2 Yaꞌ tiꞌ muchꞌquiyob i bʌ i yonlel quixtyañu. Cheꞌ jini ti ochi ti buchtyʌl Jesús ti mal jumpꞌej barco yaꞌ ti jaꞌ. Yaꞌ ti luꞌ cʌyleyob tiꞌ tiꞌ jaꞌ jini quixtyañu.

3 Cheꞌ jini Jesús tiꞌ cʌntisʌyob ti cabʌl lajoñel tyac. Tiꞌ subeyob: Ti loqꞌui majlel juntiquil winic ti pꞌujpꞌuya pacꞌ.

4 Cheꞌ ñac tiꞌ pꞌujpꞌu majlel jini pacꞌ ti yajli tsꞌityaꞌ yaꞌ ti bij. Ti tyʌliyob xmaꞌtyeꞌmut. Ti luꞌ bucꞌu jini tsaꞌ bʌ pꞌajti ti bij.

5 Tsꞌityaꞌ yambʌ ti yajli ti pam xajolel baꞌ machꞌan tyam i lumil. Saj ora jach ti pasi cheꞌ cu machꞌan tyam i lumil.

6 Cheꞌ ti pasi qꞌuin, ti puli ti qꞌuin. Chaꞌan maꞌix tyam ochem i wiꞌ ti tyʌqui.

7 Tsꞌityaꞌ yambʌ ti pꞌajti ti mal chꞌixol. Ti wen coli chꞌixol. Ti yeꞌbali jini pac.

8 Pero yambʌ pacꞌ ti yajli baꞌ wen bʌ lum. Cheꞌ ñac ti coli ti yʌcꞌʌ wen bʌ i wut. An tsaꞌ bʌ yʌcꞌʌ cien i wut, yambʌ sesenta, yambʌ treinta.

9 Jini yom bʌ i chꞌʌmben isujm ili tꞌan, pensalin la.

10 Cheꞌ jini ajcʌntꞌañob i chaꞌan Jesús tiꞌ lʌcꞌʌyob Jesús. Tiꞌ cꞌajtibeyob: ¿Chucoch chʌncol a pejcan quixtyañu ti lajoñel tyac? Cheꞌ ti yʌlʌyob.

11 Jesús tiꞌ jacꞌʌ: Dios ti yʌqꞌueyetla laꞌ chꞌʌmꞌen isujm jini max bʌ tyo baꞌan tsictiyem ti yambʌ ora bajcheꞌ miꞌ chaꞌlen yumʌl Dios. Pero jini yañoꞌ bʌ mach chꞌujbi i chꞌʌmben isujm.

12 Jini muꞌ bʌ i chꞌʌmben i sujmlel i tꞌan Dios, mi quejel i yʌqꞌuentyel ti Dios i más chꞌʌmben isujm. Pero jini machꞌʌ yom yubin c tꞌan mi quejel i chilbentyel loqꞌuel tiꞌ pusicꞌal jini tsꞌityaꞌ tyac tsaꞌ bʌ i cʌñʌ.

13 Jin chaꞌan mic pejcañob ti lajoñel tyac. Mi yilañob chʌ bʌ mic chaꞌlen pero cheꞌ bajcheꞌ maꞌix mi cꞌotyelob i wut yubil miꞌ chaꞌlen. Mi yubiñob c tꞌan pero maꞌix miꞌ chꞌʌmbeñob isujm, cheꞌ bajcheꞌ maꞌix chʌ bʌ ti yubiyob miꞌ chaꞌlen.

14 Chaꞌan bajcheꞌ mi yajñelob quixtyañujob miꞌ tsꞌʌctiyel i tꞌan tsaꞌ bʌ wʌ alʌ Dios cheꞌ ñac tiꞌ cꞌʌmbe i tiꞌ juntiquil tsaꞌ bʌ xiqꞌui yʌleꞌ Dios ti ñoj oniyix Isaías bʌ i cꞌabaꞌ. Ti yʌlʌ:

16 Pero jatyetla, cꞌajacña laꞌ woj como tsaꞌix laꞌ chꞌʌmbe isujm jini chʌncol bʌ laꞌ wilan, jini chʌncol bʌ laꞌ wubin.

17 Como mic subeñetla cabʌl jini tsaꞌ bʌ i xiqꞌui yʌleꞌ Dios ti ñoj oniyix yicꞌot cabʌlob wen bʌ quixtyañujob ti ñoj oniyix yomob i qꞌuelob jini chʌncol bʌ laꞌ wilan. Pero machꞌan ti yilʌyob. Yom i yubiñob jini chʌncol bʌ laꞌ wubin, pero machꞌan ti yubiyob. Cheꞌ ti yʌlʌ Jesús.

