2 Cheꞌ jini Ananías tiꞌ tꞌox lotyo lamital jini i tyojol i lum. Tiꞌ chꞌʌmʌ majlel lamital. Ti yʌqꞌue yajcʌbiloꞌ bʌ ajsubtꞌañob ñumel cheꞌ bajcheꞌ ti pejtyelel tiꞌ lolon mele. I yijñam yujilix isujm bacheꞌ tiꞌ chaꞌle i ñoxiꞌal.

3 Cheꞌ jini, Pedro ti yʌlʌ: Ananías, ¿bajcheꞌqui isujm ti ochi Satanás ti a pusicꞌal chaꞌan maꞌ jopꞌ a lotin Chꞌujul bʌ i Chꞌujlel Dios? ¿Chucoch ti a tꞌox mucu i tyojol a lum?

4 ¿Mach ba a chaꞌanic cheꞌ yaꞌ tyo an a lumi? Cheꞌ jeꞌel cheꞌ tsaꞌix a choño, ¿mach ba a chaꞌañʌch i tyojol? ¿Chucoch ti a lolon chaꞌle lot cheꞌ bajcheꞌ jini? Mach winicob tsaꞌ bʌ a loti. Jiñʌch Dios ti a loti, cheꞌ Pedro.

5 Cheꞌ ñac ti yubi ili tꞌan, Ananías ti yajli ti lum. Ti waꞌ sajti. Pejtyel jini tsaꞌ bʌ yubiyob bajcheꞌ ti ujti ti wen quejiyob ti bʌqꞌuen.

6 Cheꞌ jini ti tyʌliyob chaꞌtiquil uxtiquil aloꞌ bʌ winicob. Tiꞌ bʌcꞌʌyob ti pisil. Tiꞌ qꞌuecheyob majlel chaꞌan miꞌ chꞌujñañob.

7 Ti ñumi cheꞌ bajcheꞌ uxpꞌej ora. Ti ochi yijñam Ananías. Max tyo ti yubi bajcheꞌ ti ujti.

8 Pedro tiꞌ cꞌajtibe: ¿Subeñon mi melelʌch ti laꞌ choño laꞌ lum, mi chʌꞌʌch i tyojol bajcheꞌ ti laꞌ wʌlʌ? cheꞌen. Jini xꞌixic tiꞌ jacꞌʌ: Chʌꞌʌchi, cheꞌen.

9 Cheꞌ jini, Pedro tiꞌ chaꞌ sube: ¿Chucoch ti laꞌ laja laꞌ tꞌan chaꞌan mi laꞌ jopꞌ laꞌ lotin Chꞌujul bʌ i Chꞌujlel lac Yum? Qꞌuele awilan, yaꞌ añob ti pañimil tsajni bʌ i chꞌujñañob a ñoxiꞌal. Wale mi quej i pʌyetyob majlel jeꞌel, cheꞌen.

10 Cheꞌ jini ti waꞌ sajti. Ti yajli ti yebal yoc Pedro. Cheꞌ ñac ti ochiyob jini aloꞌ bʌ winicob sajtyemix tiꞌ tyajayob. Tiꞌ qꞌuecheyob majlel. Tiꞌ chꞌujñʌyob yaꞌ tiꞌ tꞌejl i ñoxiꞌal.

11 Tyoj bʌcꞌñʌjelob ti yubiyob pejtyel ochemoꞌ bʌ tiꞌ tꞌan Dios yicꞌot yañoꞌ bʌ tsaꞌ bʌ yubiyob bajcheꞌ ti ujti.

12 Dios tiꞌ pʌsʌ i pꞌʌtyʌlel baꞌan quixtyañujob tiꞌ cꞌʌbob yajcʌbiloꞌ bʌ ajsubtꞌañob ñumel. Pejtyel ochemoꞌ bʌ tiꞌ tꞌan Dios miꞌ luꞌ muchꞌquiñob i bʌ ti lejchꞌ yotyot Salomón bʌ i cꞌabaꞌ yaꞌ ti tiꞌ jini colem templo.

13 Jini machꞌʌ baꞌan ochemoꞌ bʌ tiꞌ tꞌan Dios tiꞌ qꞌuele ti ñuc jini ochemoꞌ bʌ tiꞌ tꞌan Dios pero ti bʌcꞌñʌ i yochelob.

14 I yonlel winicob xꞌixicob tiꞌ chꞌujbiyob Jesús tiꞌ pusicꞌal.

15 Lamital quixtyañu tiꞌ pʌyʌ majlel cꞌamoꞌ bʌ i piꞌʌlob ti bij baꞌ mi ñumel Pedro. Yaꞌ tiꞌ tyotsꞌ cʌyʌyob ti wʌyib chaꞌan jasʌl jach i yʌxñal Pedro mi tyajtyʌlob chaꞌan lajmicob.

16 Cheꞌ jeꞌel ti cꞌoti cabʌlob yaꞌ bʌ chumulob ti saj lum tyac yaꞌ tiꞌ joytyʌlel Jerusalén. Tiꞌ pʌyʌyob tyʌlel xcꞌamoꞌ bʌ yicꞌot tyʌcꞌlʌbiloꞌ bʌ ti xiba chaꞌan mi lajmel. Ti luꞌ lajmisʌntiyob.

