2 An ti cʌchol Juan. Pero yaꞌ ti queji yubin chʌ bʌ mucꞌ Cristo. Cheꞌ jini tiꞌ choco majlel chaꞌtiquil uxtiquil ajcʌntꞌañob i chaꞌan baꞌan Jesús chaꞌan an chʌ bʌ yom i cꞌajtiben.

3 Ti cꞌotiyob. Tiꞌ cꞌajtibeyob Jesús: ¿Jatyet ba Cristojet jini yajcʌbilet bʌ i chaꞌan Dios muꞌ bʌ quejel i tyʌlel o yom tyo mi lojon c bej pijtyan yambʌ? cheꞌob.

4 Jesús tiꞌ jacꞌbeyob ajcʌntꞌañob i chaꞌan Juan. Cucula. Suben Juan chʌncol bʌ laꞌ wilan, chʌncol bʌ laꞌ wubin.

5 Suben bajcheꞌ chʌncol i chaꞌ cꞌotyel i wut jini mutsꞌuloꞌ bʌ i wut, bajcheꞌ chʌncol ti chaꞌ xʌmbal machꞌʌ baꞌan i cꞌʌjnibal yoc ti yambʌ ora, yicꞌot chaꞌan tsaꞌix lajmiyob jini am bʌ chʌ bʌ yes pasem tiꞌ pʌchʌlel muꞌ bʌ i pʌcꞌmisʌben majlel i bʌcꞌtyal, yicꞌot bajcheꞌ mi chaꞌ ubin tꞌan xcojcoꞌ bʌ, yicꞌot an mi chaꞌ cuxtiyel sajtyemoꞌ bʌ, yicꞌot mi subentyel tꞌan chaꞌan i cotyʌntyel jini pꞌumpꞌuñoꞌ bʌ, cheꞌen.

6 Cꞌajacña i yoj mi yubin jini muꞌ bʌ i chꞌujbin ajcotyayajon i chaꞌan ti pejtyelel i pusicꞌal. Cheꞌ ti yʌlʌ Jesús.

7 Cheꞌ ñac ti chaꞌ sujtiyob baꞌan Juan jini ajcʌntꞌañob i chaꞌan, Jesús ti queji i suben quixtyañujob chaꞌan jini Juan. Ti yʌlʌ: ¿Chuquiyes tsajni laꞌ qꞌueleꞌ yaꞌ ti tyʌquin bʌ joch lum? ¿Tsajni ba laꞌ qꞌueleꞌ juntiquil cꞌun bʌ quixtyañu bajcheꞌ cꞌun sʌyan bʌ jalʌl muꞌ bʌ i nijcʌyel ti icꞌ?

8 Mi mach jiniqui, ¿chuquiyes tsajni laꞌ qꞌueleꞌ cheꞌ jini? ¿Tsajni ba laꞌ qꞌueleꞌ winic xojol bʌ i chaꞌan cꞌotyajax bʌ i pislel? Laꞌ wujil isujm jini am bʌ cꞌotyajax bʌ i pislel añob ti yotyot ñucoꞌ bʌ yumʌlob.

9 ¿Chuquiyes tsajni laꞌ qꞌueleꞌ, cheꞌ jini? ¿Juntiquil ba tsaꞌ bʌ i xiqꞌui yʌleꞌ Dios? Melelʌch pero yoque más ñuc Juan bajcheꞌ yañoꞌ bʌ tsaꞌ bʌ i xiqꞌui yʌleꞌ Dios.

10 Jiñʌch Juan tsaꞌ bʌ tyajle ti tꞌan ti Tsꞌijbubil bʌ i Tꞌan Dios baꞌ mi yʌl:

11 Melel mic subeñetla, ti pejtyelel quixtyañujob am bʌ ti mulawil cꞌʌlʌ ti ñoj oniyix, cꞌʌlʌ wale iliyi, machꞌan yambʌ lajal ñuc bajcheꞌ Juan tsaꞌ bʌ yʌcꞌʌ chꞌʌm jaꞌ. Pero jini machꞌʌ baꞌan sajlic i ñuclel bʌ quixtyañu muꞌ bʌ i yumin Dios am bʌ ti panchan, más ñuc bajcheꞌ Juan mi quejel i yajñel. Cheꞌ ti yʌlʌ Jesús. Chʌꞌʌch an yubil como ti jim bʌ ora max tyo sajt Jesús cheꞌ ñac bʌ jini.

