2 Cheꞌ jini ti tyʌliyob baꞌan Jesús chaꞌtiquil uxtiquil fariseojob chaꞌan i jopꞌ i yotsʌbeñob i mul Jesús. Jin chaꞌan tiꞌ cꞌajtibeyob Jesús mi weñʌch miꞌ cʌy i yijñam winic.

3 Jesús tiꞌ jacꞌbeyob: ¿Chuqui tiꞌ subetla Moisés ti mandar? cheꞌen.

4 Jini fariseojob ti yʌlʌyob: Moisés ti yʌqꞌue winicob i melben i juñilel baꞌ mi yʌl cʌyʌlix i yijñam. Cheꞌ jini chꞌujbix i cʌyeꞌ. Cheꞌ ti yʌlʌ Moisés, cheꞌob.

5 Jesús tiꞌ chaꞌ jacꞌbeyob: Pero chaꞌan tsʌts laꞌ pusicꞌal chʌꞌʌch tiꞌ tsꞌijbubeyetla Moisés.

6 Pero ti tyejchibal cheꞌ ñac tiꞌ mele mulawil Dios, tiꞌ mele winic yicꞌot xꞌixic.

7 Jin chaꞌan winic miꞌ cʌy i tyat i ñaꞌ chaꞌan ajnic yicꞌot i yijñam.

8 Juntiquil jach mi majlelob yubil jini chaꞌtiquil. Jin chaꞌan mach chaꞌtiquilobix. Juntiquil jachix yubil.

9 Jin chaꞌan mach yom i chaꞌ tꞌoxeꞌ winic tsaꞌ bʌ i muchꞌqui Dios. Cheꞌ ti yʌlʌ Jesús.

10 Cheꞌ yaꞌañob ti otyot, jini ajcʌntꞌañob tiꞌ chaꞌ cꞌajtibeyob Jesús chuquiyes isujm ili tꞌan.

11 Jesús tiꞌ subeyob: Jini muꞌ bʌ i cʌyeꞌ i yijñam muꞌ bʌ i chaꞌ tyajeꞌ yambʌ yijñam, chʌncol jach i chaꞌlen i tsuculel tiꞌ contra jini ñaxan bʌ yijñam.

12 Cheꞌ jeꞌel, mi tiꞌ cʌyʌ i ñoxiꞌal jini xꞌixic, mi tiꞌ tyaja yambʌ i ñoxiꞌal, miꞌ chaꞌlen i tsuculel jeꞌel. Cheꞌ ti yʌlʌ Jesús.

13 Cheꞌ jini, quixtyañujob tiꞌ pʌyʌyob tyʌlel alpꞌeñalob baꞌan Jesús chaꞌan Jesús miꞌ tyʌl jini alpꞌeñalob. Pero ajcʌntꞌañob ti queji i ticꞌ jini tsaꞌ bʌ i pʌyʌyob tyʌlel.

14 Jesús maꞌan tiꞌ saj mulʌ cheꞌ ñac tiꞌ qꞌuele. Tiꞌ subeyob: Laꞌ tyʌlicob baꞌañon jini alpꞌeñalob. Mach laꞌ ticꞌob como i chaꞌañobʌch cheꞌob bʌ bajcheꞌ alpꞌeñal mi yajñel ti yumintyel Dios.

15 Ubinla bajcheꞌ mic subeñetla. Jini yom bʌ i yochel ti yumintyel Dios laꞌ i mel i bʌ bajcheꞌ juntiquil alʌl. Machqui baꞌan mach chꞌujbi ochic. Cheꞌ ti yʌlʌ Jesús.

16 Cheꞌ jini, tiꞌ meqꞌue jini alpꞌeñalob. Jesús ti yʌcꞌʌ i cꞌʌb tiꞌ pam i jolob jini alpꞌeñalob. Ti yʌqꞌueyob i yutslel i tꞌan.

17 Jesús ti queji ti chaꞌ xʌmbal majlel ti bij. Ti tyʌli ti ajñel juntiquil colem alob. Ti ñocle tiꞌ tꞌejl Jesús. Tiꞌ sube: Weñet bʌ maestro, ¿chuqui yom c chaꞌlen chaꞌan c tyajeꞌ j cuxtyʌlel machꞌʌ yujil jilel? cheꞌen.

