2 Yaꞌi tiꞌ melbeyob i yuchꞌel Jesús. Marta tiꞌ weꞌsʌyob. Yaꞌan Lázaro ti mesa ti uchꞌel yicꞌot Jesús yicꞌot yañoꞌ bʌ jeꞌel.

3 Cheꞌ jini María tiꞌ chꞌʌmʌ tyʌlel baꞌan Jesús cheꞌ bajcheꞌ xiñol litro aceite bʌ perfume nardo bʌ i cꞌabaꞌ. Wen lets i tyojol. Tiꞌ yulbe i yoc Jesús. Ti wiꞌil tiꞌ sujcube i yoc tiꞌ tsutsel i jol. Ti pujqui i yujtsꞌil perfume ti pejtyelel i mal i yotyot.

4 Cheꞌ jini Judas Iscariote i yalobil bʌ Simón juntiquil ajcʌntꞌan i chaꞌan Jesús muꞌ bʌ quej i yʌcꞌ ti cʌchol Jesús cheꞌ ñac jini ti yʌlʌ:

5 ¿Chucoch machꞌan ti chojni jini perfume chaꞌan trescientos denarios chaꞌan mi la cʌqꞌuen jini pꞌumpꞌuñoꞌ bʌ? cheꞌen.

6 Pero machꞌan tiꞌ pensali pꞌumpꞌuñoꞌ bʌ jini Judas. Tsaꞌ jach i yʌlʌ chaꞌan ajxujchꞌ jini Judas. An tiꞌ wenta i cʌñʌtyan tyaqꞌuin motin i chaꞌañob. Tiꞌ xujchꞌi loqꞌuel ti jini am bʌ tiꞌ wenta.

7 Cheꞌ jini Jesús ti yʌlʌ: Mach laꞌ tiqꞌueꞌ jini María. Lotyol i chaꞌan jini perfume chaꞌan i chajpʌntyel c mujquel.

8 Ti beleꞌ qꞌuin wʌꞌan laꞌ wicꞌot jini pꞌumpꞌuñoꞌ bʌ. Pero joñon machꞌan beleꞌ qꞌuin wʌꞌañon quicꞌotyetla, cheꞌen.

9 Cabʌl israelob ti yubiyob chaꞌan yaꞌan Jesús ti Betania. Ti majliyob yaꞌi mach chaꞌan jach yom i qꞌuel Jesús pero chaꞌan yomob i qꞌuel Lázaro jeꞌel tsaꞌ bʌ tyejchisʌ loqꞌuel Jesús baꞌan sajtyemoꞌ bʌ.

10 Cheꞌ jini, jini ñuc bʌ curajob tiꞌ lajayob i tꞌan chaꞌan yom i tsʌnsañob Lázaro jeꞌel.

11 Como ti caj Lázaro cabʌl israelob tiꞌ cʌyʌyob i tsʌcleñob majlel jini curajob chaꞌan i chꞌujbiñob Jesús.

12 Cabʌl quixtyañu ti majli ti Jerusalén chaꞌan i melob pascua bʌ qꞌuin i chaꞌan israelob. Ti yijcꞌʌlel ti yubiyob chaꞌan mi quejel i cꞌotyel Jesús ti lum jeꞌel.

13 Cheꞌ jini, tiꞌ tyucꞌuyob i yopol tyac chꞌip. Ti loqꞌuiyob majlel ti Jerusalén chaꞌan i tyaj tyʌlel Jesús. Ti cꞌam bʌ tꞌan ti yʌlʌyob. Laꞌ sujbic i ñuclel Dios. Tijicñayet jatyet chʌncol bʌ a tyʌlel chaꞌan cheꞌ yom Dios. Tijicñayet i yumet israelob, cheꞌob.

14 Jesús tiꞌ tyaja juncojt burro. Tiꞌ cꞌʌchtyʌ cheꞌ bajcheꞌ tsꞌijbubil ti Tsꞌijbubil bʌ i Tꞌan Dios:

16 Ti ñaxan max tyo tiꞌ chꞌʌmʌyob isujm jini ajcʌntꞌañob i chaꞌan Jesús tsaꞌ bʌ ujti. Pero ti wiꞌil tyo cheꞌ ñac ti tsictiyi i ñuclel Jesús cheꞌ ti letsi majlel ti panchan tiꞌ chaꞌ cꞌajtiyiyob i chaꞌan bajcheꞌ wʌ tsꞌijbubil tiꞌ tꞌan Dios ti ñoj oniyix chaꞌan Jesús chaꞌan mi quejel i cꞌʌchtyan i yal burro.

17 Jini quixtyañujob tsaꞌ bʌ i yilʌyob cheꞌ ñac Jesús tiꞌ pejcʌ Lázaro yaꞌ ti muconibʌl cheꞌ ñac tiꞌ tyejchisʌ loqꞌuel baꞌan sajtyemoꞌ bʌ, ti queji i luꞌ chaꞌ alob tsaꞌ bʌ i yilʌyob.

