2 Jini ñaxan bʌ tsic quixtyañu ti ujti cheꞌ ñac yumʌl jini Cirenio yaꞌ ti Siria bʌ pañimil.

3 Ti pejtyelel quixtañu an chaꞌan luꞌ majlicob ti yoque i lumal bʌ chaꞌan mi yotsañob i cꞌabaꞌ ti jun.

4 Jin chaꞌan ti loqꞌui majlel José yaꞌ ti lum Nazaret bʌ i cꞌabaꞌ yaꞌ ti Galilea bʌ pañimil chaꞌan mi majlel ti lum Belén bʌ i cꞌabaꞌ yaꞌ ti Juda bʌ pañimil baꞌ ti chꞌocʌ David ti ñoj oniyix. Como José i jiñʌjlel David.

5 José ti majli i yotsan i cꞌabaꞌ yicꞌot María tsaꞌix bʌ i cꞌajti. Chʌncol i cʌñʌtyan yalobil jini María.

6 Cheꞌ jini cheꞌ yaꞌ añob ti Belén, ti cꞌoti yorojlel chaꞌan mi quej i chꞌoc an yalobil.

7 Ti chꞌocʌ ñaxan bʌ yalobil i chaꞌan María. Alob. Tiꞌ bʌcꞌʌ ti bʌjqꞌuil. Ti tyotsꞌ choco ti buqꞌuijib alʌqꞌuil. Como machꞌan baꞌ tiꞌ tyajayob baꞌ mi yochelob ti wʌyel.

8 Yaꞌ ti jumpꞌej jamilol lʌcꞌʌl yaꞌ ti Belén an ajcʌñʌtya tiñʌmeꞌ. Miꞌ cʌñʌtyan i tiñʌmeꞌ ti acꞌbʌlel. [Tiñʌmeꞌ yom i yʌleꞌ oveja.]

9 Ti ora jach ti cꞌoti juntiquil ajtoñel i chaꞌan Dios chꞌoyol bʌ ti panchan yaꞌ baꞌañob. Sʌcjaman ti sutyʌlel yaꞌ baꞌañob chaꞌan tiꞌ ñuclel lac Yum. Tiꞌ wen bʌcꞌñʌyob jini ajcʌñʌtya tiñʌmeꞌ.

10 Pero jini ajtoñel i chaꞌan Dios chꞌoyol bʌ ti panchan tiꞌ subeyob: Mach yom mi laꞌ chaꞌlen bʌqꞌuen. Como mic chꞌʌmbeñetla tyʌlel wen bʌ tꞌan muꞌ bʌ i yʌqꞌuen cꞌajacña bʌ i yoj pejtyelel quixtyañujob.

11 Como sajmʌl ti chꞌocʌ chaꞌañetla yaꞌ ti lumal i chaꞌan bʌ David Ajcotyaya laꞌ chaꞌan. Jiñʌch CRISTO lac Yum.

12 Jiñʌch i tsictisʌntyel chaꞌan mi quej laꞌ cʌñeꞌ. Mi quej laꞌ cꞌotyel laꞌ tyaj jini chꞌoc alʌl bʌcꞌʌl ti bʌjqꞌuil. Tyotsꞌol ti buqꞌuijib alʌqꞌuil. Cheꞌ ti yʌlʌ ajtoñel i chaꞌan Dios chꞌoyol bʌ ti panchan.

13 Cheꞌ jini, ti saj ora jach ti tsictiyi baꞌan ajtoñel i chaꞌan Dios cabʌl yambʌ ajtoñelob i chaꞌan Dios chꞌoyol bʌ ti panchan tsaꞌ bʌ i subeyob i wenlel Dios.

14 Ti yʌlʌyob:

15 Ti chaꞌ sujtiyob majlel ti panchan jini ajtoñelob i chaꞌan Dios. Cheꞌ jini, jini ajcʌñʌtya tiñʌmeꞌ ti queji i subeñob i bʌ: Coxla. Laꞌ lac majlel ti Belén chaꞌan la quilan chʌ bʌ ti ujti yicꞌot chʌ bʌ tiꞌ subeyonla lac Yum. Cheꞌ ti yʌlʌyob.

