Tiꞌ pocbeyob yoc ajcʌntꞌañob i chaꞌan Jesús
13
Cʌyʌl tyo jumpꞌej qꞌuin chaꞌan i tyaj i qꞌuinilel jini pascua bʌ qꞌuin i chaꞌan israelob. Yujil isujm Jesús chaꞌan i yorojlelix i cʌyeꞌ ili mulawil chaꞌan mi chaꞌ majlel baꞌan i Tyat ti panchan. Jesús tiꞌ wen pꞌuntyʌ i chaꞌañob wʌꞌ bʌ añob ti mulawil. Mi quejel i pʌsꞌeñob jini más ñuc bʌ i señʌjlel chaꞌan tiꞌ pꞌuntyʌyob. 2 Jini xiba tsaꞌix ujti i nijcʌben i pusicꞌal Judas Iscariote i yalobil bʌ Simón chaꞌan i ñaꞌtyan i yʌcꞌ ti cʌchol Jesús.
3 Jesús yujil isujm ti tyʌli ti Dios. Yujil isujm jeꞌel mi quejel i chaꞌ majlel baꞌan Dios. Yujil isujm tsaꞌix aqꞌuenti i pꞌʌtyʌlel ti i Tyat chaꞌan i meleꞌ chʌ bʌ yes yom miꞌ meleꞌ.
4 Jesús ti tyechi baꞌ buchul ti mesa. Tiꞌ jocho pʌl bʌ i bujc. Tiꞌ cʌchʌ tyam bʌ sujquicꞌʌbʌl ti xinil.
5 Tiꞌ jebe jaꞌ ti pocꞌ. Ti queji i pocben i yoc jujuntiquil ajcʌntꞌañob i chaꞌan. Tiꞌ sujcubeyob i yoc ti sujquicꞌʌbʌl cʌchʌl bʌ ti xinil.
6 Cheꞌ bʌ yom i pocben i yoc Simón Pedro ti queji i yʌleꞌ: C Yum, ¿muꞌ ba quejel a pocbeñon coc? cheꞌen.
7 Jesús tiꞌ jacꞌʌ: Max tyo baꞌan maꞌ chꞌʌmben isujm chʌ bʌ mucꞌon. Pero muꞌ tyo quejel a ñaꞌtyan, cheꞌen.
8 Pero Pedro tiꞌ sube: Machꞌan baꞌ bʌ ora mi quejel a pocbeñon coc, cheꞌen. Jesús tiꞌ jacꞌʌ: Mi machꞌan mic pocbeñet a woc mach c chaꞌañetic, cheꞌen.
9 Simón Pedro tiꞌ sube: C Yum, mach jinic jach coc, pero maꞌ pocbeñon j cꞌʌb col jeꞌel, cheꞌ jini, cheꞌen.
10 Pero Jesús tiꞌ sube: Jini ujtye bʌ i chaꞌleñob tsꞌʌmel yom jach pocbentyel i yoc chaꞌan chaꞌ sʌquix mi yajñel. Sʌc isʌbiletla aunque mach ti pejtyeletla sʌc isʌbiletla, cheꞌen.
11 Ti yʌlʌ chaꞌan mach sʌc isʌbilob ti pejtyelelob, como yujil isujm majchqui jini muꞌ bʌ quej i yʌc ti cʌchol.
12 Cheꞌ ti ujti i pocbeyob i yoc tiꞌ chaꞌ xojo pʌl bʌ i bujc. Ti chaꞌ buchle baꞌan mesa. Tiꞌ subeyob: ¿Muꞌ ba laꞌ chꞌʌmben isujm chʌ bʌ tic chaꞌle? cheꞌen.
