2 Cheꞌ jini, jini rico bʌ winic tiꞌ pʌyʌ jini i yajchoñoñel. Ti yʌlʌ: ¿Chuquiyes i sujmlel iliyi chʌncol bʌ i subeñoñob? Subeñon bajcheꞌ ti a cꞌʌñʌ ti pejtyelel chʌ bʌ tyac ti cʌqꞌueyet ti a wenta. Maꞌix mi quejel c bej aqꞌueñet a chaꞌlen troñel. Cheꞌ ti subenti.

3 Cheꞌ jini, jini ajchoñoñel ti wen queji ti pensal: ¿Chuquiyes mi quejel c chaꞌlen wale mi tiꞌ chilbon c troñel jini c yum? Maꞌix c wersa chaꞌan mic chaꞌlen tsʌts bʌ troñel. Mic quisnin j cꞌajtin majtyan tyaqꞌuin.

4 Cujil isujm chʌ bʌ yes mi quejel c chaꞌlen chaꞌan añʌch amigojob c chaꞌan muꞌ bʌ i pʌyon ochel ti yotyot cheꞌ tsaꞌix i chilbon c troñel c yum, cheꞌen.

5 Cheꞌ jini ti queji i pʌyeꞌ ti jujuntiquil ti pejtyelel añoꞌ bʌ i bet yicꞌot jini rico bʌ. Tiꞌ cꞌajtibe jini ñaxan bʌ: ¿Jaypꞌejqui a bet a wicꞌot? cheꞌen.

6 Jini ñaxan bʌ tiꞌ jacꞌʌ: Añʌch c bet cien colem yajnib lew, cheꞌen. Cheꞌ jini, jini yajchoñoñel tiꞌ sube: Umbaꞌan i junilel a bet. Buchiꞌ, ti saj ora jach yom maꞌ chaꞌ tsꞌijbun yambʌ jun chaꞌan cincuenta jach mi yʌl, cheꞌen.

7 Cheꞌ jini, jini yajchoñoñel tiꞌ cꞌajtibe yambʌ quixtyañu. Ixcu jatyet, ¿jaypꞌejqui a bet? cheꞌen. Jini tiꞌ jacꞌʌ: Añʌch c bet trigo jocꞌal pꞌis, cheꞌen. Jini yajchoñoñel ti yʌlʌ: Umbaꞌan i junilel a bet. Waꞌ tsꞌijbun yambʌ chaꞌan ochenta pꞌis jach. Cheꞌ ti subenti.

8 Jini rico bʌ winic tiꞌ subu i ñuclel jini i yajchoñoñel chaꞌan wen yujil bajcheꞌ miꞌ chaꞌlen. I tyʌlelʌch quixtyañujob mach bʌ baꞌan miꞌ chꞌujbin Dios miꞌ más ñaꞌtyan bajcheꞌ miꞌ chaꞌlibeñob i bʌ.

9 Jesús ti yʌlʌ jeꞌel: Mic subeñetla yom mi laꞌ cꞌʌñeꞌ chʌ bʌ an a chaꞌan chaꞌan i cotyʌntyel yañoꞌ bʌ wʌꞌ ti mulawil. Mi quejel i uts an a wicꞌot quixtyañu. Cheꞌ jini cheꞌ jilemix ti pejtyelel a ricojlel cheꞌ mi laꞌ cꞌotyel yaꞌ ti panchan mi quejel a wʌqꞌuentyel a tyojol yubil chaꞌan jini wen bʌ tsaꞌ bʌ a chaꞌle.

10 Jini muꞌ bʌ i cꞌʌñeꞌ ti xucꞌul i saj jach am bʌ tiꞌ wenta xucꞌul jeꞌel mi quejel i cꞌʌñeꞌ cheꞌ an cabʌl ti i wenta. Jini machꞌʌ baꞌan miꞌ cꞌʌñeꞌ ti xucꞌul tsꞌityaꞌ tyac jach am bʌ ti i wenta maꞌix mi quejel i cꞌʌñeꞌ ti xucꞌul anic cabʌl ti i wenta.

