2 Ti queji ti cʌntisa Jesús. Ti yʌlʌ:

3 Tijicñayob jini muꞌ bʌ i ñaꞌtyañob chaꞌan machꞌan i bajñel wenlel i pusicꞌal como jiñob mi quejel i yajñel baꞌ miꞌ chaꞌlen yumʌl Dios yaꞌ ti panchan.

4 Tijicñayob jini chꞌʌjyemoꞌ bʌ como mi quejel i ñuc isʌbentyelob i pusicꞌal ti Dios.

5 Tijicñayob jini muꞌ bʌ i juꞌsan i bʌ como mi quejel i yʌqꞌuentyelob ti pejtyelel wen tyac bʌ i chaꞌan bʌ mulawil bajcheꞌ ti wʌ alʌ Dios mi quejel i yʌqꞌuentyelob.

6 Tijicñayob jini añoꞌ bʌ i wiꞌñal yubil chaꞌan wersa yom ajnic ti tyoj bajcheꞌ yom Dios, como Dios mi quejel i cotyan chaꞌan mi yajñel ti tyoj.

7 Tijicñayob jini muꞌ bʌ i pꞌuntyañob i piꞌʌlob chaꞌan yom i cotyañob, como mi quejel i pꞌuntyʌntyelob ti Dios.

8 Tijicñayob jini sʌcoꞌ bʌ i pusicꞌal como mi quejel i qꞌuelob Dios.

9 Tijicñayob jini muꞌ bʌ i ñʌchꞌtisʌbeñob i pusicꞌal quixtyañujob chaꞌan mi lajmelob ti periyal, como Dios mi quejel i pejcañob ti i yalobil jini muꞌ bʌ i lajmisan periyal.

10 Tijicñayob jini chʌncol bʌ i lolon tyʌcꞌlʌntyelob ti i piꞌʌlob chaꞌan ti caj mi yajñelob ti tyoj, como mi quejel i yʌqꞌuentyelob i yajñel baꞌ miꞌ chaꞌlen yumʌl Dios yaꞌ ti panchan.

11 Yom tijicñayetla cheꞌ mi laꞌ lolon alꞌentyel, cheꞌ mi laꞌ tsꞌaꞌlentyel, cheꞌ an cabʌl lolon jopꞌtꞌan ti laꞌ tyojlel chaꞌan ti caj ti laꞌ chꞌujbiyon.

12 Mi chʌꞌʌch mi yujtyel, yom cꞌajacña laꞌ woj. Laꞌ ñʌchꞌlec laꞌ pusicꞌal como mi quejel laꞌ wʌqꞌuentyel ñuc bʌ laꞌ majtyan yaꞌ ti panchan. Chʌꞌʌch jeꞌel ti tyʌcꞌlʌntiyob jini tsaꞌ bʌ i xiqꞌui yʌleꞌ Dios ti ñoj oniyix. Cheꞌ ti yʌlʌ Jesús.

13 Jesús tiꞌ bej chaꞌle cʌntisʌ. Ti yʌlʌ: Jatyetla i yʌtsꞌmiletla mulawil yubil. Como chaꞌan ti laꞌ caj an tsaꞌ bʌ uts isʌbentiyob. Pero mi ti jili i tsajel machꞌan chʌ bʌ i cꞌʌñʌ i chaꞌ tsaj isʌntyel jini atsꞌam. Machꞌan sajlic i cꞌʌjnibal. Cheꞌ jach mi chojquel yaꞌ baꞌ miꞌ pejchicꞌtyecꞌ quixtyañu.

14 Jatyetla i sʌcleletla mulawil yubil. Como cheꞌ bajcheꞌ colem bʌ lum yaꞌ ti pam bujtyʌl mach chꞌujbi mʌctyʌntyel pero bej tsiquilʌch. Lajal bajcheꞌ jini yom bej tsiquil i yutslel laꞌ pusicꞌal, cheꞌen.

15 Cheꞌ mi tsujqꞌuel cas machꞌan mi yʌjqꞌuel ti yebal jumpꞌej caja. Pero mi yʌjqꞌuel ti jocꞌlib chaꞌan mi luꞌ tsictiyel i cꞌʌcꞌal baꞌan pejtyelel añoꞌ bʌ ti otyot, cheꞌen.

16 Cheꞌ jeꞌel jatyetla yom mi laꞌ pʌseꞌ an i sʌclel laꞌ pusicꞌal chaꞌan miꞌ qꞌuel quixtyañujob. Cheꞌ jini cheꞌ mi yilañob jini wen bʌ laꞌ chaꞌlibal mi quejel i subob i ñuclel lac Tyat am bʌ ti panchan, cheꞌen.