18 Jesús tiꞌ sube: ¿Chucoch mi a wʌleꞌ mi weñon? An juntiquil jach wen bʌ, jiñʌch Dios.

19 A wujilʌch isujm jini mandar tyac: Mach laꞌ pejcan yambʌ xꞌixic, mach laꞌ chaꞌlen tsʌnsa, mach laꞌ chaꞌlen xujchꞌ, mach laꞌ jopꞌen i mul laꞌ piꞌʌl, mach laꞌ loꞌlon laꞌ piꞌʌl, acꞌʌ ti ñuc laꞌ tyat, laꞌ ñaꞌ. Cheꞌ ti yʌlʌ Jesús.

20 Jini alob ti yʌlʌ: Maestro, tsʌꞌʌch c luꞌ chꞌujbi ti pejtyelel cꞌʌlʌ cheꞌ ñac alʌlon tyo, cheꞌen.

21 Jesús tiꞌ chꞌuj qꞌuele jini alob. Tiꞌ pꞌuntyʌ. Tiꞌ sube: Yom tyo a chaꞌlen yambʌ junchajp. Cucu, luꞌ choño pejtyel chʌ bʌ yes an a chaꞌan. Aqꞌueñob pꞌumpꞌuñoꞌ bʌ. Mi chʌꞌʌch maꞌ chaꞌlen mi quej a wʌqꞌuentyel cabʌl chʌ bʌ an a chaꞌan ti panchan. Laꞌ, aunque maꞌ tsʌnsʌntyel tij caj. Tsʌcleñon majlel. Cheꞌ ti yʌlʌ Jesús.

22 Cheꞌ ñac ti yubi jini alob i tꞌan Jesús, tyoj bʌcꞌñʌjel ti yubi. Ñoj chꞌʌjyem ti chaꞌ sujti majlel como an cabʌl chʌ bʌ an i chaꞌan.

23 Jesús tiꞌ qꞌuele tiꞌ suttyʌlel. Tiꞌ sube ajcʌntꞌañob i chaꞌan: Ñoj wocol mi yochel ti yumintyel Dios jini añob bʌ cabʌl chʌ bʌ an i chaꞌan. Cheꞌ ti yʌlʌ Jesús.

24 Cheꞌ ñac ti yubiyob jini tꞌan, tyoj bʌcꞌñʌjelob jini ajcʌntꞌañob. Jesús ti i chaꞌ subeyob: Calobilob, ñoj wocol mi yochel ti yumintyel Dios jini muꞌ bʌ i pꞌuntyan chʌ bʌ an i chaꞌan.

25 Más wocol mi yochel rico bʌ quixtyañu ti yumintyel Dios bajcheꞌ mi ñumel juncojt colem animal camello bʌ i cꞌabaꞌ tiꞌ chꞌub juntsꞌijt acuxan. Cheꞌ ti yʌlʌ Jesús.

26 Ti utsi quejiyob ti bʌqꞌuen. Tiꞌ subeyob i bʌ: ¿Majchqui chꞌujbi i tyaj i cotyʌntyel, cheꞌ jini? cheꞌob.

27 Jesús ti queji i chꞌuj qꞌuelob. Tiꞌ subeyob: Winicob mach chꞌujbi i chaꞌleñob. Pero Dios bʌ yi chꞌujbiyʌch i chaꞌlen. Como Dios bʌ yi chꞌujbiyʌch i luꞌ chaꞌlen chʌ bʌ yes yom, cheꞌen.

28 Pedro ti queji i suben: Pero joñon lojon tsaꞌix c luꞌ cʌyʌ lojon pejtyelel chʌ bʌ an lojon c chaꞌan. Chʌncolix lojon c tsʌcleñet majlel, cheꞌen.

