2 Tiꞌ lajayob i tꞌan chaꞌan miꞌ tyojob jumpꞌej tyaqꞌuin denario bʌ i cꞌabaꞌ ti jujumpꞌej qꞌuin. Cheꞌ jini tiꞌ chocoyob majlel ti toñel ti tsꞌujsubol.

3 Cheꞌ bajcheꞌ ti las nueve ti chaꞌ majli i yum tsꞌujsubol yaꞌ baꞌ miꞌ muchꞌquiñob i bʌ winicob machꞌʌ baꞌañob i toñel. Yaꞌ ti cꞌoti i tyaj chaꞌtiquil uxtiquil machꞌʌ baꞌan i toñel.

4 Tiꞌ subeyob: Cucula jeꞌel ti tyucꞌ tsꞌujsub. Mux c tyojetla bajcheꞌ yom chaꞌan laꞌ toñel, cheꞌen. Ti majliyob.

5 Jini i yum ti chaꞌ majli i suben yambʌ machꞌʌ baꞌañobix i toñel ti xinqꞌuinil yicꞌot ti las tres ti och an qꞌuin. Lajal tiꞌ subeyob bajcheꞌ ti subenti jini tsaꞌ bʌ i xiqꞌui majlel ti toñel ti las nueve.

6 Yicꞌot ti las cinco ti och an qꞌuin ti chaꞌ majli yaꞌ baꞌ miꞌ muchꞌquiñob i bʌ jini machꞌʌ baꞌañob i toñel. Yaꞌ ti cꞌoti i tyaj yambʌ chaꞌtiquil uxtiquil machꞌʌ baꞌañob i troñel. Tiꞌ subeyob: ¿Chucoch wʌ tyo waꞌaletla cꞌʌlʌ mi ñumel qꞌuin? cheꞌen.

7 Tiꞌ jacꞌʌyob: Chaꞌan maꞌ majch tiꞌ subeyon lojon toñel, cheꞌob. Cheꞌ jini, jini i yum tsꞌujsubol tiꞌ subeyob: Cucula jeꞌel ti toñel yaꞌ tic tsꞌujsubol. Muqꞌuix c tyojetla bajcheꞌ yom chaꞌan laꞌ troñel, cheꞌen.

8 Cheꞌ iqꞌuixi i yum tsꞌujsubol tiꞌ sube jini ajcʌñʌtya troñel: Pʌyʌla tyʌlel jini ajtroñelob. Aqꞌueñobix i tyojol. Maꞌ ñaxan tyojeꞌ jini wiꞌilix bʌ ti cꞌotiyob. Ti wiꞌil maꞌ tyojeꞌ jini ñaxan bʌ ti cꞌotiyob, cheꞌen.

9 Cheꞌ jini, ti tyʌliyob jini tsaꞌ bʌ quejiyob ti troñel ti las cinco ti och an qꞌuin. Ti aqꞌuentiyob jujuntiquil jumpꞌej denario, jiñʌch i tyojol jumpꞌej qꞌuin toñel.

10 Ti wiꞌil tyo cheꞌ ñac ti tyʌliyob i chꞌʌm i tyojol jini tsaꞌ bʌ ñaxan quejiyob ti troñel cꞌʌlʌ ti sʌcꞌʌ, tiꞌ lolon ñaꞌtyʌyob chaꞌan más on mi quejel i yʌqꞌuentyelob. Pero ti aqꞌuentiyob jujumpꞌej denario i tyojol ti jujuntiquil jeꞌel.

11 Cheꞌ ñac tiꞌ chꞌʌmʌyob i tyojol ti quejiyob i michꞌan. Ti queji i tyajeꞌ ti tꞌan jini i yum tsꞌujsubol.

12 Ti yʌlʌyob: Jini wiꞌilobix ti juli tiꞌ chaꞌleyob troñel jumpꞌej jach ora. Junlajal ti a wʌqꞌueyob i tyojol cheꞌ bajcheꞌ ti a tyojoyon lojon tsaꞌ bʌ lojon c chaꞌle wersa bʌ toñel. Ti lojon j cuchu ticwal cꞌʌlʌ ti ñumi qꞌuin, cheꞌob.

