2 Esteban tiꞌ jacꞌʌ: Piꞌʌlob, cʌscuñalob. Ñʌchꞌtyanla. Jini Dios am bʌ i ñuclel tiꞌ pʌsʌ i bʌ baꞌan lac yum Abraham ti ñoj oniyix cheꞌ ñac yaꞌ tyo an Abraham ti Mesopotamia bʌ i cꞌaba bʌ pañimil, cheꞌ ñac max tyo maj ti chumtyʌl yaꞌ ti Harán.

3 Dios tiꞌ sube Abraham: Cʌyʌx a lumal yicꞌot a piꞌʌlob. Cucux yaꞌ ti yambʌ pañimil baꞌ mic pʌsꞌeñet, cheꞌ ti subenti Abraham ti Dios.

4 Cheꞌ jini, ti loqꞌui majlel Abraham baꞌan caldeojob. Ti majli ti chumtyʌl yaꞌ ti Harán. Ti wiꞌil cheꞌ ñac ti sajti i tyat Abraham, Dios tiꞌ pʌyʌ tyʌlel wʌꞌwʌꞌi ti ili lum baꞌ chumulonla wale iliyi.

5 Pero Dios machꞌan ti yʌqꞌue i lum Abraham wʌꞌi, mi i sajlic. Pero Dios ti yʌcꞌʌ i tꞌan chaꞌan mi quejel i yʌqꞌuentyel lum. Ti yʌlʌ cheꞌ sajtyemix Abraham jini i yalobilob mi quej i yʌqꞌuentyel jini lum wʌꞌwʌꞌi. Chʌꞌʌch ti subenti Abraham aunque max tyo baꞌan i yalobil cheꞌ ñac ti subenti.

6 Cheꞌ jeꞌel Dios tiꞌ sube Abraham chaꞌan i jiñʌjlelob mi quej i chumtyʌlob ti yambʌ pañimil mach bʌ i lumalobic. Mi quej i yotsʌntyelob ti mosojintyel baꞌ mi quej i chʌc ñusan wocol cꞌʌlʌl cuatrocientos jab.

7 Pero Dios tiꞌ sube jeꞌel jini Abraham: Pero joñon mi quej cʌqꞌueñob i xotꞌ i mul jini muꞌ bʌ i yotsañob ti mosojintyel a jiñʌjlelob. Ti wiꞌil mi quej i loqꞌuelob tyʌlel. Wʌꞌi mi quej i chꞌujutisañoñob. Cheꞌ ti yʌlʌ Dios cheꞌ ñac tiꞌ pejcʌ Abraham.

8 Cheꞌ jini Dios tiꞌ mele trato yicꞌot Abraham. Ti xijqꞌui Abraham i tsepben i pʌchʌlel aloꞌ bʌ i jiñʌjlel chaꞌan tsiquil ti yotsʌyob i bʌ ti trato. Jin chaꞌan cheꞌ ñac ti chꞌocʌ i yalobil Abraham, Isaac bʌ i cꞌabaꞌ, Abraham tiꞌ tsepbe i pʌchʌlel cheꞌ an jax tyo i chaꞌan ocho qꞌuin. Cheꞌ ñac winiquix Isaac chʌꞌʌch tiꞌ tsepbe i pʌchʌlel jeꞌel i yalobil Jacob bʌ i cꞌabaꞌ. Chʌꞌʌch jeꞌel cheꞌ winiquix Jacob tiꞌ tsepbe i pʌchʌlel i yalobilob. An doce aloꞌ bʌ i yalobilob jini Jacob. Jiñʌch i tyat jini doce mujchꞌ winicob i jiñʌjlelob Israel.

9 Lac yumob ti ñoj oniyix jiñʌch i yalobilob Jacob. Jiñobʌch tsaꞌ bʌ i lolon queji i tsꞌaꞌqꞌuelob José bʌ i cꞌabaꞌ bʌ i yijtsꞌin. Tiꞌ choñoyob winicob tsaꞌ bʌ i pʌyʌyob majlel ti yambʌ pañimil Egipto bʌ i cꞌabaꞌ. Pero Dios machꞌan tiꞌ cʌyʌ José.

