2 Tiꞌ michꞌqꞌueleyob Pedro yicꞌot Juan como chʌncox i cʌntisañob quixtyañujob. Chʌncox i subeñob chaꞌan Jesús ti tyejchi loqꞌuel baꞌan sajtyemoꞌ bʌ. Chʌncol i yʌlob chaꞌan tsiquilʌch, cheꞌ jini, mi quej i tyejchelob yañoꞌ bʌ baꞌan sajtyemoꞌ bʌ jeꞌel.

3 Tiꞌ chucuyob. Ti yotsʌyob ti cʌchol jintyo ti yijcꞌʌlel. Mach chꞌujbi i waꞌ yʌcꞌob ti melojel como iqꞌuix quejel.

4 Pero cabʌl tsaꞌ bʌ yubiyob i tꞌan jini yajcʌbiloꞌ bʌ ajsubtꞌañob ñumel tiꞌ chꞌujbiyob. Cheꞌ jini ti ocꞌʌyob jintyo anix lʌcꞌʌl jopꞌej mil cheꞌ winicob jach ti tsijquiyob.

5 Ti yijcꞌʌlel tiꞌ muchꞌquiyob i bʌ yaꞌ ti Jerusalén jini israelob añoꞌ bʌ ñuc bʌ yeꞌtyel, yicꞌot xñoxoꞌ bʌ añoꞌ bʌ yeꞌtyel yicꞌot ajcʌntisajob chaꞌan i mandar Moisés.

6 Yaꞌan jeꞌel ñoj ñuc bʌ cura Anás bʌ i cꞌabaꞌ yicꞌot Caifás jeꞌel, yicꞌot Juan, Alejandro yicꞌot pejtyelel i piꞌʌlob jini ñoj ñuc bʌ cura.

7 Jiñob tiꞌ xiqꞌuiyob i pʌy tyʌlel Juan yicꞌot Pedro yaꞌ baꞌañob. Tiꞌ cꞌajtibeyob: ¿Majchiqui ti yʌqꞌuetla ti laꞌ wenta chaꞌan mi laꞌ chaꞌlen cheꞌ bajcheꞌ chʌncol laꞌ niqꞌui chaꞌlen? ¿Baqui ti laꞌ tyaja i pꞌʌtyʌlel lajmisaya? Cheꞌ tiꞌ cꞌajtibeyob.

8 Jini Chꞌujul bʌ i Chꞌujlel Dios am bʌ tiꞌ pusicꞌal Pedro ti yʌqꞌue i jaqꞌueꞌ. Ti yʌlʌ: Jatyetla, yumʌlet bʌ la, jatyetla, xñoxet bʌ la am bʌ laꞌ weꞌtyel wʌꞌ ti lac lumal.

9 Chʌncol laꞌ cꞌajtibeñon lojon bajcheꞌ ti ujti, bajcheꞌ ti lajmisʌnti ili mach bʌ mejl i nijcan i yoc.

10 Mux c subeñetla cheꞌ jini, chaꞌan miꞌ luꞌ ñaꞌtyan pejtyel israelob. Ili winiqui wʌꞌ baꞌan wʌꞌi ti lajmisʌnti chaꞌan ti caj ti lojon j cꞌʌñʌ i pꞌʌtyʌlel Jesucristo chꞌoyol bʌ ti Nazaret. Jiñʌch jini tsaꞌ bʌ laꞌ tsʌnsʌ ti cruz, tsaꞌ bʌ i tyeche loqꞌuel Dios baꞌan sajtyemoꞌ bʌ.

11 Jiñʌch jini Jesús tsaꞌ bʌ i tyaja ti tꞌan tsꞌijbubil bʌ i tꞌan Dios baꞌ mi yʌleꞌ: Jiñʌch jini wen bʌ tyun yubil tsaꞌ bʌ laꞌ waꞌchoco xmel tyun bʌ otyotyetla. Pero jini tyun ti ochi bajcheꞌ oy ti xujcꞌ otyot.

12 Machꞌan yambʌ baꞌ chꞌujbi lac tyaj laj cotyʌntyel. Dios maꞌ ti yʌcꞌonla yambʌ ti pejtyelel mulawil baꞌ mi lac tyajeꞌ laj cotyʌntyel. Cojach ti Jesús. Cheꞌ ti yʌlʌ.

