2 Ti a wʌcꞌon tic wenta pejtyel quixtyañu chaꞌan mi cʌqꞌuen i cuxtyʌlel machꞌʌ yujil jilel pejtyel tsaꞌ bʌ a wʌcꞌon.

3 Jiñʌch i cuxtyʌlel machꞌʌ yujil jilel cheꞌ miꞌ cʌñetyob ti ñoj melel bʌ Dioset jini cojach bʌ Dios yicꞌot joñon Jesucristojon tsaꞌ bʌ a choco tyʌlel.

4 Tic tsictisʌ a ñuclel wʌꞌ ti mulawil. Tsaꞌix c tsꞌʌctisʌ jini toñel tsaꞌ bʌ a xicꞌon c chaꞌlen.

5 Wale c Tyat, pʌsʌ c ñuclel ti a tyojlel cheꞌ bajcheꞌ i tyʌlel an c ñuclel quicꞌotyet cꞌʌlʌ cheꞌ ñac max tyo baꞌan mulawil.

6 Tic tsictisʌbet ti i tyojlel jini tsaꞌ bʌ a yajcʌ loqꞌuel ti i chaꞌañoꞌ bʌ mulawil chaꞌan a wʌqꞌueñon tic wenta. A chaꞌañobʌch. Ti a wʌcꞌon tic wenta. Tiꞌ chꞌujbibeyetyob a tꞌan.

7 Wale yujilobix isujm ti pejtyelel tsaꞌ bʌ c chaꞌle tyʌlem ti jatyet.

8 Tsaꞌix c subeyob pejtyelel a cʌntisa tsaꞌ bʌ a subon. Tiꞌ chꞌujbiyob. Yujilobix isujm melelʌch loqꞌuemon ti a tyojlel ti tyʌliyon ti mulawil. Tiꞌ chꞌujbiyob chaꞌan ti a chocoyon tyʌlel.

9 Mij cꞌajtibeñet i wenlel. Machꞌan mij cꞌajtibeñet chaꞌan machꞌʌ baꞌan tiꞌ chꞌujbiyetyob pero mij cꞌajtibeñet chaꞌan tsaꞌ bʌ a wʌcꞌon tic wenta como a chaꞌañobʌch.

10 Ti pejtyelelob lac chaꞌañobʌch. Miꞌ tsictisʌbeñoñob c ñuclel.

11 Maꞌ mi quejel j cʌytyʌl wʌꞌ ti mulawil. Pero jini lac chaꞌañob tsaꞌ bʌ i chꞌujbiyonla wʌꞌ tyo mi cʌytyʌlob. Joñon mic majlel chaꞌan mi cajñel a wicꞌotyon. Chꞌujul bʌ c Tyat, cʌñʌtyañob ti a pꞌʌtyʌlel jini tsaꞌ bʌ a wʌcꞌon tic wenta chaꞌan ajnic ti junsujm jach bʌ i pensal bajcheꞌ jatyet quicꞌot mi la cajñel ti junsujm lac pensal.

12 Cheꞌ wʌꞌ añon ti mulawil yicꞌotyob tij cʌñʌtyʌyob ti a pꞌʌtyʌlel tsaꞌ bʌ a wʌcꞌon tic wenta. Tij cʌñʌtyʌyob. Machꞌan tiꞌ sʌtyʌ i bʌ mi junticlec. Jini jach tsaꞌ bʌ i wʌ ñaꞌtyʌnti muꞌ bʌ i sʌt i bʌ chaꞌan mi tsꞌʌctiyel bajcheꞌ wʌ tsꞌijbubil ti Tsꞌijbubil bʌ a Tꞌan.

13 Wale mi quejel c chaꞌ tyʌlel yaꞌ baꞌañet. Pero mij cꞌajtibeñet ili tyac cheꞌ wʌꞌ tyo añon ti mulawil chaꞌan wen cꞌajacña i yoj mi yajñelob cheꞌ bajcheꞌ cꞌajacña coj.

14 Tsaꞌix c subeyob a tꞌan pero jini i chaꞌañoꞌ bʌ mulawil tiꞌ michꞌqꞌueleyob. Como mach i chaꞌañob mulawil cheꞌ bajcheꞌ mach i chaꞌañon mulawil.