10 Dios tiꞌ wen cotyʌ José cheꞌ ñac tiꞌ ñusʌ wocol. Tiꞌ locꞌsʌ ti wocol. Dios ti yʌqꞌue i ñaꞌtyʌbal. Jini ñuc bʌ yumʌl ti Egipto, Faraón bʌ i cꞌabaꞌ, ti queji i qꞌuel ti ñuc José. Ti yotsʌ ti ñuc bʌ yeꞌtyel chaꞌan pejtyel Egipto yicꞌot chaꞌan pejtyel i yotyot Faraón.

11 Cheꞌ jini yaꞌ ti pañimil tyac Egipto yicꞌot Canaán bʌ i cꞌabaꞌ pejtyelob ti queji i wen ñusañob wiꞌñal. Ti queji i wen ñusañob wocol lac yumob ti ñoj oniyix. Machꞌañobix i bʌl i ñʌcꞌ.

12 Cheꞌ jini ti yubi Jacob cheꞌ an tyo lotyol bʌ i chaꞌañob i bʌl i ñʌcꞌ yaꞌ ti Egipto. Jin chaꞌan tiꞌ choco majlel i yalobilob chaꞌan i qꞌueleꞌ. Jiñʌch cheꞌ ñac cojax tyo bʌ ti majliyob. Jini i yalobilob Jacob jiñʌch lac yumob ti ñoj oniyix.

13 Ti chaꞌyajlelel ti majliyob i yʌscuñob, José ti yʌcꞌʌ i bʌ ti cʌjñel tiꞌ tyojlelob. Jini ñuc bʌ yumʌl yaꞌ ti Egipto ti queji i ñaꞌtyan majchqui jini i piꞌʌlob José.

14 Cheꞌ jini José tiꞌ xiqꞌui i yʌscuñob chaꞌan i pʌyob tyʌlel i tyat yicꞌot pejtyelelob yambʌ i piꞌʌlob. An setenta y cinco cheꞌ ti pejtyelelob.

15 Jiñʌch bajcheꞌ ti ujti chaꞌan yaꞌ ti majli ti chumtyʌl ti Egipto jini Jacob. Cheꞌ ñumenix cabʌl jabil yaꞌi ti sajti Jacob. Ti wiꞌil ti sajtiyob i yalobilob jeꞌel. Jiñʌch lac yumob jeꞌel ti ñoj oniyix.

16 Cheꞌ ñac ti ñumi cabʌl jabil ti cꞌaxtisʌbentiyob i bʌquel yaꞌ ti lum Siquem bʌ i cꞌabaꞌ. Yaꞌ tiꞌ chꞌujniyob ti muconibʌl piquil bʌ ti mal tyun tsaꞌ bʌ i wʌ mʌñʌ Abraham baꞌan i yalobil juntiquil winic yaꞌ ti Siquem, Hamor bʌ i cꞌabaꞌ.

17 Bej mucꞌ ti tꞌan Esteban. Ti yʌlʌ: Yaꞌ ti Egipto ti bej ocꞌʌyob lac yumob ti ñoj oniyix. Wen pꞌojlemix jini lac yumob ti ñoj oniyix cheꞌ ñac ti cꞌoti i yorojlel Dios mi quej i tsꞌʌctisan i tꞌan tsaꞌ bʌ i wʌ sube Abraham ti ñoj oniyix.

18 Cheꞌ jini ti ochi ti yeꞌtyel yambʌ ñuc bʌ yumʌl. Maꞌ tiꞌ cʌñʌ José jini ñuc bʌ yumʌl como yoque wajalix ti sajti José cheꞌ ñac tiꞌ chꞌʌmʌ yeꞌtyel jini tsijiꞌ bʌ yumʌl.

19 Jini ñuc bʌ yumʌl tiꞌ wen loti lac yumob ti ñoj oniyix. Cabʌl tiꞌ tyʌcꞌlʌyob. Ti yʌqꞌueyob i wersa cʌyob aloꞌ bʌ i yalobilob ujtyel bʌ i chꞌoc an chaꞌan mi sajtyelob.

