2 Tiꞌ subeyob jini chaꞌtiquil: Cucula yaꞌ ti jini lum yaꞌ tiꞌ tyojel laꞌ wut. Yaꞌi mi quejel laꞌ tyajeꞌ cot cʌchʌl juncojt burra. Yaꞌan yicꞌot i yal. Tiquila. Pʌyʌla tyʌlel.

3 Mi an majch chʌ bʌ miꞌ subeñetla chaꞌan chʌncol laꞌ tiqueꞌ yom laꞌ subeñob: Yom i cꞌʌñeꞌ lojon c yum. Muꞌ tyo lojon c waꞌ chaꞌ pʌyeꞌ tyʌlel, cheꞌetla, cheꞌ Jesús.

4 Chʌꞌʌch ti ujti chaꞌan mi tsꞌʌctiyel jini tsaꞌ bʌ ajli ti Dios ti ñoj oniyix cheꞌ ñac tiꞌ cꞌʌñʌ i tiꞌ juntiquil tsaꞌ bʌ i xiqꞌui yʌleꞌ Dios. Ti yʌlʌ:

6 Cheꞌ jini, jini ajcʌntꞌañob i chaꞌan Jesús ti majliyob. Tiꞌ chaꞌleyob bajcheꞌ ti subentiyob.

7 Tiꞌ pʌyʌyob tyʌlel jini ñaꞌ burra yicꞌot i yal yaꞌ baꞌan Jesús. Tiꞌ tyasibeyob i pat i yal burro ti i pislelob. Jesús tiꞌ cꞌʌchtyʌ majlel jini burro.

8 Yaꞌan cabʌl quixtyañu. Tiꞌ tyʌsbeyob majlel i pislelob yaꞌ ti bij. Yañoꞌ bʌ tiꞌ tsepeyob jubel i cꞌʌb tyac tyeꞌ. Tiꞌ lin acꞌʌyob majlel yopol tyeꞌ ti bij.

9 Jini ñaxañoꞌ bʌ majlelob bʌ quixtyañujob yicꞌot jini chʌncol bʌ i tyʌlelob tiꞌ pat Jesús cꞌam tiꞌ chaꞌleyob tꞌan. Ti yʌlʌyob: Laꞌ sujbic a ñuclel i jiñʌjlelet bʌ ñuc bʌ yumʌl David. Tijicñayet jatyet chʌncol bʌ a tyʌlel chaꞌan cheꞌ yom lac Yum Dios. Laꞌ sujbic i ñuclel Dios. Cheꞌ ti yʌlʌyob ti cꞌam bʌ tꞌan.

10 Cheꞌ ñac ti ochi ti Jerusalén Jesús, luꞌ mucꞌob ti tꞌan quixtyañujob. Luꞌ yom i qꞌuelob. Cabʌlob ti queji i yʌlob: ¿Majchqui jini? cheꞌob.

11 An tsaꞌ bʌ i jacꞌʌyob: Jiñʌch Jesús, juntiquil tsaꞌ bʌ i xiqꞌui yʌleꞌ Dios, chꞌoyol bʌ ti Nazaret yaꞌ ti pañimil Galilea bʌ i cꞌabaꞌ, cheꞌob.

12 Cheꞌ jini, Jesús ti ochi yaꞌ ti templo baꞌ miꞌ chꞌujutisañob Dios. Yaꞌ ti pat templo an cabʌl muꞌ bʌ i mʌn muꞌ bʌ i chon animal tyac. Tiꞌ luꞌ chocoyob loqꞌuel. Tiꞌ chꞌaꞌ chocbeyob i mesa tyac jini ajqꞌuex tyaqꞌuiñob yicꞌot i buchlib tyac jini muꞌ bʌ i choñob xꞌujcutsuꞌ.

13 Tiꞌ subeyob: Yaꞌ ti Tsꞌijbubil bʌ i Tꞌan Dios mi yʌleꞌ: Jini cotyot mi quejel i pejcʌntyel ti yotyotlel oración, cheꞌen. Pero jatyetla tsaꞌix laꞌ sutqui ti yotyotlel ajxujchꞌob. Cheꞌ ti yʌlʌ Jesús.

14 Ti cꞌotyiyob jini mutsꞌuloꞌ bʌ i wut yicꞌot jini machꞌʌ baꞌan i cꞌʌjnibal i yoc i cꞌʌb yaꞌ baꞌan Jesús yaꞌ ti templo. Jesús tiꞌ lajmisʌyob.

