Lajoñel chaꞌan simaron bʌ ajtoñelob
12
Jesús ti queji i pejcañob ti lajoñel tyac. Ti yʌlʌ: An juntiquil winic tsaꞌ bʌ pʌcꞌʌ tsꞌujsub. Tiꞌ joy corrajli. Tiꞌ chajpʌ i yajnib baꞌ miꞌ petsꞌbeñob loqꞌuel i yaꞌlel. Tiꞌ tsꞌʌpʌ chan bʌ i waꞌlib chaꞌan i qꞌuintyan pañimil. Cheꞌ jini ti yʌcꞌʌ tiꞌ majñʌntyel ajcʌñʌtya tsꞌujsubob. Ti majli ti ñajt bʌ pañimil.2 Cheꞌ ti yorojlel i tyucꞌob tsꞌujsub tiꞌ xiqꞌui majlel i yajtoñel yaꞌ baꞌan ajcʌñʌtya tsꞌujsubol chaꞌan i tꞌox chꞌʌmben i wut.
3 Pero jini ajcʌñʌtya tsꞌujsubol tiꞌ chucuyob. Tiꞌ jatsꞌʌyob. Maꞌ chʌ bʌ ti yʌqꞌueyob. Tiꞌ chaꞌ xiqꞌuiyob sujtyel.
4 Cheꞌ jini i yum tsꞌujsubol tiꞌ chaꞌ xiqꞌui majlel yambʌ ajtoñel. Cheꞌ jini yaꞌ ti yʌcꞌbeyob ti tyun. Tiꞌ lowbeyob i jol. Tiꞌ wen wajleyob cheꞌ ñac ti yajnisʌ sujtyel.
5 Cheꞌ jini i yum ti chaꞌ xiqꞌui majlel yambʌ. Jini tiꞌ tsʌnsʌyob. Cheꞌ jeꞌel tiꞌ xiqꞌui majlel cabʌl yañoꞌ bʌ. An tsaꞌ bʌ i jatsꞌʌyob. An tsaꞌ bʌ i tsʌnsʌyob.
6 Yaꞌ tyo ti cʌyle ti yotyot i yum tsꞌujsubol juntiquil yalobil pꞌuntyʌbil bʌ i chaꞌan. Cheꞌ jini, tiꞌ xiqꞌui majlel jini i yalobil yaꞌ baꞌañob. Tiꞌ ñaꞌtyʌ: Muqꞌuix i wersa qꞌuelob ti ñuc calobil. Cheꞌ tiꞌ lolon pensali.
7 Cheꞌ jini, jini ajcʌñʌtya tsꞌujsubol tiꞌ subeyob i bʌ: Jiñʌch muꞌ bʌ i quejel i yochel tiꞌ yum ili tsꞌujsubol. Laꞌ lac tsʌnsan. Cheꞌ jini, mi quej lac chꞌʌmeꞌ ili tsꞌujsubol, cheꞌob.
8 Cheꞌ jini, tiꞌ chucuyob. Tiꞌ tsʌnsʌyob. Tiꞌ jʌp chocoyob loqꞌuel i bʌcꞌtyal yaꞌ ti tsꞌujsubol.
9 Cheꞌ jini Jesús tiꞌ cꞌajtibeyob: ¿Chuquiyes mi quej i chaꞌlen mi laꞌ wʌl i yum tsꞌujsubol? cheꞌen. Mi quejel i tyʌlel i tsʌnsañob jini ajcʌñʌtya tsꞌujsubol. Mi quejel i yʌqꞌueñob ili tsꞌujsubol tiꞌ wenta yañoꞌ bʌ.
10 ¿Machꞌa baꞌan baꞌ ti laꞌ qꞌuele jini Tsꞌijbubil bʌ i Tꞌan Dios? Mi yʌl:
Jini tyun tsaꞌ bʌ i chocoyob ajmel tyuni otyot ti ochi tiꞌ wentyʌlel oy tiꞌ xujcꞌ otyot.
11 Jiñʌch i chaꞌlibal lac Yum. Tyoj bʌcꞌñʌjel mi laj qꞌueleꞌ jini tsaꞌ bʌ i chaꞌle.
Cheꞌ tsꞌijbubil. Cheꞌ ti yʌlʌ Jesús.