11 Mi maꞌix xucꞌulet ti cꞌʌñol ti troñel Dios jini am bʌ ti mulawil am bʌ ti a wenta machꞌan mi quejel a wʌqꞌuentyel ti a wenta laꞌ chaꞌlen jini yoque melel bʌ, jiñʌch i troñel Dios.

12 Mi maꞌix xucꞌulet ti cꞌʌñol chʌ bʌ yes i chaꞌan yambʌ quixtyañu am bʌ ti a wenta, cheꞌ jini machꞌan mi yʌqꞌueñetla Dios jini ñoj wen bʌ chaꞌan i yajñel ti yoque a chaꞌan bʌ.

13 Machꞌan ajtroñel chꞌujbi bʌ i yumin chaꞌtiquil i yum wʌꞌ ti mulawil. Mi quejel i michꞌqꞌuel juntiquil, mi quejel i pꞌuntyan jini yambʌ. Xucꞌul miꞌ chaꞌliben i troñel juntiquil, miꞌ luꞌ ñusʌben i tꞌan jini yambʌ. Chʌꞌʌch an lac pusicꞌal jeꞌel. Mach chꞌujbi laꞌ yumin Dios cheꞌ chʌncol laꞌ yumin tyaqꞌuin, cheꞌ ti yʌlʌ Jesús.

14 I tyʌlel jini fariseojob tiꞌ wen mulʌ tyaqꞌuin. Chʌncox i luꞌ yubiñob bajcheꞌ chʌncol i yʌleꞌ Jesús. Cheꞌ jini, tiꞌ wajleyob Jesús.

15 Cheꞌ jini Jesús tiꞌ subeyob: Jatyetla chʌncox laꞌ lolon pʌs laꞌ bʌ ti i tyojlel quixtyañujob cheꞌ bajcheꞌ mi weñetla. Pero Dios miꞌ luꞌ cʌn laꞌ pusicꞌal. Dios miꞌ tsꞌaꞌqꞌuel jini muꞌ bʌ i lolon qꞌuejlel ti ñuc ti quixtyañu.

16 Cꞌʌlʌ jintyo ti tyʌli Juan jin jach ti sujbi i mandar Moisés yicꞌot i tꞌan jini tsaꞌ bʌ i xiqꞌui yʌleꞌ Dios. Pero cheꞌ ti jim bʌ ora cheꞌ ñac ti tyʌli Juan ti queji i sujbel jini wen bʌ tꞌan chaꞌan bajcheꞌ miꞌ chaꞌlen yumʌl Dios. Ti pejtyelel quixtyañujob muꞌ bʌ i yochel miꞌ chaꞌleñob wersa chaꞌan ochicob ti jini tsijiꞌ bʌ tꞌan.

17 Chꞌujbi i sʌc jilel majlel pejtyelel mulawil yicꞌot chan pero mach chꞌujbi i saj jilel i cꞌʌjnibal mi jumpꞌejlic saj tꞌan ti i tꞌan Dios.

18 Jesús ti yʌlʌ mi tiꞌ cʌyʌ i yijñam juntiquil winic chaꞌan i chaꞌ tyajeꞌ yambʌ yijñam chʌncol jach i chaꞌlen i tsuculel jini winic. Jini muꞌ bʌ i pʌyeꞌ cʌyʌl bʌ xꞌixic miꞌ chaꞌlen i tsuculel jeꞌel. Cheꞌ tiꞌ chaꞌle cʌntisʌ Jesús.

19 Jesús tiꞌ bej chaꞌle cʌntisa. Ti yʌlʌ: An juntiquil rico bʌ winic am bʌ cabʌl chʌ bʌ an i chaꞌan. Tiꞌ bej xojo wen bʌ i pislel. Cꞌotyajax i pislel. Tiꞌ chaꞌle colem bʌ qꞌuiñejel ti jujumpꞌej qꞌuin.

20 An jeꞌel juntiquil pꞌumpꞌum bʌ winic Lázaro bʌ i cꞌabaꞌ. Cabʌl chʌ bʌ pasem ti pʌchʌlel. Ti buchle yaꞌ ti lum yaꞌ ti tiꞌ yotyot jini rico bʌ winic.

