2 Pero ti yʌlʌyob: Mach yom cheꞌ chʌncol qꞌuiñejel, ame nijquicob quixtyañu, cheꞌob.

3 Yaꞌan Jesús ti lum Betania bʌ i cꞌabaꞌ ti yotyot Simón jini tsaꞌ bʌ pejcʌnti ti Leproso, jiñʌch yom yʌleꞌ juntiquil am bʌ chʌ bʌ yes pasem tiꞌ pʌchʌlel tsaꞌ bʌ yʌcꞌʌ i pʌcꞌmisʌben majlel i bʌcꞌtyal. Yaꞌan tiꞌ tꞌejl mesa Jesús. Ti tyʌli juntiquil xꞌixic yicꞌot yowocña bʌ aceite nardo bʌ i cꞌabaꞌ ñoj lets bʌ i tyojol. Melel i yajnib ti tyun alabastro bʌ i cꞌabaꞌ. Tiꞌ xutꞌbe i bicꞌ i yajnib jini yowocña bʌ aceite. Tiꞌ mulbe tiꞌ jol Jesús.

4 Chaꞌtiquil uxtiquil yaꞌ bʌ añob ti michꞌʌyob. Ti yʌlʌyob: ¿Chucoch ti lolon yʌsi jini yowocña bʌ aceite?

5 Ñumen ti trescientos denarios i tyojol. Yom tsaꞌic chojni chaꞌan i yʌqꞌueñob jini pꞌumpꞌuñoꞌ bʌ yi, cheꞌob. Tiꞌ michꞌqꞌueleyob jini xꞌixic.

6 Jesús tiꞌ subeyob: Chʌch ajni. ¿Chucoch mi laꞌ tyʌcꞌlan? Ñoj wen tiꞌ chaꞌlibon ili xꞌixic.

7 Jini pꞌumpꞌuñoꞌ bʌ wʌch beleꞌ an laꞌ wicꞌot ti beleꞌ qꞌuin. Baꞌ bʌ ora laꞌ wom mi mejlel laꞌ cotyañob. Pero joñon machꞌan beleꞌ qꞌuin wʌꞌ añon quicꞌotyetla.

8 Jini xꞌixic tiꞌ mele chꞌujbi bʌ i meleꞌ. Tiꞌ ñaxan wʌ muluyon tic bʌcꞌtyal chaꞌan i chajpʌbeñon c chꞌujñʌntyel.

9 Melel mic subeñetla, baꞌical jach miꞌ sujbel ili wen tꞌan chaꞌan laꞌ cotyʌntyel, mi quejel i yʌjlel bajcheꞌ tiꞌ chaꞌle jini xꞌixic chaꞌan mi ñaꞌtyʌntyel. Cheꞌ ti yʌlʌ Jesús.

10 Cheꞌ jini, Judas Iscariote, juntiquil jini docejlelob ti majli yaꞌ baꞌan ñuc bʌ curajob chaꞌan i lajob i tꞌan chaꞌan bajcheꞌ chꞌujbi i yʌcꞌ Jesús tiꞌ cꞌʌb i contra.

11 Wen cꞌajacñayob i yoj cheꞌ ñac ti yubiyob. Ti yʌcꞌʌyob i tꞌan chaꞌan mi yʌcꞌob tyaqꞌuin. Cheꞌ jini Judas ti queji i sʌclan bajcheꞌ mi yʌcꞌ ti cʌchol Jesús.

12 Ti tyejchibal qꞌuiñejel cheꞌ miꞌ cꞌuxob caxlan waj machꞌʌ baꞌan yicꞌot i levadura muꞌ bʌ yʌqꞌuen i wos i bʌ, cheꞌ miꞌ tsʌnsañob tiñʌmeꞌ chaꞌan pascua bʌ qꞌuin, jini ajcʌntꞌañob i chaꞌan Jesús ti queji i cꞌajtiben: ¿Baqui a wom mi lojon c majlel c chajpʌbeñet chaꞌan maꞌ chaꞌlen weꞌel cheꞌ ti qꞌuiñejel pascua? cheꞌob.

13 Cheꞌ jini tiꞌ xiqꞌui majlel chaꞌtiquil ajcʌntꞌañob i chaꞌan. Tiꞌ subeyob: Cucula yaꞌ ti lum. Mi quej laꞌ tyaj juntiquil winic chʌncol bʌ i qꞌuecheꞌ majlel jumpꞌej ucꞌun jaꞌ. Tsʌclenla majlel.