13 Jini am bʌ yeꞌtyel ti yilʌyob wen chꞌejl tiꞌ chaꞌleyob tꞌan Pedro yicꞌot Juan. Tyoj bʌcꞌñʌjel ti yubiyob como yujilob isujm machꞌan ti cabʌl ochiyob ti qꞌuel jun mi añobic yeꞌtyel. Tiꞌ ñaꞌtyʌyob cheꞌ i piꞌʌlobʌch ti xʌmbal Jesús cheꞌ ñac wʌꞌ tyo an ti mulawil Jesús.

14 Machꞌan chʌ bʌ chꞌujbi i yʌlob tiꞌ contra Pedro yicꞌot Juan como yaꞌ waꞌal yicꞌotyob jini tsaꞌ bʌ cꞌoqꞌuisʌnti.

15 Tiꞌ xiqꞌuiyob loqꞌuel baꞌañob. Ti queji i bajñel pejcañob i bʌ jini añoꞌ bʌ yeꞌtyel.

16 Ti yʌlʌyob: ¿Chuquiyes mi quejel lac tyumben ili winicob? Tisquilʌch tsaꞌix i pʌsʌyob ñuc bʌ i pꞌʌtyʌlel. Luꞌ yujilob isujm ili wʌꞌ bʌ chumulob ti Jerusalén. Mach chꞌujbi la cʌl mi lot.

17 Pero chaꞌan mach chʌc pꞌojlic ili tꞌan baꞌan quixtyañujob, laꞌ lac wen ticꞌob chaꞌan maꞌ miꞌ chʌc subeñob tꞌan chaꞌan jini Jesús. Cheꞌ ti yʌlʌyob añoꞌ bʌ i yeꞌtyel.

18 Cheꞌ jini tiꞌ chaꞌ pʌyʌyob tyʌlel Pedro yicꞌot Juan. Tiꞌ wen tiqꞌuiyob chaꞌan maꞌan miꞌ chʌc chaꞌlen subtꞌan mi cʌntisa chaꞌan jini Jesús.

19 Pero Pedro yicꞌot Juan tiꞌ jacꞌbeyob: ¿Bajcheꞌqui yom mi lojon c chaꞌlen mi laꞌ wʌl? ¿Yom ba mi lojon cacꞌben i tꞌan Dios o mi lojon cacꞌbeñet laꞌ tꞌan jatyetla?

20 Mach chꞌujbi lojon cʌy c sub jini tsaꞌ bʌ lojon quilʌ, tsaꞌ bʌ lojon cubi. Cheꞌ tiꞌ jacꞌʌyob Pedro yicꞌot Juan.

21 Jini ñuc bʌ curajob i chaꞌan israelob yicꞌot xñoxob am bʌ yeꞌtyel tiꞌ tiqꞌuiyob. Tiꞌ coloyob. Maꞌan chʌ bʌ ti tyumbeyob chaꞌan chʌncox i bʌcꞌñañob quixtyañujob como jiñob chʌncox i qꞌuelob ti ñuc Pedro yicꞌot Juan. Ti pejtyelel quixtyañu chʌncox i subob i ñuclel Dios chaꞌan jini tsaꞌ bʌ ujti.

22 Jini winic tsaꞌ bʌ lajmisʌnti ñumenix ti cuarenta i jabilel.

23 Cheꞌ ñac ti cojliyob Pedro yicꞌot Juan ti sujtiyob majlel yaꞌ baꞌan ochemoꞌ bʌ tiꞌ tꞌan Dios. Tiꞌ subeyob pejtyel tsaꞌ bʌ subentiyob ti ñuc bʌ curajob yicꞌot jini yañoꞌ bʌ añoꞌ bʌ yeꞌtyel.

24 Cheꞌ ñac jini ochemoꞌ bʌ tiꞌ tꞌan Dios ti yubiyob pejtyel bajcheꞌ ti ujti, ti jumpꞌejlob jach i pusicꞌal tiꞌ chaꞌleyob oración. Ti yʌlʌyob: C Yum, jatyet Dioset. Ti a mele chan yicꞌot mulawil. Ti a mele colem jaꞌ tyac yicꞌot pejtyel yan tyac bʌ.