15 Pero jini ñuc bʌ curajob yicꞌot ajcʌntisajob chaꞌan i mandar israelob, ti quejiyob ti michꞌan cheꞌ ñac ti yilʌ i señʌjlel ñuc tyac bʌ i pꞌʌtyʌlel Jesús yicꞌot cheꞌ ñac ti yubiyob i tꞌan alpꞌeñalob yaꞌ ti templo cheꞌ ti cꞌam bʌ tꞌan ti yʌlʌyob: Laꞌ sujbic a ñuclel, i jiñʌjlelet bʌ ñuc bʌ yumʌl David tsaꞌ bʌ i choco tyʌlel Dios, cheꞌob.

16 Tiꞌ cꞌajtibeyob Jesús: ¿Chʌncol ba a wubin chʌ bʌ chʌncol i yʌlob alpꞌeñalob? cheꞌob. Jesús tiꞌ jacꞌʌ: Chʌncol cubin. ¿Machꞌa baꞌan ti laꞌ qꞌuele ti Tsꞌijbubil bʌ i Tꞌan Dios baꞌ miꞌ wʌ tyajeꞌ ti tꞌan bajcheꞌ miꞌ sub i ñuclel Dios alpꞌeñalob. Mi yʌleꞌ:

17 Cheꞌ jini Jesús tiꞌ cʌyʌyob. Ti loqꞌui majlel ti Jerusalén. Ti majli yaꞌ ti saj lum Betania bʌ i cꞌabaꞌ baꞌ tiꞌ ñusʌ acꞌbʌlel.

18 Ti yijcꞌʌlel cheꞌ ñac chʌncol i sujtyel majlel ti Jerusalén, Jesús ti yubi wiꞌñal.

19 Yaꞌ ti i tiꞌ bij ti yilʌ juntyejc tyeꞌ higuera bʌ i cꞌabaꞌ. Pero cheꞌ ñac tiꞌ lʌcꞌʌ jini tyeꞌ machꞌan ti saj tyajbe i wut. I yopol jach an. Cheꞌ jini Jesús tiꞌ sube chaꞌan maꞌix baꞌ bʌ ora mi quejel i chaꞌ acꞌ i wut. Ti jini jach bʌ ora ti waꞌ queji i tyʌquin jini tyeꞌ.

20 Tyoj bʌcꞌñʌjel ajcʌntꞌañob i chaꞌan cheꞌ ñac ti yilʌ bajcheꞌ ti ujti. Tiꞌ cꞌajtibeyob Jesús: ¿Bajcheꞌqui isujm cheꞌ saj ora jach ti tyʌqui jini tyeꞌ? cheꞌob.

21 Jesús tiꞌ subeyob: Melel mic subeñetla mi mucꞌʌch laꞌ chꞌujbin ti jumpꞌej jach laꞌ pusicꞌal chaꞌan chʌꞌʌch mi quejel i yujtyel, mi maꞌan chaꞌpꞌej laꞌ pensal, mach jinic jach chꞌujbi laꞌ chaꞌlen bajcheꞌ ti laꞌ wilʌ ti ujti yicꞌot jini tyeꞌ, pero chꞌujbi laꞌ suben jini wits jeꞌel chaꞌan i chꞌuyeꞌ loqꞌuel i bʌ wʌꞌwʌꞌi, chaꞌan mi majlel ti ochel yaꞌ ti colem jaꞌ. Mi muqꞌuic laꞌ chꞌujbin chʌꞌʌch mi quejel i yujtyel.

22 Mi muqꞌuic laꞌ chꞌujbin ti jumpꞌej laꞌ pusicꞌal mi quejel laꞌ wʌqꞌuentyel chʌ bʌ jach yes mi laꞌ cꞌajtin ti oración. Cheꞌ ti yʌlʌ Jesús.

23 Ti ochi ti templo Jesús. Cheꞌ muꞌ tyo ti cʌntisa yaꞌ ti cꞌotiyob jini ñuc bʌ curajob yicꞌot xñoxob añoꞌ bʌ i yeꞌtyel chaꞌan israelob. Ti yʌlʌyob: ¿Baqui tyʌlem a weꞌtyel chaꞌan maꞌ niqꞌui chaꞌlen jini muꞌ ba a chaꞌlen? ¿Majchqui ti yʌqꞌuet ili a weꞌtyel chaꞌan maꞌ niqꞌui meleꞌ? cheꞌob.

24 Jesús tiꞌ jacꞌʌ: Joñon jeꞌel an chʌ bʌ com j cꞌajtibeñetla. Mi ti laꞌ jacꞌʌ, cheꞌ jini mi quejel c subeñetla baqui tyʌlem queꞌtyel, cheꞌen.