14 Yaꞌ baꞌ mi yochel subenla i yum otyot: Jini Maestro mi yʌl: ¿Baqui an jini saj mal chaꞌan weꞌicon quicꞌot ajcʌntꞌañob c chaꞌan cheꞌ ti pascua bʌ qꞌuiñejel? cheꞌetla mi laꞌ suben.

15 Cheꞌ jini mi quejel i pʌsꞌeñetla jumpꞌej saj mal yaꞌ ti chaꞌlajmlel otyot, colem chajpʌbilix i mal. Yaꞌi mi laꞌ chajpan muꞌ bʌ quejel laj cꞌuxeꞌ. Cheꞌ ti yʌlʌ Jesús.

16 Ti majliyob jini ajcʌntꞌañob. Yaꞌ ti cꞌotiyob ti lum. Tiꞌ tyajayob cheꞌ bajcheꞌ ti wʌ alʌ Jesús. Tiꞌ chajpʌyob ili uchꞌel chaꞌan pascua.

17 Cheꞌ iqꞌuix quejel ti tyʌli Jesús yicꞌot doce ajcʌntꞌañob i chaꞌan.

18 Cheꞌ ñac chʌncolob ti weꞌel yaꞌ ti mesa, ti queji i yʌleꞌ Jesús: Melel mic subeñetla, an juntiquil wʌꞌ bʌ chʌncol ti weꞌel quicꞌot mi quejel i yʌcꞌon ti cʌchol. Cheꞌ ti yʌlʌ Jesús.

19 Ñoj chꞌʌjyem ti queji yubiñob. Ti queji i cꞌajtibeñob Jesús. ¿Joñon ba ti? Yambʌ ti yʌlʌ: ¿Joñon ba ti? cheꞌ tyacob.

20 Jesús tiꞌ subeyob: Juntiquil wʌꞌ bʌ an la quicꞌot muꞌ bʌ i tsꞌajeꞌ i waj ti chꞌejew quicꞌot, cheꞌen.

21 Mi quejel c sajtyel Joñon i Piꞌʌlon bʌ Quixtyañujob cheꞌ bajcheꞌ wʌ tsꞌijbubil. Pero ñoj wocol mi quejel i yubin jini muꞌ bʌ i yʌcꞌon ti cʌchol. Más wen machic baꞌan ti chꞌocʌ ili winic. Cheꞌ ti yʌlʌ Jesús.

22 Cheꞌ ñac mucꞌob ti weꞌel Jesús tiꞌ chꞌʌmʌ waj. Tiꞌ chaꞌle oración. Tiꞌ xetꞌe. Ti yʌqꞌueyob. Ti yʌlʌ: Cꞌuxula. Jiñʌch c bʌcꞌtyal, cheꞌen.

23 Cheꞌ jini tiꞌ chꞌʌmʌ jumpꞌej butꞌul bʌ vaso, tiꞌ sube wocox i yʌlʌ Dios. Ti yʌqꞌueyob. Cheꞌ jini ti pejtyelel tiꞌ motin japʌyob.

24 Jesús tiꞌ subeyob: Jiñʌch c chꞌichꞌel muꞌ bʌ quejel c bejquel chaꞌan cabʌlob chaꞌan tsiquil mi quejel tsijib trato bʌ tꞌan, cheꞌen.

25 Melel mic subeñetla, machꞌanix mi quej c chaꞌ japeꞌ jini yaꞌlel uva jintyo mi capeꞌ yaꞌ baꞌ luꞌ tsijib tyac yaꞌ baꞌ muꞌ ti yumʌl Dios. Cheꞌ ti yʌlʌ Jesús.

26 Cheꞌ ti ujti i cꞌʌyob jumpꞌej cꞌay ti loqꞌuiyob majlel ti wits Olivajol bʌ i cꞌabaꞌ.

27 Jesús tiꞌ sube ajcʌntꞌañob i chaꞌan: Ti laꞌ pejtyelel mi quejel laꞌ quisniñon ti ili bʌ acꞌbʌlel como ti Tsꞌijbubil bʌ i Tꞌan Dios mi yʌl: Mi quej c tsʌnsan jini ajcʌñʌtya tiñʌmeꞌ. Cheꞌ jini mi quej i pam pujquelob tiñʌmeꞌob. Chʌꞌʌch wʌ tsꞌijbubil, cheꞌ Jesús. [Tiñʌmeꞌ yom i yʌleꞌ oveja.]

28 Pero ti wiꞌil cheꞌ mi quejel c chaꞌ tyejchel loqꞌuel baꞌan sajtyemoꞌ bʌ mi quej c majlel c pijtyañetla yaꞌ ti Galilea. Cheꞌ ti yʌlʌ Jesús.

