Xiba tiꞌ jopꞌo i yʌsan ti mulil Jesús
4
Butꞌul i pusicꞌal Jesús ti Chꞌujul bʌ i Chꞌujlel. Ti loqꞌui majlel yaꞌ ti río Jordan. Chꞌujul bʌ i Chꞌujlel tiꞌ pʌyʌ majlel ti tyʌquin bʌ joch lum.2 Yaꞌi tiꞌ ñusʌ cuarenta qꞌuin. Jini xiba tiꞌ jopꞌo i yotsʌben i mul. Machꞌan chʌ bʌ tiꞌ cꞌuxu Jesús cꞌʌlʌ cuarenta qꞌuin. Ti wiꞌil ti yubi wiꞌñal.
3 Cheꞌ jini, xiba tiꞌ sube Jesús: Mi melel yalobilet Dios suben jini tyun chaꞌan mi pʌntyʌyel ti waj, cheꞌen.
4 Jesús tiꞌ jacꞌʌ: Tsꞌijbubil bʌ i Tꞌan Dios mi yʌl: Mach ti waj jach cuxul quixtyañu pero cuxul jeꞌel chaꞌan ti pejtyelel tꞌan tsaꞌ bʌ i yʌlʌ Dios, cheꞌ tsꞌijbubil, cheꞌen.
5 Cheꞌ jini, Jesús ti pʌjyi majlel ti xiba ti chan bʌ wits. Tiꞌ luꞌ pʌsꞌeꞌ Jesús ti ora jach pejtyelel pañimil tyac am bʌ ti mulawil.
6 Xiba tiꞌ sube: Mi quej c luꞌ cʌqꞌueñet pejtyelel i pꞌʌtyʌlel yicꞌot i ñuclel jini yumʌlob wʌꞌ ti pañimil tyac. Como c chaꞌañʌch ti pejtyelel. Ti aqꞌuentiyon. Chꞌujbi cʌqꞌuen majchical com cʌqꞌuen, cheꞌen.
7 Mi ti a ñocchoco a bʌ tic tyojlel chaꞌan a chꞌujutisañon, luꞌ a chaꞌañʌch mi cʌqꞌueñet, cheꞌ ti yʌlʌ xiba.
8 Pero Jesús tiꞌ jacꞌʌ: Satanás, loqꞌuen wʌꞌ tic tyojlel, cheꞌ cu ti Tsꞌijbubil bʌ i Tꞌan Dios mi yʌl: Chꞌujutisan laꞌ Yum laꞌ Dios. Jin jach yom maꞌ yumin, cheꞌen.
9 Cheꞌ jini, xiba tiꞌ pʌyʌ majlel Jesús ti lum Jerusalén bʌ i cꞌabaꞌ. Tiꞌ waꞌchoco yaꞌ ti pam templo. Ti subenti Jesús: Mi melel i yalobilet Dios choco jubel a bʌ cꞌʌlʌl yaꞌ ti lum.
10 Como jini Tsꞌijbubil bʌ i Tꞌan Dios mi yʌl:
Dios mi quejel i xiqꞌueꞌ tyʌlel ajtroñelob i chaꞌan chꞌoyoloꞌ bʌ ti panchan chaꞌan i cʌñʌtyañetyob.
11 Mi quejel i chuquetyob ti i cꞌʌb
chaꞌan machꞌan maꞌ low a woc ti tyum.
Cheꞌ ti yʌlʌ xiba.
12 Jesús tiꞌ jacꞌʌ: Mi yʌl jeꞌel ti Tsꞌijbubil bʌ i Tꞌan Dios: Mach yom a jopꞌ a wilpusicꞌlen laꞌ Yum laꞌ Dios, cheꞌen.
13 Jini xiba machꞌan tiꞌ tyaja yambʌ bajcheꞌ yom chaꞌan i yotsan i mul Jesús. Cheꞌ jini tiꞌ chaꞌ cʌyʌ Jesús chaꞌpꞌej uxpꞌej qꞌuin.
