2 Cheꞌ ñac ti yilʌ jini fariseojob chʌ bʌ mucꞌ ajcʌntꞌañob i chaꞌan Jesús, tiꞌ subeyob Jesús: Qꞌuele ajcʌntꞌañob a chaꞌan chʌncol i chaꞌleñob toñel ticꞌbil bʌ cheꞌ ti qꞌuinilel cꞌaj oj. Cheꞌ ti yʌlʌyob.

3 Pero Jesús tiꞌ subeyob: ¿Machꞌa baꞌan ti laꞌ qꞌuele yaꞌ ti jun bajcheꞌ tiꞌ chaꞌle David ti ñoj oniyix cheꞌ ñac ti yubi wiꞌñal David yicꞌot i piꞌʌlob?

4 Ti ochi yaꞌ ti yotyot Dios. Tiꞌ chꞌʌmʌ waj tsaꞌ bʌ ajqꞌui ti mesa tsaꞌ bʌ i yʌcꞌʌyob chaꞌan i majtyan Dios. Tiꞌ cꞌuxu David. Ti yʌqꞌue i piꞌʌlob jeꞌel. Pero ticꞌbil chaꞌan maꞌ majch miꞌ cꞌuxeꞌ jini waj. Jin jach curajob miꞌ cꞌuxob. Cheꞌ ti yʌlʌ Jesús.

5 ¿Machꞌa baꞌan ti laꞌ qꞌuele bajcheꞌ tsꞌijbubil ti i mandar Moisés chaꞌan jini curajob maꞌ mucꞌob ti cꞌaj oj? Miꞌ chaꞌleñob toñel ti templo cheꞌ ti yorojlel cꞌaj oj. Pero maꞌan majch mi yʌlob chaꞌan xmulilob chaꞌan ti caj.

6 Pero mic subeñetla wʌꞌ añon más ñucon bajcheꞌ jini templo.

7 Machꞌan ti laꞌ chꞌʌmbe isujm jini Tsꞌijbubil bʌ i Tꞌan Dios baꞌ mi yʌleꞌ: Jini com bʌ yi jiñʌch chaꞌan mi laꞌ pꞌuntyan laꞌ piꞌʌlob chaꞌan laꞌ wom laꞌ cotyañob. Más wen mij qꞌueleꞌ jini, cheꞌ bajcheꞌ cheꞌ mi laꞌ wʌqꞌueñon pulem bʌ c majtyan. Chʌꞌʌch tsꞌijbubil tiꞌ tꞌan Dios, cheꞌen. Mi tsaꞌic laꞌ chꞌʌmbe i sujmlel ili tꞌan machꞌan ti laꞌ lolon subu i mul quixtyañujob cheꞌ machꞌan i mulob, cheꞌen.

8 Jesús tiꞌ subeyob jeꞌel. Joñoñʌch i Piꞌʌlon bʌ Quixtyañujob. An tic wenta cʌleꞌ chʌ bʌ yom ujtic ti qꞌuinilel cꞌaj oj. Cheꞌ ti yʌlʌ Jesús cheꞌ cu i yʌcꞌbal.

9 Cheꞌ jini Jesús ti loqꞌui majlel yaꞌi. Ti ochi ti i templo israelob.

10 Yaꞌan juntiquil winic tyʌquin bʌ juntsꞌijt i cꞌʌb. Yaꞌan quixtyañujob yom bʌ i jopꞌbeñob i mul Jesús. Jin chaꞌan tiꞌ cꞌajtibeyob: ¿Yom ba lajmisʌntyel juntiquil xcꞌamꞌan ti qꞌuinilel cꞌaj oj, o mach yom? Cheꞌ tiꞌ cꞌajtibeyob Jesús.

11 Jesús tiꞌ jacꞌbeyob: Mi an tsaꞌ bʌ yajli juncojt laꞌ tiñʌmeꞌ ti pozo, ¿machꞌa baꞌan mi laꞌ majlel laꞌ waꞌ locꞌsan ti ora aunque i qꞌuinilelic cꞌaj oj? cheꞌen.

12 Pero yoque más an i cꞌʌjnibal quixtyañu cheꞌ bajcheꞌ tiñʌmeꞌ. Cheꞌ jini maꞌ tiqꞌuil chaꞌan i chaꞌlentyel wen bʌ cheꞌ ti qꞌuinilel cꞌaj oj, cheꞌen.

13 Cheꞌ jini Jesús tiꞌ sube jini winic tyʌquin bʌ i cꞌʌb: Sʌtsꞌʌ a cꞌʌb, cheꞌen. Cheꞌ ñac tiꞌ sʌtsꞌʌ i cꞌʌb ti waꞌ lajmi. Lajal wen ti cʌyle bajcheꞌ yambʌ i cꞌʌb.

