2 Jesús tiꞌ subeyob jini ajcʌntꞌañob i chaꞌan: Melelʌch an cabʌl cꞌajbal yubil pero maꞌix cabʌl ajtroñel, cheꞌen. Cheꞌ ti yʌlʌ ti lajoñel cheꞌ an cabʌl yom bʌ i cotyʌntyel. Pero maꞌix cabʌl ajsubtꞌañob. Jesús ti yʌlʌ: Jin chaꞌan cꞌajtibenla i Yum cꞌajbal chaꞌan i choqueꞌ majlel ajtroñelob ti cꞌajbal, cheꞌ ti yʌlʌ Jesús.

3 Jesús ti yʌlʌ: Cucucla. Mic choquetla majlel ti subtꞌan cheꞌ bajcheꞌ ovejajetla joyol bʌ ti simaron bʌ animal, cheꞌen.

4 Mach yom mi laꞌ chꞌʌmeꞌ majlel mi laꞌ morralic, mi yajnibic laꞌ tyaqꞌuin, mi yanic bʌ laꞌ zapatos. Mach yom mi junticlec cabʌl jalijel laꞌ wʌqꞌuen saludo tyac ti bij.

5 Cheꞌ mi laꞌ wochel ti jumpꞌej otyot mi laꞌ wʌqꞌuen saludos. Mi laꞌ wʌleꞌ: Laꞌ tyʌlic i ñʌchꞌtyʌlel i pusicꞌal ili añob ti ili otyot, cheꞌetla, cheꞌ ti yʌlʌ Jesús.

6 Jesús ti yʌlʌ: Mi yaꞌan quixtyañu yom bʌ i qꞌueletla mi quejel i tyajeꞌ i ñʌchꞌtyʌlel i pusicꞌal. Pero mi mach yom i yubin laꞌ tꞌan maꞌix mi yʌqꞌuentyel i ñʌchꞌtyʌlel i pusicꞌal.

7 Cʌylenla yaꞌ ti otyot. Cꞌuxula, japʌla chʌ bʌ jach yes mi laꞌ pʌsꞌentyel. Jini ajtroñel añʌch chaꞌan i yʌqꞌuentyel i yuchꞌel chaꞌan i tyojol yubil. Mach yom mi laꞌ cꞌaxel ti yambʌ otyot chaꞌan jijliquetla.

8 Cheꞌ mi laꞌ cꞌotyel ti jumpꞌej lum baꞌ miꞌ pʌyetla ochel, cꞌuxula chʌ bʌ mi yʌqꞌueñetla.

9 Lajmisanla jini ajcꞌamꞌañob yaꞌ bʌ añob ti jini lum. Subenla: I yorojlelix wale cheꞌ yom i chaꞌlen yumʌl Dios wʌꞌ baꞌ añetla, cheꞌetla.

10 Pero mi ti cꞌotiyetla ti jumpꞌej lum baꞌ mach yom i qꞌueletla loqꞌuenla yaꞌ ti calle. Subenla:

11 Jinic tyo i lumil lojon coc i chaꞌan ili lum mic chijcun lojon loqꞌuel chaꞌan mi laꞌ ñaꞌtyan mach wen bajcheꞌ ti laꞌ chaꞌle. Pero ñaꞌtyanla yomox i chaꞌlen yumʌl Dios wʌꞌ baꞌañetla, cheꞌetla.

12 Mic subeñetla cheꞌ ti yorojlel melojel más wocol mi quejel i yʌjqꞌuel ti xotꞌmulil ili quixtyañujob cheꞌ bajcheꞌ jini añoꞌ bʌ ti lum Sodoma bʌ i cꞌabaꞌ, cheꞌ ti yʌlʌ Jesús.

