2 Cheꞌ jini juntiquil cꞌam bʌ winic tiꞌ lʌcꞌʌ Jesús. Lepra bʌ i cꞌabaꞌ i cꞌamꞌan. An chʌ bʌ yes pasem ti i pʌchʌlel muꞌ bʌ i pʌcꞌmisʌben majlel i bʌcꞌtyal. Tiꞌ ñocle yaꞌ ti yebal yoc Jesús. Tiꞌ sube: Mi a wom, chꞌujbiyʌch a lajmisañon, cheꞌ ti subenti Jesús.

3 Cheꞌ jini, Jesús ti tyʌlʌ jini cꞌam bʌ. Ti yʌlʌ: Comʌch. Laꞌ lajmiquet. Cheꞌ ti subenti jini cꞌam bʌ. Cheꞌ ñac ti ujti i yʌleꞌ Jesús, ti ora jach ti lajmi. Cꞌoqꞌuix ti cʌyle.

4 Cheꞌ jini, Jesús tiꞌ sube: Qꞌuele a bʌ chaꞌan machꞌan majch maꞌ saj suben. Cucu, pʌsʌ a bʌ baꞌan cura. Yaꞌi maꞌ wʌqꞌuen i majtyan Dios cheꞌ bajcheꞌ ti yʌlʌ Moisés ti mandar chaꞌan mi yilañob ti pejtyelelob chaꞌan tsaꞌix lajmiyet. Cheꞌ ti subenti jini winic.

5 Ti cꞌoti Jesús yaꞌ ti jumpꞌej lum Capernaum bʌ i cꞌabaꞌ. Yaꞌ ti cꞌoti baꞌan Jesús juntiquil am bʌ yeꞌtyel ti capitán chaꞌan cien soldado i chaꞌan bʌ romanojob. Tiꞌ wersa cꞌajtibe Jesús ti wocol tꞌan.

6 Ti yʌlʌ: C Yum, yaꞌ ti cotyot an juntiquil ñoj cꞌam bʌ ajtoñel c chaꞌan. An ti wʌyib. Mach chꞌujbi i nijcʌntyel i yoc i cꞌʌb. Ñoj cabʌl chʌncol i yubin wocol. Cheꞌ ti yʌlʌ jini capitán.

7 Jesús ti yʌlʌ: Mucꞌʌch c majlel c lajmisan, cheꞌen.

8 Jini capitán tiꞌ jacꞌʌ: C Yum, maꞌix c ñuclel chaꞌan maꞌ wochel ti cotyot. Cheꞌ jach maꞌ wʌcꞌ a tꞌan chaꞌan mi lajmel. Cheꞌ jini mux i lajmel jini ajtoñel c chaꞌan, cheꞌen.

9 Como joñon jeꞌel mic xijqꞌuel ti yambʌ más ñuc bʌ yeꞌtyel. Joñon jeꞌel mic xiqꞌueꞌ soldadojob. Cheꞌ mic suben juntiquil: Cucux, choꞌon. Mi majlel. Mic suben yambʌ: Laꞌ, choꞌon. Mi tyʌlel. Cheꞌ mic suben ajtoñel: Chaꞌlen jini, choꞌon. Miꞌ chaꞌlen. Cheꞌ ti yʌlʌ jini capitán.

10 Cheꞌ ñac ti yubi Jesús i tꞌan jini capitán ñoj tijicña ti yubi. Jesús tiꞌ sube quixtyañujob chʌncol bʌ i tsʌclen majlel: Melel mic subeñetla, machꞌan baꞌ tic tyaja baꞌan pejtyelel c piꞌʌlob israelob juntiquil muꞌ bʌ i wen chꞌujbiñon bajcheꞌ ili capitán, cheꞌen.

11 Mic subeñetla yaꞌ bʌ loqꞌuemob ti pasoꞌ qꞌuin yicꞌot baꞌ mi pꞌʌjquel qꞌuin mi quejel i tyʌlelob cabʌl machꞌʌ israelob muꞌ bʌ i buchtyʌlob ti uchꞌel yicꞌot Abraham, yicꞌot Isaac yicꞌot Jacob yaꞌ ti panchan baꞌ miꞌ chaꞌlen yumʌl Dios.

