2 Judas, jini muꞌ bʌ yʌcꞌ Jesús tiꞌ cꞌʌb i contrajob tiꞌ cʌñʌ jini pʌcꞌʌbʌl jeꞌel. Como yaꞌi cabʌl tiꞌ muchꞌquiyob i bʌ Jesús yicꞌot ajcʌntꞌañob i chaꞌan.

3 Yaꞌ ti cꞌoti Judas. Tiꞌ pʌyʌ cꞌotyel junmujchꞌ soldadojob yicꞌot chaꞌtiquil uxtiquil policía am bʌ yeꞌtyel i cʌñʌtyan templo i chaꞌanoꞌ bʌ israelob tsaꞌ bʌ xijqꞌui majlel ti ñuc bʌ curajob i chaꞌan bʌ israelob yicꞌot fariseojob. Tiꞌ chꞌʌmʌyob majlel i machit tyac yicꞌot cꞌajc yicꞌot tsꞌʌbʌl bʌ tyaj.

4 Pero Jesús tiꞌ wʌ ñaꞌtyʌ ti pejtyelel chʌ bʌ tyac mi quejel i ñusan. Jin chaꞌan ti majli i tyajob tyʌlel. Tiꞌ cꞌajtibeyob: ¿Majchqui chʌncol laꞌ sajcan? cheꞌen.

5 Tiꞌ jacꞌʌyob: Jesús, chꞌoyol bʌ ti Nazaret, cheꞌob. Jesús ti yʌlʌ: Joñoñʌch, cheꞌen. Yaꞌan yicꞌotyob Judas muꞌ bʌ i yʌcꞌ tiꞌ cꞌʌb i contrajob Jesús.

6 Cheꞌ ñac Jesús tiꞌ subeyob: Joñoñʌch, cheꞌen, ti chꞌaꞌ yajliyob ti lum.

7 Cheꞌ jini Jesús tiꞌ chaꞌ cꞌajtibeyob: ¿Majchqui chʌncol laꞌ sajcan? cheꞌen. Ti yʌlʌyob: Jesús chꞌoyol bʌ ti Nazaret, cheꞌob.

8 Cheꞌ jini, Jesús tiꞌ subeyob: Tsaꞌix c subetla chaꞌan joñoñʌch. Mi chʌncol laꞌ sajcañon, laꞌ sujticob jini ajcʌntꞌañob c chaꞌan, cheꞌen.

9 Chʌꞌʌch ti ujti chaꞌan mi tsꞌʌctiyel tsaꞌ bʌ wʌ alʌ Jesús: Tsaꞌ bʌ yʌcꞌon c Tyat ti panchan, machꞌan tic sʌtyʌ, mi junticlec. Cheꞌ ti wʌ alʌ.

10 Cheꞌ jini, Simón Pedro tiꞌ botsꞌo i machit. Tiꞌ tsepbe loqꞌuel i ñoj bʌ i chiquin juntiquil ajtroñel i chaꞌan ñoj ñuc bʌ cura. Malco i cꞌabaꞌ jini ajtroñel.

11 Pero Jesús tiꞌ sube Pedro: Chaꞌ otsan a machit ti yotyot. Bajcheꞌ maꞌ wʌl: ¿Mach ba baꞌan an chaꞌan c ñusan wocol muꞌ bʌ i yʌqꞌueñon c ñusan c Tyat maꞌ wʌl? cheꞌen.

12 Cheꞌ jini, jini soldadojob yicꞌot i capitán soldadojob yicꞌot policíajob tsaꞌ bʌ xijqꞌuiyob tyʌlel tiꞌ chucuyob Jesús. Tiꞌ cʌchʌyob.

13 Cheꞌ jini, tiꞌ pʌyʌyob majlel Jesús ti yotyot Anás, jiñʌch i ñijꞌatyat Caifás. Ti jim bʌ jabil an i yeꞌtyel Caifás ti ñoj ñuc bʌ cura.

14 Jiñʌch jini Caifás tsaꞌ bʌ wʌ subeyob jini israelob añoꞌ bʌ yeꞌtyel: Más wen muqꞌuic i sajtyel juntiquil chaꞌan ti laj qꞌuexol ti lac pejtyelel, cheꞌen.

15 Juan yicꞌot Simón Pedro tiꞌ tsʌcle majlel Jesús. Jini ñoj ñuc bʌ cura tiꞌ cʌñʌ Juan, jin chaꞌan ti yʌcꞌʌ i majlel cꞌʌlʌ yaꞌ ti corredor baꞌ ti pʌjyi majlel Jesús.

