2 Ti yotyot c Tyat an cabʌl chumlibʌl. Machic baꞌan cabʌl chumlibʌl tsaꞌix c wʌ subetla i wentyʌlel mi machic baꞌan, como mi quejel c majlel c chajpʌbeñetla laꞌ wajnib.

3 Cheꞌ mi yujtyel c chajpʌbeñetla laꞌ wajnib, mic chaꞌ tyʌlel c pʌyetla majlel baꞌañon, chaꞌan yaꞌ baꞌañon yaꞌ añetla jeꞌel.

4 Laꞌ wujil isujm baqui mic majlel. Cʌñʌl laꞌ chaꞌan i bijlel panchan. Cheꞌ ti yʌlʌ Jesús.

5 Tomás ti yʌlʌ: C Yum, mach cujil lojon isujm baqui maꞌ majlel. ¿Bajcheꞌqui chꞌujbi lojon j cʌn jini bij? cheꞌen.

6 Jesús tiꞌ sube: Joñoñʌch jini bij yom bʌ laꞌ tꞌun majlel. Mic subeñetla melel bʌ tꞌan yom bʌ laꞌ chꞌujbin. Mi cʌqꞌueñetla laꞌ cuxtyʌlel machꞌʌ yujil jilel. Machꞌan majch mi cꞌotyel baꞌan c Tyat. Jini jach am bʌ tic wenta.

7 Mi ti laꞌ cʌñʌyon ti laꞌ cʌñʌ c Tyat jeꞌel. Wale cʌñʌlix laꞌ chaꞌan c Tyat. Tsaꞌix laꞌ qꞌuele yubil, cheꞌen.

8 Felipe tiꞌ sube: C Yum, pʌsbeñon lojon a Tyat. Jasʌl mi ti a pʌsʌ, cheꞌen.

9 Jesús tiꞌ sube: Wajalix wʌꞌ añon quicꞌotyetla. ¿Max tyo ba a chʌc cʌñʌyon, Felipe? Jini tsaꞌix bʌ i yilʌyon, tsaꞌix i yilʌ c Tyat jeꞌel yubil. ¿Chuqui i wentyʌlel a chaꞌan cheꞌ pʌsbeñon lojon a Tyat? cheꞌet.

10 ¿Machꞌa baꞌan maꞌ chꞌujbin añon tic Tyat, c Tyat an ti joñon? Jini tꞌan muꞌ bʌ c subeñetla machꞌan mic sub tic bajñelil. C Tyat muꞌ bʌ i yajñel ti joñon, miꞌ chaꞌlen ili toñel tyac.

11 Chꞌujbin chaꞌan añon tic Tyat, c Tyat an ti joñon. Mi machꞌan mi laꞌ chꞌujbin ili c tꞌan chaꞌan tic subeyetla o machqui, jinic jachix ca laꞌ chꞌujbin jini ñuc tyac bʌ tsaꞌ bʌ c pʌsʌ.

12 Melel mic subeñetla jini muꞌ bʌ i yochel tic chaꞌan, mi quejel i pʌs ñuc tyac bʌ pꞌʌtyʌlel jeꞌel muꞌ bʌ c pʌs. Más ñuc bajcheꞌ tic pʌsʌ mi quejel i pʌs como mux quejel c chaꞌ majlel baꞌan c Tyat c bajñel.

13 Pejtyel chʌ bʌ tyac mi laꞌ cꞌajtiben c Tyat chaꞌan cheꞌ com, joñon mi quejel c chaꞌlen chaꞌan mi tsictiyel i ñuclel c Tyat ti i Yalobilon.

14 Mucꞌʌch cʌqꞌueñetla chʌ bʌ tyac jach yes mi laꞌ cꞌajtin tij cꞌabaꞌ, chaꞌan cheꞌʌch com.

15 Mi ti laꞌ pꞌuntyʌyon yom laꞌ jacꞌbeñon c mandar.

16 Joñon mi quej j cꞌajtiben c Tyat. Jini mi quej i yʌqꞌueñetla yambʌ muꞌ bʌ i yʌqꞌueñetla laꞌ ñaꞌtyʌbal, muꞌ bʌ i ñuc isʌbeñetla laꞌ pusicꞌal, chaꞌan mi yajñel laꞌ wicꞌot ti beleꞌ ora.

17 Jiñʌch Chꞌujul bʌ c Chꞌujlel muꞌ bʌ i pʌs i sujmlel Dios. Jini i chaꞌañoꞌ bʌ mulawil mach chꞌujbi i yʌqꞌuentyelob Chꞌujul bʌ c Chꞌujlel como mach chꞌujbi i qꞌuejlel. Mach chꞌujbi i cʌñob jeꞌel. Jatyetla mi laꞌ cʌn, como mi yajñel laꞌ wicꞌot. Mi quejel i beleꞌ ajñel ti laꞌ pusicꞌal.