12 Pero jini israelob tsaꞌ bʌ subentiyob i tꞌan Dios machꞌʌ baꞌan tiꞌ chꞌujbiyob mi quejel i chojquelob majlel yaꞌ baꞌ icꞌjowan, baꞌ mi quejelob ti uqꞌuel yicꞌot tsʌts mi quejel i cꞌuxob i yej. Cheꞌ tiꞌ sube quixtyañujob Jesús.

13 Cheꞌ jini Jesús tiꞌ sube jini capitán: Cucux ti a wotyot. Chaꞌan ti a chꞌujbiyon tsaꞌix lajmi ajtroñel a chaꞌan. Cheꞌ ti yʌlʌ Jesús. Ti jin jach bʌ ora ti waꞌ lajmi jini ajtroñel.

14 Jesús ti majli ti yotyot Pedro. Yaꞌ ti yilʌ i nijꞌañaꞌ Pedro. Mi wen ubin cꞌajc. An ti wʌyib.

15 Jesús tiꞌ tyʌlbe i cꞌʌb. Ti waꞌ lajmi cꞌajc. Cheꞌ jini ti tyejchi. Tiꞌ melbeyob i yuchꞌel.

16 Cheꞌ yomox icꞌan ti pʌjyiyob tyʌlel yaꞌ baꞌan Jesús cabʌl tyʌcꞌlʌbiloꞌ bʌ ti xiba. Machꞌan chʌ bʌ yambʌ ti cꞌʌjni, tiꞌ tꞌan jach, Jesús tiꞌ waꞌ choco loqꞌuel xibajob. Tiꞌ luꞌ lajmisʌbeyob i cꞌamꞌan quixtyañujob chʌ bʌ tyac jach bʌ cꞌamꞌan yicꞌotyob.

17 Chʌꞌʌch ti ujti chaꞌan mi tsꞌʌctiyel tsaꞌ bʌ i wʌ alʌ juntiquil tsaꞌ bʌ xiqꞌui yʌleꞌ Dios Isaías bʌ i cꞌabaꞌ. Tiꞌ tyaja ti tꞌan Jesús. Ti yʌlʌ: Tiꞌ cotyʌyonla laj cucheꞌ lac wocol tyac. Tiꞌ choco loqꞌuel laj cꞌamꞌan tyac. Chʌꞌʌch ti wʌ alʌ Isaías ti ñoj oniyix cheꞌ max tyo ajn ti mulawil Jesús.

18 Cheꞌ ñac ti yilʌ Jesús joyol ti cabʌl quixtyañujob tiꞌ xiqꞌuiyob ajcʌntꞌañob i chaꞌan chaꞌan miꞌ cꞌaxelob ti junxejlel colem joyol bʌ jaꞌ.

19 Juntiquil ajcʌntisa chaꞌan i mandar israelob tiꞌ lʌcꞌʌ Jesús. Ti yʌlʌ: Maestro, com c tsʌcleñet majlel baꞌical jach maꞌ majlel, cheꞌen.

20 Jesús tiꞌ sube: Xwax an i met. Xmaꞌtyeꞌmut an i cꞌuꞌ. Pero Joñon i Piꞌʌlon Quixtyañujob machꞌan c bajñel ajñib baꞌ mic tyotsꞌtyʌl. Chʌꞌʌch ti yʌlʌ Jesús.

21 Cheꞌ jini, juntiquil ajcʌntꞌan i chaꞌan Jesús tiꞌ sube: C Yum, aqꞌueñon c pijtyan jintyo mi sajtyel c tyat chaꞌan mic ñaxan chꞌujñan. Cheꞌ jini, mux c tsʌclañet majlel, cheꞌen.

22 Jesús tiꞌ sube: Laꞌ. Tsʌcleñon majlel. Muꞌ tyo i chꞌujñan a tyat yaꞌ bʌ mi sajtyel jini sajtyemoꞌ bʌ yubil. Cheꞌ ti yʌlʌ Jesús. Como chʌꞌʌch bajcheꞌ sajtyemoꞌ bʌ yubil jini machꞌʌ baꞌan miꞌ chꞌujbiñob Dios.

23 Cheꞌ jini ti ochi Jesús ti barco. Ti ochiyob jeꞌel ajcʌntꞌañob i chaꞌan.

24 Cheꞌ jini ti queji toñel bʌ icꞌ yaꞌ ti colem joyol bʌ jaꞌ. Jini icꞌ ti queji i wetsꞌ ochel jaꞌ ti malil barco jintyo yomox bujtꞌel ti jaꞌ. Pero wʌyʌl Jesús.