12 Jini ñuc bʌ curajob yicꞌot ajcʌntisajob chaꞌan i mandar israelob, yicꞌot xñoxob añoꞌ bʌ i yeꞌtyel, ti queji i ñaꞌtyañob bajcheꞌ chꞌujbi i chucob Jesús como tiꞌ ñaꞌtyʌyob añʌch isujmlel ili lajoñel tiꞌ contrajob. Pero chaꞌan tiꞌ bʌcꞌñʌyob quixtyañu tiꞌ cʌyʌyob Jesús. Ti majliyob.
Tꞌan chaꞌan tyojoñel
13 Cheꞌ jini tiꞌ chocoyob majlel chaꞌtiquil uxtiquil fariseojob yicꞌot junmujchꞌ herodianojob chaꞌan miꞌ ñʌchꞌtyʌbeñob i tꞌan Jesús chaꞌan miꞌ jopꞌbeñob i mul.
14 Cheꞌ ti cꞌotiyob ti yʌlʌyob: Maestro, cujil lojon isujm chaꞌan melelʌch chʌ bʌ maꞌ wʌleꞌ. Maꞌan maꞌ pensalin chʌ bʌ jach mi yʌlob. Junlajal jach maꞌ qꞌuel winicob mi an i yeꞌtyel mi maꞌan i yeꞌtyel. Junsujm jach maꞌ chaꞌlen cʌntisa chaꞌan i bijlel Dios. Jin chaꞌan com j cꞌajtibeñet: ¿Bajcheꞌ maꞌ wʌle? ¿Yom ba mi la cʌqꞌuen tyojoñel ñoj ñuc bʌ yumʌl o mach yom? ¿Yom ba mi lac tyoj o mach yom? Cheꞌ tiꞌ cꞌajtibenti Jesús.
15 Jesús tiꞌ ñaꞌtyʌ chaꞌchajp i pensal jini yaꞌ bʌ añob. Jin chaꞌan tiꞌ subeyob: ¿Chucoch mi laꞌ sʌclʌbeñon c mul? Chꞌʌmbeñon tyʌlel junwejch tyaqꞌuin chaꞌan j qꞌueleꞌ. Cheꞌ ti yʌlʌ Jesús.
16 Cheꞌ jini tiꞌ chꞌʌmʌyob tyʌlel tyaqꞌuin. Jesús tiꞌ subeyob: ¿Majchqui i locꞌom wʌꞌ bʌ an ti tyaqꞌuin? ¿Majchqui i cꞌabaꞌ wʌꞌ tsꞌijbubil? cheꞌen. Tiꞌ jacꞌʌyob: I chaꞌan jini ñoj ñuc bʌ yumʌl, cheꞌob.
17 Jesús tiꞌ subeyob: Cheꞌ jini, aqꞌuenla ñoj ñuc bʌ yumʌl i chaꞌan bʌ yumʌl. Aqꞌuenla Dios i chaꞌan bʌ Dios, cheꞌen. Tyoj bʌcꞌñʌjelob cheꞌ ti yubiyob.
Cꞌajtibal chaꞌan bajcheꞌ mi tyejchel loqꞌuel baꞌan sajtyemoꞌ bʌ
18 Tiꞌ lʌcꞌʌyob Jesús chaꞌtiquil uxtiquil saduceojob. Jiñʌch muꞌ bʌ i yʌlob chaꞌan machꞌan mi lac chaꞌ tyejchel loqꞌuel baꞌan sajtyemoꞌ bʌ. Tiꞌ cꞌajtibeyob Jesús:
19 Maestro, Moisés ti yʌqꞌueyonla mandar chʌ bʌ yom i chaꞌlen mi ti sajti juntiquil winic mi tiꞌ bajñel cʌyʌ yijñam cheꞌ max tyo baꞌan yalobil. Ti yʌlʌ yom i wersa pʌyben yijñam yʌscun jini ijtsꞌiñʌl bʌ chaꞌan miꞌ tyejchben i jiñʌjlel jini tsaꞌ bʌ sajti. Cheꞌ ti yʌlʌ Moisés, cheꞌob.
20 Cheꞌ jini, an siete winicob yoque yijtsꞌiñob i bʌ. Tiꞌ pʌyʌ yijñam jini ascuñʌl bʌ. Ti sajti cheꞌ max tyo baꞌan i yalobil.
21 Cheꞌ jini, i chaꞌticlel bʌ yijtsꞌin tiꞌ pʌybe i yijñam i yʌscun. Ti sajti jeꞌel cheꞌ max tyo baꞌan i yalobil. Chʌꞌʌch jeꞌel ti yuxticlel.