16 Ora jach ti waꞌ majliyob. Ti cꞌoti i tyajob María yicꞌot José yicꞌot chꞌoc alʌl tyotsꞌol bʌ ti buqꞌuijib alʌqꞌuil.

17 Cheꞌ ñac ti yilʌyob jini chꞌoc alʌl ti queji i subeñob yañoꞌ bʌ jeꞌel chʌ bʌ yes ti subentiyob ti jini ajtoñel i chaꞌan Dios chꞌoyol bʌ ti panchan.

18 Tyoj bʌcꞌñʌjel ti yubiyob ti pejtyelel tsaꞌ bʌ i yubibeyob i tꞌan jini ajcʌñʌtya tiñʌmeꞌ.

19 Pero María tiꞌ bajñel ñaꞌtyʌ tiꞌ pusicꞌal pejtyelel jini tsaꞌ bʌ ujti. Tiꞌ bej pensali i sujmlel tiꞌ pusicꞌal.

20 Ti chaꞌ sujtiyob jini ajcʌñʌtya tiñʌmeꞌ. Tiꞌ bej subeyob ti pejtyelelob chaꞌan ñucʌch Dios chaꞌan jini tsaꞌ bʌ subentiyob yicꞌot tsaꞌ bʌ i yilʌyob. Como chʌꞌʌch ti ujti bajcheꞌ ti subentiyob ti ajtoñel i chaꞌan Dios chꞌoyol bʌ ti panchan.

21 Cheꞌ tsaꞌix tsꞌʌctiyi ocho o waxʌc qꞌuin i chaꞌan Jesús tiꞌ tsepeyob i pʌchʌlel cheꞌ bajcheꞌ i tyʌlel miꞌ chaꞌleñob israelob. Ti yotsʌbeyob i cꞌabaꞌ Jesús. Jiñʌch i cꞌabaꞌ tsaꞌ bʌ wʌ subenti María ti ajtoñel i chaꞌan Dios chꞌoyol bʌ ti panchan cheꞌ max tyo baꞌan tiꞌ cʌñʌtyʌ yalobil.

22 Cheꞌ ñac ti tsꞌʌctiyi i yorojlel chaꞌan miꞌ wen cʌñʌtyan i bʌ María cheꞌ bajcheꞌ ti xijqꞌuiyob ti Moisés ti ñoj oniyix, tiꞌ pʌyʌyob majlel yaꞌ ti templo jini alʌl yaꞌ ti lum Jerusalén bʌ i cꞌabaꞌ chaꞌan mi yʌqꞌuen Dios.

23 Chʌꞌʌch tiꞌ chaꞌleyob chaꞌan tsꞌijbubil tiꞌ tꞌan lac Yum ti ñoj oniyix baꞌ mi yʌleꞌ: Pejtyelel yʌx alʌl bʌ alob muꞌ bʌ i chꞌoc an i chaꞌañʌch lac Yum. Chʌꞌʌch tsꞌijbubil.

24 Ti majli yaꞌ ti templo chaꞌan i yʌqꞌueñob lac Yum Dios tsʌnsʌbil bʌ i majtyan cheꞌ bajcheꞌ i tyʌlel tiꞌ chaꞌleyob cheꞌ bajcheꞌ mi yʌleꞌ ti mandar i chaꞌan lac Yum ti ñoj oniyix. Mi yʌl: Aqꞌuen Dios chaꞌcojt xmucuy o mi chaꞌcojt xꞌujcutsuꞌ, cheꞌ yom mi yʌqꞌuentyel lac Yum. Cheꞌ tsꞌijbubil ti mandar lac Yum ti ñoj oniyix.

25 Ti jim bʌ ora yaꞌ chumul ti Jerusalén juntiquil winic Simeón bʌ i cꞌabaꞌ. Uts i pusicꞌal. Tiꞌ beleꞌ chꞌujutisʌ Dios. Tiꞌ bej pijtyʌ chaꞌan i tyajeꞌ i librejlel i piꞌʌlob jini israeloꞌ bʌ. An Chꞌujul bʌ i Chꞌujlel Dios tiꞌ pusicꞌal Simeón.