25 Cheꞌ jini, jini ajcʌntꞌañob ti queji i pꞌixtisañob Jesús. Tiꞌ subeyob: C Yum, muqꞌuix quejel lac sujpꞌel ochel ti mal jaꞌ, cheꞌob.

26 Jesús tiꞌ subeyob: ¿Chucoch muqꞌuetla ti bʌqꞌuen? Tsꞌityaꞌ jach chʌncol laꞌ chꞌujbiñon. Cheꞌ ti yʌlʌ Jesús. Cheꞌ jini ti tyejchi. Tiꞌ tiqꞌui icꞌ yicꞌot witsꞌlaw bʌ jaꞌ. Ti waꞌ lajmi. Wen ñʌchꞌʌlix ti cʌyle.

27 Tyoj bʌcꞌñʌjel ajcʌntꞌañob i chaꞌan Jesús. Tiꞌ cꞌajtibeyob i bʌ, ¿majchqui wale jini winic muꞌ bʌ i chꞌujbibentyel i tꞌan ti icꞌ yicꞌot ti jaꞌ? Cheꞌ ti yʌlʌyob.

28 Jesús yicꞌot ajcʌntꞌañob i chaꞌan tiꞌ cꞌaxiyob majlel ti junxej colem joyol bʌ jaꞌ. Yaꞌ ti cꞌotiyob yaꞌ ti i lumal ajgadarenojob. Cheꞌ jini, chaꞌtiquil winicob ti loqꞌuiyob yaꞌ ti chꞌujñʌjibʌl. Tiꞌ lʌcꞌʌyob Jesús. Tyʌcꞌlʌbiloꞌ bʌ ti xiba ti chaꞌticlelob. Ñoj simaroñob. Pejtyel quixtyañujob miꞌ bʌcꞌñañob ñumel yaꞌ ti bij.

29 Cheꞌ ñac ti yilʌyob Jesús ti quejiyob ti oñel jini xibajob am bʌ tiꞌ pusicꞌal jini chaꞌtiquilob. Ti yʌlʌyob: ¿Chuquiyes a wom a wicꞌotyon lojon, Jesús, jatyet i Yalobilet bʌ Dios? ¿Tsaꞌix ba tyʌliyet a wʌ tyʌcꞌlañon lojon cheꞌ max tyo cꞌot i yorojlel maꞌ chocon lojon ochel ti xotꞌmulil? Cheꞌ ti yʌlʌyob.

30 Yaꞌ chʌncol ti bucꞌbal yonlel chityam yaꞌ lʌcꞌʌl.

31 Jini xibajob tiꞌ wersa cꞌajtibe Jesús: Mi mux a chocon lojon loqꞌuel tiꞌ pusicꞌal ili quixtyañujob, aqꞌueñon lojon cochel ti chityam, cheꞌob.

32 Jesús tiꞌ subeyob: Cucux. Ochen, cheꞌen. Cheꞌ jini, jini xibajob ti loqꞌuiyob tiꞌ pusicꞌal winicob. Ti ochiyob tiꞌ pusicꞌal chityam. Cheꞌ jini, jini chityam ti luꞌ jubiyob majlel ti ajñel yaꞌ ti queptyʌl. Tiꞌ chocoyob ochel i bʌ ti malil colem joyol bʌ jaꞌ. Yaꞌ ti luꞌ jicꞌtyʌyob jaꞌ.

33 Cheꞌ ñac ti yilʌ ajcʌñʌtya chityam chʌ bʌ ti ujti tiꞌ bʌcꞌñʌyob. Ti majliyob ti ajñel. Cheꞌ ñac ti cꞌotiꞌyob yaꞌ ti lum tiꞌ luꞌ subu pejtyel bajcheꞌ ti ujti jini chityam yicꞌot bajcheꞌ ti ujti jini winicob tsaꞌ bʌ loqꞌui xiba tiꞌ pusicꞌal.

34 Cheꞌ jini, ti pejtyelel quixtyañujob yaꞌ bʌ añob ti Gadara ti luꞌ majliyob yaꞌ baꞌan Jesús. Cheꞌ ñac tiꞌ qꞌueleyob tiꞌ subeyob chaꞌan mi loqꞌuel majlel yaꞌ baꞌ añob.