29 Pero Pedro tiꞌ sube: Aunque ti pejtyelel miꞌ quisniñetyob pero mach joñonic. Cheꞌ ti yʌlʌ Pedro.

30 Jesús tiꞌ jacꞌbe: Melel mic subeñet, wale ti ili bʌ acꞌbʌlel cheꞌ max tyo i chaꞌle chaꞌ uqꞌuel tyat mut, jatyet uxyajlel mi quejel a wʌleꞌ mach a cʌñʌyon. Cheꞌ ti yʌlʌ Jesús.

31 Pedro tiꞌ wersa chaꞌ alʌ: Aunque an chaꞌan sajticon quicꞌotyet, machꞌan mi quej j cʌl mach cʌñʌyet, cheꞌen. Cheꞌ ti yʌlʌyob ti pejtyelelob.

32 Yaꞌ ti cꞌotiyob baꞌan jumpejt lum Getsemaní bʌ i cꞌabaꞌ baꞌan pʌcꞌʌl bʌ tyeꞌ tyac. Jesús ti queji i subeñob ajcʌntꞌañob i chaꞌan: Buchiꞌla wʌꞌi cheꞌ mic majlel c chaꞌlen oración, cheꞌen.

33 Tiꞌ pʌyʌ majlel Pedro yicꞌot Jacobo yicꞌot Juan. Ñoj chꞌʌjyem ti queji i yubin Jesús. Ñoj cꞌuxucña i pusicꞌal.

34 Tiꞌ subeyob: Ñoj chꞌʌjyem c pusicꞌal. Comox sajtyel tic chꞌʌjyemlel. Wʌꞌ mi laꞌ cʌytyʌl wʌꞌi. Yom chꞌuj pꞌixiletla, cheꞌen.

35 Tsaꞌ tyo i chaꞌle xʌmbal cheꞌ lactyʌl majlel. Tiꞌ ñuc choco i bʌ ti oración. Tiꞌ cꞌajtibe Dios chaꞌan machꞌan mi cꞌotyel i yorojlel i cʌlʌx ñusan wocol mi ti mejli i tijqꞌuel.

36 Ti yʌlʌ: C Tyat, luꞌ chꞌujbiyʌch a meleꞌ. Mach a wʌcꞌon cochel ti ili wocol. Pero mele jiñʌch bajcheꞌ a wom mach jinic bajcheꞌ com joñon. Cheꞌ ti yʌlʌ Jesús.

37 Ti chaꞌ cꞌoti baꞌan ajcʌntꞌañob i chaꞌan. Wʌyʌlobix tiꞌ tyajayob. Tiꞌ sube Pedro: Simón, ¿wʌyʌletix ba? ¿Machꞌa baꞌan ti mejli a ticꞌ a wʌyel mi jumpꞌejlic ora?

38 Tiqꞌuila laꞌ wʌyel. Chaꞌlenla oración chaꞌan machꞌan mi laꞌ yajlel ti mulil. Ti laꞌ pusicꞌal laꞌ wom laꞌ mel chʌ bʌ wen pero wocol mi laꞌ chaꞌlen como quixtyañujetla.

39 Ti chaꞌ majli. Lajal tiꞌ chaꞌle oración.

40 Ti chaꞌ cꞌoti yaꞌ baꞌañob. Chaꞌ wʌyʌlobix tiꞌ chaꞌ tyajayob como bej yom i mutsꞌob i wut. Machꞌan ti saj mejli i jacꞌob.

41 Ti yuxyajlelel ti chaꞌ cꞌoti baꞌañob. Tiꞌ subeyob: Wʌyenixla, cꞌajax laꞌ woj. Ya jaxʌl. Tsaꞌix cꞌoti i yorojlel chaꞌan laꞌ wilan Joñon i Piꞌʌlon bʌ Quixtyañujob muqꞌuix quejel cʌjqꞌuel tiꞌ cꞌʌb xmulilob.

42 Tyejchenla. Cox lac tyaj tyʌlel. Lʌcꞌʌlix an jini muꞌ bʌ quej i yʌcꞌon ti cʌchol, cheꞌen.

43 Cheꞌ chʌncol tyo ti tꞌan Jesús, ti cꞌoti Judas, jiñʌch juntiquil i docejlelob. Ti tyʌli yicꞌot i yonlel am bʌ i machit tyac yicꞌot an tyacoꞌ bʌ i tyeꞌ. Yaꞌ loqꞌuemob tyʌlel yaꞌ baꞌan jini ñuc bʌ curajob yicꞌot baꞌan ajcʌntisajob chaꞌan i mandar israelob yicꞌot baꞌañob xñoxob añoꞌ bʌ yeꞌtyel.

