2 Cheꞌ jini chaꞌtiquil uxtiquil fariseojob ti queji i cꞌajtibeñob jini ajcʌntꞌañob i chaꞌan Jesús: ¿Chucoch mi laꞌ chaꞌlen ticꞌbil bʌ cheꞌ ti qꞌuinilel cꞌaj oj? cheꞌob.

3 Jesús tiꞌ jacꞌbeyob: ¿Machꞌa baꞌan ti laꞌ qꞌuele yaꞌ ti jun bajcheꞌ tiꞌ chaꞌle David ti ñoj oniyix cheꞌ ñac ti yubiyob wiꞌñal David yicꞌot i piꞌʌlob?

4 Ti ochi yaꞌ ti yotyot Dios David. Tiꞌ chꞌʌmʌ waj tsaꞌ bʌ ajqꞌui ti mesa tsaꞌ bʌ i yʌcꞌʌyob chaꞌan i majtyan Dios. Tiꞌ cꞌuxu David. Ti yʌqꞌue i piꞌʌlob jeꞌel. Pero ticꞌbil chaꞌan maꞌan majch miꞌ cꞌuxeꞌ jini waj. Jin jach curajob miꞌ cꞌuxob, cheꞌ ti yʌlʌ Jesús.

5 Tiꞌ subeyob jeꞌel: Joñoñʌch i Piꞌʌlon Quixtyañujob. An tic wenta cʌleꞌ chʌ bʌ yom ujtic ti qꞌuinilel cꞌaj oj cheꞌ ti yʌlʌ Jesús cheꞌ cu i yʌcꞌbal.

6 Ti yambʌ i qꞌuinilel cꞌaj oj ti ochi Jesús ti i templo israelob. Ti queji ti cʌntisa. Yaꞌan juntiquil winic tyʌquin ñoj bʌ i cꞌʌb.

7 Jini ajcʌntisajob i chaꞌan israelob yicꞌot fariseojob tiꞌ wen qꞌueleyob Jesús mi mucꞌʌch i lajmisan cheꞌ ti qꞌuinilel cꞌaj oj chaꞌan yomob i jopꞌben i mul Jesús.

8 Pero Jesús yujil isujm chʌ bʌ tiꞌ pensaliyob tiꞌ pusicꞌal. Cheꞌ jini tiꞌ sube jini winic tyʌquin bʌ i cꞌʌb: Tyejchen. Laꞌ ti waꞌtyʌl wʌꞌ tiꞌ tyojel lojon c wut, cheꞌen. Jini winic tsʌꞌʌch tyejchi. Ti waꞌle tiꞌ tyojelob.

9 Cheꞌ jini Jesús tiꞌ sube jini yañoꞌ bʌ. Mi quej j cꞌajtibeñetla junchajb: ¿Baqui bʌ yom lac meleꞌ ti qꞌuinilel cꞌaj oj? ¿Wen ba yom mi lac chaꞌlen o mach wen yom mi lac chaꞌlen? ¿Yom ba mi laj cotyan juntiquil chaꞌan mach sajtic, o mach yom mi laj cotyan? cheꞌ ti yʌlʌ Jesús.

10 Cheꞌ jini Jesús tiꞌ luꞌ qꞌuele pejtyelel yaꞌ bʌ añob ti joytyʌlel. Tiꞌ sube jini winic: Sʌtsꞌʌ a cꞌʌb, cheꞌ Jesús. Cheꞌ jini, jini winic tiꞌ sʌtsꞌʌ i cꞌʌb. Ti waꞌ lajmi.

11 Pero jini yañoꞌ bʌ ti wen michꞌʌyob. Ti queji i cꞌajtibeñob i bʌ chʌ bʌ mi quejel i tyumbeñob Jesús.

12 Ti jim bʌ qꞌuin tyac ti majli Jesús ti wits chaꞌan i chaꞌlen oración. Cꞌʌlʌ ti ñumi acꞌbʌlel tiꞌ pejcʌ Dios ti oración.

13 Cheꞌ ti sʌcꞌʌ, Jesús tiꞌ pʌyʌ tyʌlel jini ajcʌntꞌañob i chaꞌan. Ti yajcʌ loqꞌuel docejob tsaꞌ bʌ i pejcʌ jeꞌel ti yajcʌbiloꞌ bʌ ajsubtꞌañob ñumel.