17 Jini ñuc bʌ cura yicꞌot i piꞌʌlob ti troñel saduceojoꞌ bʌ i cꞌabaꞌ ti queji i tsꞌaꞌqꞌuel jini yajcʌbiloꞌ bʌ ajsubtꞌañob ñumel como cabʌl quixtyañujob chʌncol i chꞌujbiben i tꞌan Dios.

18 Tiꞌ chucuyob. Ti yotsʌyob ti cʌchonibʌl.

19 Pero ti acꞌbʌlel jini ajtroñel i chaꞌan Dios chꞌoyol bʌ ti panchan tiꞌ jambeyob i tiꞌ cʌchonibʌl. Tiꞌ pʌyʌyob loqꞌuel.

20 Tiꞌ subeyob: Chaꞌ cucuxla yaꞌ ti templo. Yom mi laꞌ suben pejtyel quixtyañujob jini tꞌan bajcheꞌ mi lac tyaj laj cuxtyʌlel ti Cristo. Cheꞌ ti yʌlʌ jini ajtroñel i chaꞌan Dios chꞌoyol bʌ ti panchan.

21 Tiꞌ chaꞌleyob bajcheꞌ ti subentiyob. Ti sʌcꞌan ti chaꞌ ochiyob ti templo. Ti quejiyob ti cʌntisa. Cheꞌ jini, ti jini mismo bʌ ora jini ñuc bʌ cura yicꞌot i piꞌʌlob ti toñel tiꞌ pʌyʌyob tyʌlel pejtyel am bʌ yeꞌtyel ti Junta Suprema. Jiñʌch jini xñoxob am bʌ yeꞌtyel chaꞌan israelob. Cheꞌ jini tiꞌ choco majlel policíajob yaꞌ ti cʌchonibʌl chaꞌan i pʌy tyʌlel jini yajcʌbiloꞌ bʌ ajsubtꞌañob ñumel.

22 Cheꞌ ñac ti cꞌotiyob ti cʌchonibʌl jocholix tiꞌ tyajayob. Maꞌix yaꞌañob. Ti chaꞌ sujtiyob baꞌ muchꞌquibilob am bʌ yeꞌtyel. Tiꞌ subeyob:

23 Wen ñupꞌul ti lojon c tyaja cʌchonibʌl. Yaꞌ añob ajcʌñʌtya cʌchonibʌl waꞌal ti tiꞌ pero cheꞌ ñac ti lojon camʌ i tiꞌ, maꞌix majch an ti malil, cheꞌob.

24 Cheꞌ ñac ti yubiyob ili tꞌan jini ñuc bʌ cura yicꞌot saduceojob yicꞌot ñuc bʌ policía i chaꞌan bʌ templo ti queji i wen pensaliñob: ¿Bajcheꞌqui mi quej i yujtyel pejtyel jini? cheꞌob.

25 Cheꞌ ñac chʌncolob tyo ti pensal ti cꞌoti juntiquil tsaꞌ bʌ subeyob: Ubinla, yaꞌ añob ti templo jini winicob tsaꞌ bʌ laꞌ wotsʌ ti cʌchol. Chʌncox i cʌntisañob quixtyañujob, cheꞌen.

26 Jini ñuc bʌ policía yicꞌot i winicob ti majli yaꞌ ti templo chaꞌan i pʌyob tyʌlel. Pero machꞌan chʌ bʌ tiꞌ tyumbeyob jini yajcʌbiloꞌ bʌ ajsubtꞌañob ñumel. Xucꞌul jach tiꞌ pʌyʌyob loqꞌuel como jini policíajob tiꞌ bʌcꞌñʌyob jujlel ti tyun ti jini yambʌ quixtyañujob.

27 Cheꞌ ñac ti cꞌoti yicꞌotyob tiꞌ pʌyʌyob ochel yaꞌ baꞌan añoꞌ bʌ yeꞌtyel. Jini ñuc bʌ cura tiꞌ subeyob:

28 Joñon lojon tic wen tiqꞌuiyetla ti tsʌts bʌ tꞌan chaꞌan mach laꞌ chʌc chaꞌlen cʌntisa chaꞌan ili winiqui. Pero ¿bajcheꞌqui ti laꞌ chaꞌle wale? Qꞌuele awilan, chʌncol laꞌ pam pujquel laꞌ cʌntisa ti pejtyel Jerusalén. Laꞌ wom jach laꞌ pajtyañon lojon cheꞌ joñon lojon ti cʌcꞌʌ ti tsʌnsʌntyel jini Jesús. Cheꞌ ti yʌlʌ jini ñuc bʌ cura.

29 Cheꞌ jini Pedro yicꞌot yambʌ yajcʌbiloꞌ bʌ ajsubtꞌañob ñumel tiꞌ jacꞌʌyob: An ti lojon c wenta mi lojon jacꞌben i xicꞌojel Dios aunque mi lojon c ñusʌben i xicꞌojel winicob.

