2 Ti pʌjyi Jesús jeꞌel yicꞌot ajcʌntꞌañob i chaꞌan chaꞌan mi majlel baꞌ chʌncol yujtyel ñujpuñel.

3 Cheꞌ ñac ti jili i yaꞌlel tsꞌujsub i ñaꞌ Jesús tiꞌ sube: Tsaꞌix jili i yaꞌlel tsꞌujsub, cheꞌen.

4 Pero Jesús tiꞌ jacꞌʌ: Xꞌixic, ¿chucoch maꞌ subeñon jini? cheꞌen. Max tyo yorojlel c pʌs c ñuclel, cheꞌen.

5 Pero i ñaꞌ tiꞌ subeyob jini muꞌ bʌ i ñusan i yaꞌlel tsꞌujsub: Luꞌ jacꞌʌla chʌ bʌ jach miꞌ subeñetla laꞌ chaꞌlen, cheꞌen.

6 Yaꞌan wʌcpꞌej i yajnib jaꞌ melel bʌ ti tyun. Mi yochel cheꞌ bajcheꞌ ochenta o cien litros jaꞌ ti jujumpꞌej i yajnib. Israelob miꞌ cꞌʌñob chaꞌan pocoñel chaꞌan bajcheꞌ miꞌ chꞌujbiñob.

7 Jesús tiꞌ sube muꞌ bʌ i ñusan i yaꞌlel tsꞌujsub: Luꞌ butꞌula ti jaꞌ ili yajnib jaꞌ tyac, cheꞌen. Tiꞌ luꞌ butꞌuyob jintyo ti pajmi.

8 Cheꞌ jini, Jesús tiꞌ subeyob: Wale luchula tsꞌityaꞌ. Chꞌʌmʌla majlel baꞌan jini muꞌ bʌ ti xicꞌoñel chaꞌan qꞌuin, cheꞌen. Chʌꞌʌch tiꞌ chaꞌleyob.

9 Jini muꞌ bʌ ti xicꞌoñel chaꞌan qꞌuin tiꞌ japʌ cheꞌ tsꞌintyʌl jini jaꞌ tsaꞌ bʌ pʌntiyi ti i yaꞌlel tsꞌujsub. Pero machꞌan tiꞌ ñaꞌtyʌ baqui tyʌlem. Jin jach muꞌ bʌ i ñusan i yaꞌlel tsꞌujsub tiꞌ ñaꞌtyʌyob bajcheꞌ ti mejli como jiñobʌch tiꞌ luchuyob jini jaꞌ. Cheꞌ jini, jini muꞌ bʌ ti xicꞌoñel chaꞌan qꞌuin tiꞌ pʌyʌ tyʌlel jini winic muꞌ bʌ ti ñujpuñel.

10 Tiꞌ sube: I tyʌlelʌch ñaxan mi luchbentyel jini más wen bʌ i yaꞌlel tsꞌujsub. Cheꞌ tsaꞌix i japʌyob mi pʌsꞌentyel jini mach bʌ ñoj wen. Pero jatyet ti a lotyo jini más wen bʌ chaꞌan mi yʌqꞌuentyel ti wiꞌil.

11 Cheꞌ ti pʌntiyi jini jaꞌ ti yaꞌlel tsꞌujsub jiñʌch baꞌ tiꞌ ñaxan pʌsʌ ñuc bʌ i pꞌʌtyʌlel Jesús. Tiꞌ pʌsʌ i ñuclel yaꞌ ti Caná ti Galilea. Jini ajcʌntꞌañob i chaꞌan tiꞌ chꞌujbiyob Jesús.

12 Cheꞌ ñac ti ujti jini qꞌuiñejel ti majli Jesús ti lum Capernaum bʌ i cꞌabaꞌ. I ñaꞌ yicꞌot i yijtsꞌiñob yicꞌot ajcʌntꞌañob i chaꞌan Jesús ti majli yicꞌotyob. Tiꞌ ñusʌyob chaꞌpꞌej uxpꞌej qꞌuin yaꞌi.

13 Cheꞌ ñac lʌcꞌʌlix i yorojlel pascua bʌ qꞌuin i chaꞌan bʌ israelob ti majli Jesús yaꞌ ti lum Jerusalén bʌ i cꞌabaꞌ.

14 Yaꞌi tiꞌ pat colem templo Jesús tiꞌ tyajayob jini muꞌ bʌ i chon tyat wacax, tiñʌmeꞌ yom bʌ i yʌleꞌ oveja yicꞌot xꞌujcutsuꞌ. Yaꞌan jeꞌel buchuloꞌ bʌ ti mesa chaꞌan i qꞌuexben i tyaqꞌuin quixtyañujob.

