SALMOS
Jiñʌch cꞌay tyac tsaꞌ bʌ i cꞌʌyiyob israelob
An i chaꞌan israelob jumpꞌej jun am bʌ ciento y cincuenta Salmo muꞌ bʌ i cꞌʌyiñob. Jini yumʌl David tiꞌ tsꞌijbu cabʌl jini Salmo. Yañoꞌ bʌ tiꞌ tsꞌijbuyob jeꞌel. An tyo tsaꞌ bʌ i tsꞌijbunti cheꞌ ñac jini añoꞌ bʌ ti Judá ti chaꞌ sujtiyob tyʌlel tiꞌ lumal loqꞌuem ti Babilonia baꞌ buchul yumʌl ti Caldea baꞌ ti pʌjyiyob majlel ti oniyix. An Salmo tyac tsaꞌ bʌ tsꞌijbunti chaꞌan i subeñob Dios wocox i yʌlʌ, chaꞌan i subeñob i ñuclel Dios, yambʌ chaꞌan i cꞌajtisan ñuc tyac bʌ tsaꞌ bʌ i chaꞌle Dios tiꞌ tyojlel israelob, yambʌ ti tsꞌijbunti cheꞌ bajcheꞌ oración chaꞌan i cꞌajtisʌbeñob Dios i cotyañob. Wʌꞌ ti ochi veintiseis chaꞌan mi laj qꞌueleꞌ.
Jini tyoj bʌ yicꞌot simaroñoꞌ bʌ
1
Tijicña jini quixtyañu machꞌʌ baꞌan miꞌ chaꞌlen xʌmbal yicꞌot simaroñoꞌ bʌ chaꞌan miꞌ jacꞌbeñob i tꞌan, Jini machꞌʌ baꞌan mi waꞌtyʌl tiꞌ bijlel xmulilob,
Jini machꞌʌ baꞌan mi buchtyʌl yicꞌot xwajleyajob.
2 Ili quixtyañu miꞌ tyaj i tijicñʌyel tiꞌ mandar lac Yum.
Miꞌ bej ñaꞌtyan chʌ bʌ yom lac Yum ti qꞌuiñil yicꞌot ti acꞌbʌlel.
3 Lajalʌch jini quixtyañu bajcheꞌ tyeꞌ pʌcꞌʌl bʌ ti tiꞌ cuxul bʌ paꞌ muꞌ bʌ i yʌcꞌ i wut cheꞌ ti yorojlel.
I yopol jini tyeꞌ mach yujil pꞌajtyel.
Pejtyel chʌ bʌ miꞌ mel jini quixtyañu weñʌch mi yujtyel.
4 Mach cheꞌic jini simaron bʌ quixtyañu.
Lajalobʌch bajcheꞌ i sujl trigo muꞌ bʌ i wejlan majlel icꞌ.
5 Jin chaꞌan machꞌan mi quej i qꞌuejlelob ti tyoj tiꞌ yorojlel melojel. Jini xmulilob machꞌan mi quej i yochelob yaꞌ baꞌ miꞌ muchꞌquiñob i bʌ jini tyojoꞌ bʌ.
6 Como lac Yum miꞌ cʌñʌtyan jini tyojoꞌ bʌ tiꞌ bijlel.
Pero i bijlel jini simaroñoꞌ bʌ mi yʌcꞌob ti jilel.