El Diablo Tienta a Jesús
Jesús ti tyechi i troñel yaꞌ ti Galilea
14 Jesús ti chaꞌ sujti majlel ti Galilea bʌ pañimil. Butꞌul i pusicꞌal tiꞌ pꞌʌtyʌlel Chꞌujul bʌ i Chꞌujlel Dios. Cabʌl tiꞌ pucuyob majlel tꞌan chaꞌan Jesús yaꞌ ti lum tiꞌ joytyʌlel.
15 Tiꞌ bej cʌntisʌyob ti i templo israelob ti jujumpꞌej lum tyac. Ti pejtyelel tiꞌ subuyob i ñuclel Jesús.
Jesús yaꞌ ti lum Nazaret bʌ i cꞌabaꞌ
16 Cheꞌ jini, Jesús tsajni ti Nazaret jini lum yaꞌ baꞌ ti coli. Ti qꞌuinilel cꞌaj oj ti ochi ti i templo israelob cheꞌ bajcheꞌ i tyʌlel tiꞌ chaꞌle. Ti waꞌle Jesús chaꞌan i qꞌueleꞌ Tsꞌijbubil bʌ i Tꞌan Dios.
17 Ti yʌqꞌueyob Jesús jini jun tsaꞌ bʌ tsꞌijbu jini tsaꞌ bʌ i xiqꞌui yʌleꞌ Dios Isaías bʌ i cꞌabaꞌ. Cheꞌ ñac tiꞌ jamʌ jini bʌlʌl bʌ jun tiꞌ tyaja baꞌ mi yʌleꞌ chʌꞌʌch bajcheꞌ iliyi:
18 I Chꞌujlel lac Yum an quicꞌot
como tsaꞌix i yajcʌyon chaꞌan mic suben wen bʌ tꞌan pꞌumpꞌuñoꞌ bʌ.
Ti xijqꞌuiyon c lajmisan jini chꞌʌjyem bʌ i pusicꞌal.
Ti aqꞌuentiyon c subeñob tꞌan chaꞌan i tyajob i librejlel jini cʌchʌloꞌ bʌ yubil
chaꞌan mi cꞌotyel i wut jini mutsꞌuloꞌ bʌ i wut
chaꞌan mi lajmel i tyʌcꞌlʌntyel jini tyʌcꞌlʌbiloꞌ bʌ.
19 Ti aqꞌuentiyon c subeꞌ i yorojlel wale cheꞌ mi pʌstyʌl i yutslel lac Yum.
Chʌꞌʌch tiꞌ qꞌuele baꞌ ti wʌ tyajlel ti tꞌan Jesús.
20 Cheꞌ jini tiꞌ ñupꞌu jini jun Jesús. Tiꞌ chaꞌ aqꞌue jini am bʌ tiꞌ wenta yaꞌ ti i templo israelob. Ti buchle Jesús. Ti pejtyelelob chʌncol i bej qꞌuelob Jesús.
21 Cheꞌ jini ti queji ti tꞌan Jesús. Ti yʌlʌ: Wale iliyi chʌncox i tsꞌʌctiyel wʌꞌ ti laꞌ tyojlel tsaꞌ bʌ ujti j qꞌueleꞌ bʌ tꞌan, cheꞌen.
22 Ti pejtyelelob weñʌch tiꞌ tyajayob ti tꞌan Jesús. Tyoj bʌcꞌñʌjelob chaꞌan ti cꞌotyajax bʌ tꞌan tsaꞌ bʌ subentiyob ti Jesús. Tiꞌ cꞌajtibeyob i bʌ: ¿Mach ba jin i yalobil José? cheꞌob.
