Yaꞌ ti ochi Jesús ti Jerusalén
11
Cheꞌ ñac lʌcꞌʌlix añob ti Jerusalén, yaꞌ ti lum tyac Betfagé yicꞌot Betania bʌ i cꞌabaꞌ, yaꞌ ti lʌcꞌʌlel wits Olivajol bʌ i cꞌabaꞌ, Jesús tiꞌ xiqꞌuiyob majlel chaꞌtiquil ajcʌntꞌañob i chaꞌan.2 Jesús tiꞌ subeyob: Cucula yaꞌ ti jumpꞌej saj lum yaꞌ bʌꞌan ti laꞌ tyojel. Yaꞌ tiꞌ tiꞌ lum cheꞌ ochel muqꞌuetla yaꞌ cot cʌchʌl mi quej laꞌ tyaj juncojt tsijib burro. Max tyo baꞌan majch ti cꞌʌchtyʌ. Tiquila. Pʌyʌla tyʌlel, cheꞌen.
3 Anqui majch tiꞌ subetla: ¿Chucoch cheꞌ mi laꞌ chaꞌlen bajcheꞌ jini? cheꞌqui tiꞌ subetla. Subenla: Yom i cꞌʌñeꞌ lojon c Yum, cheꞌ mi laꞌ suben. Saj ora mi quej i choqueꞌ tyʌlel. Cheꞌ ti yʌlʌ Jesús.
4 Cheꞌ jini ti majliyob. Yaꞌ tiꞌ tyajayob jini burro yaꞌ cot cʌchʌl tiꞌ tiꞌ otyot yaꞌ ti calle. Tiꞌ tiquiyob.
5 Jini yaꞌ bʌ waꞌalob ti queji i yʌlob: ¿Chuqui muqꞌuetla? ¿Chucoch mi a tiqueꞌla jini burro? cheꞌob.
6 Cheꞌ jini, tiꞌ jacꞌʌyob bajcheꞌ ti wʌ alʌ Jesús. Cheꞌ jini tsʌꞌʌch yʌcꞌʌyob i pʌyeꞌ majlel.
7 Tiꞌ pʌyʌyob majlel jini burro yaꞌ baꞌan Jesús. Tiꞌ tyasibeyob i pat jini burro tiꞌ pislelob. Jesús tiꞌ cꞌʌchtyʌ majlel.
8 Cabʌlob tiꞌ tyʌsʌyob majlel i pislel yaꞌ ti bij. Yañoꞌ bʌ tiꞌ lin acꞌʌyob majlel yopol tyeꞌ ti bij tsaꞌ bʌ i seqꞌueyob yaꞌi.
9 Jini ñaxañoꞌ bʌ majlel yicꞌot wiꞌipat bʌ majlel cꞌam bʌ tꞌan chʌncolob majlel. Chʌncol yʌlob: Laꞌ sujbic i ñuclel Dios. Tijicñayet jatyet muꞌ bʌ a tyʌlel chaꞌan cheꞌ yom lac yum Dios.
10 Tijicñayob jini muꞌ bʌ i yumiñob Dios cheꞌ bajcheꞌ ti wʌ subenti lac yum David ti ñoj oniyix. Laꞌ sujbic i ñuclel Dios. Cheꞌ ti yʌlʌyob jini quixtyañujob.
11 Yaꞌ ti ochi Jesús ti Jerusalén, yaꞌ ti pat templo. Tiꞌ luꞌ yojchꞌo ochel tiꞌ mali. Cheꞌ yomox icꞌan yaꞌ ti majli ti Betania bʌ i cꞌabaꞌ yicꞌot ti docejlelob.
Jesús tiꞌ tꞌojtiꞌi tyeꞌ machꞌʌ baꞌan i wut
12 Ti yijcꞌʌlel cheꞌ ñac ti loqꞌuiyob yaꞌ ti Betania anix i wiꞌñal Jesús.
13 Tiꞌ ñajtyʌ ilʌ juntyejc tyeꞌ higuera bʌ i cꞌabaꞌ. Ti majli i qꞌueleꞌ mi an i wut. Cheꞌ ñac ti cꞌoti, i yopol jach tiꞌ tyajbe. Como max tyo i yorojlel i wut.
14 Cheꞌ jini, Jesús tiꞌ sube chaꞌan maꞌix majch mi quej i saj cꞌuxben i wut ti beleꞌ qꞌuin. Jini ajcʌntꞌañob ti yubiyob.
Jesús tiꞌ xiqꞌuiyob loqꞌuel ajchoñoñel mʌñoñel yaꞌ ti templo
15 Cheꞌ jini ti cꞌotiyob ti Jerusalén. Cheꞌ ñac ti cꞌoti ti pat templo Jesús ti queji i chocob loqꞌuel muꞌ bʌ i chon muꞌ bʌ i mʌn yaꞌi. Tiꞌ chꞌaꞌ chocbeyob i mesa tyac ajqꞌuex tyaqꞌuiñob, yicꞌot i buchlib tyac chʌncoloꞌ bʌ i choñob xꞌujcutsuꞌ.
16 Jesús tiꞌ tiqꞌuiyob chaꞌan mach i chꞌʌmob majlel i cuch yaꞌ tiꞌ pat templo.
17 Ti queji i cʌntisañob. Ti yʌlʌ: Yaꞌ ti Tsꞌijbubil bʌ i Tꞌan Dios mi yʌleꞌ: Jini cotyot mi pejcʌntyel ti i yotyotlel oración chaꞌan pejtyelel quixtyañujob. Pero jatyetla tsaꞌix laꞌ sutqui ti yotyotlel ajxujchꞌob. Cheꞌ ti yʌlʌ Jesús.