30 Jatyetla ti laꞌ tsʌnsʌ Jesús cheꞌ ñac ti laꞌ jocꞌchoco ti cruz. Pero Dios ti tyeche loqꞌuel baꞌan sajtyemoꞌ bʌ. Jiñʌch jini mismo Dios tsaꞌ bʌ i chꞌujbiyob tiꞌ pusicꞌal lac yumob ti ñoj oniyix jeꞌel.

31 Dios tiꞌ pʌyʌ letsel Jesús yaꞌ tiꞌ ñoj chaꞌan tsiquil añʌch i ñuclel Jesús. Ti otsʌnti ti ñuc bʌ yeꞌtyel yicꞌot ti ajcotyayaj. Añʌch, cheꞌ jini, bajcheꞌ chꞌujbi i pensaliñob i mul chaꞌan i cʌyob i mul israelob yicꞌot chaꞌan mi ñusʌbentyelob i mul.

32 Cujilʌch lojon isujm chuqui chʌncol lojon cʌleꞌ. Chʌꞌʌch mi yʌleꞌ jeꞌel Chꞌujul bʌ i Chꞌujlel Dios tsaꞌ bʌ aqꞌuenti majchical jach miꞌ chꞌujbin Dios. Cheꞌ ti yʌlʌyob jini yajcʌbiloꞌ bʌ ajsubtꞌañob ñumel.

33 Cheꞌ ñac ti yubiyob ili tꞌan jini añoꞌ bʌ yeꞌtyel ti wen michꞌʌyob. Yom i tsʌnsañob jini yajcʌbiloꞌ bʌ ajsubtꞌañob ñumel.

34 Pero yaꞌan juntiquil fariseo, Gamaliel bʌ i cꞌabaꞌ. Jini Gamaliel luꞌ yujil isujm jini oñiyix bʌ i xicꞌojel Dios. Pejtyel quixtyañu tiꞌ qꞌueleyob ti ñuc jini Gamaliel. Jini ti waꞌle. Tiꞌ subeyob chaꞌan miꞌ poj pʌy loqꞌuel jini yajcʌbiloꞌ bʌ ajsubtꞌañob ñumel.

35 Gamaliel tiꞌ subeyob jini añoꞌ bʌ yeꞌtyel: Piꞌʌlob, ñaꞌtyanla chʌ bʌ mi quej laꞌ tyumbeñob ili winicob.

36 Cꞌajal laꞌ chaꞌan max tyo jaliji juntiquil winic Teudas bʌ i cꞌabaꞌ tiꞌ lolon subu i bʌ ti ñuc. Cheꞌ jini ti queji i tsʌcleñob cheꞌ bajcheꞌ cuatrocientos winicob. Pero ti tsʌnsʌnti jini Teudas. Ti luꞌ putsꞌiyob jini winicob. Ti chaꞌ lajmi jini tꞌan.

37 Ti wiꞌil cheꞌ ti yorojlel censo ti tyʌli yambʌ winic loqꞌuem bʌ ti Galilea Judas bʌ i cꞌabaꞌ. Cabʌl winicob tiꞌ tsʌcleyob majlel jini Judas. Pero tiꞌ tsʌnsʌyob jeꞌel. Ti luꞌ putsꞌiyob i winicob.

38 Jin chaꞌan mic subeñetla, laꞌ ajnic ili winicob. Mach laꞌ wotsan laꞌ bʌ. Mi tyʌlem jach ti bajñel i pusicꞌalob ili tꞌan, cheꞌ jach mi quej i lajmel.

39 Pero mi tyʌlem ti Dios mach chꞌujbi laꞌ jisan. Ñaꞌtyanla ame chʌncol laꞌ contrajin Dios. Cheꞌ ti yʌlʌ jini Gamaliel.

40 Jini am bʌ yeꞌtyel tiꞌ chꞌujbibeyob i tꞌan Gamaliel. Tiꞌ chaꞌ pʌyʌyob ochel jini yajcʌbiloꞌ bʌ ajsubtꞌañob ñumel. Tiꞌ jatsꞌʌyob ti chij. Tiꞌ chaꞌ tiqꞌuiyob chaꞌan machꞌan miꞌ chʌc chaꞌleñob tꞌan chaꞌan Jesús. Cheꞌ jini tiꞌ coloyob.

41 Jini yajcʌbiloꞌ bʌ ajsubtꞌañob ñumel ti loqꞌuiyob majlel baꞌan jini am bʌ yeꞌtyel. Cꞌajacñayob i yoj chaꞌan Dios ti yʌqꞌueyob i ñusan wocol chaꞌan ti caj Jesús.

42 Maꞌ tiꞌ cʌyʌyob mi jumpꞌejlic qꞌuin i sub ñumel jini wen bʌ tꞌan chaꞌan Jesús, jiñʌch Cristo yajcʌbil bʌ i chaꞌan Dios. Tiꞌ subuyob ti jini colem templo yaꞌ ti Jerusalén yicꞌot ti otyotyel tyac.