44 Jini Judas tsaꞌ bʌ i yʌcꞌʌ Jesús ti cʌchol tiꞌ ñaxan subeyob i bʌ bajcheꞌ mi quejel i pʌsbeñob baqui bʌ jini Jesús. Ti yʌlʌ: Jini muꞌ bʌ c ñup, jiñʌch jini chʌncol bʌ laꞌ sʌclan. Chucula. Wen cʌchʌl mi laꞌ pʌy majlel. Cheꞌ ti yʌlʌ Judas.

45 Cheꞌ ñac ti cꞌoti tiꞌ waꞌ lʌcꞌʌ Jesús. Tiꞌ sube: Maestro, cheꞌen. Cheꞌ jini tiꞌ ñupu.

46 Tiꞌ chucuyob. Tiꞌ cʌchʌyob.

47 Juntiquil yaꞌ bʌ an yicꞌot tiꞌ botsꞌo i machit. Tiꞌ tsepbe loqꞌuel i chiquin yajtoñel ñoj ñuc bʌ cura.

48 Jesús tiꞌ sube: ¿Tsaꞌix ba tyʌliyetla a wicꞌot laꞌ machit yicꞌot laꞌ tyeꞌ chaꞌan mi laꞌ cʌchon cheꞌ bajcheꞌ ajxujchꞌon? cheꞌen.

49 Ti jujumpꞌej qꞌuin yaꞌ añon quicꞌotyetla ti cʌntisa yaꞌ ti templo. Machꞌan ti laꞌ saj chucuyon. Pero chʌꞌʌch chʌncol i yujtyel wale iliyi chaꞌan mi tsꞌʌctiyel Tsꞌijbubil bʌ i Tꞌan Dios. Cheꞌ ti yʌlʌ Jesús.

50 Ti pejtyelelob ajcʌntꞌañob tiꞌ cʌyʌyob Jesús. Ti putsꞌiyob.

51 Yaꞌan juntiquil alob bʌcꞌʌl bʌ ti wewel pisil. Chʌncol i tsʌclen majlel Jesús. Tiꞌ jopꞌo i chucob.

52 Cheꞌ jini tiꞌ colo jini wewel pisil. Chacalix tiꞌ cotyʌ i bʌ.

53 Yaꞌ tiꞌ pʌyʌyob majlel Jesús yaꞌ baꞌan jini ñoj ñuc bʌ cura. Cheꞌ jini, tiꞌ luꞌ muchꞌquiyob i bʌ pejtyelel yambʌ ñuc bʌ curajob yicꞌot xñoxob añoꞌ bʌ i yeꞌtyel yicꞌot ajcʌntisa chaꞌan i mandar israelob.

54 Pedro tiꞌ ñajtyʌ tsʌcle majlel Jesús. Cꞌʌlʌl ti cꞌoti yaꞌ ti pam i yotyot ñoj ñuc bʌ cura. Yaꞌ ti buchle yicꞌot policíajob. Chʌncolob ti qꞌuix.

55 Jini ñuc bʌ curajob yicꞌot pejtyelel añoꞌ bʌ yeꞌtyel ti comité Junta Suprema bʌ i cꞌabaꞌ tiꞌ sajcʌyob muꞌ bʌ i chaꞌleñob jopꞌtꞌan tiꞌ contra Jesús chaꞌan i yʌcꞌob ti sajtyel. Pero machꞌan tiꞌ tyajayob.

56 Cabʌl tiꞌ jopꞌoyob tꞌan tiꞌ contra Jesús pero machꞌan lajal ti loqꞌuiyob i tꞌan.

57 Ti waꞌleyob chaꞌtiquil uxtiquil chaꞌan i jopꞌeñob i mul Jesús. Ti yʌlʌyob:

58 Ti lojon cubi ti yʌlʌ Jesús: Mi quejel quisan jini templo melel bʌ ti cꞌʌbʌl. Ti yuxpꞌejlelel qꞌuin mi quej c chaꞌ waꞌchocon yambʌ machꞌʌ ti cꞌʌbʌl ti mejli, cheꞌen, cheꞌob.

59 Pero jini tsaꞌ bʌ yʌlʌyob machꞌan junlajal ti loqꞌuiyob i tꞌan.

60 Cheꞌ jini, ti waꞌle tiꞌ tyojlelob jini ñoj ñuc bʌ cura chaꞌan i cꞌajtiben Jesús: ¿Machꞌa baꞌan chʌ bʌ maꞌ jaqꞌueꞌ? ¿Chuquiyes i sujmlel chʌncol bʌ i yʌlob ti a contra? cheꞌen.