18 Jesús tiꞌ chaꞌle tꞌan. Ti yʌlʌ: Jiñʌch i sujmlel jini lajoñel chaꞌan pacꞌ.

19 Jini muꞌ bʌ i yubin jini tꞌan bajcheꞌ mi quejel i chaꞌlen yumʌl Dios, pero maꞌix mi yochel tiꞌ pusicꞌal chaꞌan miꞌ chꞌʌmbeñob isujm, ti lajoñel, jiñobʌch bajcheꞌ jini pacꞌ tsaꞌ bʌ pꞌajti ti bij. Mi tyʌlel xiba miꞌ locꞌsan jini tꞌan tsaꞌ bʌ pʌjqꞌui tiꞌ pusicꞌalob yubil.

20 Ti lajoñel, jini pacꞌ tsaꞌ bʌ pꞌajti baꞌan xajolel tyac, jiñʌch quixtyañujob cheꞌ mi yubiñob i tꞌan Dios ñoj yomajax i chꞌujbiñob,

21 pero chaꞌan maꞌ tyam an i wiꞌ ti i pusicꞌal yubil, cheꞌ mi yubin wocol o cheꞌ mi yʌlꞌentyel chaꞌan ti caj tiꞌ chꞌujbi jini i tꞌan Dios yom i waꞌ cʌyeꞌ.

22 Jini pacꞌ tsaꞌ bʌ pꞌajti ti mal chꞌixol jiñʌch cheꞌ bajcheꞌ jini muꞌ bʌ i yubin i tꞌan Dios pero miꞌ bej pensalin i chaꞌan jach bʌ mulawil. Bej yom yambʌ chʌ bʌ an i chaꞌan. Pejtyelel yambʌ i pensal miꞌ yebalin jini tꞌan yubil, chaꞌan maꞌ mi yʌcꞌ i wut.

23 Pero jini pacꞌ tsaꞌ bʌ pʌjqꞌui ti wen bʌ lum, ti lajoñel, jiñʌch quixtyañu muꞌ bʌ i wen ubin i tꞌan Dios, muꞌ bʌ i chꞌʌmben isujm, muꞌ bʌ i cabʌl chaꞌleñob bajcheꞌ yom i chaꞌleñob cheꞌ miꞌ wen chꞌujbiñob i tꞌan Dios. Miꞌ wen acꞌob i wut yubil. Mi yocꞌan i wut ti cien, ti sesenta, ti treinta. Cheꞌ ti yʌlʌ Jesús.

24 Jesús tiꞌ subeyob yambʌ lajoñel. Ti yʌlʌ: Chꞌujbi lac lajeꞌ i yumintyel Dios cheꞌ bajcheꞌ juntiquil winic tsaꞌ bʌ pꞌujpꞌu wen bʌ pacꞌ yaꞌ ti lum.

25 Pero cheꞌ luꞌ wʌyʌlob ti tyʌli juntiquil muꞌ bʌ i contrajin i yum jini lum. Tiꞌ mucul pʌcꞌʌ machꞌʌ wen bʌ pimel yaꞌ baꞌan wen bʌ pacꞌ. Ti chaꞌ majli.

26 Ti pasi wen bʌ pacꞌ. Ti queji i yʌcꞌ i wut. Cheꞌ jini ti tsictiyi yaꞌan jeꞌel cabʌl machꞌʌ wen bʌ pimel.

27 Cheꞌ jini, jini ajtoñelob i chaꞌan bʌ i yum jini lum ti majliyob yaꞌ baꞌan i yum. Tiꞌ subeyob: C yum, mi weñʌch jini pacꞌ tsaꞌ bʌ pʌjqꞌui yaꞌ ti a lum, ¿baqui tyʌlem jini machꞌʌ wen bʌ pimel? cheꞌob.