25 ¿Majchqui tiꞌ xiqꞌui jini Juan tsaꞌ bʌ i yʌcꞌʌ chꞌʌm jaꞌ? ¿Jim ba Dios o jim ba quixtyañujob? Cheꞌ ti yʌlʌ Jesús. Cheꞌ jini ti queji i bajñel subeñob i bʌ: ¿Bajcheꞌqui yom mi lac jaqꞌueꞌ? Mi ti la cʌlʌ Dios ti xiqꞌui mi quejel i chaꞌ cꞌajtibeñonla, ¿chucoch machꞌan ti laꞌ chꞌujbi? Cheꞌ mi quejel i yʌleꞌ, cheꞌob.

26 Pero mi ti la cʌlʌ winicob tiꞌ xiqꞌui, choꞌonla, mux lac bʌcꞌñan quixtyañujob como miꞌ luꞌ ñaꞌtyañob jini Juan jiñʌch juntiquil tsaꞌ bʌ i xiqꞌui yʌleꞌ Dios, cheꞌob.

27 Cheꞌ jini tiꞌ subeyob Jesús: Mach cujil lojon isujm majchqui tiꞌ xiqꞌui chaꞌan i yʌqꞌueꞌ chꞌʌm jaꞌ jini Juan, cheꞌob. Cheꞌ jini Jesús tiꞌ subeyob: Chʌꞌʌch joñon jeꞌel, machꞌan mic subeñetla baqui chꞌoyol i pꞌʌtyʌlel c tꞌan chaꞌan mic chaꞌlen ili tyac. Cheꞌ ti yʌlʌ Jesús.

28 Jesús tiꞌ bej chaꞌle tꞌan. Ti yʌlʌ: ¿Bajcheꞌ mi laꞌ pensalin jini muꞌ bʌ c subeñetla? An juntiquil winic an chaꞌtiquil aloꞌ bʌ i yalobilob. Tiꞌ sube juntiquil: Calobil, cucu yaꞌ ti toñel tic tsꞌujsubol cheꞌ mi ñumel ili qꞌuin, cheꞌen.

29 Pero jini alob tiꞌ jacꞌʌ: Mach com c majlel, cheꞌen. Pero ti wiꞌil tiꞌ qꞌuextyʌ i pensal. Ti majli ti toñel bajcheꞌ ti subenti.

30 Ti ñumi tsꞌityaꞌ ora jini winic ti majli yaꞌ baꞌan yambʌ i yalobil. Tiꞌ xiqꞌui majlel ti toñel jeꞌel. Jini chaꞌticlel bʌ i yalobil tiꞌ jacꞌʌ: Mucꞌʌch quejel c majlel, c tyat, cheꞌen. Pero machꞌan ti majli.

31 Cheꞌ jini, ti jini chaꞌtiquil bʌ, ¿majchqui ti yoque chaꞌle bajcheꞌ yom i tyat? ¿Jim ba jini ñaxan bʌ? ¿Jim ba jini wiꞌilix bʌ? cheꞌen Jesús. Tiꞌ jacꞌʌyob: Jini ñaxan bʌ, cheꞌob. Cheꞌ jini Jesús tiꞌ subeyob: Melel mic subeñetla chaꞌan jini xlot bʌ xchꞌʌm tyojoñel yicꞌot xꞌixicob muꞌ bʌ i choñob i bʌ mi quejel i yumiñob Dios cheꞌ machꞌan mi laꞌ yumin Dios jatyetla.

32 Como jini Juan tsaꞌ bʌ yʌcꞌʌ chꞌʌm jaꞌ ti tyʌli i cʌntisañetla bajcheꞌ yom mi laꞌ wajñel ti tyoj. Pero machꞌan ti laꞌ chꞌujbi chaꞌan melel i tꞌan. Pero jini xlot bʌ xchꞌʌm tyojoñelob yicꞌot xꞌixicob muꞌ bʌ i choñob i bʌ tiꞌ chꞌujbiyob. Pero jatyetla aunque ti laꞌ wilʌ bajcheꞌ tiꞌ qꞌuextyʌyob i pensal, machꞌan ti laꞌ qꞌuextyʌ laꞌ pensal laꞌ cʌyeꞌ laꞌ mul chaꞌan laꞌ chꞌujbin i tꞌan. Cheꞌ ti yʌlʌ Jesús.

33 Jesús tiꞌ subeyob: Ñʌchꞌtyanla jini yambʌ lajoñel. An juntiquil i yum otyot ti yʌcꞌʌ ti pʌcꞌol jumpejt tsꞌujsubol. Tiꞌ joy corrajli. Tiꞌ chajpʌ i yajñib baꞌ miꞌ petsꞌbeñob loqꞌuel i yaꞌlel. Tiꞌ tsꞌʌpʌ chan bʌ i qꞌueloñib, jiñʌch chan bʌ waꞌlib chaꞌan i qꞌuintyan pañimil. Ti yʌcꞌʌ ti majñʌntyel jini jumpejt tsꞌujsubol. Cheꞌ jini ti majli ti ñajt bʌ pañimil.

