2 C Tyat miꞌ tsepeꞌ loqꞌuel baꞌical bʌ i cꞌʌb tyac yubil mach bʌ baꞌan mi yʌcꞌ i wut. Pero miꞌ tsꞌityaꞌ tsep loqꞌuel jini i cꞌʌb tyac muꞌ bʌ i yʌcꞌ i wut chaꞌan i más acꞌ i wut.

3 Quejcʌbiletla yubil chaꞌan ti jini tꞌan tsaꞌ bʌ c subeyetla.

4 Ajñenla quicꞌot chaꞌan joñon mi cajñel laꞌ wicꞌot. I cꞌʌb tyac i yʌqꞌuil tsꞌujsub mach chꞌujbi i yʌcꞌ i wut cheꞌ i bajñel jach mi yajñel mi maꞌan tsꞌuyul ti yʌqꞌuil. Cheꞌʌch jeꞌel jatyetla mach chꞌujbi laꞌ bajñel chaꞌlen wen bʌ cheꞌ machꞌan mi laꞌ wajñel laꞌ wicꞌotyon.

5 Joñon i yʌqꞌuilon tsꞌujsub yubil. Jatyetla j cꞌʌbetla. Jini muꞌ bʌ i yajñel quicꞌot mi cajñel yicꞌot mi yʌqꞌuentyel i tsictiyel cabʌl wen bʌ miꞌ chaꞌlen. Machꞌan chʌ bʌ chꞌujbi laꞌ bajñel chaꞌlen ti laꞌ bajñelil mi machꞌan mi laꞌ wajñel quicꞌot.

6 Jini mach bʌ baꞌan mi bej ajñel quicꞌot mi quejel i chojquel. Mi quejel i tyʌquin yubil. Cheꞌ bajcheꞌ miꞌ muchꞌquintyel ti pejtyelel tyʌquin bʌ baꞌical bʌ i cꞌʌb tyac chaꞌan mi pulel ti cꞌajc.

7 Mi mux laꞌ bej ajñel quicꞌot mi machꞌan mi ñajayel ti laꞌ pusicꞌal jini j cʌntisa, cꞌajtinla chʌ bʌ tyac jach laꞌ wom mi quejel laꞌ wʌqꞌuentyel.

8 Mi tsictiyel i ñuclel c Tyat ti panchan cheꞌ mi laꞌ cabʌl chaꞌlen wen bʌ. Mi laꞌ pʌseꞌ chaꞌan yoque ajcʌntꞌañetla c chaꞌan.

9 Mic pꞌuntyañetla cheꞌʌch bajcheꞌ c Tyat miꞌ pꞌuntyañon. Bej ajñenla tic pꞌuntyaya, cheꞌ jini.

10 Cheꞌ mi laꞌ jacꞌ c mandar tyac mi quejel lac bej pꞌuntyan lac bʌ. Cheꞌ jeꞌel, mic jacꞌben i mandar c Tyat ti panchan. Mi lojon c bej pꞌuntyan lojon c bʌ.

11 Tic luꞌ subetla iliyi chaꞌan cꞌajacña laꞌ woj chaꞌan ti joñon yicꞌot chaꞌan mi tsꞌʌctiyel cꞌajacña bʌ laꞌ woj.

12 Jinic mandar chʌncol bʌ c subeyetla jiñʌch chaꞌan yom laꞌ pꞌuntyan laꞌ bʌ cheꞌ bajcheꞌ mic pꞌuntyañetla.

13 Machꞌan más ñuc bʌ pꞌuntyaya bajcheꞌ jini muꞌ bʌ i chaꞌlen muꞌ bʌ i yʌcꞌ i bʌ ti sajtyel chaꞌan ti caj miꞌ pꞌuntyan jini uts bʌ yicꞌot.

14 Jatyetla utsetla quicꞌot mi ti laꞌ chaꞌle chʌ bʌ tyac mic subeñetla.

15 Machꞌan mic bej pejcañetla ti ajtoñelob jach como machꞌan miꞌ ñaꞌtyan ajtoñel jach bʌ chʌ bʌ mi quejel i chaꞌlen i yum. Pero mic pejcañetla ti utsetla quicꞌotyon como ti pejtyelel tsaꞌ bʌ i subeyon c Tyat ti panchan tic subetla.

