2 Cabʌl quixtyañu tiꞌ tsʌcleyob majlel. Yaꞌi tiꞌ lajmisʌyob.

3 Cheꞌ jini chaꞌtiquil uxtiquil fariseo ti tyʌli baꞌan Jesús chaꞌan jach yom i yilpusicꞌlen Jesús chaꞌan yom i contrajiñob ti tꞌan. Jin chaꞌan tiꞌ cꞌajtibeyob: ¿Chꞌujbi ba i cʌy i yijñam winic cheꞌ mi yʌqꞌuentyel i juñilel chaꞌan tsiquil cʌyʌlix i chaꞌan chaꞌan cheꞌ jach yom? cheꞌob.

4 Jesús tiꞌ jacꞌʌ: ¿Machꞌa baꞌan ti laꞌ qꞌuele ti Tsꞌijbubil bʌ i Tꞌan Dios chaꞌan jini tsaꞌ bʌ i mele quixtyañujob tiꞌ mele winic yicꞌot xꞌixic? cheꞌen.

5 Yaꞌ mi yʌleꞌ jeꞌel: Jin chaꞌan jini winic miꞌ cʌy i tyat i ñaꞌ chaꞌan mi yajñel yicꞌot i yijñam. Cheꞌ bajcheꞌ juntiquil jach bʌ quixtyañu mi yajñel.

6 Cheꞌ bajcheꞌ mach bej chaꞌtiquilob pero juntiquil jach bʌ quixtyañu yubil. Jin chaꞌan mach yom i chaꞌ tꞌoxeꞌ winic jini tsaꞌ bʌ i muchꞌqui Dios. Cheꞌ ti yʌlʌ Jesús.

7 Jini fariseojob tiꞌ sube Jesús: Mi chʌꞌʌch yom, ¿chucoch cheꞌ jini tiꞌ xiqꞌuiyob Moisés winicob chaꞌan i melben i juñilel baꞌ mi yʌl cʌyʌlix xꞌixic? Cheꞌ jini chꞌujbiyix i cʌyeꞌ, cheꞌ ti yʌlʌ Moisés, cheꞌob.

8 Jesús tiꞌ sube: Chaꞌan tsʌts laꞌ pusicꞌal jin chaꞌan ti yʌqꞌueyetla Moisés jini tꞌan chaꞌan chꞌujbiyic i cʌyeꞌ i yijñam winic cheꞌ mi yʌqꞌuen i juñilel. Pero mach cheꞌiqui ti tyejchibal mulawil, cheꞌen.

9 Pero joñon mic subeñetla mi juntiquil winic miꞌ cʌy i yijñam chaꞌan i pʌyeꞌ yambʌ xꞌixic cheꞌ mach chaꞌanic tiꞌ chaꞌle i tsuculel yicꞌot yambʌ winic jini i yijñam, cheꞌ jach chʌncol i chaꞌlen i tsuculel jini winic. Yicꞌot majchical jach miꞌ pʌyeꞌ cʌyʌl bʌ xꞌixic miꞌ chaꞌlen i tsuculel jeꞌel, cheꞌen.

10 Cheꞌ jini, jini ajcʌntꞌañob i chaꞌan ti queji i subeñob Jesús. Mi chʌꞌʌch wersa yom i yajñel winic yicꞌot i yijñam cꞌoꞌojl más wen machꞌan miꞌ pʌyeꞌ i yijñam winic, cheꞌob.

11 Jesús tiꞌ jacꞌʌ: Mach ti pejtyelel chꞌujbi i yajñel ti i bajñelil. Jini jach jini muꞌ bʌ yʌqꞌuentyelob ti Dios i yajñel ti i bajñelil.

12 An ti chajp ti chajp chʌ bʌ och machꞌan miꞌ pʌyob i yijñam winicob. An winic machꞌʌ baꞌan tsꞌʌcʌl i bʌcꞌtyal ti chꞌocʌyob. An yañoꞌ bʌ ti tsepbentiyob i bʌcꞌtyal. An yañoꞌ bʌ chaꞌan yʌlol jach i chaꞌan mach yom i pʌy i yijñam chaꞌan machꞌan chʌ bʌ miꞌ mʌctyʌben chaꞌan ti caj mi yumin Dios am bʌ ti panchan. Jin chaꞌan majchical jach mach yom i pʌyeꞌ i yijñam chaꞌan ti caj i troñel Dios, weñʌch mi bajñel ajñel. Cheꞌ ti yʌlʌ Jesús.

13 Cheꞌ jini, quixtyañujob tiꞌ pʌyʌyob tyʌlel alpꞌeñalob yaꞌ baꞌan Jesús chaꞌan mi yʌcꞌ i cꞌʌb tiꞌ pam i jol yicꞌot chaꞌan miꞌ tyajob ti oración jini alpꞌeñalob. Pero jini ajcʌntꞌañob i chaꞌan Jesús ti queji i ticꞌob jini tsaꞌ bʌ i pʌyob tyʌlel.

14 Pero Jesús tiꞌ subeyob jini ajcʌntꞌañob i chaꞌan: Acꞌʌla tyʌlel baꞌañon jini alpꞌeñalob. Mach laꞌ ticꞌob. Como jini muꞌ bʌ i yumiñob Dios mi yajñel bajcheꞌ alpꞌeñalob. Cheꞌ ti yʌlʌ Jesús.

15 Ti yʌcꞌʌ i cꞌʌb tiꞌ pam i jol alpꞌeñalob. Cheꞌ jini ti loqꞌui majlel Jesús yaꞌi.

16 Juntiquil colem alob ti majli i pejcan Jesús. Ti yʌlʌ: Weñet bʌ maestro, ¿chuquiyes wen bʌ yom c chaꞌlen chaꞌan c tyajeꞌ j cuxtyʌlel machꞌʌ yujil jilel? cheꞌen.