23 Jesús tiꞌ subeyob: Cujil isujm mi quejel laꞌ subeñon jini albil bʌ tꞌan i chaꞌañob baꞌ mi yʌl: Ajtsꞌʌcaya, tsꞌʌcan a bʌ. Mi quejel laꞌ subeñon jeꞌel: Jini tsaꞌ bʌ lojon cubi ti a chaꞌle ñuc bʌ yaꞌ ti Capernaum, mele jeꞌel wʌꞌ ti a lumal. Cheꞌ mi quejel laꞌ subeñon, cheꞌ ti yʌlʌ Jesús.
24 Cheꞌ jini Jesús tiꞌ bej subeyob. Ti yʌlʌ: Melel mic subeñetla, maꞌix mi junticlec muꞌ bʌ i xiqꞌueꞌ i yʌleꞌ Dios muꞌ bʌ i qꞌuejlel ti wen ti i lumal bʌ ti i piꞌʌloꞌ bʌ, cheꞌen.
25 Mic subeñetla, melel yaꞌan cabʌl mebaꞌ xꞌixicob yaꞌ ti lumal israelob cheꞌ cuxul jini Elías tsaꞌ bʌ i xiqꞌui i yʌleꞌ Dios ti ñoj oniyix cheꞌ maꞌix ti ñumi jaꞌal uxpꞌej jab tyʌlel i xiñil jabil. An cabʌl wiꞌñal ti jim bʌ ora ti pejtyelel jini pañimil.
26 Pero machꞌan ti chojqui majlel Elías baꞌan mi junticlec mebaꞌ xꞌixic yaꞌ bʌ añob ti lumal israelob chaꞌan i cotyañob. Yaꞌ jach ti chojqui majlel yaꞌ baꞌan juntiquil mebaꞌ xꞌixic chumul yaꞌ ti Sarepta lʌcꞌʌl ti lum Sidón.
27 Cheꞌ jeꞌel cheꞌ ñac cuxul tyo Eliseo tsaꞌ bʌ i xiqꞌui i yʌleꞌ Dios an cabʌlob jini am bʌ chʌ bʌ yes pasem tiꞌ pʌchʌlel muꞌ bʌ i pʌcꞌmisʌben majlel i bʌcꞌtyal. Pero maꞌan ti lajmisʌnti mi junticlec. Jini jach ti lajmisʌnti juntiquil Naamán bʌ i cꞌabaꞌ chꞌoyol bʌ ti Siria bʌ pañimil. Cheꞌ ti yʌlʌ Jesús.
28 Cheꞌ ñac ti yubiyob i tꞌan Jesús ti wen michꞌʌyob ti pejtyelelob yaꞌ bʌ añob ti i templo israelob.
29 Ti waꞌleyob. Tiꞌ pʌyʌyob loqꞌuel Jesús ti lum. Tiꞌ pʌyʌyob majlel yaꞌ ti bujtyʌl chaꞌan yom i xit chocob jubel yaꞌ ti lomtyʌl como waꞌchocobil lum ti pam wits.
30 Pero Jesús ti ñumi ti xinil baꞌañob. Ti majli.
Jesús Proclama el Cumplimiento de las Escrituras
Juntiquil winic am bʌ i xibʌjlel
31 Cheꞌ jini, Jesús ti majli ti Capernaum jumpꞌej lum yaꞌ ti Galilea bʌ pañimil. Yaꞌi tiꞌ chaꞌle cʌntisa yaꞌ ti i templo israelob ti qꞌuinilel cꞌaj oj.
32 Tyoj bʌcꞌñʌjelob ti yubiyob chaꞌan bajcheꞌ tiꞌ chaꞌle cʌntisa como an i pꞌʌtyʌlel i tꞌan Jesús.
33 Yaꞌan juntiquil winic ti i templo israelob tyʌcꞌlʌbil bʌ ti xiba. Tiꞌ chaꞌle oñel jini xiba. Ti oñel ti yʌlʌ:
34 Cucux. ¿Chucoch maꞌ tyʌlel baꞌañon lojon, Jesús chꞌoyolet bʌ ti Nazaret? ¿Tsaꞌ ba tyʌliyet a jisañon lojon? Much j cʌñet majchetqui. Cujil isujm jatyet jini chꞌujulet bʌ i chaꞌan Dios, cheꞌ ti yʌlʌ jini xiba.