14 Ti loqꞌuiyob majlel jini fariseojob. Ti queji i motin pensaliñob bajcheꞌ chꞌujbi i yʌcꞌ ti tsʌnsʌntyel Jesús.

15 Cheꞌ ñac tiꞌ ñaꞌtyʌ Jesús chʌ bʌ chʌncol i pensaliñob ti loqꞌui majlel. Yonlel quixtyañu tiꞌ tsʌcleyob majlel. Jesús tiꞌ lajmisʌ ti pejtyelel xcꞌamꞌañob.

16 Jesús tiꞌ tiqꞌuiyob chaꞌan machꞌan mi yʌcꞌob ti cʌjñel.

17 Chʌꞌʌch ti ujti chaꞌan miꞌ tsꞌʌctiyel tsaꞌ bʌ wʌ alʌ Dios ti ñoj oniyix cheꞌ tiꞌ cꞌʌmbe i tiꞌ juntiquil tsaꞌ bʌ i xiqꞌui yʌleꞌ Dios Isaías bʌ i cꞌabaꞌ. Ti yʌlʌ:

22 Tiꞌ pʌyʌyob tyʌlel baꞌan Jesús juntiquil xꞌumaꞌ yicꞌot mutsꞌul i wut bʌ quixtyañu am bʌ i xiba tiꞌ pusicꞌal. Cheꞌ ñac Jesús tiꞌ lajmisʌ jini xꞌumaꞌ yicꞌot mutsꞌul i wut ti waꞌ queji ti tꞌan. Ti cꞌoti i wut.

23 Tyoj bʌcꞌñʌjel quixtyañujob. Ti queji i cꞌajtibeñob i bʌ: ¿Jim ba i jiñʌjlel David muꞌ bʌ choc tyʌlel Dios? cheꞌob.

24 Pero cheꞌ ñac jini fariseojob ti yubiyob chʌ bʌ chʌncol i pensaliñob ti yʌlʌyob: Ili winic miꞌ choqueꞌ loqꞌuel xibajob tiꞌ pꞌʌtyʌlel jach i yajaw xiba muꞌ bʌ i pejcʌntyel ti Beelzebú. Cheꞌ ti lolon alʌyob fariseojob.

25 Jesús tiꞌ ñaꞌtyʌ chʌ bʌ chʌncol i pensaliñob tiꞌ pusicꞌal. Tiꞌ subeyob: Mi ti queji i tꞌoxob i bʌ añoꞌ bʌ ti wenta baꞌic jach bʌ yumʌl, mi ti queji i periyaliñob i bʌ mi quejel i lajmisʌntyel i yeꞌtyel. Maꞌix mi quejel i jalejel jumpꞌej lum mi jumpꞌej otyot baꞌ miꞌ tꞌoxob i bʌ ti periyal.

26 Chʌꞌʌch Satanás jeꞌel mach chꞌujbi i bajñel choc loqꞌuel i bʌ. Mi ti queji i periyalin i bʌ mi quejel i jilel i pꞌʌtyʌlel.

27 Mi ti i pꞌʌtyʌlel Beelzebú mic choqueꞌ loqꞌuel xibajob mi laꞌ wʌl, ¿baqui miꞌ tyajeꞌ i pꞌʌtyʌlel laꞌ piꞌʌlob i choqueꞌ loqꞌuel xibajob, mi laꞌ wʌl? Jin chaꞌan laꞌ piꞌʌlob mi quejel i tsictisan laꞌ ñajayel.

28 Joñon bʌ yi tiꞌ pꞌʌtyʌlel Dios mic choqueꞌ loqꞌuel xibajob. Jin chaꞌan tsiquil chʌncol i pʌs i pꞌʌtyʌlel Dios wʌꞌ baꞌ añetla.

29 ¿Bajcheꞌ chꞌujbi i yochel juntiquil ti yotyot pꞌʌtyʌl bʌ winic i chilben loqꞌuel chʌ bʌ an i chaꞌan mi maꞌ tiꞌ ñaxan cʌchʌ jini pꞌʌtyʌl bʌ winic? Jin jach mi ti ñaxan cʌchʌ chꞌujbi i chilben chʌ bʌ an i chaꞌan. Chʌꞌʌch ti yʌlʌ ti lajoñel Jesús chaꞌan jini xiba cheꞌ bajcheꞌ pꞌʌtyʌl bʌ winic.