16 Machꞌan ti laꞌ yajcʌyon. Pero joñon tic yajcʌyetla chaꞌan cabʌl wen bʌ mi laꞌ chaꞌlen. Yicꞌot chaꞌan mi bej tsictiyel cabʌl wen bʌ mi laꞌ chaꞌlen. Jin chaꞌan mi laꞌ cꞌajtiben c Tyat chaꞌan mi quejel i yʌqꞌueñetla chʌ bʌ jach mi laꞌ cꞌajtiben.

17 Jiñʌch muꞌ bʌ c xiqꞌuetla laꞌ chaꞌlen: chaꞌan laꞌ pꞌuntyan laꞌ bʌ. Cheꞌ ti yʌlʌ Jesús.

18 Jesús ti yʌlʌ: Cheꞌ miꞌ michꞌqꞌueletla jini añoꞌ bʌ ti mulawil, ñaꞌtyanla chaꞌan ñaxan tiꞌ michꞌqꞌueleyoñob.

19 Mi i chaꞌañetla jini añoꞌ bʌ ti mulawil miꞌ pꞌuntyañetla jeꞌel bajcheꞌ miꞌ pꞌuntyan i piꞌʌlob. Pero tic yajcʌyetla loqꞌuel baꞌan i chaꞌañoꞌ bʌ mulawil. Jin chaꞌan jini i chaꞌañoꞌ bʌ mulawil miꞌ michꞌqꞌueletla.

20 Cꞌajtisanla jini tsaꞌ bʌ c subeyetla: Ajtoñeletla machꞌan más an laꞌ ñuclel bajcheꞌon laꞌ yumon. Tsaꞌix i tyʌcꞌlʌyoñob. Mi quejel i tyʌcꞌlañetla jeꞌel. Jini tsaꞌ bʌ i jacꞌbon c tꞌan mi quejel i jacꞌbeñetla laꞌ tꞌan jeꞌel.

21 Pero mi quejel i tyʌcꞌlañetla chaꞌan tij caj chaꞌan mach i cʌñʌ jini tsaꞌ bʌ i chocoyon tyʌlel.

22 Machic ti tyʌliyon chaꞌan c subeñob maꞌañob i mul. Pero wale mach chꞌujbi i yʌleꞌ maꞌañob i mul.

23 Jini muꞌ bʌ i michꞌqꞌuelon miꞌ michꞌqꞌuel c Tyat ti panchan jeꞌel.

24 Machic ti yilʌyob cheꞌ ñac tic pʌsʌ ñuc tyac bʌ c pꞌʌtyʌlel machꞌan i mul. Pero wale tsaꞌix i yilʌyob c pꞌʌtyʌlel pero miꞌ michꞌqꞌueloñob yicꞌot c Tyat ti panchan jeꞌel.

25 Chʌꞌʌch ti ujti chaꞌan miꞌ tsꞌʌctisan jini Tsꞌijbubil bʌ i Tꞌan Dios baꞌ tsꞌijbubil: Tiꞌ michꞌqꞌueleyoñob cheꞌ maꞌix chʌ bʌ och. Cheꞌʌch wʌ tsꞌijbubil, cheꞌen.

26 Mi quejel c choc tyʌlel yaꞌ bʌ loqꞌuem baꞌan c Tyat ti panchan jini Chꞌujul bʌ c Chꞌujlel. Pero yaꞌ bʌ mi tyʌlel mi quej i cotyañetla. Mi quejel i ñuc isʌbeñetla laꞌ pusicꞌal. Mi quejel i pʌsbeñetla i sujmlel c Tꞌan. Mi quejel i yʌcꞌon ti cʌjñel.

27 Jatyetla jeꞌel mi laꞌ wʌcꞌon ti cʌjñel como ti ajniyetla quicꞌot cꞌʌlʌ ti tyeche c toñel. Cheꞌ ti yʌlʌ Jesús.