17 Jesús tiꞌ bej chaꞌle cʌntisa. Ti yʌlʌ: Mach yom laꞌ lolon chꞌujbin chaꞌan ti tyʌliyon c lajmisan i mandar Moisés mi jinic i cʌntisa jini tsaꞌ bʌ i xiqꞌui yʌleꞌ Dios ti ñoj oniyix. Machꞌan ti tyʌliyon c lajmisan. Pero ti tyʌliyon chaꞌan mic tsꞌʌctisan tsaꞌ bʌ ñaxan alʌ Dios ti ñoj oniyix.

18 Como melelʌch mic subeñetla. Cꞌʌlʌ cheꞌ an tyo panchan yicꞌot mulawil, machꞌan mi quejel i yajpel mi jumpꞌejlic letra mi jumpꞌejlic punto ti jini mandar tsaꞌ bʌ tsꞌijbunti ti ñoj oniyix jintyo mi tsꞌʌctiyel ti pejtyelel bajcheꞌ ti wʌ ajli.

19 Jin chaꞌan, majchical jach miꞌ ñusan baꞌical bʌ mandar aunque mach ñuc bʌ mandar miꞌ lolon ñaꞌtyan yicꞌot mi ti cʌntisʌ yambʌ quixtyañujob chaꞌan miꞌ ñusan jini mandar jeꞌel, mi quejel i qꞌuejlel cheꞌ bajcheꞌ maꞌix i cꞌʌjnibal bʌ quixtyañu yaꞌ ti panchan baꞌ muꞌ ti yumʌl Dios. Pero jini muꞌ bʌ i chꞌujbiñob jini mandar tyac yicꞌot miꞌ cʌntisan quixtyañujob i chꞌujbiñob mi quejel i qꞌuejlel ti ñuc yaꞌ ti panchan baꞌ muꞌ ti yumʌl Dios.

20 Como mic subeñetla: Mi machꞌan mi laꞌ wajñel ti más tyoj cheꞌ bajcheꞌ mi yajñelob jini junmujchꞌ ajcʌntisajob chaꞌan i mandar israelob mi jinic quixtyañu fariseojoꞌ bʌ i cꞌabaꞌ machꞌan mi quejel laꞌ wʌqꞌuentyel laꞌ wochel yaꞌ ti panchan baꞌ muꞌ ti yumʌl Dios. Cheꞌ tiꞌ chaꞌle cʌntisa Jesús.

21 Jesús tiꞌ bej chaꞌle cʌntisa. Ti yʌlʌ: Tsaꞌix laꞌ wubi bajcheꞌ ti subentiyob laꞌ yumob ti ñoj oniyix: Mach laꞌ chaꞌlen tsʌnsa. Majchical muꞌ bʌ i chaꞌlen tsʌnsa, wersa mi quejel i mel i bʌ, cheꞌob.

22 Pero joñon mic subeñetla: Majchical jach miꞌ lolon michꞌqꞌuel i piꞌʌl wersa mi quejel i mel i bʌ. Jini muꞌ bʌ i wajlen juntiquil i piꞌʌl mi quejel i mel i bʌ baꞌan añoꞌ bʌ yeꞌtyel. Jini muꞌ bʌ i suben i piꞌʌl ti sojquem i jol chaꞌan ti caj michꞌ yicꞌot mi quejel i chojquel ochel ti xotꞌmulil ti cꞌajc.

23 Cheꞌ chʌncol a majlel a wʌqꞌuen i majtyan Dios yaꞌ ti yajnib baꞌ mi pulbentyel i majtyan Dios mi ti cꞌajtiyi a chaꞌan mi an chʌ bʌ ti mulil ti a chaꞌle tiꞌ contra juntiquil a piꞌʌl mi lolon ubin,

24 poj cʌyʌ jini i majtyan Dios yaꞌ ti tꞌejl i yajnib baꞌ mi pulbentyel i majtyan Dios. Cucu. Ñaxan pejcan a wermañu chaꞌan mi lajmel jini contra. Cheꞌ jini chꞌujbi a chaꞌ sujtyel yaꞌ baꞌ ti a cʌyʌ i majtyan Dios chaꞌan maꞌ wʌqꞌuen Dios.

25 Mi an majch miꞌ contrajiñet, yom i pʌyet majlel chaꞌan mi laꞌ mel laꞌ bʌ baꞌan am bʌ i yeꞌtyel yom mi laꞌ waꞌ pejcan ti ora chaꞌan miꞌ chaꞌ uts an a wicꞌot cheꞌ añet tyo la ti bij, cheꞌ max tyo cꞌotyetla baꞌan jini am bʌ i yeꞌtyel. Como jini am bʌ i yeꞌtyel mi quejel i yʌqꞌuet tiꞌ cꞌʌb policía. Jini policía mi quejel i yotsañet ti cʌchol.