30 Jini mach bʌ yom i qꞌuelon, miꞌ contrajiñon. Jini machꞌʌ baꞌan miꞌ chaꞌlen toñel quicꞌot chʌncol jach i jisʌbeñon c toñel, yubil. Cheꞌ ti yʌlʌ Jesús.

31 Jin chaꞌan mic subeñetla, chꞌujbiyʌch i luꞌ ñusʌbentyelob pejtyelel i mul quixtyañujob yicꞌot pejtyelel machꞌʌ wen bʌ i tꞌan muꞌ bʌ i chaꞌlen tiꞌ contra i piꞌʌlob. Jin jach mach ñusʌbil i mul jini muꞌ bʌ i chaꞌlen tꞌan tiꞌ contra Chꞌujul bʌ i Chꞌujlel Dios cheꞌ mi yʌl chaꞌan tiꞌ pꞌʌtyʌlel xiba tiꞌ chaꞌle jini tsaꞌ bʌ i chaꞌle Chꞌujul bʌ i Chꞌujlel Dios.

32 Chꞌujbi i ñusʌbentyel i mul majchical jach miꞌ chaꞌlen tꞌan tij contra Joñon i Piꞌʌlon bʌ Quixtyañujob pero jini muꞌ bʌ i chaꞌlen machꞌʌ wen bʌ tꞌan tiꞌ contra Chꞌujul bʌ i Chꞌujlel Dios mach ñusʌbil i mul mi ti ili bʌ qꞌuin tyac wale iliyi mi ti tyal tyo bʌ ora.

33 Mi wen jini tyeꞌ mi yʌcꞌ wen bʌ i wut. Mi mach wen jini tyeꞌ mi yʌqꞌueꞌ machꞌʌ wen bʌ i wut. Mi cʌjñel tyeꞌ chaꞌan bajcheꞌ an i wut.

34 Jatyetla lajaletla bajcheꞌ lucum tyac am bʌ venenojlel tiꞌ tiꞌ. ¿Bajcheꞌqui chꞌujbi laꞌ chaꞌlen wen bʌ tꞌan cheꞌ ñoj simaroñetla? Mach chꞌujbi. Como chʌ bʌ jach miꞌ butꞌ ti i pusicꞌal quixtyañu mi tsictiyel ti i tꞌan.

35 Jini wen bʌ quixtyañu mi yʌleꞌ wen bʌ tꞌan chaꞌan jini wen am bʌ tiꞌ pusicꞌal. Jini machꞌʌ wen bʌ quixtyañu mi yʌleꞌ machꞌʌ wen bʌ tꞌan chaꞌan jini machꞌʌ wen bʌ am bʌ tiꞌ pusicꞌal.

36 Pero mic subeñetla, cheꞌ ti yorojlel melojel jujuntiquil mi quejel i yʌqꞌuentyel i mel i bʌ chaꞌan jujumpꞌal lolom jach bʌ tꞌan tsaꞌ bʌ loqꞌui tiꞌ tiꞌ.

37 Jiñʌch bajcheꞌ ti laꞌ chaꞌle tꞌan, chʌꞌʌch mi quejel i tsictisʌntyel laꞌ mul. Mi weñʌch laꞌ tꞌan, mi quejel laꞌ sujbel ti tyoj. Mi mach wen laꞌ tꞌan mi quejel laꞌ sujbel ti xmulil.

38 Cheꞌ jini ti cꞌoti baꞌan Jesús chaꞌtiquil uxtiquil fariseo yicꞌot yambʌ ajcʌntisajob chaꞌan i mandar israelob. Ti yʌlʌyob: Maestro, com lojon j qꞌueleꞌ i señʌjlel ñuc tyac bʌ a pꞌʌtyʌlel, cheꞌob.

39 Jesús tiꞌ jacꞌʌ: Jini simaron bʌ quixtyañujob machꞌʌ yom i chꞌujbin Dios miꞌ cꞌajtibeñob chaꞌan yomob i pʌsꞌentyel i señʌjlel ñuc tyac bʌ c pꞌʌtyʌlel. Pero jini jach mi quejel i pʌsꞌentyelob bajcheꞌ ti ajni chaꞌan seña ti ñoj oniyix juntiquil tsaꞌ bʌ xiqꞌui yʌleꞌ Dios Jonás bʌ i cꞌabaꞌ.

40 Como cheꞌ bajcheꞌ Jonás tiꞌ ñusʌ uxpꞌej qꞌuin, uxpꞌej acꞌbʌlel tiꞌ mal i ñʌcꞌ colem chʌy, Joñon i Piꞌʌlon bʌ Quixtyañujob mi quejel c ñusan uxpꞌej qꞌuin, uxpꞌej acꞌbʌlel ti mal lum.