28 I yum tiꞌ jacꞌʌ: Jiñʌch i chaꞌlibal juntiquil ajcontra, cheꞌen. Cheꞌ jini, jini ajtroñelob tiꞌ cꞌajtibe: ¿A wom ba mi lojon c boqueꞌ loqꞌuel pejtyelel jini machꞌʌ wen bʌ pimel? cheꞌob.

29 Pero i yum jini lum ti yʌlʌ: Mach yom, cheꞌen. Como mi ti laꞌ boco loqꞌuel jini machꞌʌ wen bʌ pimel bʌbʌqꞌuen mi laꞌ boqueꞌ loqꞌuel yicꞌot jini wen bʌ jeꞌel.

30 Laꞌ ajnic chaꞌan lajal mi colel jintyo i yorojlel cꞌajbal. Cheꞌ jini, mux c xiqꞌueꞌ jini ajcꞌajbalob chaꞌan miꞌ ñaxan tsepe machꞌʌ wen bʌ pimel, chaꞌan miꞌ set cʌcheꞌ chaꞌan miꞌ puleꞌ. Cheꞌ mi yujtyel jini, mux i cꞌajeꞌ wen bʌ chaꞌan mi yotsañob ti yotyotlel baꞌ mi lotyeꞌ. Cheꞌ ti yʌlʌ.

31 Jesús tiꞌ subeyob yambʌ lajoñel jeꞌel. Ti yʌlʌ: Chꞌujbi lac lajeꞌ i yumintyel Dios yicꞌot i bʌcꞌ mostaza tsaꞌ bʌ i pꞌujpꞌu juntiquil winic ti i lum.

32 Jiñʌch yoque más i saj bʌ bʌcꞌ cheꞌ bajcheꞌ pejtyelel chʌ bʌ tyac jach bʌ pacꞌ. Pero cheꞌ mi colel, más colem mi majlel cheꞌ bajcheꞌ chʌ bʌ jach bʌ pimel. Colem mi colel jintyo chanix bajcheꞌ juntyejc tyeꞌ yubil. Yaꞌ miꞌ meleꞌ i cꞌuꞌ xmaꞌtyeꞌmut ti i cꞌʌb tyac. Cheꞌ ti yʌlʌ Jesús.

33 Jesús tiꞌ subeyob yambʌ lajoñel. Ti yʌlʌ: Chꞌujbi lac lajeꞌ i yumintyel Dios bajcheꞌ levadura muꞌ bʌ i yʌcꞌ i wos i bʌ caxlan waj muꞌ bʌ i xʌcꞌtyun juntiquil xꞌixic ti uxpꞌis harina muꞌ bʌ i cꞌʌñob i mel caxlan waj. Jini mi yʌcꞌ i luꞌ sijtꞌel caxlan waj, cheꞌen.

34 Puro ti lajoñel jach tiꞌ cʌntisʌ quixtyañujob Jesús.

35 Chʌꞌʌch ti ujti chaꞌan mi tsꞌʌctiyel tsaꞌ bʌ wʌ alʌ Dios ti ñoj oniyix cheꞌ ñac tiꞌ cꞌʌmbe i tiꞌ juntiquil tsaꞌ bʌ i xiqꞌui yʌleꞌ Dios. Ti yʌlʌ:

36 Cheꞌ jini, Jesús ti ujti i pejcan quixtyañujob. Ti ochi ti otyot. Cheꞌ jini, ti tyʌli ajcʌntꞌañob i chaꞌan. Ti yʌlʌyob: Subeñon lojon i sujmlel jini lajoñel chaꞌan jini machꞌʌ wen bʌ pimel tsaꞌ bʌ pʌjqꞌui yaꞌ baꞌan jini wen bʌ, cheꞌob.