20 Ti chꞌocʌ jini Moisés cheꞌ ñac chʌncol tyo i ñusañob cabʌl i tyʌcꞌlentyel lac yumob ti ñoj oniyix. Cꞌʌlʌl uxpꞌej uw i tyat i ñaꞌ tiꞌ cʌñʌtyʌyob Moisés yaꞌ ti yotyot. Dios tiꞌ qꞌuele ti wen jini chꞌoc alʌl Moisés.

21 Cheꞌ ñac ti cꞌoti i yorojlel cheꞌ mach chꞌujbi i chʌc mucu cʌñʌtyan, tiꞌ wersa cʌyʌyob ti sajtyel jini Moisés. Pero jini xcꞌalʌl bʌ i yalobil ñuc bʌ yumʌl yaꞌ ti Egipto tiꞌ tyaja Moisés cheꞌ ñac alʌ tyo. Tiꞌ lotyo. Tiꞌ cosʌ. Tiꞌ pʌyʌ chaꞌan i yalobilʌch.

22 Jin chaꞌan ti cʌntisʌnti Moisés ti pejtyel i ñaꞌtyʌbal egiptojob. An i wersajlel i tꞌan yicꞌot i chaꞌlibal.

23 Tiꞌ bej chaꞌle tꞌan Esteban. Ti yʌlʌ: Cheꞌ ñac tiꞌ tyaja cuarenta i jabilel, Moisés tiꞌ pensali tiꞌ pusicꞌal yom majlel i julaꞌan i piꞌʌlob, jiñʌch israeloꞌ bʌ i cꞌabaꞌ.

24 Cheꞌ ñac yaꞌani ti yilʌ juntiquil egipto chʌncox i tyʌcꞌlan israel bʌ winic. Moisés ti yotsʌ i bʌ yicꞌot jini israel bʌ chaꞌan miꞌ cotyan i piꞌʌl. Tiꞌ tsʌnsʌ jini egipto bʌ.

25 Moisés tiꞌ lolon ñaꞌtyʌ tiꞌ pusicꞌal mux i chꞌʌmꞌeñob isujm i piꞌʌlob. Mux i ñaꞌtyañob chaꞌan Dios tiꞌ choco majlel Moisés chaꞌan miꞌ cotyan, chaꞌan miꞌ locꞌsan tiꞌ cꞌʌb i contrajob. Chʌꞌʌch tiꞌ lolon ñaꞌtyʌ Moisés. Pero machꞌan tiꞌ chꞌʌmbeyob isujm jini i piꞌʌlob.

26 Ti yijcꞌʌlel Moisés tiꞌ tyaja chaꞌtiquil israelob chʌncoloꞌ bʌ ti periyal. Yom i lʌmben i michꞌlel. Tiꞌ tiqꞌuiyob. Ti yʌlʌ: Jatyetla yoque laꞌ piꞌʌlob laꞌ bʌ, ¿chucoch chʌncol laꞌ tsꞌaꞌqꞌuel laꞌ bʌ? cheꞌen.

27 Jini chʌncol bʌ i michꞌqꞌuel i piꞌʌl tiꞌ xit choco Moisés. Ti yʌlʌ: ¿Majchqui ti yʌqꞌuet ti a wenta chaꞌan maꞌ wotsan a bʌ ti yumʌl yicꞌot ti melojel chaꞌañon lojon?

28 ¿A wom ba a tsʌnsañon jeꞌel cheꞌ bajcheꞌ ti a tsʌnsʌ jini egipcio acꞌbi? Cheꞌ tiꞌ cꞌajtibe jini juntiquil.

29 Cheꞌ ñac ti yubi ili tꞌan, Moisés ti putsꞌi majlel ti yambʌ pañimil Madián bʌ i cꞌabaꞌ. Yaꞌ ti chumle cheꞌ bajcheꞌ ñumel jach mucꞌ. Yaꞌi ti chꞌocʌ chaꞌtiquil aloꞌ bʌ yalobilob.

30 Ti ñumi cuarenta jab. Cheꞌ jini, jumpꞌej qꞌuin yaꞌ ti tyʌquin bʌ joch lum lʌcꞌʌl ti wits Sinaí bʌ i cꞌabaꞌ Moisés tiꞌ qꞌuele muꞌ ti lejmel juntyejc pimel. Yaꞌ ti cꞌʌcꞌal pimel ti tsictiyi juntiquil ajtroñel i chaꞌan Dios chꞌoyol bʌ ti panchan.