18 Cheꞌ jini ti yubiyob jini ñucoꞌ bʌ curajob yicꞌot ajcʌntisajob chaꞌan i mandar israelob. Tiꞌ sʌclʌyob bajcheꞌ chꞌujbi i tsʌnsañob como chʌncol i bʌcꞌñan como ti pejtyel quixtyañu tsijcꞌ cheꞌob i pusicꞌal chaꞌan i cʌntisa Jesús.
19 Cheꞌ yomox icꞌan tsaꞌix loqꞌui majlel ti lum Jesús yicꞌot ajcʌntꞌañob i chaꞌan.
Ti tyʌqui jini higuera bʌ tyeꞌ
20 Ti sʌcꞌan ti yijcꞌʌlel ti chaꞌ ñumiyob yaꞌ baꞌan jini higuera bʌ tyeꞌ. Ti yilʌyob yoque tyʌquinix ti pejtyelel yicꞌot i wiꞌ.
21 Ti cꞌajtiyi i chaꞌan Pedro. Ti yʌlʌ: Maestro, qꞌuele, ñoj tyʌquinix ili tyeꞌ tsaꞌ bʌ a tꞌojtiꞌi, cheꞌen.
22 Jesús tiꞌ jacꞌʌ: Chꞌujbinla Dios.
23 Melel bajcheꞌ mic subeñetla. Majchical jach miꞌ suben ili wits chaꞌan i chꞌuyeꞌ loqꞌuel i bʌ chaꞌan ochic ti colem joyol bʌ jaꞌ, mi mucꞌʌch i chꞌujbin ti jumpꞌej i pusicꞌal chʌꞌʌch mi quej i yujtyel. Mi maꞌan chaꞌpꞌej i pensal, chʌꞌʌch mi quejel yujtyel bajcheꞌ ti yʌlʌ.
24 Jin chaꞌan mic subeñetla pejtyel chʌ bʌ mi laꞌ cꞌajtin ti oración, chꞌujbinla ti laꞌ pusicꞌal mi muqꞌuix quej laꞌ wʌqꞌuentyel. Cheꞌ jini melelʌch mi quejel laꞌ wʌqꞌuentyel tsaꞌ bʌ laꞌ cꞌajti.
25 Cheꞌ muqꞌuetla ti oración, mi an majch maꞌ contrajin, ñusʌbenla i mul, cheꞌ jini mi quej i ñusʌbeñetla laꞌ mul laꞌ Tyat am bʌ ti panchan.
26 Como cheꞌ machꞌan mi laꞌ ñusʌben laꞌ bʌ laꞌ mul, cheꞌ jini, machꞌan miꞌ ñusʌbeñetla laꞌ mul laꞌ Tyat am bʌ ti panchan. Cheꞌ ti yʌlʌ Jesús.
I pꞌʌtyʌlel i tꞌan Jesús
27 Yaꞌ ti chaꞌ cꞌotiyob ti Jerusalén. Chʌncol ti xʌmbal ti pat templo Jesús. Ti queji i lʌcꞌob Jesús jini ñuc bʌ curajob yicꞌot ajcʌntisajob chaꞌan i mandar israelob yicꞌot xñoxob añoꞌ bʌ i yeꞌtyel.
28 Tiꞌ cꞌajtibeyob Jesús: ¿Baqui tyʌlem a weꞌtyel cheꞌ mi a niqꞌui chaꞌlen jini muꞌ bʌ a chaꞌlen? ¿Majchqui ti yʌqꞌuet ili a weꞌtyel chaꞌan mi a niqꞌui chaꞌlen? cheꞌob.
29 Jesús tiꞌ jacꞌbeyob: Añʌch com bʌ j cꞌajtibeñetla jeꞌel. Mi ti laꞌ jacꞌʌ mi quejel c subeñetla baqui tyʌlem queꞌtyel, cheꞌen.
30 ¿Majchqui tiꞌ xiqꞌui jini Juan tsaꞌ bʌ i yʌcꞌʌ chꞌʌm jaꞌ? ¿Jim ba Dios o jim ba winicob? Jacꞌʌla. Cheꞌ ti yʌlʌ Jesús.
31 Jiñob ti queji i bajñel subeñob i bʌ. Ti yʌlʌyob: Mi ti la cʌlʌ tyʌlem ti panchan mi quejel i chaꞌ cꞌajtibeñonla, ¿chucoch maꞌan ti laꞌ chꞌujbibe?
32 ¿Chꞌujbi ba la cʌleꞌ tyʌlem ti winicob? Como tiꞌ bʌcꞌñʌyob quixtyañujob como tiꞌ ñaꞌtyʌyob chaꞌan ti pejtyelel quixtyañu tiꞌ chꞌujbiyob chaꞌan Dios tiꞌ xiqꞌui yʌleꞌ jini Juan.
33 Jin chaꞌan tiꞌ subeyob Jesús: Mach cujil lojon, cheꞌob. Jesús tiꞌ subeyob: Chʌꞌʌch joñon machꞌan mic subeñetla baqui tyʌlem queꞌtyel, cheꞌen.