2 cꞌʌlʌl jintyo ti pʌjyi letsel ti panchan. Cheꞌ ñac max tyo lets ti panchan, Jesús ti yajcʌ jini muꞌ bʌ i choqueꞌ majlel ti subtꞌan. Ti Chꞌujul bʌ i Chꞌujlel tiꞌ cʌntisʌ yajcʌbiloꞌ bʌ ajsubtꞌañob ñumel. Tiꞌ cʌntisʌ pejtyel bajcheꞌ yom miꞌ chaꞌleñob troñel.

3 Cheꞌ ñac ti ujti yʌcꞌ i bʌ ti sajtyel Jesús tiꞌ chaꞌ pʌsʌ i bʌ ti yoque i cuxtyʌlel tiꞌ tyojlelob tsaꞌ bʌ i ñaxan yajcʌyob. Cꞌʌlʌl ti ñumi cuarenta qꞌuin tiꞌ chʌc pʌsʌ i bʌ chaꞌan tsiquil melelʌch chaꞌ cuxulix. Tiꞌ subeyob cabʌl tꞌan chaꞌan i yumintyel Dios.

4 Cheꞌ yaꞌ tyo an Jesús yicꞌotyob jini yajcʌbiloꞌ bʌ ajsubtꞌañob ñumel tiꞌ wʌ subeyob chaꞌan mach yom loqꞌuicob majlel ti jini lum Jerusalén bʌ i cꞌabaꞌ. Tiꞌ subeyob: Pijtyanla wʌꞌwʌꞌi jintyo mi tsꞌʌctiyel tsaꞌ bʌ yʌlʌ c Tyat. Como mi quej i choc tyʌlel jini Chꞌujul bʌ i Chꞌujlel cheꞌ bajcheꞌ tic subetla.

5 Wajali Juan ti yʌcꞌʌ chꞌʌm jaꞌ. Pero maꞌix jal wale Dios mi quej i yʌqꞌueñetla Chꞌujul bʌ i Chꞌujlel. Cheꞌ ti yʌlʌ Jesús.

6 Cheꞌ chaꞌ muchꞌquibilob jini yajcʌbiloꞌ bʌ ajsubtꞌañob ñumel tiꞌ cꞌajtibeyob Jesús: C Yum, ¿jalajqui mi quej a wotsan ti yeꞌtyel juntiquil israel bʌ chaꞌan tiꞌ qꞌuexol mach bʌ israel? cheꞌ tiꞌ cꞌajtibeyob.

7 Jesús tiꞌ jacꞌʌ: Mach laꞌ wenta laꞌ ñaꞌtyan baqui bʌ ora baqui bʌ qꞌuin mi quej i chaꞌ aqꞌuentyel. Jiñʌch i bajñel yujil isujm c Tyat am bʌ ti panchan.

8 Cheꞌ mi yochel ti laꞌ pusicꞌal Chꞌujul bʌ i Chꞌujlel Dios mi quej i yʌqꞌueñetla laꞌ pꞌʌtyʌlel. Mi quej laꞌ loqꞌuel majlel laꞌ subeꞌ j cꞌaba wʌꞌ ti Jerusalén yicꞌot ti pejtyel pañimil tyac Judea bʌ i cꞌabaꞌ yicꞌot Samaria bʌ i cꞌabaꞌ. Cꞌʌlʌl mi quej laꞌ majlel ti más ñajt tyac bʌ pañimil. Cheꞌ ti yʌlʌ Jesús.

9 Cheꞌ ñac ti ujti i luꞌ subeñob tsaꞌix pʌjyi letsel Jesús ti panchan. Jini yajcʌbiloꞌ bʌ ajsubtꞌañob ñumel chʌncol tyo i chʌc qꞌuelob Jesús cheꞌ ñac ti letsi ti panchan. Ti tyʌli tyocal tsaꞌ bʌ mʌcʌ. Machꞌanix tiꞌ bej ilʌyob.

10 Chʌncol tyo i chꞌuj qꞌuelob ti chan baꞌ chʌncol i letsel majlel Jesús. Cheꞌ jini ti queji i qꞌuelob yaꞌ waꞌal chaꞌtiquil winic tiꞌ tꞌejlob. Ñoj sʌsʌc i pislel.

11 Ti yʌlʌyob: Winicob chꞌoyolet bʌ la ti pañimil Galilea bʌ i cꞌabaꞌ, ¿chucoch wʌꞌ tyo chʌc waꞌaletla a qꞌueleꞌ chan? Jini Jesús tsaꞌ bʌ pʌjyi letsel ti panchan wʌꞌ baꞌ añetla mi quejel i chaꞌ tyʌlel chʌꞌʌch bajcheꞌ ti laꞌ wilʌ ti majli ti panchan. Chʌꞌʌch ti subentiyob.

12 Yaꞌ añob ti jumpꞌej wits Olivajol bʌ i cꞌabaꞌ cheꞌ ti ujti pejtyel jini. Ti chaꞌ sujtiyob majlel ti Jerusalén. Machꞌan ñajt. Cheꞌ bajcheꞌ jumpꞌej jach kilómetro i ñajtlel.