14 Jiñob i cꞌabaꞌob tsaꞌ bʌ i yajcʌ Jesús: Simón tsaꞌ bʌ yotsʌbe i chaꞌchajplel i cꞌabaꞌ Pedro, Andrés i yijtsꞌin Simón; Jacobo yicꞌot Juan, Felipe yicꞌot Bartolomé,

15 Mateo yicꞌot Tomás, Jacobo i yalobil Alfeo; Simón chꞌoyol bʌ baꞌan junmujchꞌ cananista bʌ i cꞌabaꞌ;

16 Judas i yijtsꞌin Jacobo yicꞌot Judas Iscariote jini tsaꞌ bʌ i yʌcꞌʌ ti cʌchol Jesús ti yan tyo bʌ ora.

17 Jesús ti jubi tyʌlel ti wits yicꞌot ajcʌntꞌañob i chaꞌan. Yaꞌ ti cʌyle yicꞌotyob yaꞌ ti joctyʌl. Yaꞌan cabʌl quixtyañu tsaꞌ bʌ cꞌotiyob chꞌoyolob ti pejtyelel pañimil Judea bʌ i cꞌabaꞌ yicꞌot Jerusalén bʌ lum yicꞌot lum Tiro yicꞌot Sidón yaꞌ bʌ an tiꞌ tiꞌ colem jaꞌ. Ti cꞌotiyob chaꞌan i yubibeñob i tꞌan Jesús yicꞌot chaꞌan mi lajmisʌntyel.

18 Jini tyʌcꞌlʌbiloꞌ bʌ ti xibajob ti lajmisʌntiyob jeꞌel.

19 Ti pejtyelel quixtyañujob yom i tyʌlob Jesús como chaꞌan ti i pꞌʌtyʌlel tiꞌ lajmisʌyob ti pejtyelelob.

20 Cheꞌ jini Jesús tiꞌ qꞌuele jini ajcʌntꞌañob i chaꞌan. Tiꞌ subeyob: Tijicñayetla machꞌʌ baꞌan chʌ bʌ yes an laꞌ chaꞌan como miꞌ chaꞌlen yumʌl Dios ti laꞌ pusicꞌal.

21 Tijicñayetla am bʌ laꞌ wiꞌñal wale iliyi como mi quejel laꞌ ñajꞌan. Tijicñayetla muꞌ bʌ laꞌ chaꞌlen uqꞌuel chaꞌan chꞌʌjyemlel como muꞌ tyo quejel laꞌ chaꞌle tseꞌñal.

22 Tijicñayetla cheꞌ miꞌ michꞌqꞌueletla quixtyañujob cheꞌ miꞌ choquetla loqꞌuel ti i tyojlelob, cheꞌ mi laꞌ wʌlꞌentyel, cheꞌ miꞌ pꞌajetla, cheꞌ bajcheꞌ mi mach weñetla chaꞌan tij caj Joñon i Piꞌʌlon Quixtyañujob, cheꞌ ti yʌlʌ Jesús.

23 Wen tijicñisan laꞌ bʌ ti jim bʌ ora. Laꞌ ñucꞌac laꞌ pusicꞌal como mi quejel laꞌ wʌqꞌuentyel ñuc bʌ laꞌ majtyan yaꞌ ti panchan. Cheꞌ jeꞌel ti ñoj oniyix ti tyʌcꞌlʌyob jini tsaꞌ bʌ i xiqꞌui i yʌleꞌ Dios i yumob jini quixtyañujob wʌꞌ bʌꞌan wale.

24 Pero pꞌumpꞌuñetla am bʌ cabʌl chʌ bʌ an laꞌ chaꞌan como tsaꞌix laꞌ wʌ ubin cꞌajacña bʌ laꞌ woj.

25 Pꞌumpꞌuñetla ñajetix bʌ la wale cheꞌ an cabʌl chʌ bʌ yes an laꞌ chaꞌan como mi quejel laꞌ wubin wiꞌñal. Pꞌumpꞌuñetla muqꞌuet bʌ la ti tseꞌñal chaꞌan wen añetla mi laꞌ lolon ubin wale. Mi quejel laꞌ chaꞌlen uqꞌuel chaꞌan ti laꞌ chꞌʌjyemlel.

26 Pꞌumpꞌuñetla cheꞌ pejtyelel quixtyañujob miꞌ tyajetla ti wen bʌ tꞌan. Chʌꞌʌch tiꞌ lolon tyajbeyob ti wen bʌ tꞌan jeꞌel jini xlot tsaꞌ bʌ lolon alʌ ti xijqꞌui i yʌleꞌ Dios jini i yumob ti ñoj oniyix. Cheꞌ tiꞌ chaꞌle cʌntisʌ Jesús.

27 Jesús ti bej alʌ: Pero jatyetla muꞌ bʌ laꞌ ñʌchꞌtyañon, mic subeñetla: Pꞌuntyan laꞌ contrajob. Chaꞌliben wen bʌ jini muꞌ bʌ i tsꞌaꞌleñetla.

