Ti tyʌli Chꞌujul bʌ i Chꞌujlel Dios
2
Yaꞌ luꞌ muchꞌquibilob pejtyel ochemoꞌ bʌ tiꞌ tꞌan Dios ti jumpꞌej otyot cheꞌ ti cꞌoti i yorojlel jini qꞌuin Pentecostés bʌ i cꞌabaꞌ.2 Ora jach ti queji i yubiñob juꞌucña cheꞌ bajcheꞌ pꞌʌtyʌl bʌ icꞌ chꞌoyol bʌ ti panchan. Ti bujtꞌi i yejtsꞌal pejtyel jini otyot baꞌ buchulob.
3 Cheꞌ jini ti tsictiyi cheꞌ bajcheꞌ lemlemña bʌ cꞌajc. Ti waꞌle ti jol ti jujuntiquilob.
4 Cheꞌ jini ti jujuntiquil ti bujtꞌiyob ti Chꞌujul bʌ i Chꞌujlel Dios. Ti quejiyob ti tꞌan ti yan tyac bʌ tꞌan cheꞌ bajcheꞌ ti yʌcꞌʌyob ti tꞌan jini Chꞌujul bʌ i Chꞌujlel Dios.
5 Ti mismo jim bʌ ora yaꞌ añob ti Jerusalén israeloꞌ bʌ loqꞌuemoꞌ bʌ ti pejtyel pañimil tyac. Miꞌ beleꞌ cꞌajtisañob Dios.
6 Cheꞌ ñac ti yubiyob ili juꞌucña bʌ tꞌan ti jojmiyob majlel i qꞌuelob. Machꞌan tiꞌ ñaꞌtyʌyob chuqui yom i yʌleꞌ como ti jujuntiquil ti yubiyob chʌncol ti subtꞌan ti yoque i tꞌañob.
7 Tyoj bʌcꞌñʌjel ti yubiyob. Ti yʌlʌyob: Chꞌoyolob ti Galilea ti pejtyel ili winicob chʌncoloꞌ bʌ ti tꞌan
8 ¿Bajcheꞌqui isujm, cheꞌ jini, mi lac luꞌ ubin chʌncolob ti tꞌan ti yoque lac tꞌan bʌ yi? cheꞌob.
9 Lamital chꞌoyolon bʌ la ti pañimil Partia bʌ i cꞌabaꞌ yicꞌot yaꞌ ti Media, yicꞌot yaꞌ ti Elam, yicꞌot yaꞌ ti Mesopotamia, yicꞌot yaꞌ ti Judea, yicꞌot yaꞌ ti Capadocia yicꞌot yaꞌ ti Ponto, yicꞌot yaꞌ ti pañimil Asia bʌ i cꞌabaꞌ.
10 An chꞌoyolon bʌ la jeꞌel yaꞌ ti Frigia yicꞌot Panfilia, yicꞌot yaꞌ ti Egipto yicꞌot ti pañimil tyac yaꞌ ti Africa ti lʌcꞌʌlel yambʌ pañimil Cirene bʌ i cꞌabaꞌ. An jeꞌel chꞌoyoloꞌ bʌ ti Roma poj wʌꞌan ti julaꞌ jeꞌel. Lamital chꞌoyoloꞌ bʌ ti Roma yoque israelob. Lamital ti sutquiyob i bʌ chaꞌan i chꞌujbiñob cheꞌ bajcheꞌ miꞌ chꞌujbiñob israeloꞌ bʌ.
11 An jeꞌel chꞌoyoloꞌ bʌ yaꞌ ti Creta yicꞌot yaꞌ ti Arabia. Luꞌ chꞌoyoloꞌ bʌ ti Galilea jini chʌncox i subob i ñuclel Dios pero mi lac luꞌ ubin ti jujunchajp bʌ lac tꞌan, cheꞌ ti yʌlʌyob.
12 Tyoj bʌcꞌñʌjelob cheꞌ ñac ti yubiyob. Machꞌan tiꞌ chꞌʌmbeyob isujm jini chʌncol bʌ i yujtyel. Ti cꞌajtibeyob i bʌ: ¿Bajcheꞌqui i sujmlel jini? cheꞌob.