21 Jini pꞌumpꞌun bʌ winic yom i cꞌuxeꞌ muꞌ bʌ i pꞌajtyel ti mesa cheꞌ muꞌ ti uchꞌel jini rico bʌ winic. Jinic tyo tsꞌiꞌ ti tyʌli i lemben jini pasem bʌ ti pʌchʌlel.

22 Ti sajti jini pꞌumpꞌum bʌ winic. Ajtroñelob i chaꞌan Dios chꞌoyoloꞌ bʌ ti panchan tiꞌ pʌyʌyob majlel yaꞌ ti paraíso yaꞌ baꞌan Abraham. Ti sajti jeꞌel jini rico bʌ. Ti chꞌujñʌnti.

23 Cheꞌ ñac chʌncol i yilan wocol jini wen rico bʌ winic yaꞌ baꞌ mi majlel jini sajtyemoꞌ bʌ tiꞌ letsʌ i wut. Tiꞌ ñajtyʌ qꞌuele Abraham yicꞌot Lázaro yaꞌ an yicꞌot jeꞌel.

24 Cheꞌ jini tiꞌ chaꞌle oñel: C tyat Abraham, qꞌueleyon ti pꞌumpꞌun chaꞌan maꞌ cotyañon. Xiqꞌui jini Lázaro chaꞌan miꞌ tsꞌajeꞌ i yal cꞌʌb ti jaꞌ chaꞌan tyʌlic i tsʌn isʌbeñon cacꞌ como ñoj wocol chʌncol c ñusan wʌꞌ ti cꞌajc, cheꞌen.

25 Pero Abraham tiꞌ sube: Calobil, ñaꞌtyan ñoj wen añet cheꞌ ñac cuxulet tyo. Lázaro ti yilʌ wocol. Wale iliyi mi ñuc isʌntyel i pusicꞌal. Jatyet maꞌ wilan wocol.

26 Cheꞌ jeꞌel an colem jajp chꞌen muꞌ bʌ i tꞌoxonla. Aniqui majch yom cꞌotyel yaꞌ baꞌ añet mach chꞌujbi. Mach chꞌujbi cꞌaxic wʌꞌwʌꞌi jini yaꞌ bʌ añob yaꞌ yaꞌi jeꞌel.

27 Cheꞌ jini, jini rico bʌ winic ti yʌlʌ: Mic wersa cꞌajtibeñet c tyat, Abraham, chaꞌan a xiqꞌueꞌ majlel Lázaro yaꞌ ti yotyot c tyat.

28 Yaꞌan joꞌtiquil quijtsꞌiñob. Laꞌ i subeñob chaꞌan machꞌan mi tyʌlel i ñusan wocol jeꞌel wʌꞌ baꞌañon. Cheꞌ ti yʌlʌ jini wen rico bʌ winic.

29 Pero Abraham ti yʌlʌ: Añob i jun tsaꞌ bʌ i tsꞌijbu Moisés yicꞌot tsaꞌ bʌ xiqꞌui yʌleꞌ Dios ti ñoj oniyix. Laꞌ i chꞌujbiben i tꞌan, cheꞌen.

30 Jini wen rico bʌ winic tiꞌ jacꞌʌ: Chʌꞌʌchi, c tyat Abraham, pero muqꞌuic i majlel yaꞌ baꞌ añob juntiquil loqꞌuem bʌ baꞌan sajtyemoꞌ bʌ mi quejel i qꞌuextyañob i pusicꞌal i cʌyob i mul, cheꞌen.

31 Pero Abraham tiꞌ sube: Mi mach yomob i chꞌujbiben i tꞌan Moisés yicꞌot i tꞌan tsaꞌ bʌ i xiqꞌui i yʌleꞌ Dios machꞌan mi quejel i chꞌujbin i tꞌan juntiquil aunque ti tyechi loqꞌuel baꞌan sajtyemoꞌ bʌ mi cꞌotyel i subeñob i tꞌan Dios, cheꞌ Abraham ti yʌlʌ Jesús.