jini ajtꞌan.