13 Pero yañoꞌ bʌ yi tiꞌ wajleyob. Qꞌuixiñob. Cheꞌ ti yʌlʌyob.
I subtꞌan Pedro
14 Cheꞌ jini Pedro ti waꞌle ti subtꞌan ti xinil jini yambʌ oncejob yajcʌbiloꞌ bʌ ajsubtꞌañob ñumel. Cꞌam ti queji ti tꞌan. Ti yʌlʌ: Piꞌʌlob, chꞌoyolet bʌ la ti Judea yicꞌot pejtyel wʌꞌ bʌ chumuletla ti Jerusalén, wen ñʌchꞌtyanla chʌ bʌ mi quej c subeñetla. Chꞌujbinla jini.
15 Machꞌan qꞌuixiñon lojon bajcheꞌ mi laꞌ lolon ñaꞌtyan como a las nueve jach tyo ti sʌcꞌan, cheꞌen. Como maꞌan baꞌ bʌ ora mi qꞌuixñañob israelob ti sʌcꞌan.
16 Pero jini chʌncol bʌ yujtyel jiñʌch tsaꞌ bʌ i wʌ alʌ jini tsaꞌ bʌ i xiqꞌui yʌleꞌ Dios, Joel bʌ i cꞌabaꞌ.
17 Jini Joel ti yʌlʌ:
Ti yujtibal bʌ qꞌuin tyac Dios mi yʌl:
Mi quej cʌqꞌueñob Chꞌujul bʌ c Chꞌujlel pejtyel quixtyañujob.
Laꞌ walobilob mi quej i wʌ alob jini muꞌ bʌ c mel.
Jini aloꞌ bʌ winicob mi quejel i qꞌuel cheꞌ bajcheꞌ ti ñajal chaꞌan jini muꞌ tyo bʌ quej yujtyel.
Mux c pejcan ñoxobix bʌ ti ñajal tyac.
18 Ti mismo jim bʌ oraji mi quej cʌqꞌuen jini winic bʌ yicꞌot jini xꞌixic bʌ ajtroñelob c chaꞌan jini c Chꞌujlel.
Mi quej i subob c tꞌan.
19 Yaꞌ ti chan mi quej c wen pʌs ñuc bʌ c melbal
yicꞌot wʌꞌ ti mulawil bʌbʌqꞌuen bʌ señʌjlel c pꞌʌtyʌlel:
jiñʌch chꞌichꞌ, cꞌajc, yicꞌot butsꞌ.
20 Mi quej yicꞌan qꞌuin.
Chʌchʌc cheꞌ bajcheꞌ chꞌichꞌ mi majlel uw cheꞌ
max tyo ñoj cꞌot i qꞌuinilel i tyʌlel laꞌ Yum.
Jini qꞌuinilel i tyʌlel laꞌ Yum ñoj bʌbʌqꞌuen bʌ qꞌuin.
21 Cheꞌ jini, majchical jach muꞌ bʌ i pejcan laꞌ Yum tiꞌ cꞌabaꞌ mi quej i cotyʌntyel.
Chʌꞌʌch ti yʌlʌ Dios ti tiꞌ Joel, cheꞌ bajcheꞌ ti chaꞌ alʌ Pedro.
22 Pedro ti yʌlʌ jeꞌel: Jatyetla israelet bʌ la, ñʌchꞌtyanla muꞌ bʌ c subeñetla. Dios tiꞌ wen pʌsʌ ti laꞌ tyojlel chaꞌan añʌch i pꞌʌtyʌlel jini Jesús chꞌoyol bʌ ti Nazaret. Como jiñʌch i pꞌʌtyʌlel Dios ti tsictiyi ti Jesús ti laꞌ tyojlel cheꞌ ñac tiꞌ cꞌoqꞌuisʌ xcꞌamꞌañob. Tiꞌ chaꞌ cuxtisʌ sajtyemoꞌ bʌ yicꞌot yan tyac bʌ i melbal cheꞌ bajcheꞌ laꞌ wujil isujm.
23 Pero cheꞌ ñac ti aqꞌuentiyetla Jesús ti laꞌ pꞌʌtyʌlel cheꞌ bajcheꞌ tiꞌ wʌ ñaꞌtyʌ Dios, jatyetla ti laꞌ chucu. Ti laꞌ wʌcꞌʌ tiꞌ cꞌʌb jini simaroñoꞌ bʌ tsaꞌ bʌ i tsʌnsʌyob ti cruz.