15 Machꞌan mic subeñet chaꞌan a locꞌsañob ti mulawil pero mic subeñet chaꞌan maꞌ cʌñʌtyan ti i pꞌʌtyʌlel xiba.

16 Chʌꞌʌch bajcheꞌ mach i chaꞌañon mulawil chʌꞌʌch jeꞌel mach i chaꞌañob mulawil jini chʌncol bʌ i chꞌujbiñon.

17 Ñijcʌben i pusicꞌal chaꞌan ti melel bʌ a tꞌan chaꞌan mi yʌqꞌueñetyob i bʌ chaꞌan ti a chaꞌan mi yajñelob. Melel a tꞌan.

18 Cheꞌ bajcheꞌ ti a chocoyon tyʌlel wʌꞌ ti mulawil chʌꞌʌch jeꞌel mic chocob majlel yaꞌ baꞌan jini max tyo bʌ baꞌan miꞌ chꞌujbiñetyob.

19 Mi cʌqꞌueñet c bʌ chaꞌan mic sajtyel chaꞌan ti caj jini chʌncol bʌ i chꞌujbiñoñob. Chʌꞌʌch jeꞌel mi yʌqꞌueñetyob i bʌ jeꞌel ti pejtyelel i pusicꞌal.

20 Pero mach jinic jach i bajñel i chaꞌan mij cꞌajtibeñet i wenlel jini chʌncol bʌ i chꞌujbiñon wale iliyi, pero mij cꞌajtibeñet jeꞌel chaꞌan jini muꞌ tyo bʌ quejel i chꞌujbiñon cheꞌ mi yubiñob i tꞌan jini chʌncol bʌ i chꞌujbiñon wale iliyi.

21 Mij cꞌajtibeñet chaꞌan mi quejel i yajñel ti junsujm i pensal cheꞌ bajcheꞌ mi la cajñel ti junsujm. Jatyet añet ti joñon. Joñon añon ti jatyet. Cheꞌ bajcheꞌ mij cꞌajtibeñet chaꞌan jini lac chaꞌañoꞌ bʌ mi yajñel ti junsujm i pensal chaꞌan ti laj caj chaꞌan jini machꞌʌ baꞌan miꞌ chꞌujbin mi quejel i ñaꞌtyan ti a chocoyon tyʌlel ti mulawil.

22 Ti cʌqꞌueyob i ñuclel cheꞌ bajcheꞌ ti a wʌcꞌon c ñuclel chaꞌan mi motin ajñel ti junsujm i pensal chʌꞌʌch bajcheꞌ joñon quicꞌotyet mi la cajñel ti junsujm lac pensal.

23 Joñon, yicꞌot jatyet yicꞌot jini lac chaꞌañoꞌ bʌ junsujm jach lac pensal como añon ti jini muꞌ bʌ i chꞌujbiñon. Jatyet añet ti joñon. Ti cʌqꞌueyob i ñuclel cheꞌ bajcheꞌ ti a wʌcꞌon c ñuclel chaꞌan jini añoꞌ bʌ ti mulawil mi quejl i ñaꞌtyan ti a chocoyon tyʌlel chaꞌan jeꞌel miꞌ ñaꞌtyan lajal maꞌ pꞌuntyañob lac chaꞌañoꞌ bʌ cheꞌ bajcheꞌ maꞌ pꞌuntyañon.

24 C Tyat, tsaꞌix a wʌcꞌon tic wenta tsaꞌ bʌ i chꞌujbiyon. Com yaꞌ añob baꞌ mi quej cajñel chaꞌan i yilan c ñuclel tsaꞌ bʌ a wʌcꞌon. Como ti a pꞌuntyʌyon. Ti a wʌcꞌon c ñuclel cheꞌ ñac max tyo mejl mulawil.

25 Tyoj bʌ c Tyat, i chaꞌan jach bʌ mulawil machꞌan miꞌ cʌñetyob. Pero joñon bʌ yi j cʌñʌyetyʌch. Jini muꞌ bʌ i chꞌujbiñon yujilobix isujm ti a chocoyon tyʌlel.

26 Tsaꞌix c tsictisʌbeyob bajcheꞌ añet. Muꞌ tyo c bej tsictisʌbeñob bajcheꞌ añet chaꞌan i ñaꞌtyan bajcheꞌ maꞌ pꞌuntyañon. Yicꞌot mi cajñel tiꞌ pusicꞌalob. Cheꞌ jini, mi quej i pꞌuntyañob i bʌ. Cheꞌ tiꞌ chaꞌle oración Jesús.