25 C Yum, jatyet ti Chꞌujul bʌ a Chꞌujlel ti a chaꞌle tꞌan tiꞌ tiꞌ David jini ajtroñel a chaꞌan, jini lojon c yum ti ñoj oniyix. Ti yʌlʌ:

27 Ti oración ti bej alʌyob: Ñoj melelʌch wʌꞌ ti ili bʌ lum tiꞌ muchꞌquiyob i bʌ Herodes yicꞌot Poncio Pilato yicꞌot israeloꞌ bʌ yicꞌot jini mach bʌ israelob. Tiꞌ luꞌ muchꞌquiyob i bʌ tiꞌ contra Jesús jini chꞌujul bʌ a walobil, jiñʌch jini tsaꞌ bʌ a yajcʌ chaꞌan lojon cajcotyayaj.

28 Cheꞌ jini chʌꞌʌch ti luꞌ tsꞌʌctiyi pejtyel tsaꞌ bʌ a wʌ alʌ mi quej i wersa ujtyel.

29 Wale, C Yum, qꞌuele bajcheꞌ chʌncox i jopꞌ i bʌcꞌtisañon lojon. Pero ajtroñelon lojon a chaꞌan, c Yum. Cotyañon lojon chaꞌan wen chꞌejl mi lojon c sub a wen tꞌan.

30 Pʌsʌ a pꞌʌtyʌlel chaꞌan lajmicob xcꞌamꞌañob. Pʌsʌ ñuc tyac bʌ a pꞌʌtyʌlel chaꞌan tiꞌ pꞌʌtyʌlel Jesús jini chꞌujul bʌ a walobil. Chʌꞌʌch tiꞌ chaꞌleyob oración jini ochemoꞌ bʌ tiꞌ tꞌan Dios.

31 Cheꞌ ñac ti ujtiyob ti oración tiꞌ nijcʌ Dios jini otyot baꞌ muchꞌquibilob. Ti bujtꞌiyob i pusicꞌal jujuntiquil ti Chꞌujul bʌ i Chꞌujlel Dios. Chꞌejl tiꞌ bej subuyob i tꞌan Dios. Maꞌ sajlicob i bʌqꞌuen.

32 Jumpꞌej jach i pusicꞌal, jumpꞌej jach i pensal pejtyel jini ochemoꞌ bʌ tiꞌ tꞌan Dios. Maꞌan majch ti yʌlʌ mi i bajñel i chaꞌan chʌ bʌ an i chaꞌan. Tyem i chaꞌañobʌch ti pejtyelelob.

33 Dios ti bej yʌqꞌueyob cabʌl i pꞌʌtyʌlel ti subtꞌan jini yajcʌbiloꞌ bʌ ajsubtꞌañob ñumel. Tiꞌ chʌc subuyob chaꞌan ti tyejchi loqꞌuel Jesús baꞌan sajtyemoꞌ bʌ. Ti pejtyelel tsaꞌ bʌ i chꞌujbiyob tiꞌ pusicꞌal i tꞌan Dios ti aqꞌuentiyob i yutslel i pusicꞌal Dios.

34-35 Maꞌan majch machꞌʌ baꞌan chʌ bʌ an i chaꞌan, como jini am bʌ i lum, am bʌ yotyot tiꞌ choñoyob. Tiꞌ chꞌʌmʌ tyʌlel i tyojol. Ti yʌqꞌue yajcʌbiloꞌ bʌ ajsubtꞌañob ñumel. Tiꞌ tꞌoxbeyob chaꞌan jasʌl chʌ bʌ an i chaꞌan jini ochemoꞌ bʌ tiꞌ tꞌan Dios.

36 Yaꞌan yicꞌotyob juntiquil winic chꞌoyol bʌ ti jumpꞌej saj lum joyol bʌ ti jaꞌ Chipre bʌ i cꞌabaꞌ. José i cꞌabaꞌ jini winic. I jiñʌjlel Levita jini José. Jini yajcʌbiloꞌ bʌ ajsubtꞌañob ñumel miꞌ pejcan José ti Bernabé. I sujmlel i cꞌabaꞌ ti lac tꞌan mi yʌl jini muꞌ bʌ i chaꞌ tijicnisʌbeñonla lac pusicꞌal.

37 Jini José tiꞌ choño i lum. Tiꞌ chꞌʌmbeyob tyʌlel i tyojol. Ti yʌqꞌue tiꞌ wenta yajcʌbiloꞌ bʌ ajsubtꞌañob ñumel.