61 Jesús chꞌuj ñʌchꞌʌl ti cʌyle, machꞌan tiꞌ saj jacꞌʌ. Jini ñoj ñuc bʌ cura tiꞌ chaꞌ cꞌajtibe: ¿Jatyet ba Cristojet, jini yajcʌbilet bʌ i chaꞌan Dios? ¿Yalobilet ba jini ñoj utsꞌat bʌ Dios? cheꞌen.

62 Jesús tiꞌ jacꞌʌ: Joñoñʌch, cheꞌen. Mi quejel laꞌ wilan Joñon i Piꞌʌlon bʌ Quixtyañujob yaꞌ buchul ti i ñoj jini pꞌʌtyʌl bʌ Dios. Mi quej laꞌ wilan cheꞌ mi quejel c tyʌlel yaꞌ ti mal tyocal yaꞌ ti panchan. Cheꞌ ti yʌlʌ Jesús.

63 Cheꞌ jini, tiꞌ tsili i pislel jini ñoj ñuc bʌ cura como chʌncol jach i cuyeꞌ i bʌ ti Dios Jesús tiꞌ lolon ñaꞌtyʌ. Ti yʌlʌ: ¿Chuquiyes i cꞌʌjnibal mi lac sʌclan yambʌ tꞌan? cheꞌen.

64 Tsaꞌix laꞌ wubi chʌncol i chaꞌlen bibajax bʌ tꞌan tiꞌ contra Dios. ¿Bajcheꞌ laꞌ wʌleꞌ? cheꞌen. Cheꞌ jini ti luꞌ yʌcꞌʌyob i tꞌan chaꞌan yom tsʌnsʌntic, cheꞌob.

65 Jini yaꞌ bʌ añob ti queji i tyujbañob Jesús. Tiꞌ mʌcbeyob i wut. Tiꞌ tyum jajtsꞌiyob. Tiꞌ subeyob: Subeñon lojon majchqui tiꞌ jatsꞌʌyet, cheꞌob. Jini policíajob tiꞌ lecꞌ jajtsꞌʌyob.

66 Yaꞌan Pedro tiꞌ pat i yotyot jini ñuc bʌ cura. Ti tyʌli juntiquil xcꞌalʌl bʌ yajtoñel jini ñuc bʌ cura.

67 Cheꞌ ñac ti yilʌ Pedro yaꞌ chʌncol ti qꞌuix, tiꞌ chꞌuj qꞌuele, tiꞌ sube: Jatyet jeꞌel ti a piꞌle ti xʌmbal Jesús chꞌoyol bʌ ti Nazaret, cheꞌen.

68 Pero Pedro ti yʌlʌ mach chʌꞌic. Ti yʌlʌ: Mach j cʌñʌ. Machꞌan mic ñaꞌtyan chʌ bʌ maꞌ wʌleꞌ, cheꞌen. Ti loqꞌui majlel ti corredor. Cheꞌ jini tiꞌ chaꞌle jun uqꞌuel tyat mut.

69 Jini xcꞌalʌl tiꞌ chaꞌ qꞌuele Pedro. Ti queji i suben jini yaꞌ bʌ añob: Iliyi jiñʌch juntiquil i piꞌʌlob, cheꞌen.

70 Pedro ti chaꞌ alʌ mach melelic. Cheꞌ jini ti jumucꞌlel tiꞌ chaꞌ subeyob Pedro jini yaꞌ bʌ añob: Melelʌch, jatyet i piꞌʌlet cheꞌ cu yaꞌ tyʌlemet ti Galilea jeꞌel como tsiquilʌch jeꞌel bajcheꞌ muqꞌuet ti tꞌan, cheꞌob.

71 Cheꞌ jini Pedro ti queji ti alꞌiya. Ti yʌlʌ: Melelʌch c tꞌan, Dios miꞌ qꞌuelon. Mach j cʌñʌ ili winic chʌncol bʌ laꞌ wʌleꞌ, cheꞌen.

72 Ti waꞌ queji ti uqꞌuel tyat mut. Cheꞌ jini ti cꞌajtiyi i chaꞌan Pedro tsaꞌ bʌ i wʌ alʌ Jesús cheꞌ ñac tiꞌ sube: Cheꞌ max tyo i chaꞌle chaꞌ uqꞌuel tyat mut uxyajlelel mi quejel a wʌleꞌ mach a cʌñʌyon, cheꞌen. Cheꞌ tiꞌ wʌ sube. Cheꞌ jini cheꞌ tiꞌ ñaꞌtyʌ Pedro ti wen queji ti uqꞌuel.