37 Jesús tiꞌ subeyob: Ti lajoñel jini tsaꞌ bʌ i pʌcꞌʌ wen bʌ pacꞌ jiñʌch Joñon i Piꞌʌlon bʌ Quixtyañujob, cheꞌen.

38 Jini lum baꞌ ti pʌjqꞌui, jiñʌch mulawil. Ti lajoñel jini wen bʌ pacꞌ jiñʌch jini muꞌ bʌ i yumin Dios, jini machꞌʌ wen bʌ pimel jiñʌch jini añob bʌ ti i pꞌʌtyʌlel xiba.

39 Ti lajoñel jini tsaꞌ bʌ i pʌcꞌʌ machꞌʌ wen bʌ pimel, jiñʌch xiba i bajñel. Ti lajoñel jini i yorojlel cꞌajbal jiñʌch cheꞌ i yorojlel mi quejel i jilel mulawil. Ti lajoñel jini tsaꞌ bʌ i chaꞌleyob cꞌajbal jiñʌch jini ajtoñelob i chaꞌan Dios chꞌoyoloꞌ bʌ ti panchan.

40 Cheꞌ bajcheꞌ tiꞌ muchꞌquiyob machꞌʌ wen bʌ pimel chaꞌan i puleꞌ chʌꞌʌch mi quejel i yujtyel jeꞌel chaꞌan machꞌʌ wen bʌ quixtyañu cheꞌ ti yorojlel mi quejel i jilel mulawil.

41 Joñon i Piꞌʌlon bʌ Quixtyañujob mi quejel c xiqꞌueꞌ majlel ajtoñelob i chaꞌan Dios chꞌoyoloꞌ bʌ ti panchan chaꞌan miꞌ cꞌajeꞌ i wentyʌlel ti pejtyelel quixtyañujob tsaꞌ bʌ yʌqꞌue i yotsañob i mul i piꞌʌlob yicꞌot muꞌ bʌ i chaꞌlen machꞌʌ wen.

42 Mi quejel i chocob ochel ti yajnib cꞌajc baꞌ mi quejel i chaꞌleñob uqꞌuel yicꞌot tsʌts mi quejel i cꞌuxob i yej.

43 Pero jini muꞌ bʌ i chaꞌleñob bajcheꞌ miꞌ xiqꞌueꞌ Dios mi quejel i yajñel baꞌ muꞌ ti yumʌl Dios wʌꞌ ti mulawil. Mi quejel i tsꞌʌjyel bajcheꞌ qꞌuin. Jini yom i yʌleꞌ mi quejel i qꞌuejlel ti tyoj. Jini yom bʌ i chꞌʌmben isujm ili tꞌan, pensalin la. Cheꞌ ti yʌlʌ Jesús.

44 Jesús ti yʌlʌ: Chꞌujbi lac lajeꞌ i yumintyel Dios yicꞌot yonlel tyaqꞌuin tsaꞌ bʌ mujqui ti jamilol. Juntiquil winic tiꞌ tyaja. Yaꞌ ti chaꞌ mucu yaꞌ baꞌ tiꞌ tyaja. Wen cꞌajacña i yoj ti majli i choñeꞌ ti pejtyelel chʌ bʌ an i chaꞌan chaꞌan i mʌñeꞌ jini jamilol baꞌ mucul jini yonlel tyaqꞌuin. Jiñʌch yom i yʌleꞌ cheꞌ mi lac yumin Dios, jini muꞌ bʌ i yʌqꞌueñonla Dios más an i cꞌʌjnibal bajcheꞌ pejtyelel am bʌ lac chaꞌan.

45 Jesús ti yʌlʌ: Chꞌujbi lac lajeꞌ i yumintyel Dios yicꞌot juntiquil ajmʌn lets bʌ i tyojol bʌ tyun perla bʌ i cꞌabaꞌ.

46 Cheꞌ miꞌ tyajeꞌ jumpꞌej ñoj lets bʌ i tyojol, mi majlel i choñeꞌ pejtyelel chʌ bʌ an i chaꞌan chaꞌan i mʌñeꞌ jini ñoj lets bʌ i tyojol bʌ tyun.

47 Chꞌujbi lac lajeꞌ i yumintyel Dios yicꞌot jumpꞌej chimol chʌy tsaꞌ bʌ chojqui ochel ti jaꞌ. Ti ochi cabʌl chʌy ti chajp ti chajp.