13 Pꞌumpꞌuñetla yaꞌ añet bʌ la yaꞌ ti lum Corazín bʌ i cꞌabaꞌ. Pꞌumpꞌuñetla yaꞌ añet bʌ la yaꞌ ti lum Betsaida bʌ i cꞌabaꞌ chaꞌan wocol mi quejel laꞌ wubin. Tsaꞌic pʌsꞌentiyob ti ñoj oniyix yaꞌ bʌ añob ti lum Tiro yicꞌot Sidón jini ñuc bʌ c pꞌʌtyʌlel tsaꞌ bʌ c chaꞌle wʌꞌ baꞌ añetla tsaꞌix i qꞌuextyʌyob i pusicꞌal i cʌyob i mul. Tsaꞌix i xojoyob iꞌicꞌ bʌ pislel. Tsaꞌix i mujluyob i bʌ ti tyan chaꞌan i señʌjlel i chꞌʌjyemlel chaꞌan i mul, cheꞌ ti yʌlʌ Jesús.

14 Pero ti i yorojlel melojel mi quejel laꞌ más aqꞌuentyel más wocol bʌ xotꞌmulil bajcheꞌ tiꞌ ñusʌyob jini añoꞌ bʌ ti Tiro yicꞌot Sidón.

15 Jixcu añet bʌ la ti lum Capernaum bʌ i cꞌabaꞌ chʌncol laꞌ lolon ñaꞌtyan mi quejel laꞌ qꞌuejlel ti ñuc cꞌʌlʌ ti chan. Mi quejel laꞌ majlel baꞌ mi majlel i ñusan wocol chaꞌan ti caj i mul.

16 Jini muꞌ bʌ i ñʌchꞌtyʌbeñetla laꞌ tꞌan mi ñʌchꞌtyʌbeñon c tꞌan jeꞌel. Jini muꞌ bʌ i pꞌajetla, miꞌ pꞌajon jeꞌel. Jini muꞌ bʌ i pꞌajon, miꞌ pꞌajeꞌ Dios tsaꞌ bʌ i chocoyon tyʌlel, cheꞌ ti yʌlʌ Jesús.

17 Tijicñayob ti chaꞌ cꞌotiyob baꞌan Jesús jini setenta ajsubtꞌañob. Ti yʌlʌyob: C Yum, chaꞌan ti caj a cꞌabaꞌ jinic tyo xibajob tiꞌ chꞌujbibeyon lojon c tꞌan, cheꞌob.

18 Jesús ti yʌlʌ: Chʌꞌʌchi. Ti quilʌ bajcheꞌ ti yajli Satanás cheꞌ bajcheꞌ i cꞌʌcꞌal chajc.

19 Tsaꞌix cʌqꞌueyetla laꞌ pꞌʌtyʌlel chaꞌan laꞌ petsꞌ tyeqꞌueꞌ lucum yicꞌot tyaꞌ chʌb yicꞌot chaꞌan mi laꞌ jotben i pꞌʌtyʌlel laj contra. Machꞌan chʌ bʌ mi quejel i tyumbeñetla.

20 Pero mach jin jach yom cꞌajacña laꞌ woj chaꞌan miꞌ chꞌujbibeñetla laꞌ tꞌan jini xibajob pero yom cꞌajacña laꞌ woj jeꞌel chaꞌan tsꞌijbubil laꞌ cꞌabaꞌ yaꞌ ti panchan, cheꞌ ti yʌlʌ Jesús.

21 Ti jim bʌ ora wen cꞌajacña yoj ti yubi Jesús chaꞌan ti Chꞌujul bʌ i Chꞌujlel Dios. Ti yʌlʌ: Mic subeñet a ñuclel c Tyat, i yumet panchan yicꞌot mulawil como ti a wʌqꞌue i chꞌʌmꞌeñob i sujmlel jini muꞌ bʌ yajñel bajcheꞌ alʌl machꞌʌ baꞌan miꞌ qꞌuel i bʌ ti ñuc. Pero machꞌan ti a wʌqꞌue i chꞌʌmꞌen i sujmlel jini am bʌ cabʌl i ñaꞌtyʌbal i chaꞌan jach bʌ mulawil yicꞌot wen yujiloꞌ bʌ miꞌ lolon ñaꞌtyañob. Chʌꞌʌch wen, c Tyat, como chʌꞌʌch yom a pusicꞌal. Cheꞌ tiꞌ chaꞌle oración Jesús.