26 Ti subenti Simeón ti Chꞌujul bʌ i Chꞌujlel Dios machꞌan mi quej i sajtyel jintyo baꞌ bʌ ora tsaꞌix i yilʌ Cristo jini yajcʌbil bʌ muꞌ bʌ quej i choqueꞌ tyʌlel lac Yum.

27 Jini winic ti majli ti jini ñuc bʌ i templo israelob. Jini Chꞌujul bʌ i Chꞌujlel Dios tiꞌ nijcʌbe i pusicꞌal i majlel. Cheꞌ ñac ti cꞌoti i ñaꞌ i tyat alʌl Jesús ti cꞌotiyob ti templo chaꞌan i meleꞌ bajcheꞌ xiqꞌuilob chaꞌan jini oniyix bʌ mandar.

28 Simeón tiꞌ meqꞌue jini alʌl. Tiꞌ subu i ñuclel Dios. Ti yʌlʌ:

33 Tyoj bʌcꞌñʌjelob ti yubiyob José yicꞌot María i ñaꞌ Jesús cheꞌ ti yubiyob jini tsaꞌ bʌ i yʌlʌ Simeón chaꞌan jini muꞌ tyo bʌ quejel i chaꞌlen jini chꞌoc alʌl.

34 Cheꞌ jini Simeón tiꞌ subeyob chaꞌan tijicña mi quej yajñelob. Pero tiꞌ sube jini María i ñaꞌ bʌ Jesús: Qꞌuele awilan cabʌl israeloꞌ bʌ mi quej i yajlel yubil chaꞌan ti caj maꞌan miꞌ yʌcꞌ ti ñuc ili alʌl. Yicꞌot cabʌl mi quejel i waꞌchocontyel cheꞌ miꞌ yʌcꞌob ti ñuc. Cabʌlob machꞌʌ baꞌan mi quej i yʌcꞌob ti ñuc mi quej i chaꞌleñob tꞌan tiꞌ contra jini muꞌ bʌ quejel i pʌseꞌ a walobil.

35 Cheꞌ jini, ti caj i melbal mi quejel i tsictiyel chʌ bʌ miꞌ bajñel pensaliñob tiꞌ pusicꞌal ti jujuntiquil. Ñoj chꞌʌjyem mi quej a wubin ti a pusicꞌal pejtyelel i contrajintyel. Cꞌux mi quej a wubin ti a pusicꞌal. Cheꞌ ti subenti María ti Simeón.

36 Yaꞌan jeꞌel juntiquil xꞌixic muꞌ bʌ yʌleꞌ chʌ bʌ mi xiqꞌueꞌ yʌleꞌ Dios i cꞌabaꞌ Ana. I yalobil Fanuel loqꞌuem ti junmujchꞌ quixtyañujob i jiñʌjlel Aser. Wen ñejepꞌix. Tiꞌ tyaja i ñoxiꞌal cheꞌ ñac wen xcꞌalʌl tyo. Cheꞌ anix siete jabil i tyajbal i ñoxiꞌal ti sajti i ñoxiꞌal.

37 Pero cꞌʌlʌl mebaꞌix ochenta y cuatro jabil. Machꞌan tiꞌ cʌyʌ templo. Tiꞌ bej chaꞌlibe i toñel lac Yum ti chꞌajb yicꞌot ti oración ti qꞌuinil ti acꞌbʌlel. Tiꞌ poj cʌyʌ tyac weꞌel uchꞌel.

38 Ti jini jach bʌ ora ti ochi Ana yaꞌ baꞌañob. Ñaxan tiꞌ sube Dios wocox i yʌlʌ. Cheꞌ jini ti queji i suben ti pejtyelel jini muꞌ bʌ i pijtyañob chaꞌan miꞌ tyajob i librejlel añoꞌ bʌ ti Jerusalén chaꞌan jini alʌl Jesús.