41 Jini tsaꞌ bʌ chumleyob yaꞌ ti Nínive, i lumal Jonás, mi quejel i waꞌtyʌl ti yorojlel melojel tiꞌ tyojlel Dios cheꞌ miꞌ melob i bʌ quixtyañujob añoꞌ bʌ wale iliyi. Mi quejel i subob laꞌ mul. Como jini añoꞌ bʌ ti Nínive tiꞌ qꞌuextyʌyob i pensal, tiꞌ cʌyʌyob i mul cheꞌ ñac Jonás tiꞌ subeyob i tꞌan Dios. Tiꞌ chꞌujbiyob. Pero joñon wʌꞌ añon, más ñucon cheꞌ bajcheꞌ Jonás pero maꞌix miꞌ chꞌujbibeñon c tꞌan.

42 Jeꞌel jini xꞌixic bʌ yumʌl yaꞌ ti sur mi quejel waꞌtyʌl ti yorojlel melojel ti tyojlel Dios. Cheꞌ miꞌ melob i bʌ jini quixtyañujob añoꞌ bʌ wale mi quejel i subob i mul. Como jini xꞌixic chꞌoyol bʌ ti más ñajt bʌ pañimil ti tyʌli chaꞌan i ñʌchꞌtyan i ñaꞌtyʌbal jini yumʌl Salomón bʌ i cꞌabaꞌ. Pero más ñucon bajcheꞌ Salomón chaꞌan jach machꞌan mi laꞌ chꞌujbiñon. Cheꞌ ti yʌlʌ Jesús.

43 Jesús tiꞌ bej chaꞌle cʌntisa. Ti yʌlʌ: Cheꞌ mi loqꞌuel xiba tiꞌ pusicꞌal quixtyañu miꞌ chaꞌlen xʌmbal jini xiba ti tyʌquin bʌ lum tyac. Miꞌ bej sajcan majlel baꞌ miꞌ chaꞌ ochel chaꞌan i cꞌajeꞌ i yoj. Cheꞌ machꞌan miꞌ tyajeꞌ yambʌ yajnib, miꞌ pensalin:

44 Mi quejel c chaꞌ majlel ti cajnib baꞌ ti loqꞌuiyon, cheꞌen. Cheꞌ mi chaꞌ cꞌotyel xiba miꞌ tyajeꞌ jini quixtyañu baꞌ ti loqꞌui. Cheꞌ bajcheꞌ jocholix bʌ otyot mi yilan i pusicꞌal jini quixtyañu. Wen misubil, tyoj isʌbil yubil.

45 Cheꞌ jini mi majlel jini xiba i pʌy tyʌlel yambʌ siete xibajob más simaroñoꞌ bʌ. Mi luꞌ ochel ti chumtyʌl tiꞌ pusicꞌal jini quixtyañu. Ti wiꞌil más pꞌumpꞌum mi quejel i yajñel jini quixtyañu cheꞌ bajcheꞌ ti ñaxan. Chʌꞌʌch lajal bajcheꞌ jini mi quejel i yujtyel yicꞌot jini simaroñoꞌ bʌ quixtyañujob añoꞌ bʌ wale iliyi. Mi quejel i más asiyel. Cheꞌ ti yʌlʌ Jesús.

46 Jesús chʌncol tyo i cʌntisan quixtyañujob cheꞌ ñac yaꞌ ti cꞌoti i ñaꞌ yicꞌot i yijtsꞌiñob. Yaꞌ añob ti pañimil. Yomob i pejcan Jesús.

47 An majch tiꞌ sube Jesús: Yaꞌan ti pañimil a ñaꞌ yicꞌot a wijtsꞌiñob. Yom i pejcañetyob, cheꞌen.

48 Pero Jesús tiꞌ sube jini tsaꞌ bʌ tyʌli i pʌyeꞌ: ¿Majchqui jini c ñaꞌ yicꞌot quijtsꞌiñob mi laꞌ wʌl? cheꞌen.

49 Cheꞌ jini tiꞌ sut qꞌuele jini chʌncol bʌ i cʌmbeñob i tꞌan. Ti yʌlʌ: Jiñob c ñaꞌob, quijtsꞌiñob yubil, cheꞌen.

50 Como majchical jach muꞌ bʌ i chaꞌlen bajcheꞌ yom i pusicꞌal c Tyat am bʌ ti panchan jiñʌch quijtsꞌin, jiñʌch c ñaꞌ yubil. Cheꞌ ti yʌlʌ Jesús.