2 Tiꞌ cʌntisʌyob ti cabʌl lajoñel tyac. Tiꞌ subeyob:

3 Ubinla. Ti loqꞌui majlel juntiquil winic ti pꞌujpꞌujya pacꞌ.

4 Cheꞌ ñac tiꞌ pꞌujpꞌuj majlel jini pacꞌ ti yajli tsꞌityaꞌ yaꞌ ti bij. Ti tyʌliyob xmaꞌtyeꞌmut. Tiꞌ luꞌ bucꞌu tsaꞌ bʌ pꞌajti ti bij.

5 Yambʌ ti yajli ti pam xajolel baꞌ maꞌ tyam i lumil. Saj ora ti pasi, cheꞌ cu machꞌan tyam i lumil.

6 Cheꞌ ti pasi qꞌuin i ticwʌlel qꞌuin ti yubi. Ti tyʌqui cheꞌ cu machꞌan tyam ochem i wiꞌ.

7 Yambʌ ti pꞌajti cʌytyʌl ti mal chꞌixol. Cheꞌ ti wen coli jini chꞌixol tiꞌ yebajli jini pacꞌ. Machꞌan ti yʌcꞌʌ i wut.

8 Yambʌ ti yajli baꞌ wen bʌ lum. Ti pasi. Tsʌꞌʌch coli. Tsʌꞌʌch wen yʌcꞌʌ i wut. Jujumpꞌej i bʌcꞌ ti yʌcꞌʌ treinta i wut, yambʌ sesenta, yambʌ cien. Cheꞌ ti yʌlʌ Jesús.

9 Ti yʌlʌ : Jini yom bʌ i chꞌʌmben isujm ili tꞌan, pensalinla. Cheꞌ ti yʌlʌ Jesús.

10 Cheꞌ ñac ti bajñel cʌyleyob, ti queji i cꞌajtibeñob Jesús i sujmlel jini lajoñel tyac jini yaꞌ bʌ jomolob, yicꞌot jini muꞌ bʌ i pejcʌntyelob ti docejob.

11 Jesús tiꞌ subeyob: Ti aqꞌuentiyetla laꞌ chꞌʌmben i sujmlel bajcheꞌ miꞌ chaꞌlen yumʌl Dios machꞌʌ bʌ an tsictiyem ti yambʌ ora. Pero jini machꞌʌ baꞌan ochemob mi cʌntisʌntyelob ti lajoñel tyac.

12 Cheꞌ mic subeñob aunque miꞌ chꞌuj ilañob pero cheꞌ bajcheꞌ maꞌ miꞌ cꞌotyelob i wut miꞌ chaꞌlen. Aunque mi yubin c tꞌan pero maꞌix miꞌ chꞌʌmbeñob isujm. Cheꞌ bajcheꞌ maꞌ chʌ bʌ ti yubiyob miꞌ chaꞌlen ame i cʌyobic i mul ame ñusʌbenticob i mul. Cheꞌ ti yʌlʌ Jesús.

13 Tiꞌ cꞌajtibeyob: ¿Machꞌa baꞌan mi laꞌ chꞌʌmben isujm jini lajoñel? ¿Bajcheꞌqui mi quej laꞌ chꞌʌmben isujm pejtyel yambʌ lajoñel cheꞌ jini? Cheꞌ ti yʌlʌ Jesús.

14 Jini tsaꞌ bʌ majli ti pꞌujpꞌuya pacꞌ ti lajoñel jiñʌch cheꞌ an majch miꞌ chaꞌlen subtꞌan.

15 Jini tsaꞌ bʌ pꞌajti ti bij jiñʌch bajcheꞌ quixtyañu muꞌ bʌ i subentyelob jini wen bʌ tꞌan. Cheꞌ ubibilob i chaꞌan jini tꞌan , miꞌ waꞌ tyʌlel Satanás. Miꞌ locꞌsʌben tiꞌ pusicꞌal.