28 Subenla wen bʌ muꞌ bʌ i chꞌʌquetla. Pejcʌbenla Dios ti oración jini muꞌ bʌ i tyʌcꞌlañetla.

29 Mi an majch miꞌ jatsꞌet ti jumpꞌej a choj, aqꞌuen i chaꞌ jatsꞌet ti junwejl a choj jeꞌel. Mi an majch wersa yom i chꞌʌmeꞌ a tsuts bujc aqꞌuen i chꞌʌmeꞌ a bujc jeꞌel.

30 Majchical miꞌ cꞌajtibeñet, aqꞌuen. Jini muꞌ bʌ i wersa chꞌʌmeꞌ chʌ bʌ an a chaꞌan mach a pensalin a chaꞌ suben i sutquibeñet.

31 Cheꞌ bajcheꞌ a wom a melbentyel wen bʌ chʌꞌʌch yom a melben yambʌ a piꞌʌl jeꞌel.

32 Mi chʌncol jach laꞌ pꞌuntyan jini muꞌ bʌ i pꞌuntyañetla, ¿wen ba mi laꞌ chaꞌlen, maꞌ wʌl? Como chʌꞌʌch miꞌ pꞌuntyañob i piꞌʌlob jini machꞌʌ baꞌan ochemob. Cheꞌ jini lajal jach mi laꞌ chaꞌlen pꞌuntyaya bajcheꞌ miꞌ pꞌuntyan i bʌ simaroñoꞌ bʌ jeꞌel.

33 Mi chʌncol jach laꞌ chaꞌlibenla wen bʌ jini muꞌ bʌ i chaꞌlibeñetla wen bʌ jeꞌel, ¿wen ba mi laꞌ chaꞌlen, cheꞌ jini? Machꞌan, como chʌꞌʌch miꞌ chaꞌlen xmulilob jeꞌel.

34 Mi chʌncol jach laꞌ wʌcꞌ ti qꞌuex jini chꞌujbi bʌ i chaꞌ aqꞌueñetla, ¿wen ba mi laꞌ chaꞌlen? Como lajalet jach la yicꞌot simaroñoꞌ bʌ, cheꞌ jini.

35 Pero jatyetla wersa yom mi laꞌ pꞌuntyan laꞌ contrajob. Yom mi laꞌ chaꞌliben wen bʌ. Yom mi laꞌ wʌqꞌuen chʌ bʌ miꞌ cꞌajtibeñetla ti qꞌuex cheꞌ machꞌan mi laꞌ pijtyan i jol. Mi quejel laꞌ wʌqꞌuentyel cabʌl laꞌ tyojol yubil. Mi quejel laꞌ wajñel ti yalobil Dios machꞌʌ baꞌan i pꞌisol i ñuclel. Como uts Dios jeꞌel yicꞌot jini machꞌʌ baꞌan wocox i yʌlʌyob tiꞌ pusicꞌal yicꞌot simaroñoꞌ bʌ.

36 Pꞌuntyanla laꞌ piꞌʌlob cheꞌ bajcheꞌ miꞌ pꞌuntyañetla laꞌ Tyat am bʌ ti panchan jeꞌel. Cheꞌ ti yʌlʌ Jesús.

37 Jesús ti bej alʌ: Mach yom laꞌ lolon al mi an i mul cheꞌ max tyo ti yoque tsictyay mi an o mi machꞌan. Cheꞌ jini, maꞌan mi yʌl Dios mi añʌch laꞌ mul. Mach yom mi laꞌ lolon al ti xmulil yañoꞌ bʌ cheꞌ max tyo tsictyay. Cheꞌ jini machꞌan mi yʌl Dios mi xmuliletla. Ñusʌbeñob i mul. Cheꞌ jini Dios miꞌ ñusʌbeñetla laꞌ mul jeꞌel.

38 Aqꞌuenla yañobꞌ bʌ. Dios mi quej i yʌqꞌueñetla jeꞌel. Dios mi quej i yʌqꞌueñetla wen bʌ i pꞌisol cheꞌ bajcheꞌ mi tsʌts tejnibil chaꞌan chejpʌbil chʌncol ti wejtyʌyel mi quejel i yʌqꞌueñetyob. Como cheꞌ bajcheꞌ mi laꞌ pꞌisben quixtyañujob chʌꞌʌch mi quejel laꞌ wʌqꞌuentyel jeꞌel. Cheꞌ ti yʌlʌ Jesús.