22 Ti luꞌ sajtiyob cꞌʌlʌ tiꞌ sietejlelob. Maꞌan tiꞌ cʌyʌ i yalobil mi junticlec. Cheꞌ jini ti sajti jini xꞌixic jeꞌel.
23 Cheꞌ ti yorojlel mi chaꞌ tyejchelob jini sajtyemoꞌ bʌ, ¿majchqui i ñoxiꞌal jini xꞌixic maꞌ wʌl? Como tiꞌ sietejlelob tiꞌ pʌyʌyob chaꞌan i yijñam. Cheꞌ ti yʌlʌyob saduceojob.
24 Jesús tiꞌ subeyob: Mi laꞌ wotsan laꞌ ñajayel tyac como machꞌan mi laꞌ chꞌʌmꞌen isujm Tsꞌijbubil bʌ i Tꞌan Dios mi i pꞌʌtyʌlelic Dios.
25 Como cheꞌ miꞌ chaꞌ tyejchelob loqꞌuel baꞌan sajtyemoꞌ bʌ, maꞌix miꞌ pʌyob i yijñam, maꞌix mi sijintyelob jeꞌel. Mi quejel i yajñelob cheꞌ bajcheꞌ mi yajñel ajtroñelob i chaꞌan Dios am bʌ ti panchan.
26 Chaꞌan i sujmlel bajcheꞌ mi chaꞌ tyejchel sajtyemoꞌ bʌ, ¿machꞌa baꞌan qꞌuelel laꞌ chaꞌan yaꞌ tiꞌ jun tsaꞌ bʌ i tsꞌijbu Moisés baꞌ Dios tiꞌ pejcʌ Moisés cheꞌ loqꞌuem i tꞌan Dios ti pimel muꞌ bʌ ti lejmel? Ti yʌlʌ: Joñon i Dioson Abraham, i Dioson Isaac, i Dioson Jacob. Cheꞌ ti yʌlʌ Dios.
27 Tsiquil cheꞌ jini, Dios bʌ yi i Diosʌch cuxuloꞌ bʌ. Aunque sajtyem i bʌcꞌtyal pero cuxul i chꞌujlel. Jin chaꞌan an cabʌl laꞌ ñajayel. Cheꞌ ti yʌlʌ Jesús.
Jini más ñuc bʌ tyumbiya
28 Ti cꞌoti baꞌan Jesús juntiquil ajcʌntisa chaꞌan i mandar israelob tsaꞌ bʌ yubi cheꞌ ñac mucꞌob ti tꞌan. Cꞌotyajax ti yubi bajcheꞌ tiꞌ jacꞌʌ Jesús. Tiꞌ cꞌajtibe: ¿Baqui bʌ más ñuc ti pejtyelel jini mandar tyac? cheꞌen.
29 Jesús tiꞌ jacꞌʌ: Jini más ñuc bʌ mandar jiñʌch muꞌ bʌ yʌleꞌ: Ñʌchꞌtyanla israelet bʌ la. Jini lac Yum, lac Dios, jiñʌch juntiquil jach bʌ lac Yum.
30 Pꞌuntyan laꞌ Yum laꞌ Dios ti pejtyelel laꞌ pusicꞌal, ti pejtyelel laꞌ chꞌujlel, ti pejtyelel laꞌ ñaꞌtyʌbal yicꞌot ti pejtyelel laꞌ pꞌʌtyʌlel. Jiñʌch jini más ñuc bʌ mandar.
31 Lʌcꞌʌl lajal bʌ yicꞌot i chaꞌpꞌejlel bʌ mandar baꞌ mi yʌl: Pꞌuntyan a piꞌʌlob ti chumtyʌl lajal bajcheꞌ mi a bajñel pꞌuntyan a bʌ. Cheꞌ mi yʌleꞌ jini mandar tyac. Machꞌan yambʌ mandar más ñuc bʌ bajcheꞌ iliyi. Cheꞌ ti yʌlʌ Jesús.
32 Cheꞌ jini, jini ajcʌntisa tiꞌ sube Jesús: Ñoj melel, Maestro. Melelʌch bajcheꞌ maꞌ wʌleꞌ cheꞌ juntiquil jach jini Dios, machꞌan yambʌ Dios.
33 Melelʌch, cheꞌ mi lac pꞌuntyan Dios ti pejtyelel lac pusicꞌal, ti pejtyelel lac ñaꞌtyʌbal, ti pejtyelel lac chꞌujlel, ti pejtyelel lac pꞌʌtyʌlel yicꞌot cheꞌ mi lac pꞌuntyan lac piꞌʌl ti chumtyʌl lajal bajcheꞌ mi lac bajñel pꞌuntyan lac bʌ, melelʌch más wen bajcheꞌ pejtyelel baꞌic jach bʌ i majtyan Dios. Cheꞌ ti yʌlʌ jini winic.
