2 Mi quej laꞌ chojquel loqꞌuel ti laꞌ templo tyac. Jinic tyo tyal i yorojlel mi quej i lolon ñaꞌtyan miꞌ chaꞌliben i toñel Dios cheꞌ miꞌ tsʌnsañetla.

3 Chʌꞌʌch mi quejl i tyʌcꞌlañetla como machꞌan tiꞌ cʌñʌ c Tyat ti panchan mi jinic tiꞌ cʌñʌyoñob jeꞌel.

4 Mic wʌ subeñetla ili tyac chaꞌan cheꞌ mi quejel laꞌ ñusan wocol mi laꞌ cꞌajtisan jini tsaꞌ bʌ c wʌ subetla. Cheꞌ ti yʌlʌ Jesús.

5 Pero wale mi quejel c majlel yaꞌ baꞌan jini tsaꞌ bʌ i chocoyon tyʌlel. Machꞌan mi junticlec mi laꞌ cꞌajtibeñon baqui mic majlel.

6 Pero wen chꞌʌjyemetla chaꞌan tic tꞌan tsaꞌ bʌ c subetla.

7 Pero melel c tꞌan. Más wen chaꞌañetla cheꞌ mic majlel. Como mi machꞌan mic majlel mach tyal chaꞌan mi yajñel laꞌ wicꞌot jini Chꞌujul bʌ c Chꞌujlel muꞌ bʌ quej i yʌqꞌueñetla laꞌ ñaꞌtyʌbal. Mi quej i ñuc isʌbeñetla laꞌ pusicꞌal. Pero cheꞌ mic majlel mic choqueꞌ tyʌlel.

8 Cheꞌ mi tyʌlel Chꞌujul bʌ c Chꞌujlel mi quej i tsictisʌben i mul quixtyañujob. Mi quejel i tsictisʌbeñob bajcheꞌ yom i yajñel. Mi quejel i tsictisan chaꞌan Dios mi quej i chaꞌlen melojel cheꞌ miꞌ melob ti jujuntiquilob.

9 Jini Chꞌujul bʌ c Chꞌujlel mi quej i tsictisan chaꞌan xmulilob como machꞌan miꞌ chꞌujbiñoñob.

10 Mi quejel i yʌqꞌuen i ñaꞌtyañob bajcheꞌ yom i yajñelob ti tyoj como mic majlel baꞌan c Tyat ti panchan. Jatyetla machꞌanix mi quej laꞌ bej qꞌuelon.

11 Jini Chꞌujul bʌ c Chꞌujlel mi quej i yʌqꞌuen i ñaꞌtyañob chaꞌan Dios miꞌ chaꞌlen melojel como wʌ alʌlix chaꞌan mi quej i xotꞌ i mul ti tyal tyo bʌ ora jini xiba muꞌ bʌ ti xicꞌojel wʌꞌ ti mulawil. Yicꞌot mi quej i xotꞌ i mul jini añoꞌ bʌ tiꞌ wenta xiba.

12 An tyo cabʌl chʌ bʌ com c subeñetla pero max tyo chꞌujbi laꞌ luꞌ chꞌʌmben isujm wale.

13 Cheꞌ mi tyʌlel Chꞌujul bʌ c Chꞌujlel muꞌ bʌ i pʌsꞌeꞌ i sujmlel mi quejel i cʌntisañetla ti pejtyelel i sujmlel. Como machꞌan miꞌ chaꞌlen bajñel tꞌan. Jini jach mi yʌl tsaꞌ bʌ subenti. Mi quejel i yʌqꞌueñetla laꞌ chꞌʌmben i sujmlel muꞌ tyo bʌ quej i yujtyel tyac.

14 Jini Chꞌujul bʌ c Chꞌujlel mi quejel i sub c ñuclel como mi quej i yʌqꞌueñetla laꞌ cʌñeꞌ c ñaꞌtyʌbal.

15 Ti pejtyelel i ñaꞌtyʌbal c Tyat ti panchan c ñaꞌtyʌbal jeꞌel. Jin chaꞌan ti cʌlʌ ti pejtyʌlel lojon c ñaꞌtyʌbal mi cʌqꞌuen i subeñetla jini Chꞌujul bʌ c Chꞌujlel chaꞌan laꞌ ñaꞌtyan. Cheꞌ ti yʌlʌ Jesús.

16 Jesús ti yʌlʌ: Maꞌix jal mi quej laꞌ bej qꞌuelon. Pero ti wiꞌil tyo tsꞌityaꞌ mi quej laꞌ chaꞌ qꞌuelon. Mi quejel c majlel yaꞌ baꞌan c Tyat ti panchan, cheꞌen.

17 Cheꞌ jini, chaꞌtiquil uxtiquil ajcʌntꞌañob i chaꞌan tiꞌ subeyob i bʌ: ¿Chuqui i sujmlel chʌncol bʌ i yʌl? Miꞌ subeñonla chaꞌan maꞌix jal mi quej lac bej qꞌueleꞌ. Pero tsꞌityaꞌ wiꞌil mi quejel lac chaꞌ qꞌueleꞌ. Mi quej i majlel yaꞌ baꞌan i Tyat.

18 ¿Chʌ bʌ yom i yʌleꞌ cheꞌ maꞌix jal? Mach cujila chʌ bʌ chʌncol i yʌleꞌ, cheꞌob. Cheꞌ ti chaꞌ tyajayob ti tꞌan Jesús.