13 Jini i yum tsꞌujsubol tiꞌ sube juntiquil: C piꞌʌl, machꞌan chʌ bʌ tic chaꞌle ti a contra. ¿Machꞌa baꞌan ti lac laja lac tꞌan chaꞌan mi cʌqꞌueñet jumpꞌej denario chaꞌan jumpꞌej qꞌuin toñel? cheꞌen.

14 Chꞌʌmʌ a tyojol. Cucux. Com c tyojeꞌ jini wiꞌilix bʌ ti cꞌotiyob lajal bajcheꞌ mic tyojetla.

15 ¿Machꞌa chꞌujbi c chaꞌlen chʌ bʌ jach com yicꞌot c bajñel tyaqꞌuin? ¿Jim ba jini wen bʌ tsaꞌ bʌ c chaꞌle tiꞌ tyejchbe i michꞌlel laꞌ pusicꞌal yicꞌot laꞌ piꞌʌlob ti troñel chaꞌan jach laꞌ wom chʌ bʌ niqꞌui an i chaꞌan? Cheꞌ ti yʌlʌ i yum tsꞌujsubol.

16 Jesús ti yʌlʌ: Cheꞌ bajcheꞌ jini, an machꞌʌ baꞌan mi qꞌuejlel ti ñuc wʌꞌ ti mulawil mi quejel i qꞌuejlel ti ñuc yaꞌ baꞌ muꞌ ti yumʌl Dios. An jini muꞌ bʌ i qꞌuejlel ti ñuc wʌꞌ ti mulawil machꞌan mi quejel i qꞌuejlel ti ñuc yaꞌ baꞌ muꞌ ti yumʌl Dios. Como an cabʌl pʌyʌloꞌ bʌ chaꞌan mi yochel yaꞌ baꞌ muꞌ ti yumʌl Dios, pero machꞌan cabʌlob yajcʌbiloꞌ bʌ ti Dios chaꞌan mi yochelob.

17 Cheꞌ ñac muꞌ ti xʌmbal majlel Jesús ti bijlel Jerusalén an chʌ bʌ ti queji i bajñel subeñob ajcʌntꞌañob i chaꞌan.

18 Ti yʌlʌ: Cheꞌ bajcheꞌ mi laꞌ wilan chʌncol lac letsel majlel yaꞌ ti Jerusalén. Yaꞌi Joñon i Piꞌʌlon bʌ Quixtyañujob mi quejel cʌjqꞌuel tiꞌ cꞌʌb ñucoꞌ bʌ curajob yicꞌot jini yambʌ ajcʌntisajob chaꞌan i mandar israelob. Mi quejel i meloñob chaꞌan i yʌcꞌon ti sajtyel.

19 Mi quejel i yʌcꞌon tiꞌ cꞌʌb jini machꞌʌ israeloꞌ bʌ quixtyañujob chaꞌan i wajleñoñob, chaꞌan i jatsꞌoñob, chaꞌan i yʌcꞌon ti sajtyel ti cruz. Pero ti yuxpꞌejlel qꞌuin mi quejel c tyejchel loqꞌuel yaꞌ baꞌan sajtyemoꞌ bʌ. Cheꞌ ti yʌlʌ Jesús.

20 Cheꞌ jini, i yijñam Zebedeo ti cꞌoti baꞌan Jesús yicꞌot chaꞌtiquil i yalobilob, jiñʌch Jacobo yicꞌot Juan. Ti ñocle ti yebal yoc Jesús chaꞌan an chʌ bʌ yom i cꞌajtiben.

21 Jesús ti yʌlʌ: ¿Chuquiyes a wom? cheꞌen. Jini i ñaꞌ Jacobo yicꞌot Juan tiꞌ jacꞌʌ: Acꞌʌ a tꞌan chaꞌan mi buchtyʌlob jini chaꞌtiquil calobilob juntiquil ti a ñoj, juntiquil ti a tsꞌej cheꞌ mi quejel a chaꞌlen yumʌl, cheꞌen.

22 Jesús tiꞌ subeyob: Machꞌan mi laꞌ ñaꞌtyan chʌ bʌ yes chʌncol laꞌ cꞌajtin. ¿Chꞌujbi ba laꞌ ñusan jini wocol muꞌ bʌ quejel c ñusan? como ñoj cʌlʌx bʌ wocol mi quejel c ñusan, cheꞌen. Tiꞌ jacꞌʌyob: Chꞌujbiyʌch, cheꞌob.