22 Jesús ti yʌlʌ: Tsaꞌix luꞌ aqꞌuentiyon tic wenta tic Tyat pejtyelel chʌ bʌ tyac an. Maꞌan majch miꞌ yoque cʌñon mi i Yalobilon Dios. Jini jach i bajñel Dios miꞌ yoque cʌñon chaꞌan i Yalobiloñʌch. Machꞌan majch miꞌ cʌñeꞌ majchqui jini c Tyat, joñon c bajñel jach mij cʌñeꞌ c Tyat yicꞌot pejtyelel com bʌ cʌqꞌuen i cʌñeꞌ, cheꞌen.

23 Cheꞌ jini tiꞌ qꞌuele jini ajcʌntꞌañob i chaꞌan. Cheꞌ jini ti bajñel subeyob: Cꞌajacñayob i yoj jini muꞌ bʌ yoque ilañob jini muꞌ bʌ laꞌ wilan.

24 Como mic subeñetla cabʌl jini tsaꞌ bʌ i xiqꞌui i yʌleꞌ Dios yicꞌot yumʌlob ti ñoj oniyix yomob i qꞌuelob jini chʌncol bʌ laꞌ wilan. Pero machꞌan ti yilʌyob. Yom i yubiñob jini chʌncol bʌ laꞌ wubin pero machꞌan ti yubiyob. Cheꞌ ti yʌlʌ Jesús.

25 Cheꞌ jini juntiquil ajcʌntisa chaꞌan mandar i chaꞌan israelob ti majli i pejcan Jesús chaꞌan i yilpusicꞌlen Jesús. Tiꞌ cꞌajtibe: Maestro, ¿chuqui yom mic chaꞌlen chaꞌan mic tyajeꞌ j cuxtyʌlel machꞌʌ yujil jilel? cheꞌen.

26 Jesús tiꞌ jacꞌʌ: ¿Bajcheꞌ tsꞌijbubil tiꞌ mandar Dios? cheꞌen.

27 Jini ajcʌntisa chaꞌan i mandar israelob tiꞌ jacꞌʌ: Pꞌuntyan laꞌ Yum jini laꞌ Dios ti pejtyelel laꞌ pusicꞌal, yicꞌot ti pejtyelel laꞌ chꞌujlel yicꞌot ti pejtyelel laꞌ pꞌʌtyʌlel yicꞌot ti pejtyelel laꞌ ñaꞌtyʌbal. Pꞌuntyan laꞌ piꞌʌlob cheꞌ lajal bajcheꞌ mi laꞌ bajñel pꞌuntyan laꞌ bʌ. Cheꞌ tiꞌ jacꞌʌ jini ajcʌntisa.

28 Cheꞌ jini Jesús tiꞌ sube: Weñʌch bajcheꞌ ti a jacꞌʌ. Mi chʌꞌʌch maꞌ chaꞌlen mi quejel a tyajeꞌ a cuxtyʌlel machꞌʌ yujil jilel.

29 Pero jini ajcʌntisa chaꞌan mandar yom weñʌch mi yubintyel ti Jesús chaꞌan jini tsaꞌ bʌ i lolon cꞌajtibe. Jin chaꞌan tiꞌ sube Jesús: ¿Majchqui jini c piꞌʌlob? cheꞌen.

30 Cheꞌ jini Jesús tiꞌ sube ti lajoñel: An juntiquil israel bʌ winic tsaꞌ bʌ loqꞌui majlel ti Jerusalén chaꞌan i jubel majlel ti Jericó. Ti chujqui ti ajxujchꞌob. Tiꞌ luꞌ chilbeyob chʌ bʌ an i chaꞌan. Jinic tyo i pislel tiꞌ chilbeyob. Tiꞌ lowoyob. Ti majliyob jini ajxujchꞌob. Yomox sajtyel tiꞌ cʌyʌyob jini winic yaꞌ ti bij.

