2 Yaꞌan juntiquil winic machꞌʌ mejl ti xʌmbal cꞌʌlʌ cheꞌ ñac ti chꞌocʌ. Beleꞌ qꞌuin miꞌ pʌyob majlel ti tiꞌ templo chaꞌan miꞌ cꞌajtibeñob majtyan tyaqꞌuin jini muꞌ bʌ i yochelob ti templo. I cꞌabaꞌ ili i tiꞌ templo Hermosa.

3 Cheꞌ ñac ti yilʌ ochel mucꞌob ti templo Pedro yicꞌot Juan tiꞌ cꞌajtibeyob majtyan tyaqꞌuin.

4 Cheꞌ jini Pedro yicꞌot Juan tiꞌ chꞌuj qꞌueleyob jini cꞌam bʌ yi. Pedro ti yʌlʌ: Qꞌueleyon lojon, cheꞌen.

5 Cheꞌ jini tiꞌ chꞌuj qꞌueleyob como tiꞌ ñaꞌtyʌ mi quej yʌqꞌuentyel i majtyan.

6 Pedro tiꞌ sube: Machꞌan c tyaqꞌuin pero añʌch bajcheꞌ mij cotyañet, cheꞌen. Chaꞌan tiꞌ pꞌʌtyʌlel Jesús chꞌoyol bʌ ti Nazaret, waꞌi. Chaꞌlen xʌmbal. Cheꞌ yʌlol jini cꞌam bʌ.

7 Cheꞌ jini Pedro tiꞌ chucu tiꞌ ñoj. Tiꞌ chꞌuyu tyejchel. Ti waꞌ pꞌʌtyʌliyi i bicꞌ yoc yicꞌot ti pejtyelel yoc.

8 Cheꞌ jini, ti tijpꞌi tyejchel. Ti queji ti xʌmbal. Ti ochi ti templo yicꞌotyob. Muꞌ ti xʌmbal. Muꞌ ti tijpꞌel. Chʌncox i sub i ñuclel Dios.

9 Pejtyel quixtyañu yaꞌ baꞌañob ti yilʌyob chʌncox ti xʌmbal. Chʌncolix i subeꞌ i ñuclel Dios.

10 Tiꞌ luꞌ cʌñʌyob jiñʌch jini tsaꞌ bʌ buchle i cꞌajtin i majtyan tyaqꞌuin yaꞌ ti tiꞌ templo Hermosa bʌ i cꞌabaꞌ. Tsijcꞌ cheꞌob i pusicꞌal. Tyoj bʌcꞌñʌjelob chaꞌan bajcheꞌ ti lajmi ili winiqui.

11 Chʌncol tyo i tyul mecꞌob Pedro yicꞌot Juan ili winiqui tsaꞌ bʌ lajmisʌnti yoc. Yaꞌ ti majliyob ti jumpꞌej i lejchꞌ yotyot Salomón bʌ i cꞌabaꞌ. Ti waꞌ ajñel muchꞌquiyob i bʌ pejtyel winicob yaꞌ baꞌañob. Tyoj bʌcꞌñʌjelob cheꞌ ti yilʌyob.

12 Cheꞌ ñac ti yilʌ chʌncox i muchꞌquiñob i bʌ, Pedro tiꞌ subeyob: Winicob i jiñʌjlet bʌ la Israel, ¿chucoch tyoj bʌcꞌñʌjeletla cheꞌ mi laꞌ wilan jini tsaꞌ bʌ ujti? ¿Chucoch mi laꞌ chꞌuj qꞌuelon lojon cheꞌ bajcheꞌ ti lojon c pꞌʌtyʌlel ti lojon c lajmisʌ iliyi winiqui o mi ti lojon c wenlel cheꞌ muqꞌuix ti xʌmbal ili winiqui?

13 Pero mach jinic ti lojon c wenlel. Jini Dios muꞌ bʌ lojon c chꞌujbin, tsaꞌ bʌ i chꞌujbiyob jeꞌel Abraham, Isaac, yicꞌot Jacob, lac yumob ti ñoj oniyix, tiꞌ wen pʌsʌ i ñuclel Jesús. Cheꞌ cu jini Jesús tsaꞌ bʌ laꞌ wʌqꞌue i mel i bʌ baꞌan Pilato, jiñʌch i yalobil Dios. Pero cheꞌ ñac Pilato tiꞌ lolon jopꞌo i coleꞌ maꞌan ti laꞌ wʌcꞌʌ ti cojlel.

14 Chꞌujulʌch jini Jesús. Maꞌ sajlic i mul. Pero maꞌan ti laꞌ wʌcꞌʌ ti cojlel. Tsaꞌ jach laꞌ cꞌajti chaꞌan miꞌ colbeñetla juntiquil ajtsʌnsa.

