2 Jesús tiꞌ cꞌajtibe: ¿Chʌncol ba a qꞌueleꞌ cheꞌ ñoj wen melel tyac ili otyot? Pero machꞌan mi quejel i saj cʌytyʌl mi jumpꞌejlic tyun tiꞌ pam yambʌ. Mi quejel i luꞌ jejmel jubel. Cheꞌ ti yʌlʌ Jesús.

3 Cheꞌ jini ti majliyob ti wits Olivajol bʌ i cꞌabaꞌ yaꞌ tiꞌ tyojel jini templo. Cheꞌ ñac yaꞌ buchul Jesús yicꞌot Pedro, Jacobo, Juan yicꞌot Andrés ti queji i bajñel cꞌajtibeñob tyac.

4 Subeñon lojon, ¿jalajqui mi quej i yujtyel pejtyel jini? ¿Chuqui ti seña mi quejel cheꞌ mi luꞌ tsꞌʌctiyel pejtyel jini? cheꞌob.

5 Jesús tiꞌ subeyob: Yom wen xucꞌuletla chaꞌan machꞌan majch chꞌujbi i lotiñetla.

6 Cabʌl mi quej i tyʌlelob muꞌ bʌ i quejel i cꞌʌmbeñon j cꞌabaꞌ. Mi quejel i yʌlob: Joñon Cristojon yajcʌbilon bʌ i chaꞌan Dios, cheꞌob. Cabʌl mi quejel i lotintyelob.

7 Cheꞌ mi quej laꞌ wubin an cabʌl guerra yicꞌot cabʌl tꞌan tyac chaꞌan guerra, mach quejiquetla ti bʌqꞌuen. Chʌꞌʌch mi quej i wersa yujtyel pero max tyo me jinic i yujtibal mulawil.

8 Mi quejelob ti guerra jumpꞌej pañimil yicꞌot yambʌ pañimil. Yumʌlob yicꞌot añoꞌ bʌ tiꞌ wenta mi quejel i chaꞌlen guerra tiꞌ contra yambʌ yumʌl. Mi quejel yujquel tyac lum ti cabʌl pañimil tyac. Mi quejel wiꞌñal yicꞌot wocol. Jiñʌch i tyejchibal jax tyo wocol muꞌ bʌ quej i ñusan quixtyañujob.

9 Cʌñʌtyan laꞌ bʌ. Mi quejel laꞌ wʌjqꞌuel tiꞌ cꞌʌb ñuc bʌ yeꞌtyel. Mi quej i jatsꞌetla yaꞌ ti templo tyac israelob. Mi quejel laꞌ pʌjyel majlel yaꞌ tiꞌ tyojlel añoꞌ bʌ i yeꞌtyel yicꞌot ñuc bʌ yumʌlob chaꞌan tij caj joñon, chaꞌan mi laꞌ subon tiꞌ tyojlelob.

10 Cheꞌ max tyo i yujtibal añʌch chaꞌan subentic quixtyañujob jini wen bʌ tꞌan chaꞌan laj cotyʌntyel ti pejtyel pañimil tyac.

11 Cheꞌ miꞌ pʌyetyob majlel baꞌan añoꞌ bʌ i yeꞌtyel mach laꞌ ñaxan pensalin chʌ bʌ mi quej laꞌ subeñob. Subenla jini muꞌ bʌ i yʌqꞌueñetla a subeꞌ Dios ti jim bʌ ora. Cheꞌ jini mach jatyeticla muqꞌuet bʌ la ti tꞌan pero jiñʌch Chꞌujul bʌ i Chꞌujlel Dios mucꞌ ti tꞌan.

12 Jini i yijtsꞌiñob i bʌ mi quejel i yʌcꞌob i bʌ tiꞌ cꞌʌb jini yom bʌ i tsʌnsañob. Winic mi quejel i yʌqꞌueꞌ ti tsʌnsʌntyel i yalobil. I yalobilob mi quejel i contrajiñob i tyat i ñaꞌ. Mi quej i yʌcꞌob ti tsʌnsʌntyel.