31 Tyoj bʌcꞌñʌjel Moisés cheꞌ ti yilʌ jini ajtroñel i chaꞌan Dios. Cheꞌ ñac tiꞌ lʌcꞌʌ chaꞌan mi más qꞌueleꞌ ti yubibe i tꞌan lac Yum ti yʌlʌ:

32 Joñon i Dioson Abraham, Isaac yicꞌot Jacob, a yumob ti ñoj oniyix. Cheꞌ ti yʌlʌ jini ajtꞌan. Tsitsiña ti queji ti bʌqꞌuen Moisés. Mach yom i chaꞌ qꞌuel jini pimel ti caj i bʌqꞌuen.

33 Jini lac Yum tiꞌ sube. Jocho a zapatos chaꞌan tsiquil chʌncol a qꞌuelon ti ñuc como wʌꞌ mic pejcañet.

34 Tsaꞌix j quilʌ bajcheꞌ chʌncol i ñusañob wocol jini quixtyañujob c chaꞌan yaꞌ ti Egipto. Tsaꞌix cubibeyob i yuqꞌuel. Tsaꞌix jubiyon tyʌlel chaꞌan c locꞌsañob ti tyʌcꞌlʌntyel chʌncol bʌ i ñusañob baꞌan egipciojob. Cucux cheꞌ jini. Mi quej c choquet majlel yaꞌ ti Egipto. Cheꞌ ti subenti Moisés ti Dios.

35 Dios ti yajcʌ Moisés chaꞌan i cotyan i piꞌʌlob. Ti pejcʌnti ti ajtroñel i chaꞌan Dios chꞌoyol bʌ ti panchan cheꞌ ñac ti yilʌ pimel chʌncol bʌ ti lejmel. Cheꞌ jini Dios tiꞌ choco tyʌlel Moisés chaꞌan mi yochel ti ñuc bʌ yeꞌtyel tiꞌ tyojlelob i piꞌʌlob chaꞌan i locꞌsañob ti wocol lac yumob ti ñoj oniyix. Chʌꞌʌch tiꞌ mele Dios aunque machꞌan ti qꞌuejli ti ñuc Moisés cheꞌ ñac ti subenti: Majchqui ti yʌqꞌuet ti a wenta chaꞌan maꞌ wotsan a bʌ ti yumʌl yicꞌot ti melojel chaꞌañon lojon?

36 Jiñʌch jini Moisés tsaꞌ bʌ i pʌyʌyob loqꞌuel ti Egipto lac yumob ti ñoj oniyix. Yaꞌi tiꞌ pʌsʌ ñuc tyac bʌ i pꞌʌtyʌlel tyʌlem bʌ ti Dios. Tiꞌ pʌsʌ ñuc tyac bʌ i pꞌʌtyʌlel jeꞌel yaꞌ ti colem jaꞌ Chʌchʌc Jaꞌ bʌ i cꞌabaꞌ yicꞌot jeꞌel yaꞌ ti tyʌquin bʌ joch lum. Chʌꞌʌch tiꞌ chaꞌle cꞌʌlʌl cuarenta jab.

37 Jiñʌch jini Moisés tsaꞌ bʌ yʌlʌ: Dios mi quej i yajcan juntiquil israel bʌ winic cheꞌ bajcheꞌetla muꞌ bʌ i yotsan ti juntiquil muꞌ bʌ i xiqꞌueꞌ yʌleꞌ Dios. Cheꞌ bajcheꞌ ti yajcʌyon Dios mi quej i yajcan jini yambʌ. Yom mi laꞌ chꞌujbin i tꞌan. Chʌꞌʌch tiꞌ subeyob jini israeloꞌ bʌ jini Moisés.