15 Cheꞌ ñac ti yilʌ Jesús chʌ bʌ mucꞌob ti templo, tiꞌ jalʌ pʌchi. Tiꞌ chocoyob loqꞌuel ti pejtyelelob. Tiꞌ choco loqꞌuel tiñʌmeꞌ yicꞌot tyat wacax jeꞌel. Tiꞌ luꞌ chocbeyob i mesa tyac.

16 Jesús tiꞌ subeyob jini ajchon xꞌujcutsuꞌ: Locꞌsanla pejtyelel chʌ bʌ yes an laꞌ chaꞌan. Mach yom laꞌ chaꞌlen choñoñel wʌꞌ ti yotyot c Tyat am bʌ ti panchan, cheꞌen.

17 Cheꞌ jini, ajcʌntꞌañob i chaꞌan ti chaꞌ cꞌajtiyi i chaꞌañob Tsꞌijbubil bʌ i Tꞌan Dios baꞌ mi yʌl: Mach com j qꞌuel jini muꞌ bʌ i chaꞌleñob bajcheꞌ jini como mij qꞌuel ti ñuc ili a wotyot, cheꞌen. Cheꞌ tiꞌ chaꞌ pensaliyob jini ajcʌntꞌañob i chaꞌan Jesús bajcheꞌ wʌ tsꞌijbubil ti ñoj oniyix chaꞌan bajcheꞌ tiꞌ chaꞌle Jesús.

18 Cheꞌ jini, jini israelob tiꞌ cꞌajtibeyob Jesús: ¿Chuqui ti i señʌjlel a pꞌʌtyʌlel maꞌ pʌsꞌeñon lojon chaꞌan mi tsictiyel mi a wenta a chaꞌlen cheꞌ bajcheꞌ jini? cheꞌ yʌlol Jesús.

19 Jesús tiꞌ jacꞌʌ: Jisanla iliyi templo. Ti yuxpꞌejlel qꞌuin mi quej c chaꞌ waꞌchocon, cheꞌen.

20 Cheꞌ jini, jini israelob tiꞌ subeyob: Ti cuarenta y seis años ti mejli jini templo. ¿Bajcheꞌqui isujm cheꞌ maꞌ wʌl ti uxpꞌej qꞌuin jach mi quej a chaꞌ waꞌchocon? cheꞌob.

21 Pero jini templo tsaꞌ bʌ i tyaja ti tꞌan Jesús jiñʌch i bʌcꞌtyal.

22 Jin chaꞌan cheꞌ ti chaꞌ tyejchi loqꞌuel Jesús baꞌan sajtyemoꞌ bʌ, ajcʌntꞌañob i chaꞌan ti chaꞌ cꞌajtiyi i chaꞌan bajcheꞌ ti ñaxan alʌ Jesús cheꞌ max tyo ti sajti. Cheꞌ jini tiꞌ chꞌujbiyob chaꞌan melel jini tꞌan tsaꞌ bʌ i wʌ subeyob Jesús yicꞌot jeꞌel tiꞌ chꞌujbiyob Tsꞌijbubil bʌ i Tꞌan Dios baꞌ mi tyajtyʌl ti tꞌan chaꞌan jiñʌch muꞌ bʌ i chojquel tyʌlel.

23 Cheꞌ ñac yaꞌan ti Jerusalén Jesús ti yorojlel pascua bʌ qꞌuin, cabʌl tiꞌ chꞌujbiyob Jesús. Tiꞌ chꞌujbiyob cheꞌ ñac ti yilʌ ñuc tyac i pꞌʌtyʌlel tsaꞌ bʌ i pʌsʌ Jesús.

24 Pero Jesús yujil isujm chaꞌan ili quixtyañujob machꞌan tiꞌ chꞌujbiyob ti pejtyelel i pusicꞌal como tiꞌ luꞌ ñaꞌtyʌ chʌ bʌ an tiꞌ pusicꞌal quixtyañujob.

25 Mach cꞌʌñʌ i subentyel Jesús chuqui an tiꞌ pusicꞌal quixtyañu como miꞌ bajñel ñaꞌtyan chuqui an tiꞌ pusicꞌalob.