13 Ti pejtyelelob mi quejel i michꞌqꞌueletla chaꞌan ti caj chʌncol laꞌ tsʌcleñon. Cheꞌ jini, jini muꞌ bʌ i cucheꞌ i wocol cꞌʌlʌl ti jilibal mi quejel i cotyʌntyel.

14 Mi quejel laꞌ wilan mi yujtyel bajcheꞌ ti wʌ alʌ tsaꞌ bʌ xijqꞌui yʌleꞌ Daniel bʌ i cꞌabaꞌ. Tiꞌ tsꞌijbu chaꞌan mi quejel laꞌ wilan jini ñoj bibajax bʌ muꞌ bʌ i jisan cabʌl chʌ bʌ yes tyac yaꞌix waꞌal yaꞌ baꞌ mach yom ochic. Jini muꞌ bʌ i qꞌueleꞌ ili jun yom i chꞌʌmben isujm cheꞌ mi yilan bajcheꞌ ti wʌ ajli. Cheꞌ jini, jini añoꞌ bʌ ti Judea cheꞌ miꞌ qꞌueleꞌ bajcheꞌ mi yujtyel yom putsꞌicob majlel ti wits.

15 Ti jim bʌ ora jini am bʌ tiꞌ pat i yotyot mach yom jalec chaꞌan i yochel i chꞌʌmeꞌ loqꞌuel chʌ bʌ an i chaꞌan ti yotyot.

16 Jini muꞌ bʌ i majlel tiꞌ cholel mach yom chaꞌ sujtic ti yotyot mi chaꞌanic i locꞌsan i pislel.

17 Ñoj pꞌumpꞌuñob cheꞌ bajcheꞌ mi quejel i ñusañob wocol jini cʌñʌtyʌbil tyo bʌ i chaꞌan i yalobil, yicꞌot chʌncol tyo bʌ i tsuꞌsan i yalobil.

18 Chaꞌlenla oración chaꞌan mach ti yorojlel tsʌñal mi laꞌ wersa majlel ti putsꞌel.

19 Ñoj wocol mi quejel ili qꞌuin tyac. Más wocol bajcheꞌ pejtyel wocol tyac bʌ cꞌʌlʌl tiꞌ tyejchibal ili mulawil tsaꞌ bʌ i mele Dios cꞌʌlʌ wale iliyi. Machꞌan baꞌ bʌ ora mi quejel i ñumel lajal bʌ wocol.

20 Mi machꞌan miꞌ comꞌisan Dios ili qꞌuin tyac, machꞌan majch miꞌ cucheꞌ. Pero mi quej i comꞌisan ili qꞌuin tyac chaꞌan ti caj miꞌ pꞌuntyan Dios jini tsaꞌ bʌ i wʌ yajcʌ.

21 Cheꞌ jini mi an majch miꞌ subeñetla: Qꞌuele wʌꞌan wʌꞌi jini Cristo yajcʌbil bʌ i chaꞌan Dios, cheꞌen, o yambʌ mi yʌl: Cucu, qꞌuelela yaꞌan Cristo, jini yajcʌbil bʌ i chaꞌan Dios yaꞌyaꞌi, cheꞌen. Mach yom laꞌ chꞌujbin.

22 Como cabʌl mi quejel i lolon subob i bʌ ti Cristo yicꞌot mi quej i lolon yʌlob xiqꞌuil tyʌlel i chaꞌan Dios. Mi quej i pʌsob tyac i señʌjlel yicꞌot ñuc tyac bʌ i pꞌʌtyʌlel chaꞌan yom i lotiñob jinic tyo yajcʌbiloꞌ bʌ i chaꞌan Dios mi ti mejliyob.