16 Pedro ti cʌyle yaꞌ ti lʌcꞌʌl tiꞌ otyot. Yaꞌ chaꞌ tsajni Juan. Tiꞌ pejcʌ jini xcꞌalʌl tsaꞌ bʌ cʌñʌtyʌ i tiꞌ otyot. Cheꞌ jini, ti yʌcꞌʌ ti ochel Pedro.

17 Jini xcꞌalʌl tiꞌ sube Pedro: Jixcu jatyet, ¿mach ba ajcʌntꞌañet i chaꞌan jini winic muꞌ bʌ i pejcʌntyel ti Jesús jeꞌel? cheꞌen. Pedro tiꞌ jacꞌʌ: Machꞌan. Mach joñonic, cheꞌen.

18 Jini ajtroñelob yicꞌot policíajob ti i ñutsuyob cꞌajc como an tsʌñal. Yaꞌ waꞌalob ti qꞌuix. Yaꞌ waꞌal Pedro yicꞌotyob. Muꞌ ti qꞌuix jeꞌel.

19 Jini ñoj ñuc bʌ cura ti queji i cꞌajtiben Jesús majchqui jini ajcʌntꞌañob i chaꞌan yicꞌot chʌ bʌ ti cʌntisa mucꞌ.

20 Jesús tiꞌ sube: Jini tsaꞌ bʌ cʌlʌ, jamʌl ti cʌlʌ baꞌ chꞌujbi i yubin ti pejtyelelob. Tic beleꞌ chaꞌle cʌntisʌ ti baꞌical bʌ saj templo tyac baꞌ miꞌ muchꞌquiñob i bʌ quixtyañujob yicꞌot jeꞌel ti ñuc bʌ templo baꞌ mi luꞌ muchꞌquiñob i bʌ pejtyelel israelob. Machꞌan chʌ bʌ yes tic saj mucul alʌ, cheꞌen.

21 ¿Chucoch maꞌ cꞌajtibeñon chʌ bʌ yes tij cʌntisʌyob? Yom a cꞌajtibeñob tsaꞌ bʌ yubiyob. Laꞌ i subeñetyob chʌ bʌ ti cʌlʌ. Yujilob isujm. Cheꞌ ti yʌlʌ Jesús.

22 Cheꞌ ñac Jesús ti ujti i yʌleꞌ ili tꞌan, juntiquil policía i chaꞌan bʌ templo yaꞌ waꞌal tiꞌ tꞌejl tiꞌ jatsꞌʌ Jesús tiꞌ choj. ¿Chʌꞌʌch ba yom a jacꞌben i tꞌan jini ñoj ñuc bʌ cura maꞌ lolon ubin? cheꞌen.

23 Jesús tiꞌ sube jini policía: Mi an machꞌʌ wen ti cʌlʌ, subeñon chʌ bʌ mach wen ti cʌlʌ. Pero mi weñʌch ti cʌlʌ, ¿chucoch ti a jatsꞌʌyon? cheꞌen.

24 Cheꞌ jini, Anás tiꞌ choco majlel Jesús yaꞌ baꞌan Caifás jini ñoj ñuc bʌ cura. Cʌchʌl ti majli Jesús.

25 Yaꞌ tyo waꞌal Pedro baꞌan cꞌajc. Muꞌ tyo ti qꞌuix. Jini yaꞌ bʌ waꞌalob yicꞌot ti yʌlʌyob: ¿Mach ba jatyet jeꞌel ajcʌntꞌan i chaꞌan jini winic muꞌ bʌ i pejcʌntyel ti Jesús? cheꞌob. Pedro tiꞌ jacꞌʌ: Machꞌan. Mach joñoñic, cheꞌ Pedro.

26 Cheꞌ jini, juntiquil ajtoñel i chaꞌan ñoj ñuc bʌ cura, i piꞌʌl jini tsaꞌ bʌ tsejpi loqꞌuel i chiquin ti Pedro ti yʌlʌ: ¿Machꞌa jatyet tsaꞌ bʌ quilʌyet yaꞌ ti pʌcꞌʌbʌl a wicꞌot Jesús jeꞌel?