34 Cheꞌ ti yorojlel i tyucꞌob tsꞌujsub tiꞌ choco majlel i yajtoñel yaꞌ baꞌan jini ajcʌñʌtya tsꞌujsubol chaꞌan miꞌ tꞌox chꞌʌmben i wut bajcheꞌ ti wʌ alʌyob.

35 Pero jini ajcʌñʌtya tsꞌujsubol tiꞌ chucuyob jini ajtoñelob. Tiꞌ jatsꞌʌ juntiquil, tiꞌ tsʌnsʌ yambʌ, tiꞌ julu ti tyun yambʌ.

36 Jini i yum tsꞌujsubol tiꞌ chaꞌ choco majlel yambʌ ajtroñelob. Pero más onix tiꞌ choco majlel cheꞌ bajcheꞌ ti ñaxan. Pero jini ajcʌñʌtya tsꞌujsubol lajal tiꞌ tyʌcꞌlʌyob.

37 Ti wiꞌil tiꞌ xiqꞌui majlel i yalobil como tiꞌ pensali: Mucꞌʌch i wersa qꞌuelob ti ñuc calobil, cheꞌen.

38 Pero cheꞌ ñac jini ajcʌñʌtya tsꞌujsubol ti yilʌyob jini i yalobil i yum tsꞌujsubol tiꞌ subuyob i bʌ: Jiñʌch muꞌ bʌ i quejel i yochel ti yum jini tsꞌujsubol. Laꞌ lac tsʌnsan. Cheꞌ jini mi quejel lac chꞌʌmeꞌ ili tsꞌujsubol, cheꞌob.

39 Chʌꞌʌch tiꞌ chucuyob. Tiꞌ locꞌsʌyob ti tsꞌujsubol. Tiꞌ tsʌnsʌyob. Cheꞌ tiꞌ chaꞌle lajoñel Jesús.

40 Cheꞌ jini Jesús tiꞌ cꞌajtibeyob jini ñuc bʌ curajob yicꞌot jini xñoxob añoꞌ bʌ i yeꞌtyel baꞌan israelob: ¿Cheꞌ mi tyʌlel jini i yum tsꞌujsubol chuquiyes mi quejel i tyumben jini ajcʌñʌtya tsꞌujsubol mi laꞌ wʌl? cheꞌen.

41 Tiꞌ jacꞌʌyob: Mi quejel i tsʌnsañob jini simaron bʌ ajcʌñʌtya tsꞌujsubol. Maꞌix mi quejel i saj pꞌuntyʌntyel. Cheꞌ jini mi quejel i yʌqꞌuen jini tsꞌujsubol ti majñʌntyel yañoꞌ bʌ ajcʌñʌtya tsꞌujsubol muꞌ bʌ quejel i tꞌox aqꞌuen i wut cheꞌ ti yorojlel, cheꞌob.

42 Jesús tiꞌ subeyob: ¿Machꞌa baꞌan ti laꞌ qꞌuele jini Tsꞌijbubil bʌ i Tꞌan Dios? An baꞌ mi yʌl:

43 Jesús tiꞌ bej pejcʌyob jini ñuc bʌ curajob yicꞌot jini xñoxob anoꞌ bʌ yeꞌtyel. Tiꞌ subeyob: Jin chaꞌan mic subeñetla: Maꞌ mi quejel laꞌ bej aqꞌuentyel laꞌ cʌñʌtyan i tꞌan Dios jatyetla israelet bʌ la. Pero mi quejel i yʌqꞌuentyelob jini muꞌ bʌ i chꞌujbiben bajcheꞌ tsꞌijbubil, cheꞌen.

44 Yicꞌot chaꞌan jini tyun ujtyel bʌ cʌleꞌ, majchical jach mi yajlel ti pam jini tyun mi quejel i bicꞌtiyel. Pero mi jini tyun mi yajlel ti pam quixtyañu mi quejel i juchꞌeꞌ bajcheꞌ tsꞌubejn. Cheꞌ ti yʌlʌ Jesús.

45 Cheꞌ ñac ti yubiyob jini lajoñel tyac, jini ñuc bʌ curajob yicꞌot xñoxob añoꞌ bʌ i yeꞌtyel tiꞌ ñaꞌtyʌyob chaꞌan chʌncol i tyajtyʌlob ti tꞌan.

46 Yomob i chuc Jesús chaꞌan mi yotsan ti cʌchol pero tiꞌ bʌcꞌñʌyob ame mi michꞌañob quixtyañujob. Como jini quixtyañujob tiꞌ ñaꞌtyʌyob chaꞌan Jesús jiñʌch juntiquil tsaꞌ bʌ xiqꞌui yʌleꞌ Dios.