2 Nicodemo ti cꞌoti baꞌan Jesús ti acꞌbʌlel. Tiꞌ sube Jesús: Maestro, cujilix lojon isujm chaꞌan tyʌlemetyʌch ti Dios bajcheꞌ ajcʌntisajet. Como machꞌan majch chꞌujbi i pʌs ñuc tyac bʌ i pꞌʌtyʌlel muꞌ bʌ a chaꞌlen mi machꞌan Dios yicꞌotyob.

3 Jesús tiꞌ sube Nicodemo: Melel mic subeñet, jini mach bʌ baꞌan miꞌ chaꞌ chꞌoc an mach chꞌujbi i yumin Dios.

4 Nicodemo tiꞌ sube: ¿Bajcheꞌqui chꞌujbi i chaꞌ chꞌoc an winic cheꞌ winiquix? ¿Chꞌujbi ba i chaꞌ ajñel ti i ñaꞌ chaꞌan mi chaꞌ chꞌoc an? cheꞌen.

5 Jesús ti yʌlʌ: Melel mic subeñet: Jini mach bʌ baꞌan mi chꞌoc an chaꞌan ti jaꞌ yicꞌot chaꞌan ti Chꞌujul bʌ i Chꞌujlel Dios mach chꞌujbi i yumin Dios.

6 Cheꞌ mi lac chꞌoc an wʌꞌ ti mulawil mi la cʌqꞌuentyel lac bʌcꞌtyal. Cheꞌ mi chꞌoc an quixtyañu ti Chꞌujul bʌ i Chꞌujlel Dios mi yʌqꞌuentyel tsijiꞌ bʌ i cuxtyʌlel.

7 Mach yom tyoj bʌcꞌñʌjel maꞌ wubin chaꞌan jini c tꞌan tsaꞌ bʌ c subet. Wersa yom laꞌ chaꞌ chꞌoc an, bajcheꞌ tic subet.

8 Jiñʌch cheꞌ bajcheꞌ jini icꞌ mi ñumel baꞌic jach mi ñumel. Mi laꞌ wubin icꞌ pero mach a wujil isujm baqui mi tyʌlel baqui mi majlel. Chʌꞌʌch bajcheꞌ jini chꞌoc ejemoꞌ bʌ ti Chꞌujul bʌ i Chꞌujlel Dios.

9 Nicodemo tiꞌ cꞌajtibe Jesús: ¿Bajcheꞌqui chꞌujbi yujtyel jini? cheꞌen.

10 Jesús tiꞌ jacꞌʌ: Jatyet maestrojet i chaꞌan lac piꞌʌlob israelob. ¿Machꞌa baꞌan maꞌ ñaꞌtyan jini? cheꞌ ti yʌlʌ Jesús.

11 Melel mic subeñet, mi lojon c chaꞌlen tꞌan chaꞌan chʌ bʌ tyac ti lojon quilʌ. Machꞌan mi laꞌ chꞌujbin chaꞌan melel lojon c tꞌan.

12 Tsaꞌix c subeyetla i sujmlel jini am bʌ ti panchan cheꞌ ñac mic lajeꞌ yicꞌot wʌꞌ bʌ an ti mulawil. Mi machꞌan mi laꞌ chꞌujbin cheꞌ mic subeñetla chʌ bʌ yes wʌꞌan ti mulawil, ¿bajcheꞌqui mi quej laꞌ chꞌujbin cheꞌ mic subeñetla chʌ bʌ an ti panchan?

13 Machꞌan majch ti letsi majlel ti panchan, jin jach jini tsaꞌ bʌ jubi tyʌlel ti panchan. Jin jach Joñon i Piꞌʌlon bʌ Quixtyañujob. Yaꞌ añon ti panchan.

14 Cheꞌ bajcheꞌ Moisés tiꞌ jocꞌchoco lucum ti tyeꞌ ti tyʌquin bʌ joch lum cheꞌ jeꞌel mi quej c wersa letsʌntyel Joñon i Piꞌʌlon bʌ Quixtyañujob.

15 Chaꞌan majchical jach miꞌ chꞌujbin chaꞌan Ajcotyayajon i chaꞌan machꞌan mi sajtyel chaꞌan ti beleꞌ ora. Miꞌ tyaj i cuxtyʌlel machꞌʌ yujil jilel. Cheꞌ ti yʌlʌ Jesús.

16 Como chʌꞌʌch tiꞌ wen pꞌuntyʌ Dios jini añoꞌ bʌ ti mulawil. Ti yʌcꞌʌ cojach bʌ i Yalobil. Majchical jach muꞌ bʌ i chꞌujbin ti i pusicꞌal i Yalobil Dios machꞌan mi sajtyel. Miꞌ tyaj i cuxtyʌlel machꞌʌ yujil jilel.

17 Como Dios machꞌan tiꞌ choco tyʌlel i Yalobil ti mulawil chaꞌan mi yotsan ti xotꞌmulil añoꞌ bʌ ti mulawil. Tiꞌ choco tyʌlel chaꞌan miꞌ tyajob i cotyʌntyel ti Yalobil Dios jini añoꞌ bʌ ti mulawil.

18 Jini muꞌ bʌ i chꞌujbin chaꞌan ajcotyaya i chaꞌan i Yalobil Dios machꞌan mi yochel ti xotꞌmulil. Jini mach bʌ baꞌan miꞌ chꞌujbin wʌ alʌlix mi quej i xotꞌ i mul como machꞌan tiꞌ chꞌujbi jini cojach bʌ Yalobil Dios.