12 Tiꞌ bej chaꞌle tꞌan Jesús. Ti yʌlʌ: Cꞌʌlʌ cheꞌ ñac ti queji i yʌcꞌ chꞌʌm jaꞌ Juan cꞌʌlʌ wale iliyi, an cabʌl yom bʌ i wersa yumiñob Dios. Cheꞌ bajcheꞌ miꞌ ñetꞌob i bʌ i tsʌcleñon chaꞌan wersa yom i tyajob wen tyac bʌ muꞌ bʌ i yʌqꞌuentyelob wʌꞌ baꞌ chʌncol i pʌs i pꞌʌtyʌlel Dios.

13 Cꞌʌlʌ jintyo ti tyʌli Juan ti pejtyelelob jini tsaꞌ bʌ i xiqꞌui yʌleꞌ Dios ti ñoj oniyix yicꞌot jini i mandar Moisés ti luꞌ wʌ alʌyob chaꞌan tyal i yorojlel mi quejel i chaꞌlen yumʌl Dios.

14 Mi mux a chꞌujbin muꞌ bʌ c subeñetla, jini Juan jiñʌch Elías yubil tsaꞌ bʌ ajli chaꞌan añʌch chaꞌan tyʌlic.

15 Jini yom bʌ i chꞌʌmben isujm ili tꞌan, pensalin la.

16 Jesús ti yʌlʌ: ¿Chuquiyes yicꞌot mi quejel c lajeꞌ ili quixtyañujob am bʌ ili ora? Ili quixtyañujob chʌꞌʌch añob bajcheꞌ alpꞌeñalob yubil buchulob ti alas ti parque. Ti oñel miꞌ subeñob i piꞌʌlob ti alas:

17 Chʌncol lojon c lolon wuseꞌ jalʌl pero maꞌ mi laꞌ chaꞌlen son. Mi lojon c chaꞌlen chꞌʌjyem bʌ cꞌay pero maꞌ mi laꞌ chaꞌlen uqꞌuel, cheꞌob.

18 Ti tyʌli Juan muꞌ bʌ i yʌcꞌ chꞌʌm jaꞌ. Machꞌan mi cabʌl chaꞌlen wen bʌ uchꞌel. Machꞌan mi japeꞌ i yaꞌlel tsꞌusub. Mi laꞌ lolon aleꞌ an i xibʌjlel.

19 Cheꞌ jini ti tyʌliyon, i Piꞌʌlon bʌ Quixtyañujob. Mic chaꞌlen wen bʌ weꞌel uchꞌel, pero mi laꞌ wʌlon ti xwoꞌlelon yicꞌot chaꞌan mic niqꞌui japeꞌ. I piꞌʌlon ti xʌmbal xmulilob yicꞌot xlot bʌ xchꞌʌm tyojoñelob cheꞌ mi laꞌ wʌl. Pero cheꞌ yoque ochemob bʌ tiꞌ tꞌan Dios bʌ quixtyañu, Dios mi yʌqꞌueñob i ñaꞌtyan bajcheꞌ yom i yajñelob. Cheꞌ jini miꞌ tsictiyel tyʌlem i ñaꞌtyʌbal ti Dios.

20 Cheꞌ jini Jesús ti queji i ticꞌob. Ti queji i tsʌtsʌ pejcañob quixtyañujob yaꞌ ti lum tyac yaꞌ baꞌ tiꞌ pʌsʌ cabʌl ñuc tyac bʌ i pꞌʌtyʌlel como machꞌan ti qꞌuextyʌyob i pensal i cʌyob i mul.