18 Jin chaꞌan ti majliyob i tyaj tyʌlel Jesús cheꞌ ñac ti ochi majlel Jesús ti Jerusalén chaꞌan ubibil i chaꞌan jini ñuc tyac bʌ i pꞌʌtyʌlel tsaꞌ bʌ i pʌsʌ Jesús.

19 Cheꞌ jini, jini fariseojob tiꞌ subeyob i bʌ: Qꞌuele awilan, maꞌ chʌ bʌ chꞌujbi lac chaꞌlen. Ti pejtyelel quixtyañu miꞌ tsʌcleñob majlel Jesús, cheꞌob.

20 An jeꞌel quixtyañujob mach bʌ israelob tyʌlem bʌ ti pañimil Grecia bʌ i cꞌabaꞌ, ti cꞌotiyob jeꞌel ti Jerusalén chaꞌan i chꞌujutisan Dios cheꞌ ti yorojlel qꞌuin.

21 Jini griegojob ti majliyob baꞌan Felipe chꞌoyol bʌ ti lum Betsaida am bʌ ti pañimil Galilea bʌ i cꞌabaꞌ. Tiꞌ subeyob: Com lojon j qꞌueleꞌ Jesús, cheꞌob.

22 Felipe ti majli i suben Andrés. Jini chaꞌtiquil ti majliyob i suben Jesús.

23 Cheꞌ jini, Jesús tiꞌ subeyob: Wale i yorojlelix mi quejel i tsictiyel c ñuclel, Joñon i Piꞌʌlon bʌ Quixtyañujob, cheꞌen.

24 Melel mic subeñetla: Mi machꞌan mi yochel ti lum jumpꞌej i bʌcꞌ trigo o chʌ bʌ jach yes bʌ pacꞌ, mi machꞌan mi mujquel, cheꞌ jach an. Pero mi ti mujqui, mi pasel. Mi yʌcꞌ cabʌl i wut.

25 Jini muꞌ bʌ i lolon bajñel pꞌuntyan i bʌ chaꞌan machic i ñusan wocol mi quejel i sʌt i bʌ. Pero jini muꞌ bʌ i yʌcꞌ i bʌ cheꞌ bajcheꞌ miꞌ pꞌajeꞌ i bʌ yubil chaꞌan tij caj, mi cʌñʌtyʌntyel chaꞌan mi yʌqꞌuentyel i cuxtyʌlel machꞌʌ yujil jilel.

26 Mi an majch yom i chaꞌlibeñon c toñel, yom i tsʌcleñon. Yaꞌ baꞌ añon yaꞌ mi quejel i yajñel jeꞌel. Jini muꞌ bʌ i chaꞌlibeñon c toñel mi quejel i qꞌuejlel ti ñuc tic Tyat ti panchan. Cheꞌ ti yʌlʌ Jesús.

27 Jesús ti yʌlʌ: Wale chꞌʌjyemon. ¿Chuqui yom mi cʌle? ¿Yom ba mi cʌl: C Tyat, cotyañon loqꞌuel ti jini wocol muꞌ bʌ quejel c ñusan? Machꞌan, como jini chaꞌan ti tyʌliyon.

28 C Tyat, cotyañon chaꞌan c pʌseꞌ a ñuclel. Cheꞌ jini ti ubinti tꞌan loqꞌuem bʌ tyʌlel ti panchan tsaꞌ bʌ yʌlʌ: Tsaꞌix c pʌsʌ c ñuclel muꞌ tyo c chaꞌ pʌseꞌ, cheꞌ ti ubinti ajtꞌan.

29 Jini quixtyañujob yaꞌ bʌ añob tsaꞌ bʌ i yubi ajtꞌan ti yʌlʌyob: I tꞌan chajc, cheꞌob. Yañoꞌ bʌ ti yʌlʌyob: Juntiquil ajtoñel i chaꞌan Dios chꞌoyol ti panchan tiꞌ chaꞌle tꞌan, cheꞌob.

30 Cheꞌ jini, Jesús tiꞌ subeyob: Mach bajñel chaꞌañon ti ajli tꞌan pero ti ajli chaꞌañetla jeꞌel.

31 Wale i yorojlel mi yujtyel melojel chaꞌan jini añoꞌ bʌ ti mulawil. I yorojlel mi chojquel loqꞌuel jini xiba muꞌ bʌ ti xicꞌ wʌꞌ ti mulawil.

32 Cheꞌ mic letsʌntyel ti chañelel lum mi quejel i ñijcʌbentyel i pusicꞌal pejtyelel quixtyañu muꞌ bʌ quejel i chꞌujbiñon.

33 Chʌꞌʌch ti wʌ alʌ Jesús chaꞌan miꞌ tsictisan bajcheꞌ mi quejel i sajtyel.

34 Quixtyañujob tiꞌ jacꞌʌyob: Tsaꞌix lojon cubi ti juñilel i chaꞌan mandar chaꞌan jini yajcʌbil bʌ i chaꞌan Dios mi yajñel ti beleꞌ ora. ¿Bajcheꞌqui isujm cheꞌ maꞌ wʌl i Piꞌʌl Quixtyañujob wersa mi letsʌntyel? ¿Majchqui jini i Piꞌʌl Quixtyañujob? cheꞌob.