23 Pero jatyetla yom tsajibiletla. Joñon tic wʌ subetla pejtyelel jini. Cheꞌ ti wʌ alʌ Jesús.

24 Jim bʌ ora cheꞌ ujtyemix ili wocol tyac bʌ mi quejel i yicꞌan qꞌuin. Machꞌan mi quej i lejmel i cꞌʌcꞌal uw.

25 Mi quejel i yajlel tyac jubel ecꞌ am bʌ ti chan yicꞌot pejtyel chʌ bʌ an ti chan mi quejel i nijcʌyel.

26 Mi quejel i yilañoñob Joñon i Piꞌʌlon bʌ Quixtyañujob cheꞌ mi quejel c tyʌlel ti tyocal tic pꞌʌtyʌlel yicꞌot c ñuclel.

27 Cheꞌ mic tyʌlel mi quejel c choc tyʌlel ajtroñelob c chaꞌan chꞌoyol bʌ ti panchan. Mi quejel i muchꞌquiñob jini yajcʌbiloꞌ bʌ i chaꞌan Dios ti chʌnwejlel mulawil cꞌʌlʌl ti junxejlel mulawil cꞌʌlʌl ti ñajtlel chan.

28 Cʌñʌla jini lajoñel chaꞌan higuera bʌ i cꞌabaꞌ bʌ tyeꞌ. Cheꞌ an i buts cheꞌ chʌncol i chꞌojquijñel i yopol, cheꞌ jini mi laꞌ ñaꞌtyan lʌcꞌʌlix i yorojlel qꞌuin tyunil.

29 Cheꞌ jeꞌel, cheꞌ mi laꞌ qꞌueleꞌ chʌncol i yujtyel tyac iliyi, mi laꞌ ñaꞌtyan lʌcꞌʌlix i yorojlel mi quej c chaꞌ tyʌlel. Mero más lʌcꞌʌlix mach tyalon, yubil.

30 Melel mic subeñetla mi quejel i yujtyel tyac ti pejtyelel iliyi cheꞌ max tyo ti sajtiyob ili quixtyañujob wʌꞌ tyo bʌ añob ti ili ora.

31 Mi quejel i sʌc jilel majlel chan yicꞌot mulawil pero c tꞌan mach saj jil. Mux i luꞌ tsꞌʌctiyel. Cheꞌ ti yʌlʌ Jesús.

32 Machꞌan majch yujil baqui bʌ qꞌuin o baqui bʌ ora mi yujtyel jini, mi ajtroñelobic yaꞌ ti panchan, mi jinic joñon i Yalobilon mach cujil isujm. Jin jach c Tyat am bʌ ti panchan yujil isujm. Cheꞌ ti yʌlʌ Jesús.

33 Jin chaꞌan yom yʌxʌl laꞌ woj. Wen ñaꞌtyanla. Chaꞌlenla oración. Como machꞌan mi laꞌ ñaꞌtyan baqui bʌ ora mi quej i cꞌotyel yorojlel.

34 Chʌꞌʌch mi quejel i yujtyel bajcheꞌ juntiquil winic tsaꞌ bʌ majli ti ñajt bʌ lum. Cheꞌ ñac ti loqꞌui ti yotyot ti luꞌ aqꞌue tiꞌ wenta ajtroñelob i chaꞌan. Jujuntiquil ti yʌqꞌueyob i toñel. Tiꞌ sube juntiquil chaꞌan i wen cʌñʌtyʌben i tiꞌ i yotyot.

35 Yom yʌxʌl laꞌ woj como mach laꞌ wujil baqui bʌ ora mi quejel i tyʌlel i yum otyot mi ti pat xinqꞌuinil o mi ti xin acꞌbʌlel o mi ti jun uqꞌuel mut, o mi ti sʌc an.

36 Yom yʌxʌl laꞌ woj ame waꞌ tyʌlic cheꞌ wʌyʌletla.

37 Jini muꞌ bʌ c subeñetla mic subeñob ti pejtyelelob. Yom wen yʌxʌl laꞌ woj. Cheꞌ ti yʌlʌ Jesús.