38 Jiñʌch jini Moisés tsaꞌ bʌ ajni yicꞌot lac yumob ti ñoj oniyix cheꞌ yaꞌañob ti tyʌquin bʌ joch lum. Jiñʌch jini Moisés jeꞌel tsaꞌ bʌ pejcʌnti ti juntiquil ajtroñel i chaꞌan Dios chꞌoyol bʌ ti panchan yaꞌ ti jini wits Sinaí bʌ i cꞌabaꞌ cheꞌ yaꞌ muchꞌquibilob lac yumob ti ñoj oniyix. Ti aqꞌuenti Moisés jini mandar tyac chaꞌan laj cuxtyʌlel. Jiñʌch jini muꞌ bʌ laj cubin cꞌʌlʌl wale iliyi.

39 Pero jini lac yumob ti ñoj oniyix mach yom i jacꞌbeñob i tꞌan Moisés. Cheꞌ jach tiꞌ tsꞌaꞌleyob. Yomob chaꞌ sujtyel ti Egipto.

40 Cheꞌ ñac maꞌan poj yaꞌan Moisés pejtyel quixtyañujob tiꞌ xiqꞌuiyob juntiquil cura i chaꞌañob, Aarón bʌ i cꞌabaꞌ. Ti yʌlʌyob: Com maꞌ melbeñon lojon dios tyac muꞌ bʌ lojon qꞌuech majlel ti lac wut como mach cujila chuqui ti tyumbenti jini Moisés tsaꞌ bʌ i pʌyʌyonla loqꞌuel ti Egipto. Cheꞌ ti yʌlʌyob.

41 Jin chaꞌan Aarón tiꞌ mele i locꞌom saj wacax. Tiꞌ tsʌnsʌyob alʌqꞌuil chaꞌan pulem bʌ i majtyan jini i dios. Cꞌajacñayob i yoj chaꞌan jini dios tsaꞌ bʌ mejli ti cꞌʌbʌl.

42 Cheꞌ jini Dios ti loqꞌui majlel tiꞌ tyojlelob. Tiꞌ cʌyʌyob chaꞌan i chꞌujutisañob ecꞌ tyac am bʌ ti chan. Tiꞌ meleyob cheꞌ bajcheꞌ ti tsꞌijbunti ti jini tsaꞌ bʌ i xiqꞌui yʌleꞌ Dios ti ñoj oniyix. Jini tiꞌ tsꞌijbu:

44 Bej muꞌ ti tꞌan jini Esteban: Ti yʌlʌ: Cheꞌ ñac mucꞌob tyo ti xʌmbal yaꞌ ti tyʌquin bʌ joch lum lac yumob ti ñoj oniyix, an i chaꞌañob carpa bʌ otyot baꞌ miꞌ chꞌujutisañob Dios. Tiꞌ meleyob carpa bʌ otyot cheꞌ bajcheꞌ tiꞌ xiqꞌui Dios, cheꞌ bajcheꞌ ti pʌsꞌenti Moisés ti Dios.

45 Cheꞌ ñac ti sajti Moisés ti waꞌchoconti Josué tiꞌ qꞌuexol. Jini tiꞌ pʌyʌyob ochel lac yumob ti ñoj oniyix ti tsijiꞌ bʌ lum tsaꞌ bʌ i wʌ alʌ Dios mi quej i yʌqꞌuentyelob. Cheꞌ ñac ti cꞌotiyob an i yum jini lum, pero Dios tiꞌ chocoyob loqꞌuel jini i yum chaꞌan ochic lac yumob ti ñoj oniyix. An yicꞌotyob carpa bʌ otyot baꞌ miꞌ chꞌujutisañob Dios. Cꞌʌlʌl chʌꞌʌch an yicꞌotyob cabʌl jabil, cꞌʌlʌl jintyo tiꞌ chꞌʌmʌ yeꞌtyel ñuc bʌ yumʌl David bʌ i cꞌabaꞌ.

46 Dios tiꞌ qꞌuele ti wen jin ñuc bʌ yumʌl David bʌ i cꞌabaꞌ. Jini yom i melben i templo Dios baꞌ mi quej i tyʌlel ti chumtyʌl. Jiñʌch jini Dios tsaꞌ bʌ i chꞌujbi jeꞌel juntiquil i yumob David, Jacob bʌ i cꞌabaꞌ.