27 Pedro ti chaꞌ alʌ chaꞌan mach cheꞌiqui. Ti jin jach bʌ ora tiꞌ waꞌ chaꞌle uqꞌuel tyat mut.

28 Cheꞌ yomox sʌcꞌ an tiꞌ pʌyʌyob loqꞌuel Jesús yaꞌ ti yotyot Caifás. Tiꞌ pʌyʌyob majlel ti yotyot ñuc bʌ yumʌl Pilato bʌ i cꞌabaꞌ. Pero jini israelob machꞌan ti ochiyob ti mal baꞌ ti pʌjyi ochel Jesús. Como tiqꞌuil chaꞌan bajcheꞌ miꞌ bajñel tyumbiñob i bʌ chaꞌan mi yochel baꞌan jini machꞌʌ israelob cheꞌ ti yorojlel i qꞌuinilel pascua. Tiqꞌuil, cheꞌ jini, i cꞌuxob jini muꞌ bʌ i chajpʌntyel chaꞌan i qꞌuinilel pascua.

29 Jin chaꞌan Pilato ti loqꞌui i pejcañob. Tiꞌ subeyob: ¿Chuquiyes i mul jini winic mi laꞌ wʌl? cheꞌen.

30 Tiꞌ jacꞌʌyob: Machic baꞌan i mul jini winic machꞌan ti lojon cʌcꞌʌ ti a cꞌʌb, cheꞌob.

31 Cheꞌ jini, Pilato tiꞌ subeyob: Pʌyʌla majlel. Melela cheꞌ bajcheꞌ tsꞌijbubil ti laꞌ mandar laꞌ bajñel, cheꞌen. Pero jini israelob ti yʌlʌyob: Tiqꞌuil chaꞌan joñon lojon israelon bʌ lojon mi lojon cʌcꞌ ti sajtyel quixtyañu, cheꞌob.

32 Chʌꞌʌch ti tsꞌʌctiyi tsaꞌ bʌ wʌ alʌ Jesús bajcheꞌ mi quejel i sajtyel.

33 Pilato ti chaꞌ ochi ti mal yotyot baꞌ mi ujtyel melojel. Tiꞌ pʌyʌ tyʌlel Jesús. Tiꞌ cꞌajtibe: ¿Jatyet ba ñuc bʌ Yumʌlet i chaꞌan israelob? cheꞌen.

34 Jesús ti yʌlʌ: ¿Chʌncol a bajñel al tyʌlem bʌ ti a pusicꞌal o am ba majch tiꞌ subeyet chaꞌan chʌꞌʌchi? cheꞌen.

35 Pilato ti yʌlʌ: ¿Joñon israelon ba maꞌ lolon al? Jiñʌch a piꞌʌlob israeloꞌ bʌ yicꞌot ñuc bʌ curajob tsaꞌ bʌ yʌcꞌʌyetyob tij cꞌʌb. ¿Chuquiyes ti a chaꞌle tiꞌ contrajob? cheꞌen.

36 Jesús tiꞌ sube Pilato: Mach wʌꞌic ti mulawil mic chaꞌlen queꞌtyel. Mi wʌꞌiqui, tiꞌ chaꞌleyob wersa ajcʌntꞌañob c chaꞌan i wentyʌlel chaꞌan machic ajqꞌuicon tiꞌ cꞌʌb israelob añoꞌ bʌ i yeꞌtyel. Pero mach wʌꞌic mic chaꞌlen yumʌl, cheꞌen.

37 Cheꞌ jini, Pilato ti yʌlʌ: ¿Melel ba yumʌlet, cheꞌ jini? Jesús ti yʌlʌ: Melelʌch bajcheꞌ ti a wʌlʌ. Yumʌlon. Ti chꞌocʌyon chaꞌan mic tyʌlel wʌꞌ ti mulawil chaꞌan mic subeñob quixtyañujob melel bʌ tꞌan muꞌ bʌ yʌcꞌ ti cʌjñel i sujmlel Dios. Jini muꞌ bʌ i jacꞌ jini melel bʌ tꞌan miꞌ ñʌchꞌtyan chʌ bʌ mic subeñob. Cheꞌ ti yʌlʌ Jesús.

38 Pilato ti yʌlʌ: ¿Chuquiyes cheꞌ melel bʌ tꞌan? cheꞌen.

39 I tyʌlel cheꞌ ti yorojlel pascua bʌ qꞌuin mi cʌcꞌ ti colel juntiquil ajcʌchol, majchical jach mi laꞌ cꞌajtibeñon. ¿Laꞌ wom ba la mi cojlel jini ñuc bʌ Yumʌl laꞌ chaꞌan israelet bʌ la? Cheꞌ ti yʌlʌ Pilato.

40 Cheꞌ jini ti luꞌ chaꞌ quejiyob ti cꞌam bʌ tꞌan. Mach jiniqui. Laꞌ cojlic Barrabás, cheꞌob. Ajxujchꞌ jini Barrabás.