Juntiquil winic tyʌquin bʌ juntsꞌijt i cꞌʌb
3
Ti chaꞌ ochi Jesús tiꞌ templo israelob. Yaꞌan juntiquil winic tyʌquin bʌ juntsꞌijt i cꞌʌb.2 Jini quixtyañujob yom i jopꞌbeñob i mul Jesús. Jin chaꞌan ti queji i wen qꞌuelob mi mucꞌʌch i lajmisan cheꞌ ti qꞌuinilel cꞌaj oj.
3 Cheꞌ jini, Jesús tiꞌ sube jini winic tyʌquin bʌ i cꞌʌb: Laꞌ ti waꞌtyʌl tiꞌ tyojel lojon c wut, cheꞌen.
4 Cheꞌ jini, ti queji i subeñob jini yañoꞌ bʌ: ¿Baqui bʌ yom lac chaꞌlen ti qꞌuinilel cꞌaj oj? ¿Yom ba wen mi lac chaꞌlen o mach wen? ¿Yom ba mi laj cotyan juntiquil chaꞌan mach sajtic, o yom lac tsʌnsan? Cheꞌ ti yʌlʌ Jesús. Chꞌuj ñʌchꞌʌl ti cʌyleyob.
5 Jesús michꞌ ti yilʌ jini yaꞌ bʌ jomolob. Ñoj chꞌʌjyem ti yubi como tiꞌ ñaꞌtyʌ tsʌtsob i pusicꞌal. Tiꞌ sube jini winic: Sʌtsꞌʌ a cꞌʌb, cheꞌen. Cheꞌ jini, tiꞌ sʌtsꞌʌ i cꞌʌb. Wenix ti cʌyle.
6 Jini fariseojob ti loqꞌuiyob majlel. Tiꞌ muchꞌquiyob i bʌ yicꞌot yambʌ junmujchꞌ herodianojob bʌ i cꞌabaꞌ. Ti queji i motin ñaꞌtyañob bajcheꞌ chꞌujbi i tsʌnsañob Jesús.
Yonlel quixtyañujob tiꞌ tiꞌ jaꞌ
7 Cheꞌ jini, Jesús ti loqꞌui majlel. Ti majli tiꞌ tiꞌ colem joyol bʌ jaꞌ yicꞌot ajcʌntꞌañob i chaꞌan. Cabʌl quixtyañu yaꞌ bʌ chumulob ti Galilea tiꞌ tsʌcleyob majlel.
8 Cheꞌ ñac ti yubiyob ñuc tyac bʌ chʌncol i chaꞌlen Jesús cabʌl ti tyʌliyob i qꞌueleꞌ. Ti tyʌliyob yaꞌ bʌ loqꞌuemob ti pañimil Judea bʌ i cꞌabaꞌ, ti lum Jerusalén bʌ i cꞌabaꞌ, ti pañimil Idumea bʌ i cꞌabaꞌ, ti junxej jaꞌ Jordán bʌ i cꞌabaꞌ yicꞌot ti yaloꞌ lum tyac yaꞌ tiꞌ tꞌejl lum Tiro yicꞌot Sidón bʌ i cꞌabaꞌ.
9 Cheꞌ jini, Jesús tiꞌ sube ajcʌntꞌañob i chaꞌan chaꞌan i cʌybentyel jumpꞌej barco baꞌ mi quejel i yochel como cabʌl quixtyañu miꞌ petsꞌob.
10 Como Jesús tiꞌ lajmisʌ cabʌlob. Jin chaꞌan pejtyel añoꞌ bʌ i cꞌamꞌan yomob i wersa jajpꞌiñob ochel i bʌ baꞌan Jesús chaꞌan yomob i tyʌleꞌ.
11 Cheꞌ ñac ti yilʌyob Jesús, jini tyʌcꞌlʌbiloꞌ bʌ ti xiba ti ñocleyob tiꞌ tꞌejl. Ti cꞌam bʌ tꞌan ti yʌlʌyob: Jatyet i Yalobilet bʌ Dios, cheꞌob.
12 Pero Jesús tsʌts tiꞌ tiqꞌui jini xibajob chaꞌan mach yom i yubin Jesús cheꞌ xibajob mi yʌcꞌ ti cʌjñel.
Jesús ti yajcʌ docejob
13 Ti wiꞌil Jesús ti letsi majlel ti wits. Tiꞌ pʌyʌ jini yom bʌ i yajcan chaꞌan majlic yicꞌot. Ti tyʌliyob.
14 Ti yajcʌ doce winicob chaꞌan i piꞌleñob ti xʌmbal chaꞌan i waꞌchocoñob ti yeꞌtyel chaꞌan mi majlelob ti subtꞌan.
15 Ti yʌqꞌueyob i pꞌʌtyʌlel chaꞌan miꞌ lajmisan xcꞌamꞌañob yicꞌot chaꞌan miꞌ chocob loqꞌuel xibajob.
16 Jiñobʌch i cꞌabaꞌ jini docejob: Simón jini chaꞌchajp bʌ i cꞌabaꞌ Pedro bʌ mi yʌjlel jeꞌel.
17 Jacobo i yalobil Zebedeo yicꞌot Juan i yijtsꞌin Jacobo tsaꞌ bʌ i yotsʌbeyob i yʌlas cꞌabaꞌ Boanerges, i sujmlel ti lac tꞌan cheꞌ bajcheꞌ i tꞌan chajc bʌ winic,
18 yicꞌot Andrés yicꞌot Felipe yicꞌot Bartolomé yicꞌot Mateo yicꞌot Tomás yicꞌot Jacobo i yalobil Alfeo, yicꞌot Tadeo yicꞌot Simón chꞌoyol bʌ baꞌan junmujchꞌ cananistajob bʌ i cꞌabaꞌ,
19 yicꞌot Judas Iscariote, jini muꞌ bʌ quejel i yʌcꞌ ti cʌchol Jesús.