29 Jesús tiꞌ jacꞌbe: Melel mic subeñetla, cheꞌ majchical jach miꞌ cʌyeꞌ i yotot, mi yʌscuñob, mi i chichob, mi yijtsꞌiñob, mi i tyat, mi i ñaꞌ, mi yijñam, mi yalobil, mi i lum, chaꞌan ti caj i tsʌcleñon chaꞌan ti caj ili wen bʌ tꞌan chaꞌan laꞌ cotyʌntyel,

30 mi quejel i tyajeꞌ más i yoñlel bʌ. Ñumen ti cien mi quejel i tyajeꞌ yubil wʌꞌ ti mulawil i yotyot, i yʌscuñob, i chichob, i yijtsꞌiñob, i ñaꞌob, i yalobilob, i lum tyac. Aunque mi quejel i tyʌcꞌlʌntyel. Ti tyal tyo bʌ ora mi quej i tyaj i cuxtyʌlel machꞌʌ yujil jilel.

31 Cabʌl ñucoꞌ bʌ ti mulawil ti wiꞌil machꞌan mi quejel i qꞌuejlel ti ñuc. Cabʌl jini machꞌʌ ñuc wʌꞌ ti mulawil, ti wiꞌil mi quej i yajñel ti ñuc. Cheꞌ ti yʌlʌ Jesús.

32 Añob ti bij chaꞌan i letselob majlel ti Jerusalén. Jesús ñaxan ti majli. Pensaltic ti yubiyob ajcʌntꞌañob i chaꞌan. Chʌncolob jach i bʌqꞌuen tsʌcleñob jini quixtyañujob tsaꞌ bʌ i tsʌcleyob majlel. Jesús tiꞌ chaꞌ bajñel pʌyʌyob tyʌlel tiꞌ docejlel. Ti queji i subeñob chʌ bʌ mi quejel i tyumbentyel.

33 Ti yʌlʌ: Qꞌuele laꞌ wilan, chʌncox lac letsel majlel ti Jerusalén. Yaꞌi Joñon i Piꞌʌlon bʌ Quixtyañujob mi quejel cʌjqꞌuel tiꞌ cꞌʌb jini ñucoꞌ bʌ curajob yicꞌot ajcʌntisajob chaꞌan i mandar israelob. Mi quejel i yʌcꞌon ti tsʌnsʌntyel. Mi quejel i yʌcꞌoñob tiꞌ cꞌʌb machꞌʌ israelob.

34 Mi quejel i wajleñoñob, mi quejel i jatsꞌoñob ti pʌchij mi quejel i tyujbañoñob, mi quejel i tsʌnsañoñob. Pero ti yuxpꞌejlel qꞌuin mi quejel c chaꞌ tyejchel loqꞌuel baꞌan sajtyemoꞌ bʌ. Cheꞌ ti yʌlʌ Jesús.

35 Cheꞌ jini, tiꞌ lʌcꞌʌyob Jesús Jacobo yicꞌot Juan i yalobilob Zebedeo. Ti yʌlʌyob: Maestro, comʌch a wʌqꞌueñon lojon muꞌ bʌ quejel lojon j cꞌajtibeñet, cheꞌob.

36 Jesús tiꞌ subeyob: ¿Chuquiyes laꞌ wom mic melbeñetla? cheꞌen.

37 Tiꞌ jacꞌʌyob: Com motin buchlecon lojon juntiquil ti a ñoj yicꞌot juntiquil ti a tsꞌej cheꞌ yaꞌ añet ti a ñuclel, cheꞌob.

38 Jesús tiꞌ chaꞌ jacꞌʌ: Machꞌan mi laꞌ ñaꞌtyan chʌ bʌ yes chʌncol laꞌ cꞌajtin. ¿Chꞌujbi ba laꞌ ñusan jini wocol muꞌ bʌ quej c ñusan? Como ñoj cʌlʌx wocol bajcheꞌ mi quej c ñusan. Cheꞌ ti yʌlʌ Jesús.

39 Tiꞌ jacꞌʌyob: Chꞌujbiyʌch, cheꞌob. Jesús tiꞌ subeyob: Melelʌch mi quejel laꞌ ñusan jini wocol muꞌ bʌ quej c ñusan. Ñoj cʌlʌx mi quejel laꞌ ñusan.