26 Melel mic subeñet cheꞌ yaꞌix añet ti cʌchol maꞌ mi quejel a chaꞌ loqꞌuel jintyo maꞌ luꞌ tyoj a mul. Cheꞌ tiꞌ chaꞌle cʌntisa Jesús.

27 Jesús tiꞌ bej chaꞌle cʌntisa. Ti yʌlʌ: Tsaꞌix laꞌ wubi tsaꞌ bʌ ajli ti ñoj oniyix: Mach a pejcʌben i yijñam a piꞌʌl. Cheꞌ ti ajli.

28 Pero joñon mic subeñetla: Mi an majch miꞌ qꞌueleꞌ xꞌixic chaꞌan tiꞌ bajñel i pusicꞌal miꞌ ñaꞌtyan chaꞌan wersa yom i pejcan, tsaꞌix i chaꞌle tsuculel yicꞌot tiꞌ pusicꞌal.

29 Mi chʌncol i yʌqꞌueñet a wotsan a mul a ñoj bʌ a wut locꞌsan ti ora. Choco loqꞌuel. Más wen mi ti a sʌtyʌ jumpꞌej a wut cheꞌ bajcheꞌ mi tsꞌʌcʌl a bʌcꞌtyal ti chojquiyet ochel ti xotꞌmulil ti cꞌajc.

30 Mi chʌncol i yʌqꞌueñet a wotsan a mul a ñoj bʌ a cꞌʌb waꞌ tsepe loqꞌuel. Choco ti ñajt. Más wen cheꞌ xmol cꞌʌbet cheꞌ mi tsꞌʌcʌl a bʌcꞌtyal ti chojquiyet ochel ti xotꞌmulil ti cꞌajc. Chʌꞌʌch tiꞌ chaꞌle cʌntisa Jesús.

31 Jesús tiꞌ bej chaꞌle cʌntisa. Ti yʌlʌ: Yicꞌot jeꞌel ti ajli ti ñoj oniyix: Majchical miꞌ cʌyeꞌ i yijñam yom i yʌqꞌuen i juñilel chaꞌan tsiquil cʌyʌlix i chaꞌan. Cheꞌ ti ajli ti ñoj oniyix.

32 Pero joñon mic subeñetla: Mi juntiquil winic miꞌ cʌyeꞌ i yijñam chaꞌan i pʌyeꞌ yambʌ i yijñam, cheꞌ mach chaꞌanic tiꞌ chaꞌle i tsuculel yicꞌot yambʌ winic jini i yijñam, cheꞌ jach chʌncol i yʌqꞌuen i chaꞌlen i tsuculel. Jini muꞌ bʌ i pʌyeꞌ cʌyʌl bʌ xꞌixic miꞌ chaꞌlen i tsuculel jeꞌel. Cheꞌ ti yʌlʌ Jesús.

33 Tsaꞌix laꞌ wubi bajcheꞌ ti subentiyob laꞌ yumob ti ñoj oniyix: Mi ti a tyajbe i cꞌabaꞌ Dios chaꞌan a waꞌchocon a tꞌan mach yom maꞌ saj ñusan a chaꞌlen ti pejtyelel tsaꞌ bʌ a wʌlʌ. Chʌꞌʌch ti subentiyob ti ñoj oniyix.

34 Pero joñon mic subeñetla: Mach yom laꞌ lolon tyajeꞌ ti tꞌan chʌ bʌ tyac jach chaꞌan i waꞌchocontyel laꞌ tꞌan. Mach yom laꞌ tyajeꞌ ti tꞌan panchan como jiñʌch i buchlib Dios.

35 Mach yom laꞌ tyajeꞌ ti tꞌan mulawil como i yumʌch mulawil Dios. Mach yom laꞌ tyajeꞌ ti tꞌan Jerusalén chaꞌan i waꞌchocontyel a tꞌan como muꞌ ti yumʌl Dios yaꞌ ti Jerusalén. Cheꞌ bajcheꞌ chʌncox a tyaj ti tꞌan i cꞌabaꞌ Dios yubil, cheꞌ jini.

36 Mach yom laꞌ tyajeꞌ ti tꞌan laꞌ jol chaꞌan i waꞌchocontyel laꞌ tꞌan. Como mach chꞌujbi laꞌ sʌc isan laꞌ wiqꞌuisan mi juntꞌumic.