18 Machꞌan mi quej j cʌyetla ti mebaꞌ. Chaꞌ tyalon baꞌ añetla.

19 Jumucꞌ jach machꞌan mi quej i chʌc qꞌueloñob jini añoꞌ bʌ ti mulawil. Jatyetla mi quej laꞌ qꞌuelon. Chaꞌan cuxulon, mi quej laꞌ tyaj laꞌ cuxtyʌlel jeꞌel.

20 Ti jin jach bʌ qꞌuin mi quej laꞌ ñaꞌtyan añon tic Tyat. Añetla ti joñon. Añon ti jatyetla.

21 Jini muꞌ bʌ i ñaꞌtyan c xicꞌojel, muꞌ bʌ i jacꞌ c xicꞌojel miꞌ tsictisan chaꞌan yoque melel miꞌ pꞌuntyañon. C Tyat mi quejel i pꞌuntyan jini muꞌ bʌ i pꞌuntyañon. Jonon mi quej c pꞌuntyan jeꞌel. Mi quej cʌqꞌueñetla laꞌ wen cʌñon. Cheꞌ ti yʌlʌ Jesús.

22 Yañʌch bʌ Judas, mach jinic jini Judas Iscariote, tiꞌ sube: C Yum, ¿chucoch mi quej a wʌqꞌueñon lojon c wen cʌñet, cheꞌ machꞌan maꞌ wʌqꞌueñob i cʌñet jini i chaꞌañoꞌ bʌ mulawil? cheꞌ ti yʌlʌ Judas.

23 Jesús tiꞌ sube: Jini muꞌ bʌ i pꞌuntyañon, miꞌ jacꞌ chʌ bʌ mi cʌl. C Tyat ti panchan mi quej i pꞌuntyan. Cheꞌ jini c Tyat yicꞌot joñon mi quej c tyʌlel lojon ti chumtyʌl quicꞌot.

24 Jini mach bʌ baꞌan miꞌ pꞌuntyañon machꞌan miꞌ jacꞌ muꞌ bʌ cʌl. Jini tꞌan tsaꞌ bʌ laꞌ wubi mach c bajñel chaꞌan. I chaꞌañʌch c Tyat jeꞌel tsaꞌ bʌ i chocoyon tyʌlel.

25 Tic subeyetla jini tꞌan cheꞌ wʌꞌ tyo añon laꞌ wicꞌot.

26 C Tyat mi quej i choc tyʌlel Chꞌujul bʌ c Chꞌujlel tij qꞌuexol. Jiñʌch muꞌ bʌ i yʌqꞌueñetla laꞌ ñaꞌtyʌbal, muꞌ bʌ i ñuc isʌbeñetla laꞌ pusicꞌal. Jini mi quej i cʌntisañetla pejtyelel chʌ bʌ an tyac. Mi quejel i yʌqꞌueñetla laꞌ cꞌajtisan pejtyelel chʌ bʌ tyac tic subetla.

27 Mij cʌybeñetla i ñʌchꞌtyʌlel laꞌ pusicꞌal. Mi cʌqꞌueñetla i ñʌchꞌtyʌlel c pusicꞌal. Mach cheꞌic mi cʌqꞌueñetla bajcheꞌ mi yʌcꞌob i chaꞌañoꞌ bʌ mulawil. Mach laꞌ chaꞌlen pensal. Mach laꞌ chaꞌlen bʌqꞌuen.

28 Tsaꞌix laꞌ wubi cʌl: Mi quej c majlel. Mi quej c chaꞌ tyʌlel wʌꞌ baꞌ añetla. Mi melel mi laꞌ pꞌuntyañon tsaꞌix tijicñʌyi laꞌ pusicꞌal chaꞌan tic subeyetla mic majlel baꞌan c Tyat. Como c Tyat más ñuc bajcheꞌ joñon. Tijicñayetla cheꞌ jini chaꞌan tijicñayon.

29 Wale tsaꞌix c subetla cheꞌ max tyo ujt chaꞌan cheꞌ mi yujtyel chꞌujbi laꞌ más chꞌujbiñon.

30 Machꞌan mi quej c putyun chaꞌlen tꞌan quicꞌotyetla como tyal jini muꞌ bʌ i chaꞌliben i toñel xiba. Jini xiba mucꞌ ti xicꞌojel wʌꞌ ti mulawil. Pero machꞌanix i pꞌʌtyʌlel tij contra.

31 Chʌꞌʌch yom ujtic chaꞌan wʌꞌ bʌ añob ti mulawil miꞌ ñaꞌtyan mic pꞌuntyan c Tyat. Mic chaꞌlen bajcheꞌ tiꞌ xiqꞌuiyon. Tyejchenla. Coñixla.