48 Cheꞌ butꞌul chimol chʌy, jini ajchuc chʌyob miꞌ tyujcꞌañob loqꞌuel ti jaꞌ. Yaꞌ mi buchtyʌlob tiꞌ tiꞌ jaꞌ. Mi yajcan loqꞌuel chʌy. Mi yotsan wen bʌ chʌy ti chiquib. Miꞌ chocob machꞌʌ wen bʌ chʌy.

49 Chʌꞌʌch mi quejel i yujtyel cheꞌ ti yujtibal mulawil. Mi quejel i tyʌlelob ajtroñelob i chaꞌan Dios chꞌoyoloꞌ bʌ ti panchan. Partejʌch mi quejel i yajcan loqꞌuel simaron bʌ quixtyañujob yaꞌ baꞌan jini tyoj bʌ quixtyañujob.

50 Mi quejel i chocob ochel simaron bʌ quixtyañujob ti cꞌajc baꞌ mi quejel ti uqꞌuel yicꞌot baꞌ mi quejel ti tsʌts cꞌuxob i yej.

51 Cheꞌ jini, Jesús tiꞌ cꞌajtibeyob ajcʌntꞌañob i chaꞌan: ¿Tsaꞌix ba laꞌ chꞌʌmbe isujm ti pejtyelel jini tsaꞌ bʌ cʌlʌ? cheꞌen. Tiꞌ jacꞌʌyob: Tsaꞌix cu, c Yum, cheꞌob.

52 Cheꞌ jini, Jesús tiꞌ subeyob: Cheꞌ juntiquil ajcʌntisa chaꞌan i mandar israelob mi quejel i chꞌʌmben isujm jini c tꞌan chaꞌan bajcheꞌ mi quejel i chaꞌlen yumʌl Dios lajalʌch bajcheꞌ juntiquil i yum otyot am bʌ cabʌl chʌ bʌ an i chaꞌan, tsijib tyo bʌ yicꞌot oniyix tyac bʌ. Como yujil i yajcan i cꞌʌñeꞌ am bʌ i cꞌʌjnibal ti jini oniyix bʌ yicꞌot tsijiꞌ bʌ. Cheꞌ ti yʌlʌ Jesús.

53 Cheꞌ ñac ti ujti Jesús i subeñob ili lajoñel tyac ti loqꞌui majlel yaꞌi.

54 Yaꞌ ti cꞌoti tiꞌ lumal baꞌ ti coli Jesús. Ti queji ti cʌntisa ti i templo israelob yaꞌ ti i lumal. Tyoj bʌcꞌñʌjel ti yubi quixtyañujob. Ti yʌlʌyob: ¿Baqui tiꞌ niqꞌui tyaja i ñaꞌtyʌbal bajcheꞌ jini? cheꞌob. ¿Bajcheꞌqui miꞌ tyajeꞌ i pꞌʌtyʌlel i pʌsꞌe ñuc tyac bʌ i pꞌʌtyʌlel? cheꞌob.

55 Jiñʌch i yalobil ajmel buchlibʌl. María i cꞌabaꞌ i ñaꞌ. Jiñʌch i yʌscun Jacobo, José, Simón yicꞌot Judas, cheꞌob.

56 Yicꞌot xcꞌalʌl bʌ i yijtsꞌiñob Jesús wʌꞌ añob la quicꞌot. ¿Baqui tiꞌ cʌñʌ i chaꞌlen bajcheꞌ jini? cheꞌob.

57 Jin chaꞌan mach yomob i yubiñob mi ñuc Jesús. Pero Jesús tiꞌ subeyob: Mi qꞌuejlel ti ñuc tsaꞌ bʌ i xiqꞌui yʌleꞌ Dios. Jin jach jini añoꞌ bʌ ti yoque i lumal yicꞌot jini añoꞌ bʌ ti yotyot, maꞌ miꞌ qꞌueleꞌ ti ñuc. Cheꞌ ti yʌlʌ Jesús.

58 Jesús machꞌan tiꞌ pʌsʌ cabʌl ñuc tyac bʌ i pꞌʌtyʌlel yaꞌ tiꞌ lumal como maꞌ tiꞌ chꞌujbiyob chaꞌan an i pꞌʌtyʌlel.