37 Jin jach mi laꞌ wʌl chʌꞌʌchi mi chʌꞌʌchi, mi mach cheꞌiqui mach cheꞌiqui, cheꞌetla. Mi ti laꞌ más alʌ yambʌ tꞌan chaꞌan i waꞌchocontyel laꞌ tꞌan tyʌlem ti xiba, cheꞌ jini. Cheꞌ ti yʌlʌ Jesús.

38 Jesús tiꞌ bej chaꞌle cʌntisa. Ti yʌlʌ: Tsaꞌix laꞌ wubi tsaꞌ bʌ ajli ti ñoj oniyix: Mi an majch miꞌ tyomben i wut juntiquil i piꞌʌl wersa mi tyombentyel i chaꞌan jeꞌel. Mi an majch miꞌ cꞌocben i yej juntiquil i piꞌʌl, wersa mi cꞌocbentyel i chaꞌan jeꞌel. Chʌꞌʌch ti ajli ti ñoj oniyix.

39 Pero joñon mic subeñetla: Mach yom laꞌ qꞌuextyan i simaronlel jini muꞌ bʌ i tsꞌaꞌqꞌuelet. Pero jiñʌch bajcheꞌ yom: Mi an majch miꞌ jatsꞌet ti junwej a choj, aqꞌuen i jatsꞌet ti yambʌ junwej jeꞌel.

40 Mi an majch miꞌ contrajiñet, mi yom i yʌqꞌuet ti melol chaꞌan i wersa chꞌʌmeꞌ a bujc, aqꞌuen i chꞌʌmeꞌ a bujc yicꞌot a tsuts bujc jeꞌel.

41 Mi an majch miꞌ wersa xiqꞌuet ti cuchejel jumpꞌej legua, cucu a wicꞌot chaꞌpꞌej legua.

42 Majchical jach mi niqꞌui cꞌajtibeñet, aqꞌuen. Cheꞌ an chʌ bʌ miꞌ cꞌajtibeñet ti majan, aqꞌuen i majñan. Cheꞌ tiꞌ chaꞌle cʌntisa Jesús.

43 Jesús tiꞌ bej chaꞌle cʌntisa. Ti yʌlʌ: Tsaꞌix laꞌ wubi tsaꞌ bʌ ajli ti ñoj oniyix. Ti ajli: Pꞌuntyan uts bʌ a wicꞌot. Tsꞌaꞌqꞌuel a contra. Chʌꞌʌch ti ajli ti ñoj oniyix.

44 Pero joñon mic subeñetla: Pꞌuntyan laꞌ contrajob. Aqꞌueñob i yutslel laꞌ tꞌan muꞌ bʌ i tyajetla ti machꞌʌ wen bʌ tꞌan. Chaꞌliben wen bʌ muꞌ bʌ i tsꞌaꞌleñetla. Pejcʌbenla Dios ti oración muꞌ bʌ i tyʌcꞌlañetla, cheꞌen.

45 Mi chʌꞌʌch mi laꞌ chaꞌlen, tsiquil cheꞌ jini, chaꞌan i yalobiletla Dios am bʌ ti panchan. Como Dios mi yʌqꞌuen i pasel qꞌuin chaꞌan i wenlel simaroñoꞌ bʌ lajal cheꞌ bajcheꞌ chaꞌan utsoꞌ bʌ. Lajal mi yʌqꞌuen i ñumel jaꞌal baꞌan utsoꞌ bʌ yicꞌot simaroñoꞌ bʌ.

46 Pero mi jin jach mi laꞌ pꞌuntyan muꞌ bʌ i pꞌuntyañetla ¿wen ba maꞌ qꞌuejlel ti Dios maꞌ lolon al? Machꞌan. Como jinic tyo jini xlot bʌ xchꞌʌm tyojoñel miꞌ pꞌuntyañob jini utsoꞌ bʌ yicꞌotyob.

47 Mi jin jach uts mi laꞌ pejcan utsoꞌ bʌ laꞌ wicꞌot ¿chutyoqui wenlel chʌncol laꞌ chaꞌlen maꞌ lolon al? como jinic tyo jini machꞌʌ baꞌan miꞌ chꞌujbin Dios miꞌ uts pejcañob utsoꞌ bʌ yicꞌotyob.

48 Jin chaꞌan yom tsꞌʌcʌl i yutslel laꞌ pusicꞌal cheꞌ bajcheꞌ tsꞌʌcʌl i yutslel i pusicꞌal lac Tyat am bʌ ti panchan. Chʌꞌʌch tiꞌ chaꞌle cʌntisa Jesús.