13 Cheꞌ ñac ti cꞌotiyob ti Jerusalén ti ochiyob ti otyot. Ti letsiyob ti yambʌ junlajm baꞌ ti poj ajniyob Pedro yicꞌot Jacobo. Yaꞌan Juan jeꞌel yicꞌot Andrés, Felipe, Tomás, Bartolomé, Mateo, Jacobo i yalobil bʌ Alfeo. Yaꞌan jeꞌel Simón chꞌoyol bʌ baꞌan junmujchꞌoꞌ bʌ cananistajoꞌ bʌ i cꞌabaꞌ, yicꞌot Judas i yijtsꞌin Jacobo.

14 Ti jumpꞌejlob i pusicꞌal ti chʌc muchꞌquiyob i bʌ ti oración yicꞌot i yijtsꞌiñob Jesús yicꞌot María i ñaꞌ Jesús yicꞌot yañoꞌ bʌ xꞌixicob jeꞌel.

15 Ti jim bʌ qꞌuin tiꞌ muchꞌquiyob i bʌ cheꞌ bajcheꞌ ciento veintejob tsaꞌ bʌ i chꞌujbiyob Jesús. Ti waꞌle Pedro ti xiñilob.

16 Ti yʌlʌ: Hermañujob, ti ñoj oniyix jini David tiꞌ tsꞌijbu bajcheꞌ ti subenti ti Chꞌujul bʌ i Chꞌujlel Dios. Como ti wʌ alʌ mi quej i pʌseꞌ majlel bij Judas chaꞌan i chucob Jesús. Cheꞌ jini tsʌꞌʌch tsꞌʌctiyi Tsꞌijbubil bʌ i Tꞌan Dios. Chʌꞌʌch ti ujti bajcheꞌ ti wʌ alʌ mi quej i chaꞌlen jini Judas.

17 Como Judas ti ajni la quicꞌot. Ti aqꞌuenti tiꞌ wenta ili troñel jeꞌel.

18 Pero Judas tiꞌ mʌñʌ jumpejt lum yubil, como ti cꞌʌjni i tyojol tsaꞌ bʌ aqꞌuenti chaꞌan jini tsaꞌ bʌ i niqꞌui chaꞌle. Ti wiꞌil tiꞌ bajñel yʌtsꞌʌ i bʌ ti lia. Ti pucꞌ yajli. Ti tyojmi. Ti loqꞌui pejtyel i soy tyaꞌ.

19 Cheꞌ jini ti pam ubiyob ti pejtyelel yaꞌ bʌ chumulob ti Jerusalén. Jin chaꞌan ti yotsʌbeyob i cꞌabaꞌ ili jumpejt lum ti Acéldama. Yom i yʌleꞌ i lum chꞌichꞌ.

20 Como ti jun Salmos bʌ i cꞌabaꞌ mi yʌleꞌ:

21 Wʌꞌan winicob tsaꞌ bʌ i chaꞌleyob xʌmbal la quicꞌot ti beleꞌ qꞌuin cheꞌ ñac wʌꞌ tyo an ti mulawil Jesús.

22 An tsaꞌ bʌ i yilʌyob bajcheꞌ ti ajni Jesús cꞌʌlʌ cheꞌ nac tiꞌ chꞌʌmʌ jaꞌ tiꞌ cꞌʌb Juan. An la quicꞌot cꞌʌlʌ jintyo ti pʌjyi letsel Jesús ti panchan. Yom yajcʌntic juntiquil muꞌ bʌ i tyem sub la quicꞌot bajcheꞌ ti chaꞌ tyejchi loqꞌuel Jesús baꞌan sajtyemoꞌ bʌ. Cheꞌ ti yʌlʌ Pedro.

23 Cheꞌ jini ti yajcʌyob chaꞌtiquil winic. Juntiquil José bʌ i cꞌabaꞌ. Miꞌ subeñob jeꞌel ti Justo. Miꞌ subeñob jeꞌel ti Barsabás jini José. Jini yambʌ winic Matías bʌ i cꞌabaꞌ.

24 Cheꞌ jini tiꞌ chaꞌleyob oración. Ti yʌlʌyob: C Yum, luꞌ a wujilʌch isujm am bʌ tiꞌ pusicꞌal winicob. Pʌsꞌeñon lojon baqui bʌ ti ili chaꞌtiquil a wom a yajcan.

25 Chaꞌan miꞌ chꞌʌmꞌen i troñel ti subtꞌan tsaꞌ bʌ i cʌyʌ Judas cheꞌ tiꞌ tyaja i mul. Como cheꞌ ñac ti sajti ti majli yaꞌ baꞌ mi majlel machꞌʌ baꞌan miꞌ chꞌujbin i tꞌan Dios. Chʌꞌʌch tiꞌ chaꞌleyob oración.

26 Cheꞌ jini tiꞌ chaꞌleyob yajcaya chaꞌan i yajcʌntyel i qꞌuexol Judas. Matías ti ochi tiꞌ qꞌuexol. Ti ajni yicꞌot jini once yajcʌbiloꞌ bʌ ajsubtꞌañob ñumel. Lajal tiꞌ chaꞌleyob troñel.