17 Jesús tiꞌ sube: ¿Chucoch ma pejcañon ti weñon? An jach juntiquil wen bʌ, jiñʌch Dios. Pero mi a wom a tyajeꞌ a cuxtyʌlel machꞌʌ yujil jilel, jacꞌben jini mandar tyac, cheꞌen.

18 Jini alob ti yʌlʌ: ¿Baqui bʌ mandar tyac? cheꞌen. Jesús tiꞌ sube: Mach a chaꞌlen tsʌnsa, mach a pejcan yambʌ xꞌixic, mach a chaꞌlen xujchꞌ, mach a jopꞌben i mul a piꞌʌl,

19 acꞌʌ ti ñuc a tyat a ñaꞌ, pꞌuntyan a piꞌʌlob ti chumtyʌl cheꞌ bajcheꞌ maꞌ bajñel pꞌuntyan a bʌ. Cheꞌ ti yʌlʌ Jesús.

20 Jini alob ti yʌlʌ: Tsaꞌʌch c luꞌ chꞌujbi ti pejtyelel jini cꞌʌlʌ cheꞌ ñac alʌlon tyo, cheꞌen. ¿Chutyoqui yambʌ yom c chaꞌlen? cheꞌen.

21 Jesús tiꞌ sube: Mi a wom tsꞌʌcʌl bʌ i yutslel a pusicꞌal, cucu, choño chʌ bʌ yes an a chaꞌan, aqꞌueñob jini pꞌumpꞌuñoꞌ bʌ. Mi chʌꞌʌch maꞌ chaꞌlen, mi quejel a wʌqꞌuentyel cabʌl chʌ bʌ an a chaꞌan yaꞌ ti panchan. Cheꞌ jini, laꞌ. Tsʌcleñon majlel. Cheꞌ ti yʌlʌ Jesús.

22 Pero cheꞌ ñac ti yubi ili tꞌan, ñoj chꞌʌjyem ti chaꞌ sujti jini alob como an cabʌl chʌ bʌ an i chaꞌan.

23 Cheꞌ jini Jesús tiꞌ sube ajcʌntꞌañob i chaꞌan: Melel mic subeñetla, ñoj wocol mi yochelob ti yumintyel Dios am bʌ ti panchan jini ricojoꞌ bʌ, cheꞌen.

24 Mic chaꞌ aleꞌ: Más wocol mi yochel rico bʌ quixtyañu ti yumintyel Dios bajcheꞌ mi ñumel juncojt colem animal camello bʌ i cꞌabaꞌ ti i chꞌub juntsꞌijt acuxan. Cheꞌ ti yʌlʌ Jesús.

25 Cheꞌ ñac ti yubiyob ili tꞌan, tyoj bʌcꞌñʌjelob jini ajcʌntꞌañob i chaꞌan Jesús. Ti queji i cꞌajtibeñob i bʌ: ¿Majchqui chꞌujbi i tyajeꞌ i cotyʌntyel, cheꞌ jini? cheꞌob.

26 Jesús tiꞌ chꞌuj qꞌueleyob. Tiꞌ sube: Winicob mach chꞌujbi i chaꞌleñob. Pero Dios, machꞌan mach bʌ chꞌujbi i chaꞌlen, cheꞌen.

27 Pedro tiꞌ sube Jesús: C Yum, joñon lojon tsaꞌix c luꞌ cʌyʌ lojon ti pejtyelel chʌ bʌ an lojon c chaꞌan chaꞌan lojon c tsʌcleñet majlel. ¿Chuqui mi quejel lojon cʌqꞌuentyel? cheꞌen.

28 Jesús ti yʌlʌ: Melel mic subeñetla, cheꞌ ti jim bʌ ora cheꞌ mi quejel i tsijibtisʌntyel pejtyel chʌ bʌ an, cheꞌ yaꞌ buchulon Joñon i Piꞌʌlon bʌ Quixtyañujob yaꞌ tic buchlib chaꞌan tsiquil c ñuclel, cheꞌ jini jatyetla tsaꞌ bʌ laꞌ tsʌcleyon mi quejel laꞌ chaꞌlen buchtyʌl jeꞌel yaꞌ ti doce laꞌ buchlib tyac chaꞌan mi laꞌ melob jini docemujchꞌob i jiñʌjlel Israel.

29 Ti pejtyelel tsaꞌ bʌ i cʌyʌyob i yotyot, mi yʌscuñob, mi i chichob, mi yijtsꞌiñob, mi i tyat, mi i ñaꞌ, mi yijñam, mi yalobilob, mi i lumal chaꞌan ti caj mi yumiñon, mi quejel i yʌqꞌuentyel yambʌ cien i ñumenlel cheꞌ bajcheꞌ tsaꞌ bʌ i cʌyʌ. Yicꞌot jeꞌel ti tyal tyo bʌ ora mi quejel i yʌqꞌuentyel i cuxtyʌlel machꞌʌ yujil jilel.

30 Pero cabʌl machꞌʌ baꞌan mi qꞌuejlel ti ñuc wʌꞌ ti mulawil wale mi quejel i qꞌuejlel ti ñuc yaꞌ ti panchan. Cabʌl muꞌ bʌ i qꞌuejlel ti ñuc wale, machꞌan mi quejel i qꞌuejlel ti ñuc cheꞌ miꞌ chaꞌlen yumʌl Dios, cheꞌ mi quejel i luꞌ tsijibtisʌntyel pejtyelel chʌ bʌ an. Cheꞌ ti yʌlʌ Jesús.