35 Jesús tiꞌ tiqꞌui jini xiba. Ti yʌlʌ: Lajmenix ti tꞌan. Loqꞌuen wʌꞌ ti winic. Cheꞌ ti yʌlʌ Jesús. Cheꞌ jini, jini xiba tiꞌ choco jubel ti lum jini winic tiꞌ tyojelob. Ti loqꞌui jini xiba. Machꞌan ti saj lojwi jini winic.
36 Tyoj bʌcꞌñʌjelob ti yilʌyob quixtyañujob. Tiꞌ subeyob i bʌ: ¿Chuqui ti tꞌan iliyi? An i pꞌʌtyʌlel i tꞌan. Miꞌ chaꞌlen xicꞌ ti cabʌl i pꞌʌtyʌlel i tꞌan. Miꞌ xicꞌ loqꞌuel xibajob. Mi waꞌ loqꞌuelob, cheꞌob.
37 Ti waꞌ luꞌ pujqui tꞌan chaꞌan Jesús yaꞌ ti joytyʌlelob chaꞌan ti caj jini tsaꞌ bʌ i chaꞌle.
Jesús tiꞌ lajmisʌ i nijꞌañaꞌ Pedro
38 Cheꞌ jini Jesús ti loqꞌui majlel yaꞌ ti i templo israelob. Ti ochi majlel ti yotyot Simón. Cꞌam i nijꞌañaꞌ Simón. Miꞌ wen ubin cꞌajc. Tiꞌ subeyob chaꞌan i lajmisʌben.
39 Jesús ti tinle i qꞌuel jini xꞌixic, tiꞌ tiqꞌui jini cꞌajc. Ti waꞌ lajmi ti cꞌajc. Ora jach ti tyechi jini xꞌixic. Ti queji i weꞌsañob.
Cabʌl tiꞌ chaꞌle lajmisa Jesús
40 Cheꞌ ñac ti pꞌʌjqui qꞌuin, ti queji i pʌyob majlel baꞌan Jesús pejtyelel añoꞌ bʌ chʌ bʌ yes jach bʌ i cꞌamꞌan. Jesús ti yʌcꞌʌ i cꞌʌb ti jujuntiquil. Chʌꞌʌch tiꞌ lajmisʌyob.
41 Ti loqꞌui jeꞌel xibajob tiꞌ pusicꞌal cabʌl xcꞌamꞌañob. Tiꞌ chaꞌleyob oñel. Ti yʌlʌyob: I Yalobiletyʌch Dios, cheꞌob. Pero Jesús tiꞌ tiqꞌui jini xibajob. Machꞌan ti yʌcꞌʌyob ti tꞌan cheꞌ cu yujil isujm Cristojʌch jini yajcʌbil bʌ.
Jesús tiꞌ chaꞌle subtꞌan yaꞌ ti Galilea
42 Cheꞌ ti chaꞌ sʌcꞌʌ ti loqꞌui majlel Jesús yaꞌ ti lum chaꞌan mi poj bajñel ajñel. Pero quixtyañujob tiꞌ sajcʌyob. Ti cꞌotiyob yaꞌ baꞌan Jesús. Tiꞌ jopꞌo i jalitisan yaꞌi chaꞌan machꞌan mi majlel.
43 Pero Jesús tiꞌ subeyob: Añʌch chaꞌan majlicon ti yambʌ lum tyac jeꞌel chaꞌan c subeñob tꞌan chaꞌan bajcheꞌ miꞌ chaꞌlen yumʌl Dios como jini chaꞌan tiꞌ chocoyon tyʌlel, cheꞌen.
44 Cheꞌ jini, ti ñumi majlel Jesús ti subtꞌan ti i templo tyac israelob yaꞌ ti Galilea bʌ pañimil.