Tiꞌ subeyob Jesús an i pꞌʌtyʌlel xiba yicꞌot
Wiꞌil ti ochiyob ti jumpꞌej otyot Jesús yicꞌot ajcʌntꞌañob i chaꞌan.
20 Tiꞌ chaꞌ muchꞌquiyob i bʌ yonlel quixtyañujob mi jinic tyo maꞌix ti mejliyob ti uchꞌel Jesús yicꞌot jini docejob.
21 Cheꞌ ñac ti yubiyob i piꞌʌlob Jesús ti tyʌliyob chaꞌan i pʌyob loqꞌuel chaꞌan i cotyan como ti yʌlʌyob: Sojquemix i jol, cheꞌob.
22 Jini ajcʌntisajob chaꞌan i mandar israelob chꞌoyoloꞌ bʌ ti Jerusalén ti lolon alʌyob: An i yajaw xiba muꞌ bʌ i pejcʌntyel ti Beelzebú bʌ i cꞌabaꞌ tiꞌ pusicꞌal Jesús, cheꞌob. Tiꞌ pꞌʌtyʌlel jach Beelzebú miꞌ choc loqꞌuel xibajob. Cheꞌ ti lon alʌyob.
23 Jin chaꞌan Jesús tiꞌ pʌyʌ tyʌlel jini quixtyañujob. Tiꞌ cʌntisʌyob ti lajoñel tyac. Ti yʌlʌ: ¿Chꞌujbi ba i bajñel choc loqꞌuel i bʌ Satanás? Mach chꞌujbi.
24 Mi ti queji i tꞌoxob i bʌ añoꞌ bʌ tiꞌ wenta juntiquil yumʌl mi ti queji i periyalin i bʌ mi quejel i lajmisʌntyel i yeꞌtyel.
25 Mi ti quejiyob ti periyal añoꞌ bʌ ti jumpꞌej otyot, mach jaleyob.
26 Chʌꞌʌch Satanás jeꞌel mach chꞌujbi i bajñel choc loqꞌuel i bʌ. Mi tsaꞌqui queji i periyalin i bʌ mach jale. Mi quejel i jilel i pꞌʌtyʌlel.
27 Maꞌ majch chꞌujbi i yochel ti yotyot pꞌʌtyʌl bʌ winic i chilben chʌ bʌ an i chaꞌan. Jin jach mi tiꞌ ñaxan cʌchʌ, chꞌujbi i yochel i chilben chʌ bʌ an i chaꞌan ti yotyot.
28 Melel mic subeñetla, chꞌujbiyʌch i luꞌ ñusʌbentyelob pejtyel i mul quixtyañu yicꞌot pejtyel machꞌʌ wen bʌ tꞌan muꞌ bʌ i chaꞌlen tiꞌ contra i piꞌʌlob.
29 Pero mi an majch miꞌ chaꞌlen leco bʌ tꞌan tiꞌ contra Chꞌujul bʌ i Chꞌujlel Dios, cheꞌ mi yʌl chaꞌan tiꞌ pꞌʌtyʌlel xiba tiꞌ chaꞌle jini tsaꞌ bʌ i chaꞌle Chꞌujul bʌ i Chꞌujlel Dios mach chꞌujbi i ñusʌbentyel i mul. Ti beleꞌ qꞌuin añʌch i mul. Cheꞌ ti yʌlʌ Jesús.
30 Chʌꞌʌch ti yʌlʌ Jesús chaꞌan ti lolon alʌyob an xiba yicꞌot.
I ñaꞌ Jesús yicꞌot i yijtsꞌiñob
31 Ti jumucꞌlel ti cꞌoti i ñaꞌ yicꞌot i yijtsꞌiñob Jesús. Yaꞌ ti cʌyleyob ti pañimil. Tiꞌ xiqꞌuiyob ti pʌyol Jesús.
32 Quixtyañujob yaꞌ bʌ buchulob tiꞌ suttyʌlel Jesús tiꞌ subeyob: Yaꞌ añob ti pañimil a ñaꞌ yicꞌot a wijtsꞌiñob. Chʌncol i sʌclañetyob. Cheꞌ ti subenti Jesús.
33 Jesús tiꞌ jacꞌbeyob: ¿Majchqui jini c ñaꞌ, quijtsꞌiñob mi laꞌ wʌl? cheꞌen.
34 Tiꞌ luꞌ sut qꞌuele jini yaꞌ bʌ buchulob. Ti yʌlʌ: Qꞌuelela ilayi c ñaꞌetla, quijtsꞌiñetla yubil.
35 Como majchical jach muꞌ bʌ i chaꞌlen bajcheꞌ yom i pusicꞌal Dios, jiñʌch quijtsꞌin, jiñʌch c ñaꞌ yubil. Cheꞌ ti yʌlʌ Jesús.