16 Chʌꞌʌch jeꞌel tsaꞌ bʌ yajli ti xajolel. Cheꞌ mi yubiñob jini wen bʌ tꞌan ñoj yomajax i chꞌujbiñob.

17 Pero machꞌan i wiꞌ tiꞌ pusicꞌal. Jin chaꞌan maꞌ mi jalejel. Pero cheꞌ mi tsꞌityaꞌ ubin wocol o cheꞌ mi yʌlꞌentyel chaꞌan tiꞌ chꞌujbi jini wen bʌ tꞌan, mi chaꞌ ñajʌyel tiꞌ pusicꞌal.

18 Jini yambʌ pacꞌ tsaꞌ bʌ pꞌujpꞌuyi ti mal chꞌixol jiñʌch cheꞌ bajcheꞌ muꞌ bʌ i yubiñob jini wen bʌ tꞌan,

19 pero miꞌ bej pensalin i chaꞌan jach bʌ mulawil. Yicꞌot tijicña mi lolon yubin cheꞌ an cabʌl chʌ bʌ an i chaꞌan, yicꞌot bej niqꞌui yom tyo cabʌl yan tyac bʌ. Pejtyel jini miꞌ yebajlin jini wen bʌ tꞌan chaꞌan maꞌ mi yʌcꞌ i wut.

20 Jini pꞌujpꞌubil bʌ ti wen bʌ lum, jiñobʌch cheꞌ bajcheꞌ muꞌ bʌ i wen ubiñob jini tꞌan. Miꞌ wen chꞌujbiñob. Miꞌ wen acꞌob i wut. An muꞌ bʌ i yʌcꞌ i wut ti treinta, ti sesenta, o ti cien. Cheꞌ ti yʌlʌ Jesús.

21 Jesús tiꞌ subeyob yambʌ tꞌan. Ti yʌlʌ: ¿Muꞌ ba laꞌ tsꞌʌbeꞌ pat cas chaꞌan laꞌ ñupꞌ ti chiquib o mi laꞌ wʌcꞌ ti yebal wʌyibʌl? Machꞌan. Mi laꞌ jocꞌchocon tiꞌ jocꞌlib chaꞌan mi tsictiyel i cꞌʌcꞌal.

22 Machꞌan chʌ bʌ mucul tyac machꞌʌ baꞌan mi wiꞌil tsictiyel. Pejtyel machꞌʌ baꞌan tsictisʌbil mucꞌʌch i quejel i luꞌ tsictisʌntyel.

23 Jini yom bʌ i chꞌʌmben isujm ili tꞌan, pensalinla. Cheꞌ ti yʌlʌ Jesús.

24 Jesús tiꞌ subeyob yambʌ tꞌan. Ti yʌlʌ: Wen ñaꞌtyanla muꞌ bʌ laꞌ wubin. Chʌꞌʌch yonlel bajcheꞌ mi laꞌ wʌqꞌuen laꞌ piꞌʌlob , chʌꞌʌch yonlel mi quejel i yʌqꞌueñetla Dios. Más on mi quej laꞌ wʌqꞌuentyel jatyetla muꞌ bʌ laꞌ wubin ili tꞌan.

25 Jini muꞌ bʌ i chꞌʌmben i sujmlel i tꞌan Dios, mi quejel i yʌqꞌuentyel ti Dios i más chꞌʌmben isujm. Pero jini machꞌʌ yom yubin c tꞌan mi quejel i chilbentyel loqꞌuel tiꞌ pusicꞌal jini tsꞌityaꞌ tyac tsaꞌ bʌ i cʌñʌ. Cheꞌ ti yʌlʌ Jesús.

26 Jesús ti yʌlʌ: Ti lajoñel chʌꞌʌch an i yumintyel Dios bajcheꞌ winic tsaꞌ bʌ i pꞌujpꞌuj pacꞌ ti lum.

27 Cheꞌ jini mi wʌyel, mi chaꞌ pꞌixel. Chʌꞌʌch mi ñusan qꞌuin yicꞌot acꞌbʌlel. Jini pʌcꞌʌlix bʌ ti botsꞌʌ, ti coli. Jini winic machꞌan miꞌ ñaꞌtyan bajcheꞌ chʌncol i colel majlel.