23 Jesús tiꞌ subeyob: Melelʌch mi quejel laꞌ ñusan ñoj cʌlʌx bʌ wocol muꞌ bʌ c ñusan. Pero mach c wenta cʌleꞌ majchqui mi quejel i buchtyʌl tic ñoj yicꞌot tic tsꞌej. Yaꞌi mi quejel i buchtyʌlob jini tsaꞌ bʌ chajpʌntiyob tic Tyat am bʌ ti panchan. Cheꞌ ti yʌlʌ Jesús.

24 Cheꞌ ñac ti yubiyob ili tꞌan jini yañoꞌ bʌ diez ti queji i michꞌqꞌuelob Jacobo yicꞌot Juan.

25 Jesús tiꞌ pʌyʌyob tyʌlel jini docejob. Tiꞌ subeyob: Laꞌ wujil bajcheꞌ miꞌ pʌsob i bʌ ti ñuc jini yumʌlob wʌꞌ ti mulawil. Yicꞌot jini am bʌ i yeꞌtyel tiꞌ tyojlel más ñuc bʌ yumʌlob, ñoj tsʌts miꞌ xicꞌob quixtyañujob.

26 Pero jatyetla mach cheꞌic yom mi laꞌ chaꞌlen. Pero jini yom bʌ ajñel ti ñuc ti laꞌ tyojlel laꞌ i chaꞌlen cotyaj ti tyojlel i piꞌʌlob.

27 Pero majchical jach yom ajñel ti jini más ñuc bʌ yom i yotsan i bʌ cheꞌ bajcheꞌ lolom ajtroñel jach laꞌ chaꞌan.

28 Chʌꞌʌch joñon jeꞌel i Piꞌʌlon bʌ Quixtyañujob maꞌ ti tyʌliyon ti mulawil chaꞌan mic tyaj j cotyʌntyel ti quixtyañujob. Pero ti tyʌliyon chaꞌan mij cotyañob, chaꞌan mi cʌcꞌ c bʌ ti sajtyel chaꞌan i loqꞌuib ti mulil cabʌlob. Cheꞌ ti yʌlʌ Jesús.

29 Cheꞌ ñac chʌncol i loqꞌuelob majlel yaꞌ ti lum Jericó bʌ i cꞌabaꞌ, cabʌl quixtyañu tiꞌ tsʌcleyob majlel Jesús.

30 Yaꞌan chaꞌtiquil mutsꞌul bʌ i wut buchulob ti i tiꞌ bij. Cheꞌ ñac ti subentiyob chaꞌan chʌncol i ñumel majlel Jesús ti quejiyob ti cꞌam bʌ tꞌan. Ti yʌlʌyob: C Yum, i jiñʌjlelet bʌ David tsaꞌ bʌ i choco tyʌlel Dios, pꞌuntyañon lojon chaꞌan maꞌ cotyañon lojon, cheꞌob.

31 Jini quixtyañujob tiꞌ tiqꞌuiyob chaꞌan miꞌ lajmelob ti tꞌan. Pero más cꞌam ti quejiyob ti tꞌan. Ti yʌlʌyob: C Yum, i jiñʌjlelet bʌ David tsaꞌ bʌ i choco tyʌlel Dios, pꞌuntyañon lojon chaꞌan maꞌ cotyañon lojon, cheꞌob.

32 Cheꞌ jini Jesús tiꞌ cʌyʌ xʌmbal. Tiꞌ pʌyʌ tyʌlel jini mutsꞌuloꞌ bʌ i wut. Tiꞌ cꞌajtibeyob: ¿Chuquiyes a wom mic melbeñetla? cheꞌen.

33 Tiꞌ jacꞌʌyob: C Yum, com lojon chaꞌan mi cꞌotyel lojon c wut, cheꞌob.

34 Cheꞌ jini, Jesús tiꞌ pꞌuntyʌyob. Tiꞌ tyʌlbeyob i wut. Ti jin jach bʌ ora ti waꞌ cꞌoti i wut. Tiꞌ tsʌcleyob majlel Jesús.