Ti yajcʌyob jini siete diácanojob
6
Ti wen ocꞌʌyob jini ochemoꞌ bʌ tiꞌ tꞌan Dios. Cheꞌ jini lamital jini muꞌ ti tꞌan ti tꞌañob griegojob ti queji i michꞌqꞌuelob jini muꞌ bʌ ti tꞌan ti tꞌañob hebreojob. Jini griegojoꞌ bʌ ti queji i yʌleꞌ chaꞌan jini mebaꞌ ixicob i chaꞌañob mach junlajal chʌncol i yʌqꞌuentyel i bʌlob i ñʌcꞌ ti jujumpꞌej qꞌuin cheꞌ bajcheꞌ hebreojoꞌ bʌ mebaꞌ ixicob.2 Jini doce yajcʌbiloꞌ bʌ ajsubtꞌañob ñumel tiꞌ xiqꞌuiyob chaꞌan i muchꞌquiñob i bʌ pejtyel ochemoꞌ bʌ tiꞌ tꞌan Dios. Tiꞌ subeyob: Mach wen chaꞌan mi lojon c poj cʌy lojon c subtꞌan chaꞌan mi lojon c puc waj, cheꞌob.
3 Jin chaꞌan, piꞌʌlob, yom mi laꞌ yajcan wʌ bʌ loqꞌuem ti lac tyojlel siete winicob muꞌ bʌ lojon cʌqꞌuen tiꞌ wenta ili toñel. Yom mi laꞌ yajcan butꞌuloꞌ bʌ i pusicꞌal ti Chꞌujul bʌ i Chꞌujlel Dios, jini muꞌ bʌ qꞌuejlel ti ñuc ti yañoꞌ bʌ. Yom jeꞌel jini muꞌ bʌ i ñaꞌtyañob bajcheꞌ yom i melob.
4 Joñon lojon mux c bej chaꞌlen lojon oración yicꞌot subtꞌan. Cheꞌ ti yʌlʌyob jini yajcʌbiloꞌ bʌ ajsubtꞌañob ñumel.
5 Weñʌch ti yubiyob ti pejtyelelob. Tiꞌ yajcʌyob Esteban tsaꞌ bʌ i chꞌujbi Jesús ti pejtyel i pusicꞌal. Butꞌul i pusicꞌal Esteban ti Chꞌujul bʌ i Chꞌujlel Dios. Ti yajcʌyob jeꞌel Felipe, Prócoro, Nicanor, Timón, Parmenas yicꞌot Nicolás. Ti wajali mach bʌ israelic jini Nicolás, pero ti wiꞌil tiꞌ sutqui i bʌ ti israel bʌ quixtyañu. Ti wiꞌil, ti yubi i tꞌan Dios. Tiꞌ chꞌujbi Jesús tiꞌ pusicꞌal. Ti ochi tiꞌ tꞌan Dios. Jini Nicolás chꞌoyol ti lum Antioquía bʌ i cꞌabaꞌ.
6 Cheꞌ ñac pejtyel ochemoꞌ bʌ tiꞌ tꞌan Dios ti ujti i yajcañob jini sietejob, tiꞌ pʌyʌyob tyʌlel baꞌan yajcʌbiloꞌ bʌ ajsubtꞌañob ñumel. Jini docejob ti yʌqꞌueyob i cꞌʌb tiꞌ pam i jolob. Tiꞌ chaꞌleyob oración.
7 Ti wen pujqui i tꞌan Dios. Ti wen ocꞌʌyob ochemoꞌ bʌ tiꞌ tꞌan Dios yaꞌ ti Jerusalén. Jinic tyo i yonlel curajob ti ochiyob tiꞌ tꞌan Dios jeꞌel.
Tiꞌ chucuyob Esteban
8 Dios tiꞌ wen yʌqꞌue i yutslel i pusicꞌal jini Esteban. Jiñʌch juntiquil tsaꞌ bʌ aqꞌuentiyob tiꞌ wenta i pucob waj. Dios tiꞌ wen yʌqꞌue i pꞌʌtyʌlel chaꞌan miꞌ pʌs ñuc bʌ i pꞌʌtyʌlel tiꞌ tyojlel quixtyañujob.
9 Cheꞌ jini, winicob muꞌ bʌ i yajñelob tiꞌ templo israelob Esclavos Libertados bʌ i cꞌabaꞌ ti wen queji i cʌlʌx pejcañob i bʌ yicꞌot Esteban. Tiꞌ lajayob i tꞌan yicꞌot winicob chꞌoyoloꞌ bʌ ti Cirene, ti Alejandría, ti Cilicia yicꞌot yaꞌ ti colem pañimil Asia bʌ i cꞌabaꞌ.
10 Mach chꞌujbi i ganariñob ti tꞌan jini yañoꞌ bʌ como Chꞌujul bʌ i Chꞌujlel Dios ti yʌqꞌue Esteban bajcheꞌ miꞌ jaqꞌueꞌ tꞌan.
11 Jini yañoꞌ bʌ ti yʌqꞌueyob tyaqꞌuin winicob muꞌ bʌ i chaꞌleñob lot, muꞌ bʌ i lolon yʌleꞌ ti yubiyob cheꞌ ñac Esteban tiꞌ chaꞌle bibajax bʌ tꞌan tiꞌ contra Moisés jini lac yum ti ñoj oniyix yicꞌot tiꞌ contra Dios.
12 Cheꞌ bajcheꞌ jini, tiꞌ nijcʌyob tiꞌ contra Esteban jini quixtyañujob yicꞌot xñoxob am bʌ yeꞌtyel, yicꞌot ajcʌntisajob muꞌ bʌ i chaꞌlen cʌntisa bajcheꞌ miꞌ chꞌujbiñob israelob. Cheꞌ jini tiꞌ chucuyob Esteban. Tiꞌ pʌyʌyob ochel baꞌan ñucoꞌ bʌ yeꞌtyel ti Junta Suprema bʌ i cꞌabaꞌ.
13 Cheꞌ jini tiꞌ sʌclʌyob yambʌ winicob muꞌ bʌ i chaꞌleñob lot, muꞌ bʌ i lolon jopꞌbeñob i mul jeꞌel. Ti yʌlʌyob: Ili winiqui chonox i chʌc wajlen jini templo yicꞌot i mandar Dios.
14 Tsaꞌix lojon cubi ti yʌlʌ Esteban chaꞌan Jesús chꞌoyol bʌ ti Nazaret mi quej i jisan ili templo yicꞌot mi quejel i qꞌuex pejtyel tsaꞌ bʌ i xiqꞌuiyonla lac meleꞌ Moisés. Cheꞌ tiꞌ lolon chaꞌleyob jopꞌtꞌan.
15 Cheꞌ jini, jini añoꞌ bʌ i yeꞌtyel yicꞌot pejtyel yaꞌ bʌ buchulob lajal ti yilʌyob i ñiꞌ i wut Esteban cheꞌ bajcheꞌ juntiquil ajtroñel i chaꞌan Dios chꞌoyol bʌ ti panchan.