21 Tiꞌ subeyob: Pꞌumpꞌuñetla añet bʌ la yaꞌ ti lum Corazín bʌ i cꞌabaꞌ. Pꞌumpꞌuñetla añet bʌ la yaꞌ ti lum Betsaida bʌ i cꞌabaꞌ, chaꞌan mi quejel laꞌ wubin wocol. Tsaꞌic pʌsꞌentiyob ti ñoj oniyix yaꞌ bʌ añob ti Tiro yicꞌot Sidón ñuc tyac bʌ c pꞌʌtyʌlel tsaꞌ bʌ c chaꞌle wʌꞌ baꞌañetla tsaꞌix i qꞌuextyʌyob i pusicꞌal, tsaꞌix i cʌyʌyob i mul. Tsaꞌix i xojoyob iꞌicꞌ bʌ i pislel. Tsaꞌix i mujluyob i bʌ ti tyan chaꞌan i señʌjlel i chꞌʌjyemlel chaꞌan i mul.

22 Pero mic subeñetla, cheꞌ ti yorojlel melojel mi quejel laꞌ más aqꞌuentyel laꞌ ñusan más wocol bʌ xotꞌmulil bajcheꞌ tiꞌ ñusʌyob jini añoꞌ bʌ ti Tiro yicꞌot Sidón.

23 Ixcu jatyetla yaꞌ ti lum Capernaum bʌ i cꞌabaꞌ, ¿muꞌ ba laꞌ lolon ñaꞌtyan chaꞌan mi quejel laꞌ qꞌuejlel ti ñuc ti pejtyelel añoꞌ bʌ ti mulawil? Machꞌan. Mucꞌ jach laꞌ chojquel yaꞌ baꞌ mi majlel i ñusañob wocol chaꞌan ti caj i mul. Como tsaꞌic pʌsꞌentiyob ti ñoj oniyix yaꞌ bʌ añob ti lum Sodoma bʌ i cꞌabaꞌ jini ñuc tyac bʌ c pꞌʌtyʌlel tsaꞌ bʌ c chaꞌle wʌꞌ baꞌañetla jini lum tsaꞌ tyo jale i wentyʌlel cꞌʌlʌ wale iliyi.

24 Pero mic subeñetla, cheꞌ ti yorojlel melojel mi quejel laꞌ wʌqꞌuentyel laꞌ ñusan más wocol bʌ xotꞌ mulil bajcheꞌ ti aqꞌuentiyob i ñusañob wocol añoꞌ bʌ ti Sodoma i cꞌabaꞌ bʌ lum.

25 Ti jim bʌ ora Jesús ti yʌlʌ: Mic subet a ñuclel c Tyat. I yumet panchan yicꞌot mulawil. Ti a mucbeyob i sujmlel ili a tꞌan chaꞌan machic i chꞌʌmbeñob isujm a tꞌan añoꞌ bʌ i ñaꞌtyʌbal yicꞌot muꞌ bʌ i wen chꞌʌmben isujm chʌ bʌ tyac i chaꞌan jach bʌ mulawil, pero ti a wʌqꞌue i chꞌʌmbeñob i sujmlel a tꞌan jini muꞌ bʌ i yajñel bajcheꞌ alʌl machꞌʌ baꞌan miꞌ qꞌuelob i bʌ ti ñuc.

26 Chʌꞌʌch wen c Tyat, como chʌꞌʌch yom a pusicꞌal.

27 C Tyat ti panchan tsaꞌix i luꞌ acꞌon tic wenta ti pejtyelel chʌ bʌ an tyac. Cheꞌ jeꞌel machꞌan majch miꞌ cʌn c Tyat, jin jach joñon. Miꞌ cʌn c Tyat jeꞌel majchical jach mi yʌqꞌuentyel i cʌñeꞌ chaꞌan ti joñon i Yalobil.

28 Laꞌ baꞌañon ti pejtyeleletla am bʌ al bʌ laꞌ cuch yubil. Mi cʌqꞌueñetla laꞌ cꞌaj laꞌ woj.

29 Laꞌ lac motin cuch laꞌ cuch. Cʌñʌ chʌ bʌ mic cʌntisañet como utson. Pec mic mel c bʌ. Mi quejel laꞌ tyajeꞌ laꞌ cꞌaj oj chaꞌan laꞌ pusicꞌal, cheꞌen.

30 Machꞌan wocol laꞌ cuch cheꞌ mi lac motin cucheꞌ jini laꞌ cuch yubil. Mi cʌqꞌueñetla laꞌ cucheꞌ sejb bʌ. Cheꞌ tiꞌ chaꞌle lajoñel Jesús.