19 Jini machꞌʌ baꞌan miꞌ chꞌujbin wʌ alʌlix mi quej i xotꞌ i mul. Come ti tyʌli i sʌclel mulawil. Quixtyañujob tiꞌ mulʌ icꞌtꞌojñal bʌ mulawil. Machꞌan tiꞌ mulʌ i sʌclel mulawil come simaron miꞌ chaꞌleñob.

20 Como pejtyel majchical miꞌ chaꞌlen simaronlel miꞌ tsꞌaꞌqꞌuel i sʌclel mulawil. Machꞌan miꞌ lʌqꞌueꞌ i sʌclel mulawil ame tsictiyic simaronlel mucꞌob.

21 Jini muꞌ bʌ i chaꞌlen chʌ bʌ yes wen tyac bʌ miꞌ lʌcꞌ i sʌclel mulawil chaꞌan mi tsictiyel muꞌ bʌ i chaꞌlen como miꞌ chaꞌlen tiꞌ pꞌʌtyʌlel Dios.

22 Cheꞌ ñac ti ujti ti tꞌan, ti majli Jesús yicꞌot ajcʌntꞌañob i chaꞌan yaꞌ ti pañimil Judea bʌ i cꞌabaꞌ. Yaꞌ ti jale yicꞌotyob. Ti yʌcꞌʌ chꞌʌm jaꞌ.

23 Juan jeꞌel chʌncol i yʌcꞌ ti chꞌʌm jaꞌ yaꞌ ti jaꞌ Enón bʌ i cꞌabaꞌ lʌcꞌʌl ti lum Salim bʌ i cꞌabaꞌ como yaꞌ an cabʌl jaꞌ. Ti cꞌoti quixtyañujob. Tiꞌ chꞌʌmʌyob jaꞌ.

24 Ti ujti ili cheꞌ ñac max tyo och ti cʌchol Juan.

25 Ti queji i subeñob i bʌ israelob yicꞌot ajcʌntꞌañob i chaꞌan Juan chaꞌan bajcheꞌ yom i pocob i bʌ yicꞌot yambʌ pocoñel tyac.

26 Ti cꞌotiyob baꞌan Juan. Tiꞌ subeyob: Maestro, chʌncol i yʌcꞌ ti chꞌʌm jaꞌ jini am bʌ ti junxej jaꞌ Jordán bʌ i cꞌabaꞌ. Pejtyelel quixtyañu miꞌ tꞌuñob majlel tsaꞌ bʌ a wʌcꞌʌ ti ñaꞌtyʌntyel cheꞌ ñac ti a chaꞌle subtꞌan, cheꞌob.

27 Juan tiꞌ jacꞌʌ: Machꞌan miꞌ tyajeꞌ i ñuclel quixtyañujob, jin jach jini muꞌ bʌ i yʌqꞌuentyel i ñuclel chꞌoyol bʌ baꞌan Dios ti panchan.

28 Jatyetla tsaꞌix laꞌ wubi c tꞌan. Laꞌ wujil tic subu mach Cristojonic, jini yajcʌbil bʌ. Tsaꞌ jach ñaxan chojquiyon tyʌlel.

29 Jini yajcʌbil bʌ cheꞌ bajcheꞌ ajñujpuñel tsaꞌ bʌ i tyaja i yijñam. I piꞌʌl muꞌ bʌ i majlel i yotsan ajñujpuñel, muꞌ bʌ i majlel i yubiben i tꞌan wen cꞌajacña i yoj chaꞌan i tꞌan ajñujpuñel. Joñon, choꞌon, bajcheꞌ jini i piꞌʌl muꞌ bʌ majlel i yotsan ajñujpuñel yubi. Jin chaꞌan tsꞌʌcʌlix cꞌajacña bʌ coj.

30 Wersa miꞌ ñuc isʌntyel Cristo, wersa mic juꞌ sʌntyel, cheꞌ ti yʌlʌ Juan.

31 Jini chꞌoyol bʌ ti panchan, i yumʌch pejtyelel chʌ bʌ an. Jini chꞌoyol bʌ ti mulawil, i chaꞌañʌch mulawil, muꞌ jach i ñaꞌtyañob chʌ bʌ yes an ti mulawil. Jini chꞌoyol bʌ ti panchan i yumʌch ti pejtyelelob.

32 Jini chꞌoyol ti panchan miꞌ sub chʌ bʌ yes ti yilʌ yicꞌot chʌ bʌ ti yubi. Machꞌan majch miꞌ chꞌujbin chaꞌan melel muꞌ bʌ i yʌleꞌ.

33 Pero mi an majch miꞌ chꞌujbin muꞌ bʌ i yʌleꞌ jini chꞌoyol bʌ ti panchan miꞌ yʌl chaꞌan yoque melelʌch i tꞌan Dios.

34 Como jini tsaꞌ bʌ chojqui tyʌlel chaꞌan Dios, miꞌ subeꞌ i tꞌan Dios. Dios machꞌan i pꞌisol bajcheꞌ mi yʌcꞌ Chꞌujul bʌ i Chꞌujlel.

35 Lac Tyat miꞌ pꞌuntyan i Yalobil. Tsaꞌix i yʌqꞌue tiꞌ wenta i Yalobil pejtyelel chʌ bʌ an tyac.

36 Jini muꞌ bʌ i chꞌujbin chaꞌan Ajcotyaya i chaꞌan i Yalobil Dios, anix i chaꞌan i cuxtyʌlel machꞌʌ yujil jilel. Jini mach bʌ baꞌan miꞌ chꞌujbin i Yalobil Dios, mach chꞌujbi i yʌqꞌuentyel i cuxtyʌlel. Mi yajñel tiꞌ michꞌlel Dios.