40 Pero mach c wenta cʌleꞌ majchqui mi quejel i buchtyʌl tic ñoj yicꞌot tic tsꞌej. Yaꞌ mi buchtyʌlob jini tsaꞌ bʌ chajpʌbentiyob. Cheꞌ ti yʌlʌ Jesús.

41 Cheꞌ ñac ti yubiyob, jini yañoꞌ bʌ diez ti queji i michꞌqꞌuelob Jacobo yicꞌot Juan.

42 Cheꞌ jini Jesús tiꞌ pʌyʌyob tyʌlel jini docejob. Tiꞌ subeyob: Laꞌ wujil bajcheꞌ miꞌ pʌsob i bʌ ti ñuc yumʌloꞌ bʌ wʌꞌ ti mulawil. Ñoj tsʌts miꞌ xicꞌ quixtyañujob.

43 Pero jatyetla mach chʌꞌic yom laꞌ chaꞌlen. Pero jini yom bʌ ajñel ti ñuc ti laꞌ tyojlel, laꞌ i chaꞌlen cotyaj tiꞌ tyojlel i piꞌʌlob.

44 Jini más ñuc bʌ yom ajñel ti laꞌ tyojlel, yom i yotsan i bʌ cheꞌ bajcheꞌ lolon ajtroñel jach laꞌ chaꞌan.

45 Machꞌan ti tyʌliyon i Piꞌʌlon bʌ Quixtyañujob chaꞌan chaꞌlibenticon c troñel ti quixtyañujob. Pero ti tyʌliyon j cotyañob. Ti tyʌliyon cʌcꞌ c bʌ ti sajtyel chaꞌan i tyojol i loqꞌuib cabʌlob. Cheꞌ ti yʌlʌ Jesús.

46 Yaꞌ ti cꞌotiyob ti Jericó. Cheꞌ ñac ti loqꞌui majlel yaꞌ ti Jericó Jesús yicꞌot ajcʌntꞌañob i chaꞌan, yicꞌot cabʌl quixtyañu, yaꞌ tiꞌ tyajayob ti bij juntiquil mutsꞌul bʌ i wut Bartimeo bʌ i cꞌabaꞌ. Yalobil Timeo. Buchul ti bij i cꞌajtin majtyan tyaqꞌuin.

47 Cheꞌ ñac ti yubi lʌcꞌʌl i tyʌlel Jesús chꞌoyol bʌ ti Nazaret, cꞌam ti queji ti tꞌan. Ti yʌlʌ: Jesús, i jiñʌjlelet bʌ David tsaꞌ bʌ i choco tyʌlel Dios, pꞌuntyañon chaꞌan a cotyañon, cheꞌen.

48 Cabʌl ti queji i ticꞌob chaꞌan lajmic ti tꞌan. Más cꞌam ti queji ti tꞌan. Ti yʌlʌ: I jiñʌjlelet bʌ David tsaꞌ bʌ i choco tyʌlel Dios, pꞌuntyañon chaꞌan a cotyañon, cheꞌen.

49 Jesús tiꞌ poj cʌyʌ xʌmbal. Ti yʌlʌ: Pʌyʌla tyʌlel, cheꞌen. Tiꞌ pʌyʌyob jini mutsꞌul bʌ i wut. Ti queji i subeñob: Tijicñisan a pusicꞌal. Tyejchen. Chʌncox i pʌyet, cheꞌob.

50 Cheꞌ jini tiꞌ wel choco cʌytyʌl i mosil. Ti waꞌ tyejchi. Ti cꞌoti baꞌan Jesús.

51 Jesús tiꞌ sube: ¿Chuquiyes a wom mic melbeñet? cheꞌen. Jini mutsꞌul bʌ i wut tiꞌ jacꞌʌ: Maestro, com j qꞌueleꞌ pañimil, cheꞌen.

52 Jesús tiꞌ sube: Cucux, tsaꞌix cotyʌntiyet chaꞌan ti a chꞌujbiyon ti a pusicꞌal, cheꞌen. Ti queji i waꞌ ilan pañimil. Tiꞌ tsʌcle majlel Jesús ti bij.