31 Cheꞌ jini ti queji i ñumel majlel juntiquil cura i chaꞌan israelob yaꞌ ti bij. Pero cheꞌ ñac ti yilʌ jini lojwen bʌ ti ñumi majlel ti junxej bij.

32 Cheꞌ jeꞌel ti ñumi juntiquil levita muꞌ bʌ i cotyan curajob ti troñel ti i colem templo israelob ti ñoj oniyix. Cheꞌ ñac ti cꞌoti baꞌan jini lojwen bʌ ti bij tsaꞌ jach ñumi ti junxej bij jeꞌel.

33 Pero juntiquil winic chꞌoyol ti Samaria yaꞌ majlel jeꞌel yaꞌ ti bij. Cheꞌ ñac ti yilʌ jini lojwen bʌ tiꞌ wen pꞌuntyʌ.

34 Cheꞌ jini tiꞌ lʌcꞌʌ jini lojwen bʌ. Tiꞌ tsꞌʌcʌbe i lojwel tyac ti aceite yicꞌot vino. Tiꞌ tyepꞌe i lojwel tyac. Cheꞌ jini tiꞌ cꞌʌchchoco. Tiꞌ pʌyʌ majlel baꞌ mi cꞌaj i yoj. Yaꞌ tiꞌ cʌñʌtyʌ yaꞌyaꞌi.

35 Ti yijcꞌʌlel cheꞌ muqꞌuix quejel i majlel jini winic chꞌoyol bʌ ti Samaria tiꞌ locꞌsʌ chaꞌwejch i tyaqꞌuin. Ti yʌqꞌue i yum jini otyot. Tiꞌ sube: Cʌñʌtyʌbeñon ili winic. Mi más yom tyo i tyojol muꞌ tyo c chaꞌ tyojbeñet cheꞌ mic chaꞌ tyʌlel, cheꞌen.

36 Jesús ti yʌlʌ: ¿Bajcheꞌ maꞌ wʌl, cheꞌ jini, majchqui ili uxtiquil tsaꞌ bʌ i pʌsʌ i bʌ ti i piꞌʌl tsaꞌ bʌ tyʌcꞌlenti ti ajxujchꞌob? cheꞌ tiꞌ cꞌajtibe Jesús.

37 Jini ajcʌntisa chaꞌan i mandar chaꞌan israelob ti yʌlʌ: Jini tsaꞌ bʌ i chaꞌle pꞌuntyaya, cheꞌen. Cheꞌ jini Jesús tiꞌ sube: Cucux, chʌꞌʌch maꞌ chaꞌlen pꞌuntyaya jeꞌel. Cheꞌ ti subenti.

38 Jesús ti bej majli ti bij. Ti cꞌoti ti jumpꞌej saj lum. Yaꞌan juntiquil xꞌixic Marta bʌ i cꞌabaꞌ tsaꞌ bʌ i pʌyʌ ochel ti yotyot.

39 An i yijtsꞌin Marta, María bʌ i cꞌabaꞌ. María ti buchle ti yebal yoc Jesús chaꞌan i ñʌchꞌtyʌben i tꞌan.

40 Pero an cabʌl i pensal Marta chaꞌan i troñel ti yotyot. Ti tyʌli baꞌan Jesús. Ti yʌlʌ: C Yum, ¿machꞌa baꞌan maꞌ qꞌueleꞌ bajcheꞌ miꞌ bajñel cʌyon tic troñel quijtsꞌin? Suben chaꞌan i cotyañon, cheꞌen.

41 Pero Jesús tiꞌ jacꞌʌ: Marta, an cabʌl a pensal chaꞌan jach a troñel.

42 An jach junchajb más cꞌʌjnibal bʌ. María ti yajcʌ jini más wen bʌ. Machꞌan mi quejel i chilbentyel, cheꞌen.