47 Pero Dios machꞌan ti yʌqꞌue i meleꞌ. Salomón tyo tiꞌ melbe i templo Dios.

48 Pero jini Dios machꞌʌ baꞌan i pꞌisol i ñuclel machꞌan mi tyʌlel ti chumtyʌl ti chumlibʌl melel bʌ ti cꞌʌbʌl. Dios tiꞌ chaꞌle tꞌan ti tiꞌ juntiquil tsaꞌ bʌ i xiqꞌui yʌleꞌ Dios. Jini ti yʌlʌ:

51 Bej muꞌ ti tꞌan jini Esteban yaꞌ baꞌañob jini añoꞌ bʌ yeꞌtyel. Ti yʌlʌ: Pero jatyetla, wen tsʌts laꞌ pusicꞌal. Lajal laꞌ pusicꞌal, laꞌ chiquin cheꞌ bajcheꞌ jini machꞌʌ baꞌan miꞌ chꞌujbin Dios. Chʌncox laꞌ chʌc contrajin Chꞌujul bʌ i Chꞌujlel Dios. Lajaletla cheꞌ bajcheꞌ laꞌ yumob ti ñoj oniyix.

52 Jini laꞌ yumob ti ñoj oniyix tiꞌ luꞌ tyʌcꞌlʌ tsaꞌ bʌ i xiqꞌui yʌleꞌ Dios ti ñoj oniyix. Tiꞌ tsʌnsʌyob jiñobʌch tsaꞌ bʌ i tyajayob ti tꞌan jini yoque tyoj bʌ muꞌ tyo bʌ i tyʌlel ti yʌlʌyob. Wale tsaꞌix tyʌli, pero jatyetla ti laꞌ wʌcꞌʌ tiꞌ cꞌʌb ñuc bʌ yeꞌtyel. Ti laꞌ wʌcꞌʌ ti tsʌnsʌntyel.

53 Tsaꞌix aqꞌuentiyetla i mandar Dios ti ajtroñel i chaꞌan Dios loqꞌuem bʌ ti panchan, pero machꞌan mi laꞌ chꞌujbin. Che ti yʌlʌ Esteban cheꞌ ñac tiꞌ chaꞌle tꞌan yaꞌ baꞌañob jini añoꞌ bʌ yeꞌtyel.

54 Jini muchꞌquibiloꞌ bʌ am bʌ yeꞌtyel ti wen michꞌʌyob cheꞌ ñac ti yubiyob i tꞌan Esteban. Uchꞌʌcñayob i yej chaꞌan i michꞌlelob.

55 Butꞌul i pusicꞌal Esteban ti Chꞌujul bʌ i Chꞌujlel Dios. Tiꞌ chꞌuj qꞌuele letsel ti panchan. Tiꞌ qꞌuele i ñuclel Dios yicꞌot Jesús yaꞌ waꞌal tiꞌ ñoj Dios.

56 Esteban ti yʌlʌ: Qꞌuelela. Mij qꞌuel yaꞌ ti jajmi yaꞌ ti panchan. Yaꞌ waꞌal tiꞌ ñoj Dios jini i Piꞌʌl Quixtyañu.

57 Cheꞌ jini, tiꞌ mʌcʌyob i chiquin tiꞌ cꞌʌb. Tiꞌ chaꞌleyob cꞌam bʌ oñel chaꞌan michꞌob. Tiꞌ jojmi chucob.

58 Tiꞌ pʌyʌyob loqꞌuel yaꞌ ti tiꞌ lum. Jini tsaꞌ bʌ yubiyob i tꞌan Esteban tiꞌ wel chocoyob i bujc ti yeba yoc juntiquil colem alob Saulo bʌ i cꞌabaꞌ chaꞌan miꞌ cʌñʌtyʌbeñob. Cheꞌ jini tiꞌ juluyob ti tyun jini Esteban.

59 Esteban tiꞌ chaꞌle oración cheꞌ ñac chʌncolob tyo i julob. Ti yʌlʌ: C Yum Jesús, chꞌʌmbeñon c chꞌujlel. Cheꞌ ti yʌlʌ ti oración Esteban.

60 Ti ñocle ti lum Esteban. Ti cꞌam bʌ tꞌan ti yʌlʌ: C Yum, mach a wʌqꞌuen i xotꞌ i mul ili quixtyañujob, cheꞌen. Cheꞌ ñac ti ujti i yʌleꞌ ti sajti.