34 Cheꞌ ñac ti yubi Jesús cheꞌ weñʌch muꞌ ti tꞌan jini winic ti queji i suben: Tsꞌityaꞌ jachix maꞌ maꞌ ñoj ñaꞌtyan, chaꞌan maꞌ wochel ti yumintyel Dios, cheꞌen. Cheꞌ jini machꞌanix majch ti queji i chaꞌ cꞌajtiben tyac.
¿Majchqui jini Cristo?
35 Cheꞌ ñac mucꞌ ti cʌntisa Jesús yaꞌ ti pat templo ti queji i yʌleꞌ: ¿Bajcheꞌqui isujm cheꞌ mi yʌlob ajcʌntisa chaꞌan i mandar israelob mi i jiñʌjlel David jini Cristo jini yajcʌbil bʌ i chaꞌan Dios?
36 Como tiꞌ pꞌʌtyʌlel Chꞌujul bʌ i Chꞌujlel Dios David ti yʌlʌ:
Jini lac Yum tiꞌ sube jini c Yum:
Buchiꞌ tic ñoj chaꞌan tsiquilʌch a ñuclel,
jintyo mi cʌqꞌueñet chaꞌan a jisʌben i pꞌʌtyʌlel a contrajob.
Cheꞌ ti wʌ subenti Jesús ti Dios, cheꞌ David.
37 ¿Bajcheꞌqui chꞌujbi cheꞌ i jiñʌjlelon David jini Cristo cheꞌ David ti yʌlʌ Cristo ti Yum? Cheꞌ ti yʌlʌ Jesús. Jini muchꞌquibiloꞌ bʌ quixtyañu cꞌajacñayob i yoj cheꞌ ti yubiyob.
Jesús tiꞌ tyaja ti tꞌan ajcʌntisajob i chaꞌan israelob
38 Cheꞌ ñac mucꞌ ti cʌntisa Jesús ti yʌlʌ: Cʌñʌtyan laꞌ bʌ chaꞌan ajcʌntisajob chaꞌan i mandar israelob muꞌ bʌ i mulañob i wen chꞌʌlob i bʌ cheꞌ mi majlelob ti xʌmbal. Miꞌ mulañob cheꞌ cabʌl miꞌ pejcʌntyelob yaꞌ ti calle tyac.
39 Miꞌ mulañob más wen tyac bʌ buchlibʌl yaꞌ ti templo tyac israelob yicꞌot jini más wen bʌ buchlibʌl ti qꞌuiñejel.
40 Miꞌ chilbeñob i lum jini mebaꞌ ixicob. Miꞌ melob tyam bʌ oración chaꞌan wen mi yilʌntyel. Jiñobʌch más bʌbʌqꞌuen bʌ mi quej i yʌqꞌuentyel i xotꞌob i mul. Cheꞌ ti yʌlʌ Jesús.
I yofrenda juntiquil pꞌumpꞌum bʌ mebaꞌ ixic
41 Yaꞌ buchul Jesús tiꞌ tyojel baꞌ mi yotsañob ofrenda. Chʌncol i yilan cheꞌ mi yotsañob tyaqꞌuin ti yajnib. Cabʌl ricojob bʌ ti yʌcꞌʌyob i yonlel tyaqꞌuin.
42 Yaꞌ ti cꞌoti juntiquil mebaꞌ ixic machꞌʌ baꞌan chʌ bʌ an i chaꞌan. Ti yotsʌ chaꞌwejch tyaqꞌuin. Jini chaꞌwejch tyaquin lajalʌch bajcheꞌ diez centavos.
43 Jesús tiꞌ pʌyʌ ajcʌntꞌañob i chaꞌan. Tiꞌ subeyob: Melel mic subeñetla, ili pꞌumpꞌum bʌ mebaꞌ ixic más on ti yotsʌ yaꞌ ti yajnib ofrenda bajcheꞌ ti pejtyelel jini yañoꞌ bʌ yubil.
44 Como jini yañoꞌ bʌ, an tyo yonlel chʌ bʌ an i chaꞌan ti cʌyle. Jini xꞌixic maꞌix chʌ bʌ an i chaꞌan ti cʌyle. Cheꞌ ti yʌlʌ Jesús.