28 Jiñʌch jini lum mi yʌcꞌ ti colel pʌcꞌʌbʌl. Ñaxan mi pasel i yopol. Cheꞌ jini mi colel i tyeꞌel, wiꞌilix mi yʌcꞌ tꞌuñul bʌ i wut yaꞌ ti nich.

29 Cheꞌ cꞌʌnix i wut, jini winic mi majlel i cꞌajeꞌ como i yorojlelix i lojtyel. Cheꞌ tiꞌ chaꞌle cʌntisa Jesús chaꞌan i yumintyel Dios.

30 Jesús tiꞌ subu yambʌ tꞌan jeꞌel. Ti yʌlʌ: ¿Chuquiyes yicꞌot mi lac lajeꞌ i yumintyel Dios? ¿Bajcheꞌqui yom lac lajeꞌ?

31 Chꞌujbi lac lajeꞌ yicꞌot i bʌcꞌ mostaza. Cheꞌ mi pꞌujpꞌuntyel ti lum, jiñʌch más i saj bʌ bajcheꞌ pejtyel i bʌcꞌ pimel.

32 Cheꞌ pꞌujpꞌubilix, más colem mi colel bajcheꞌ yan tyac bʌ pimel cꞌuxbil tyac bʌ i yopol. Colem mi yʌcꞌ i xʌcꞌ tyac. Chꞌujbi i mel i cꞌuꞌ xmaꞌtyeꞌmut yaꞌ tiꞌ cꞌʌb. Cheꞌ ti yʌlʌ Jesús.

33 Chʌꞌʌch bajcheꞌ iliyi, Jesús tiꞌ subeyob tꞌan ti cabʌl lajoñel tyac, i pꞌisol jach bajcheꞌ ti mejli i ñaꞌtyañob.

34 Puro ti lajoñel jach tiꞌ cʌntisʌyob quixtyañujob. Cheꞌ i bajñel jach yaꞌ añob yicꞌot ajcʌntꞌañob i chaꞌan tiꞌ wen tsictisʌbeyob i sujmlel.

35 Ti jim bʌ qꞌuin ti icꞌan ti queji i subeñob ajcʌntꞌañob i chaꞌan: Laꞌ cꞌaxiconla ti junwej jaꞌ, cheꞌen.

36 Jesús tiꞌ subeyob majlel jini quixtyañujob. Cheꞌ jini, jini ajcʌntꞌañob i chaꞌan tiꞌ waꞌ pʌyʌyob majlel Jesús ti barco. Ti majli yicꞌotyob yambʌ yaloꞌ barco tyac.

37 Cheꞌ jini ti queji toñel bʌ icꞌ yaꞌ ti jaꞌ. Ti queji i wetsꞌ ochel jaꞌ yaꞌ tiꞌ mal barco jini icꞌ jintyo yomox bujtꞌel ti jaꞌ.

38 Wʌyʌl Jesús. Tyotsꞌol tiꞌ cꞌʌnjol yaꞌ tiꞌ xujc barco. Ti queji i pꞌixtisañob. Ti quejiyob i subeñob: Maestro, ¿bajcheꞌqui a wʌlʌ mi ti jiliyonla? cheꞌob.

39 Cheꞌ jini ti tyejchi Jesús. Ti queji i tiqꞌueꞌ jini icꞌ. Tiꞌ sube jini jaꞌ: Chꞌʌbix, ñʌchꞌlejen, cheꞌ tiꞌ sube. Ti waꞌ lajmi icꞌ. Ñoj ñʌchꞌʌlix ti cʌyle.

40 Jesús tiꞌ sube ajcʌntꞌañob i chaꞌan: ¿Chucoch muqꞌuetla ti bʌqꞌuen? ¿Chucoch maꞌ mi laꞌ chꞌujbin? cheꞌen.

41 Wen chʌncolob ti bʌqꞌuen. Ti queji i subeñob i bʌ: ¿Majchqui wale jini cheꞌ mi chꞌujbiben i tꞌan jinic tyo icꞌ yicꞌot jaꞌ? Cheꞌ ti yʌlʌyob jini ajcʌntꞌañob i chaꞌan Jesús.