24 Pero Dios ti chaꞌ tyeche loqꞌuel baꞌan sajtyemoꞌ bʌ como mach chꞌujbi cʌylec ti yajnib sajtyemoꞌ bʌ.
25 Como jini ñuc bʌ yumʌl ti ñoj oniyix David bʌ i cꞌabaꞌ tiꞌ tyaja ti tꞌan Jesús. Ti yʌlʌ:
Mic beleꞌ qꞌuel c Yum tiꞌ tyojel c wut.
Como beleꞌ wʌꞌ an quicꞌot. Maꞌ mi quej c saj pensalin.
26 Jin chaꞌan ñoj tijicña ti cubi. Tijicñayon tic chaꞌle tꞌan.
Cheꞌ mi chꞌujñʌntyel c bʌcꞌtyal muꞌ tyo i pijtyan i chaꞌ tyejchel loqꞌuel baꞌan sajtyemoꞌ bʌ.
27 Cheꞌ cu mach yaꞌic mi quej a cʌy c chꞌujlel ti yajnib sajtyemoꞌ bʌ.
Machꞌan mi quej a wʌcꞌ ti pʌcꞌmʌl c bʌcꞌtyal como joñon a walobilon.
28 Mux a chaꞌ aqꞌueñon j cuxtyʌlel.
Cheꞌ wʌꞌ añet quicꞌot cꞌajacñajax coj mi cubin.
Chʌꞌʌch tiꞌ tyaja ti tꞌan Jesús jini David. Cheꞌ ti yʌlʌ Pedro.
29 Pedro ti yʌlʌ jeꞌel: Piꞌʌlob, luꞌ cʌñʌl laꞌ chaꞌan ti sajti David jini lac yum ti ñoj oniyix. Tiꞌ chꞌujñʌyob. Cꞌʌlʌl wale iliyi an ti lac lumal i yajnib baꞌ ti chꞌujñʌnti.
30 Jini David jiñʌch juntiquil tsaꞌ bʌ i xiqꞌui yʌleꞌ Dios. Tiꞌ ñaꞌtyʌ i sujmlel tsaꞌ bʌ i yʌlʌ Dios chaꞌan loqꞌuem tiꞌ jiñʌjlel mi quej i tyʌlel Cristo jini muꞌ bʌ i chꞌʌmꞌen ñoj ñuc bʌ yeꞌtyel David.
31 David tiꞌ wʌ ñaꞌtyʌ muꞌ bʌ quej yujtyel. Tiꞌ wʌ ñaꞌtyʌ bajcheꞌ mi quej i chaꞌ tyejchel loqꞌuel baꞌan sajtyemoꞌ bʌ Cristo cheꞌ ñac ti yʌlʌ chaꞌan mach yaꞌic mi quej i cʌy i Chꞌujlel ti yajnib sajtyemoꞌ bʌ. Machꞌan mi quejel i yʌcꞌ ti pʌcꞌmʌl i bʌcꞌtyal. Chʌꞌʌch tiꞌ wʌ tyaja ti tꞌan Cristo jini David cheꞌ max tyo tyʌlem ti mulawil Cristo.
32 Dios ti chaꞌ tyeche loqꞌuel Jesús baꞌan sajtyemoꞌ bʌ. Ti lojon quilʌ, joñon lojon.
33 Ti pʌjyi letsel Jesús ti panchan yaꞌ tiꞌ ñoj Dios chaꞌan tsiquil añʌch i ñuclel Jesús. Ti aqꞌuenti ti i Tyat Chꞌujul bʌ i Chꞌujlel cheꞌ bajcheꞌ ti wʌ subenti. Jin chaꞌan yaꞌ tyʌlem ti Jesús pejtyel chʌncol bʌ laꞌ wubin, chʌncol bʌ laꞌ wilan wale iliyi, cheꞌ ti yʌlʌ Pedro.
34-35 Como mach jinic David tsaꞌ bʌ letsi ti panchan pero David ti yʌlʌ:
Jini lac Yum Dios tiꞌ sube c Yum,
buchiꞌ ilayi tic ñoj jintyo mi cʌqꞌueñet a ganarin a contrajob.
Chʌꞌʌch ti yʌlʌ David, cheꞌen Pedro.
36 Yom i luꞌ chꞌʌmꞌeñob isujm pejtyel israelob. Ñoj melelʌch jiñʌch jini Jesús tsaꞌ bʌ laꞌ tsʌnsʌ ti cruz. Dios chʌncol i pʌs ñoj melel lac Yumʌch jini Jesús. Jiñʌch jini Cristo. Cheꞌ ti yʌlʌ Pedro.