19 Jesús yujil isujm chaꞌan yom i cꞌajtibeñob i sujmlel. Jesús tiꞌ subeyob: Tic subetla maꞌix jal mi quej laꞌ bej qꞌuelon. Ti wiꞌil tyo tsꞌityaꞌ mi quej laꞌ chaꞌ qꞌuelon. ¿Jim ba chaꞌan mi laꞌ cꞌajtiben laꞌ bʌ i sujmlel? cheꞌen.

20 Melel mic subeñetla, mi quej laꞌ chaꞌlen uqꞌuel. Chꞌʌjyem mi quej laꞌ wubin. Pero jini quixtyañujob mach bʌ baꞌan miꞌ chꞌujbiñon tijicña mi quejel i yubiñob. Aunque chꞌʌjyem mi quej laꞌ wubin pero ti wiꞌil chaꞌ cꞌajacña laꞌ woj mi quej laꞌ chaꞌ ubin.

21 Cheꞌ muꞌ ti bajqꞌuel xꞌixic chꞌʌjyem mi yubin chaꞌan i yorojlel i wocol. Pero cheꞌ tsaꞌix chꞌocʌ i yalobil maꞌix miꞌ bej pensalin i wocol como cꞌajacña i yoj chaꞌan tsaꞌix chꞌocʌ i yalobil.

22 Chʌꞌʌch jatyetla jeꞌel wale iliyi chꞌʌjyem mi laꞌ wubin, pero mi quej c chaꞌ qꞌueletla. Cheꞌ jini, ñoj cꞌajacña laꞌ woj. Mach bʌ baꞌan majch chꞌujbi i chaꞌ chilbeñetla cꞌajacña bʌ laꞌ woj.

23 Ti jim bʌ qꞌuin mach cꞌʌñʌ laꞌ cꞌajtibeñon chʌ bʌ laꞌ wom. Melel mic subeñetla, c Tyat ti panchan mi quej i yʌqꞌueñetla ti pejtyel chʌ bʌ mi laꞌ cꞌajtin chaꞌan tsaꞌix laꞌ chꞌujbiyon.

24 Cꞌʌlʌ wale iliyi maꞌix chʌ bʌ ti laꞌ cꞌajtibe Dios chaꞌan ti laꞌ chꞌujbiyon. Cꞌajtinla. Mi quej laꞌ wʌqꞌuentyel chaꞌan ñoj cꞌajacña laꞌ woj mi laꞌ wubin. Cheꞌ ti yʌlʌ Jesús.

25 Jesús ti yʌlʌ: Tic subetla ili tyac ti lajoñel. Pero tyal i yorojlel maꞌix mic bej subeñetla ti lajoñel tyac. Cheꞌ jini, mi quej c subeñetla ti wen tsiquil bʌ tꞌan bajcheꞌ an c Tyat ti panchan.

26 Ti jim bʌ ora mi laꞌ bajñel cꞌajtiben c Tyat chʌ bʌ laꞌ wom chaꞌan ti laꞌ chꞌujbiyon. Mach ñaxan joñonic mic suben c Tyat chaꞌañetla.

27 Como c Tyat miꞌ pꞌuntyañetla. Miꞌ pꞌuntyañetla como mi laꞌ pꞌuntyañon. Mi laꞌ chꞌujbin chaꞌan ti tyʌliyon ti Dios.

28 Ti loqꞌuiyon tyʌlel tiꞌ tyojlel c Tyat ti panchan. Ti tyʌliyon wʌꞌ ti mulawil. Pero wale mi quej c chaꞌ cʌyeꞌ ili mulawil. Mux quej c chaꞌ majlel yaꞌ baꞌan c Tyat, cheꞌen.

29 Cheꞌ jini, ajcʌntꞌañob i chaꞌan tiꞌ subeyob: Wale wen tsiquil bʌ tꞌan chʌncol a subeñon lojon cheꞌ maꞌix maꞌ chaꞌ subeñon lojon ti lajoñel tyac.

30 Wale cujil lojon isujm luꞌ a wujil isujm. Mach cꞌʌñʌ majch miꞌ ñaxan cꞌajtibeñet como wʌ a wujil isujm i cꞌajtibal. Jin chaꞌan cujil lojon isujm tyʌlemet ti Dios, cheꞌob.

31 Jesús tiꞌ jacꞌbeyob: ¿Muꞌ ba laꞌ chꞌujbin chaꞌan tyʌlemon ti Dios?

32 Wale i yorojlelix mi quej laꞌ pujquel. Mi quej laꞌ chaꞌ sujtyel ti laꞌ wotyot ti jujuntiquiletla. Mi quej laꞌ bajñel cʌyon. Pero mach c bajñelic añon como wʌch an c Tyat quicꞌot.

33 Chʌꞌʌch mic wʌ subeñetla chaꞌan ñʌchꞌʌl laꞌ pusicꞌal chaꞌan tij caj. Wʌꞌ ti mulawil wersa mi laꞌ ñusan wocol. Pero mach yom laꞌ chaꞌlen bʌqꞌuen como tsaꞌix c ganar j contrajob wʌꞌ ti mulawil. Añon laꞌ wicꞌot, cheꞌen.