15 Cheꞌ jini ti laꞌ tsʌnsʌ jini muꞌ bʌ i yʌqꞌueñonla laj cuxtyʌlel. Jiñʌch jini tsaꞌ bʌ i tyeche loqꞌuel Dios baꞌan sajtyemoꞌ bʌ. Chʌncol lojon c subeꞌ chaꞌan Dios ti tyeche loqꞌuel como ti lojon quilʌ joñon lojon. Cheꞌ ti yʌlʌ Pedro.

16 Pero qꞌuele laꞌ wilan tsiquilʌch an i pꞌʌtyʌlel i cꞌabaꞌ Jesús. Ti lajmisʌnti ili winiqui chaꞌan ti lojon c chꞌujbi ti lojon c pusicꞌal, ti lojon j cꞌʌñʌ i pꞌʌtyʌlel Jesús. Cheꞌ jini chʌꞌʌch ti ujti bajcheꞌ chʌncol laꞌ wilan chaꞌan ti caj i pꞌʌtyʌlel Jesús.

17 Piꞌʌlob, cujilʌch isujm jatyetla yicꞌot añoꞌ bʌ yeꞌtyel machꞌan ti laꞌ ñaꞌtyʌ chʌ bʌ muqꞌuetla cheꞌ ñac ti laꞌ tsʌnsʌ Jesús.

18 Pero Dios ti yʌcꞌʌ ti tsꞌʌctiyel i tꞌañob jini tsaꞌ bʌ i xiqꞌui yʌleꞌ Dios ti ñoj oniyix. Como jini ti wʌ alʌyob chaꞌan mi quejel i ñusan wocol Cristo.

19 Jin chaꞌan pensalin laꞌ mul. Cʌyʌx laꞌ mul chaꞌan ñusʌbentic laꞌ mul. Cheꞌ jini Dios mi quej i ñʌchꞌchocon laꞌ pusicꞌal.

20 Mi quej i chaꞌ choc tyʌlel Jesús. Jiñʌch jini Cristo tsaꞌ bʌ wʌ yajcʌnti ti Dios chaꞌañetla.

21 Jesús mi quej i cʌytyʌl yaꞌ ti panchan jintyo mi cꞌotyel i yorojlel cheꞌ Dios mi quej i luꞌ tsijibtisan pejtyel chʌ bʌ an tyac. Chʌꞌʌch ti wʌ alʌ Dios ti tiꞌ jini tsaꞌ bʌ i xiqꞌui yʌleꞌ ti ñoj oniyix.

22 Moisés tiꞌ sube lac yumob ti ñoj oniyix: Lac Yum Dios mi quejel i yajcan juntiquil muꞌ bʌ i xiqꞌueꞌ yʌleꞌ Dios loqꞌuem yaꞌ baꞌ añetla. Juntiquil laꞌ piꞌʌl chʌꞌʌch bajcheꞌ ti yajcʌyon. Chꞌujbinla pejtyel chʌ bʌ jach miꞌ subeñetla.

23 Como majchical jach machꞌan miꞌ chꞌujbin i tꞌan mi quejel i chojquel loqꞌuel baꞌan lac piꞌʌlob israelob. Mi quejel i jisʌntyel. Cheꞌ ti yʌlʌ Moisés ti ñoj oniyix.

24 Chʌꞌʌch jeꞌel tiꞌ chaꞌle tꞌan pejtyel yañoꞌ bʌ tsaꞌ bʌ i xiqꞌui yʌleꞌ Dios. Cheꞌ ti yʌlʌ Samuel yicꞌot pejtyel yañoꞌ bʌ wiꞌilix bʌ ti tyʌliyob. Ti luꞌ chaꞌleyob tꞌan chaꞌan jini chʌncol bʌ yujtyel wale iliyi.

25 Laꞌ chaꞌañʌch wale iliyi pejtyel tsaꞌ bʌ i wʌ luꞌ alʌ Dios ti ñoj oniyix tsaꞌ bʌ yʌlʌ ti tiꞌ jini tsaꞌ bʌ i xiqꞌui yʌleꞌ Dios. Chaꞌan laꞌ wenlel Dios tiꞌ mele trato yicꞌot lac yum ti ñoj oniyix Abraham bʌ i cꞌabaꞌ. Dios ti yʌqꞌue i tꞌan Abraham. Ti yʌlʌ: Yaꞌ loqꞌuem ti a jiñʌjlel mi quejel i tyʌlel juntiquil muꞌ bʌ i cotyan pejtyel añoꞌ bʌ ti mulawil. Cheꞌ ti subenti Abraham ti Dios, cheꞌ Pedro.

26 Cheꞌ jini, cheꞌ ñac Dios ti tyeche loqꞌuel Jesús baꞌan sajtyemoꞌ bʌ, ñaxan tiꞌ xiqꞌui tyʌlel wʌꞌ baꞌ añetla chaꞌan mi yʌqꞌueñetla laꞌ wenlel chaꞌan mi laꞌ cʌy laꞌ mul ti jujuntiquiletla. Cheꞌ tiꞌ chaꞌle tꞌan Pedro.