37 Cheꞌ ñac ti yubiyob ili tꞌani, quisintic ti yubiyob. Tiꞌ cꞌajtibeyob Pedro yicꞌot yambʌ yajcʌbiloꞌ bʌ ajsubtꞌañob ñumel: Piꞌʌlob, ¿chuqui yom mi lojon c chaꞌlen? cheꞌob.
38 Pedro tiꞌ jacꞌbeyob: Cʌyʌx laꞌ mul. Chꞌʌmʌla jaꞌ chaꞌan tsiquil ti laꞌ chꞌujbi Jesús. Cheꞌ jini mi quej laꞌ ñusʌbentyel laꞌ mul. Cheꞌ jini Dios mi quej i yʌqꞌueñetla Chꞌujul bʌ i Chꞌujlel.
39 Pejtyel tsaꞌ bʌ i yʌlʌ Dios laꞌ chaꞌañʌch yicꞌot i chaꞌan laꞌ walobilob. Ti ajqꞌui jini tꞌan chaꞌañetla yicꞌot chaꞌan laꞌ walobilob yicꞌot i chaꞌan jini ñajt bʌ añob. I chaꞌan majchical jach muꞌ bʌ i nijcʌbentyel i pusicꞌal ti lac Yum Dios, cheꞌen.
40 Ti ili tꞌan tyac yicꞌot yan tyac bʌ tꞌan Pedro tiꞌ wen xiqꞌuiyob. Tiꞌ subeyob: Chꞌujbinla chaꞌan mi laꞌ tyaj laꞌ cotyʌntyel, chaꞌan maꞌ mi laꞌ lolon ñusan wocol cheꞌ bajcheꞌ mi quej i ñusañob pejtyel simaroñoꞌ bʌ. Cheꞌ ti yʌlʌ Pedro.
41 Cheꞌ jini pejtyelelob tsaꞌ bʌ i chꞌujbi ili tꞌan tiꞌ chꞌʌmʌyob jaꞌ. Cheꞌ jini ti jim bʌ qꞌuin ti ocꞌʌ hermañujob cheꞌ bajcheꞌ tres mil quixtyañujob.
42 Tiꞌ ñusʌyob cabʌl qꞌuin yicꞌot jini yajcʌbiloꞌ bʌ ajsubtꞌañob ñumel chaꞌan i cʌntisʌntyelob. Cheꞌ jini tiꞌ wen xucꞌchocoyob i pusicꞌal. Tyem tijicñayob. Tiꞌ motin japʌyob i yaꞌlel uva, tiꞌ motin cꞌuxuyob waj cheꞌ bajcheꞌ tiꞌ xiqꞌuiyob Jesús i melob. Cabʌl tiꞌ chaꞌleyob oración.
Bajcheꞌ ti ajni jini ñaxan bʌ ochemoꞌ bʌ tiꞌ tꞌan Dios
43 Tyoj bʌcꞌñajel ti luꞌ yubiyob quixtyañujob. Tiꞌ wen tsictiyi i pꞌʌtyʌlel Dios yicꞌot jini yajcʌbiloꞌ bʌ ajsubtꞌañob ñumel.
44 Junlajalob i pensal jini tsaꞌ bʌ i chꞌujbiyob Jesús. Tyem i chaꞌañob pejtyel chʌ bʌ añob i chaꞌan.
45 Tiꞌ choñoyob chʌ bʌ an i chaꞌan yicꞌot i lum tyac chaꞌan tiꞌ tyem cꞌʌmbeyob i tyojol chaꞌan chʌ bʌ yes i cꞌʌjnibal i chaꞌañob.
46 Ti jujumpꞌej qꞌuin tiꞌ muchꞌquiyob i bʌ ti templo. Ti tyem uchꞌiyob ti yotyotyob tyac. Tyem tijicñayob. Jumpꞌejlob jach i pusicꞌal.
47 Tiꞌ subuyob i ñuclel Dios. Ti qꞌuejliyob ti ñuc ti yambʌ quixtyañujob. Ti jujumpꞌej qꞌuin Dios ti más oqꞌuisʌ jini tsaꞌ bʌ i chꞌujbibeyob i tꞌan.