13 Jatyetla mi laꞌ pejcañon ti laꞌ Maestro, laꞌ Yumon. Melelʌch como chʌꞌʌch añon.
14 Mi joñon laꞌ Maestro, laꞌ Yumon tic pocbeyetla laꞌ woc, jatyetla jeꞌel yom laꞌ pocben laꞌ bʌ laꞌ woc.
15 Tic chaꞌle pʌsoñel chaꞌan mi laꞌ chaꞌlen cheꞌ bajcheꞌ tic chaꞌle.
16 Melel mic subeñetla, machꞌan ajtoñel más an bʌ i ñuclel bajcheꞌon i yumon. Machꞌan más ñuc jini chocol bʌ majlel bajcheꞌon jini tsaꞌ bʌ c chocoyetla majlel.
17 Cheꞌ laꞌ wujil isujm chʌ bʌ tic subetla cꞌajacña laꞌ woj mi chʌꞌʌch mi quejel laꞌ chaꞌlen.
18 Mach ti laꞌ pejtyel mic subeñetla. Cujil isujm majchqui jini tsaꞌ bʌ c yajcʌ. Pero wersa yom c tsꞌʌctisan jini Tsꞌijbubil bʌ i Tꞌan Dios baꞌ mi yʌleꞌ: Jini muꞌ bʌ ti uchꞌel quicꞌot tiꞌ contrajiyon, cheꞌ tsꞌijbubul, cheꞌ ti yʌlʌ Jesús.
19 Mic wʌ subeñetla chaꞌan cheꞌ mi yujtyel bajcheꞌ ti cʌlʌ mi laꞌ ñaꞌtyan majchonqui.
20 Melel mic subeñetla, jini muꞌ bʌ i pʌy ochel jini muꞌ bʌ c choc majlel miꞌ pʌyon ochel yubil. Jini muꞌ i pʌyon miꞌ pʌy ochel Dios tsaꞌ bʌ i chocoyon tyʌlel. Cheꞌ ti yʌlʌ Jesús.
Jesús ti wʌ alʌ Judas mi quej i yʌcꞌ ti cʌchol
21 Cheꞌ ujtye i yʌleꞌ tyac ili Jesús, wen chꞌʌjyem ti queji i yubin. Ti wen tsiquil bʌ tꞌan tiꞌ subeyob: Melel mic subeñetla juntiquiletla mi quejel laꞌ wʌcꞌon tiꞌ cꞌʌb j contrajob, cheꞌen.
22 Jini ajcʌntꞌañob i chaꞌan ti queji i qꞌuelob i bʌ. Pero machꞌan tiꞌ ñaꞌtyʌyob majchqui chʌncol bʌ i tyajeꞌ ti tꞌan.
23 Juntiquil ajcʌntꞌañob i chaꞌan Jesús tsaꞌ bʌ wen pꞌuntyʌnti ti Jesús tiꞌ chaꞌle uchꞌel yaꞌ tiꞌ tꞌejl Jesús.
24 Simón Pedro tiꞌ pʌsʌ tiꞌ cꞌʌb chaꞌan yom i cꞌajtiben Jesús majchqui jini muꞌ bʌ quejel i yʌcꞌ ti cꞌʌb i contra.
25 Cheꞌ jini, tiꞌ más lʌcꞌʌ Jesús chaꞌan i cꞌajtiben: C Yum, ¿majchqui jini chʌncol bʌ a tyaj ti tꞌan? cheꞌen.
26 Jesús tiꞌ jacꞌbe: Mi quejel c tsꞌajeꞌ tsꞌityaꞌ caxlan waj. Jini muꞌ bʌ cʌqꞌuen, jiñʌch jini, cheꞌen. Cheꞌ jini, tiꞌ tsꞌaja tsꞌityaꞌ caxlan waj. Ti yʌqꞌue Judas Iscariote i yalobil bʌ Simón.
27 Cheꞌ tiꞌ chꞌʌmʌ jini caxlan waj Judas, ti ora ti ochi Satanás tiꞌ pusicꞌal. Cheꞌ jini, Jesús tiꞌ sube: Ora jach maꞌ chaꞌlen jini muꞌ bʌ quej a chaꞌlen, cheꞌen.