39 Jesús tiꞌ sube ili lajoñel: ¿Chꞌujbi ba i pʌsꞌen majlel bij mutsꞌul bʌ i wut yambʌ mutsꞌul bʌ i wut? Machꞌan. Muꞌ jach i yajlel ti chaꞌticlel ti jowol bʌ lum.

40 Maꞌan ajcʌntꞌan muꞌ bʌ i más cʌñeꞌ bajcheꞌ mi cʌntisʌntyel ti ajcʌntisa. Pero an ajcʌntꞌan muꞌ bʌ i tyajeꞌ i ñaꞌtyʌbal ajcʌntisa i chaꞌan cheꞌ tsaꞌix ujti i cʌñeꞌ.

41 ¿Bajcheꞌqui isujm cheꞌ chꞌujbi a wilan i tsꞌubil tyeꞌ ti wut a wermañu cheꞌ machꞌan maꞌ pensalin mi an colem xujcꞌuꞌ tyeꞌ ti a wut yubil?

42 ¿Bajcheꞌqui chꞌujbi a suben a wermañu: Quermañu, aqꞌueñon locꞌsʌbeñet jini tsꞌubil tyeꞌ am bʌ ti a wut, cheꞌet, cheꞌ machꞌan maꞌ pensalin mi an colem xujcꞌu tyeꞌ ti a wut? Chaꞌchajb a pensal. Ñaxan locꞌsan jini colem xujcꞌu tyeꞌ am bʌ ti a wut. Cheꞌ jini chꞌujbi a más qꞌueleꞌ chaꞌan a locꞌsʌben i tsꞌubil tyeꞌ am bʌ ti i wut a wermañu yubil. Cheꞌ tiꞌ chaꞌle cʌntisa Jesús chaꞌan jini más on bʌ i mul muꞌ bʌ i lolon aleꞌ an i mul i piꞌʌl.

43 Maꞌix wen bʌ tyeꞌ muꞌ bʌ i yʌcꞌ machꞌʌ wen bʌ i wut. Jini machꞌʌ wen bʌ tyeꞌ mach chꞌujbi i yʌcꞌ wen bʌ i wut.

44 Mi cʌjñel jujuntyejc tyeꞌ chaꞌan ti i wut. Machꞌan mi lac tyucꞌ higo bʌ wut tyeꞌ ti tsꞌʌbabol. Cheꞌ jeꞌel maꞌix mi lac tyuqꞌueꞌ tsꞌujsub ti chꞌixol.

45 Jini wen bʌ quixtyañu mi yʌleꞌ wen bʌ tꞌan chaꞌan wen bʌ am bʌ tiꞌ pusicꞌal. Jini machꞌʌ wen bʌ quixtyañu mi yʌleꞌ machꞌʌ wen chaꞌan mach wen am bʌ tiꞌ pusicꞌal. Como chʌ bʌ jach miꞌ butꞌeꞌ i pusicꞌal quixtyañu mi tsictiyel ti i tꞌan.

46 Jesús tiꞌ bej chaꞌle cʌntisʌ. Ti yʌlʌ: ¿Chucoch mi laꞌ lolon subeñon: C Yum, cheꞌetla, pero machꞌan mi laꞌ jacꞌ muꞌ bʌ c subeñetla?

47 Mi quejel c subeñetla bajcheꞌ an jini muꞌ bʌ i tyʌlel baꞌañon, muꞌ bʌ i yubibeñon c tꞌan muꞌ bʌ i chꞌujbiben c tꞌan.

48 Lajalʌch bajcheꞌ juntiquil winic tsaꞌ bʌ i mele i yotyot. Pero ñaxan tyam tiꞌ piqui lum chaꞌan miꞌ tyajeꞌ tyun baꞌ miꞌ waꞌchocon i tsꞌajquil i yebal yotyot. Cheꞌ ñac ti wen tyʌmꞌʌ jaꞌ cꞌʌlʌ ti ochi ti maꞌtyeꞌel. Wen tsʌts tiꞌ jatsꞌʌ otyot jini jaꞌ pero machꞌan ti nijcʌyi otyot como tsʌts ti tsꞌuyle tiꞌ pam tyun.

49 Pero jini muꞌ bʌ i yubibeñon c tꞌan pero machꞌan miꞌ chꞌujbibeñon muꞌ bʌ c tyumbin lajal bajcheꞌ winic tsaꞌ bʌ i mele i yotyot ti pam jach lum. Machꞌan tyam bʌ i tsꞌajquil i yebal otyot. Cheꞌ ñac ti wen tyʌmꞌʌ jaꞌ wen tsʌts tiꞌ jatsꞌʌ otyot jini jaꞌ. Ti ora ti luꞌ jejmi jini otyot. Cheꞌ ti yʌlʌ Jesús ti lajoñel.