39 Jini José yicꞌot María ti luꞌ ujti i chaꞌleñob bajcheꞌ mi xijqꞌuelob ti mandar i chaꞌan lac Yum tsaꞌ bʌ i tsꞌijbu Moisés ti ñoj oniyix. Cheꞌ jini ti chaꞌ sujtiyob yaꞌ ti lumal Nazaret bʌ i cꞌabaꞌ yaꞌ ti Galilea bʌ pañimil.

40 Jini alob Jesús ti bej coli majlel. Ti más pꞌʌtyʌliyi majlel. Ti más ocʌ i ñaꞌtyʌbal. Wen an i yutslel Dios yicꞌot.

41 I tyat i ñaꞌ Jesús ti jajabil ti majliyob ti Jerusalén chaꞌan i qꞌuiñejel pascua bʌ i cꞌabaꞌ.

42 Cheꞌ ñac añʌch doce jabil i chaꞌan Jesús, ti luꞌ majliyob ti Jerusalén cheꞌ bajcheꞌ i tyʌlel miꞌ bej chaꞌleñob. Ti majli Jesús yicꞌotyob jeꞌel.

43 Ti chaꞌ luꞌ sujtiyob yañoꞌ bʌ cheꞌ ñac ti ujti qꞌuin pero Jesús ti bajñel cʌyle ti Jerusalén. Machꞌan tiꞌ ñaꞌtyʌ i ñaꞌ yicꞌot José mi ti cʌyle.

44 Tiꞌ lolon ñaꞌtyʌyob lajal chʌncol i sujtyel Jesús jeꞌel yicꞌot i piꞌʌlob ti xʌmbal. Jumpꞌej qꞌuin tiꞌ chaꞌleyob xʌmbal. Cheꞌ jini ti queji i wen sʌclan Jesús yaꞌ baꞌan i piꞌʌloꞌ bʌ yicꞌot cʌñʌloꞌ bʌ i chaꞌan.

45 Machꞌanix tiꞌ tyajayob. Cheꞌ jini ti chaꞌ sujtiyob majlel cꞌʌlʌl ti Jerusalén chaꞌan i sʌclan Jesús yaꞌyaꞌi.

46 Cheꞌ ñac ñumenix uxpꞌej qꞌuin tiꞌ chaꞌ tyajayob Jesús yaꞌ ti templo. Yaꞌ buchul baꞌan ajcʌntisajob tsaꞌ bʌ i cʌntisʌyob jini mandar tsaꞌ bʌ i sube Moisés. Jesús tiꞌ ñʌchꞌtyʌ. Tiꞌ cꞌajtibeyob tyac jeꞌel.

47 Tyoj bʌcꞌñʌjel ti yubiyob ti pejtyelelob tsaꞌ bʌ i yubibeyob i tꞌan Jesús chaꞌan bajcheꞌ tiꞌ jacꞌbeyob yicꞌot chaꞌan wen yujil.

48 Tsijcꞌ cheꞌob i pusicꞌal cheꞌ ñac ti yilʌyob Jesús i ñaꞌ i tyat. I ñaꞌ tiꞌ sube: Calobil, ¿chucoch ti a chaꞌle cheꞌ bajcheꞌ jini? A tyat quicꞌot ti lojon c wen chaꞌle pensal cheꞌ chʌncol lojon c sʌclañet. Cheꞌ ti yʌlʌ María.

49 Cheꞌ jini Jesús tiꞌ subeyob: ¿Chucoch ti laꞌ sʌclʌyon? ¿Machꞌa baꞌan laꞌ wujil isujm an chaꞌan mic chaꞌliben i toñel c Tyat? cheꞌen.

50 Pero machꞌan tiꞌ chꞌʌmbeyob i sujmlel chʌ bʌ ti yʌlʌ.

51 Cheꞌ jini Jesús ti sujti ti Nazaret yicꞌotyob. Tiꞌ bej jacꞌbeyob i tꞌan. I ñaꞌ tiꞌ luꞌ lotyo ti i pusicꞌal pejtyelel tsaꞌ bʌ i chaꞌle.

52 Jesús tiꞌ bej más ñaꞌtyʌ majlel yicꞌot ti bej más coli majlel. Dios tiꞌ bej más qꞌuele ti más wen yicꞌot chʌꞌʌch jeꞌel pejtyelel quixtyañujob.