28 Pero machꞌan majch yaꞌ bʌ chʌncol ti uchꞌel tiꞌ chꞌʌmꞌeyob isujm chucoch cheꞌ ti yʌlʌ Jesús.
29 Chaꞌan an tiꞌ wenta Judas jini tyaqꞌuin motin i chaꞌañoꞌ bʌ, an jini tsaꞌ bʌ lolon pensaliyob Jesús tiꞌ sube chaꞌan an chʌ bʌ yom i mʌn chaꞌan qꞌuiñejel o chaꞌan miꞌ cotyan pꞌumpꞌuñoꞌ bʌ. Cheꞌ tiꞌ lolon pensaliyob.
30 Cheꞌ ñac ti ujti i cꞌuxeꞌ jini caxlan waj tsaꞌ bʌ aqꞌuenti, Judas ti loqꞌui majlel. Acꞌbʌlelix.
Tsijiꞌ bʌ mandar
31 Cheꞌ tsaꞌix loqꞌui Judas, Jesús tiꞌ subeyob: Wale an chʌ bʌ mi quej c tyumbentyel muꞌ bʌ i tsictisan c ñuclel Joñon i Piꞌʌlon bʌ Quixtyañujob. I ñuclel Dios mi tsictiyel ti joñon.
32 Cheꞌ bajcheꞌ Joñon i Piꞌʌlon Quixtyañujob mic tsictisan i ñuclel Dios, chʌꞌʌch Dios miꞌ tsictisan i ñuclel i Yalobil. Ora jach mi quej i tsictisan.
33 Calobilet bʌ la, mach bej cabʌl ora wʌꞌ añon laꞌ wicꞌot. Mi quej laꞌ sajcañon. Pero chʌꞌʌch bajcheꞌ tic subeyob jini israelob añoꞌ bʌ i yeꞌtyel chʌꞌʌch mic wʌ subeñetla jeꞌel wale: Mach chꞌujbi laꞌ majlel yaꞌ baꞌ mi quej c majlel.
34 Mi cʌqꞌueñetla tsijiꞌ bʌ mandar chaꞌan laꞌ pꞌuntyan laꞌ bʌ. Chʌꞌʌch bajcheꞌ tic pꞌuntyʌyetla chʌꞌʌch yom laꞌ pꞌuntyan laꞌ bʌ jeꞌel.
35 Mi ti laꞌ pꞌuntyʌ laꞌ bʌ ti pejtyelel quixtyañu mi quejel i ñaꞌtyan ajcʌntꞌañetla c chaꞌan, cheꞌen.
Jesús ti wʌ alʌ chʌ bʌ mi quej i chaꞌlen Pedro
36 Simón Pedro tiꞌ cꞌajtibe Jesús: C Yum, ¿baqui mi quej a majlel? cheꞌen. Jesús tiꞌ jacꞌbe: Yaꞌ baꞌ mic majlel mach chꞌujbi laꞌ tsʌcleñon majlel wale iliyi. Pero muꞌ tyo quej a tsʌcleñon majlel ti tyal tyo bʌ ora, cheꞌen.
37 Cheꞌ jini, Pedro tiꞌ sube: C Yum, ¿chucoch mach chꞌujbi c tsʌcleñet majlel wale iliyi baꞌ maꞌ majlel? Chajpʌbilon cʌcꞌ c bʌ ti sajtyel chaꞌañet, cheꞌen.
38 Jesús tiꞌ jacꞌʌ: ¿Chajpʌbilet ba chaꞌan a wʌcꞌ a bʌ ti sajtyel chaꞌañon, maꞌ wʌl? Melel mic subeñet: Cheꞌ max tyo i chaꞌle uqꞌuel tyat mut, uxyajl mi quej a wʌl mach a cʌñʌyon, cheꞌen.