35 Jesús tiꞌ sube: Wʌꞌ tyo añon laꞌ wicꞌot cheꞌ bajcheꞌ i sʌclelon mulawil. Pero maꞌix bej jal wʌꞌ añon. Tsʌcleñon cheꞌ tsiquil tyo yubil como tyalix yicꞌan. Jini muꞌ bʌ i yajñel baꞌ iqꞌuix machꞌan mi yilan baꞌ mi majlel.

36 Cheꞌ wʌꞌ tyo añon laꞌ wicꞌot i sʌclelon bʌ mulawil, chꞌujbiñon chaꞌan mi laꞌ wajñel ti quixtyañu i chaꞌañet bʌ la i sʌclel. Cheꞌ tiꞌ chaꞌle lajoñel Jesús cheꞌ tiꞌ tyaja i bʌ ti tꞌan. Cheꞌ ti ujti i yʌleꞌ tyac ili ti majli. Machꞌan tiꞌ ñaꞌtyʌyob baqui ti majli.

37 Aunque Jesús tiꞌ pʌsʌ cabʌl ñuc tyac bʌ i pꞌʌtyʌlel yaꞌ baꞌañob, machꞌan tiꞌ chꞌujbiyob chaꞌan yajcʌbil i chaꞌan Dios jini Jesús.

38 Chʌꞌʌch ti ujti como wersa mi tsꞌʌctiyel jini tꞌan tsaꞌ bʌ i wʌ alʌ jini tsaꞌ bʌ i xiqꞌui i yʌleꞌ Dios ti ñoj oniyix Isaías bʌ i cꞌabaꞌ. Ti yʌlʌ:

39 Chaꞌan mach chꞌujbi i chꞌujbin chaꞌan melel i tꞌan Isaías tiꞌ wʌ tsꞌijbu jeꞌel ti ñoj oniyix:

41 Chʌꞌʌch ti yʌlʌ Isaías chaꞌan ti wʌ yilʌ i ñuclel Jesús. Tiꞌ wʌ tyaja ti tꞌan Jesús ti ñoj oniyix.

42 Pero cabʌl israelob tiꞌ chꞌujbiyob chaꞌan jiñʌch yajcʌbil i chaꞌan Dios jini Jesús. Jinic tyo an chaꞌtiquil uxtiquil añoꞌ bʌ i yeꞌtyel tiꞌ chꞌujbiyob jeꞌel. Pero machꞌan tiꞌ tsictisʌyob como tiꞌ bʌcꞌñʌyob jini fariseojob chaꞌan machꞌan mi chojquel loqꞌuel ti i templo i chaꞌan bʌ israelob.

43 Como más tiꞌ mulʌyob i subentyel i ñuclel ti quixtyañujob bajcheꞌ i subentyel i ñuclel ti Dios.

44 Jesús ti yʌlʌ ti cꞌam bʌ tꞌan: Jini muꞌ bʌ i chꞌujbin chaꞌan chocolon tyʌlel ti Dios mach i bajñel jach miꞌ chꞌujbiñon, pero miꞌ chꞌujbin jeꞌel c Tyat ti panchan tsaꞌ bʌ i chocoyon tyʌlel.

45 Jini muꞌ bʌ i yilañon mi yilan jeꞌel jini tsaꞌ bʌ i chocoyon tyʌlel.

46 Ti tyʌliyon chaꞌan joñon i sʌclelon mulawil. Jini muꞌ bʌ i chꞌujbiñon machꞌan mi bej ajñel ti icꞌjowan bʌ pañimil.

47 Pero mi an majch mi yubin c tꞌan pero mi machꞌan mi chꞌujbiñon mach joñonic mi cʌqꞌuen i xotꞌ i mul como machꞌan ti tyʌliyon ti mulawil chaꞌan cʌqꞌuen i xotꞌ i mul pero chaꞌan mij cotyañob.

48 Jini machꞌʌ baꞌan miꞌ chꞌujbin chaꞌan yajcʌbilon i chaꞌan Dios machꞌʌ baꞌan miꞌ chꞌujbin c tꞌan mi yʌqꞌuentyel i xotꞌ i mul ti yorojlel melojel. Jinic tꞌan tsaꞌ bʌ c subetla mi quejel yʌqꞌuen i tsictiyel i mul quixtyañujob.

49 Como machꞌan mic sub c bajñel ñaꞌtyʌbal pero c Tyat tsaꞌ bʌ i chocoyon tyʌlel tiꞌ xiqꞌuiyon chʌ bʌ yom cʌleꞌ, chʌ bʌ yom mij cʌntisan quixtyañujob.

50 Jini muꞌ bʌ c subeñetla jiñʌch tsaꞌ bʌ i subon c Tyat c subeñetla. Cujil isujm jini i tꞌan c Tyat mi yʌqꞌuen quixtyañujob i cuxtyʌlel machꞌʌ yujil jilel. Cheꞌ ti yʌlʌ Jesús.