Saulo miꞌ tyʌcꞌlan ochemoꞌ bʌ tiꞌ tꞌan Dios
8
Weñʌch ti yubi Saulo cheꞌ ñac tiꞌ tsʌnsʌyob Esteban. Ti jini jach bʌ qꞌuin ti queji i cabʌl tyʌcꞌlʌntyel pejtyel ochemoꞌ bʌ tiꞌ tꞌan Dios yaꞌ ti Jerusalén. Jin jach yajcʌbiloꞌ bʌ ajsubtꞌañob ñumel ti cʌyleyob yaꞌyaꞌi. Pejtyel yañoꞌ bʌ ochemoꞌ bʌ tiꞌ tꞌan Dios ti putsꞌiyob loqꞌuel. Cꞌʌlʌl ti putsꞌiyob ti pañimil Judea bʌ i cꞌabaꞌ yicꞌot ti pañimil Samaria bʌ i cꞌabaꞌ.2 Chaꞌtiquil uxtiquil winicob chʌc cꞌajalob i chaꞌan Dios tiꞌ chꞌujñiyob Esteban. Ti wen uqꞌuiyob.
3 Pero Saulo tiꞌ bej tyʌcꞌlʌyob jini ochemoꞌ bʌ tiꞌ tꞌan Dios. Ti ochi ti otyotyel tyac. Tiꞌ chucuyob. Ti yotsʌyob ti cʌchol winicob yicꞌot xꞌixicob.
Tiꞌ subuyob wen bʌ tꞌan yaꞌ ti Samaria
4 Pero jini tsaꞌ bʌ putsꞌiyob loqꞌuel ti Jerusalén tiꞌ subuyob ñumel i tꞌan Dios baꞌical jach ti majliyob.
5 Juntiquil tsaꞌ bʌ putsꞌi Felipe bʌ i cꞌabaꞌ ti majli ti pañimil Samaria bʌ i cꞌabaꞌ. Yaꞌi ti queji i wen subeñob chaꞌan Cristo.
6 Yaꞌi tiꞌ muchꞌquiyob i bʌ cabʌl quixtyañujob. Tiꞌ luꞌ wen ñʌchꞌtyʌyob pejtyel i tꞌan Felipe. Tiꞌ qꞌueleyob jeꞌel ñuc tyac bʌ i pꞌʌtyʌlel Dios tsaꞌ bʌ pʌsꞌenti tiꞌ chaꞌlibal Felipe.
7 Cabʌl tyʌcꞌlʌbiloꞌ bʌ ti xiba ti lajmisʌntiyob. Tiꞌ chaꞌle cꞌam bʌ oñel jini xibajob cheꞌ ti loqꞌui tiꞌ pusicꞌal cꞌamoꞌ bʌ. Cabʌl machꞌʌ baꞌan i cꞌʌjnibal yoc i cꞌʌb ti lajmisʌnti jeꞌel.
8 Wen cꞌajacñayob i yoj pejtyel quixtyañu yaꞌ ti lum chaꞌan ti caj chʌ bʌ ti yilʌyob, yicꞌot chʌ bʌ ti yubiyob.
9 Pero yaꞌan juntiquil winic Simón bʌ i cꞌabaꞌ. Wen yujil wujt jini Simón. Cabʌl tiꞌ loti añoꞌ bʌ ti Samaria. Tiꞌ wen chan isʌ i bʌ tiꞌ tyojlelob.
10 Pejtyel quixtyañujob tiꞌ luꞌ ñʌchꞌtyʌbeyob i tꞌan jini Simón jini añoꞌ yeꞌtyel yicꞌot jeꞌel jini machꞌʌ baꞌan i ñaꞌtyʌbal. Añʌch ñuc bʌ i pꞌʌtyʌlel Dios yicꞌot, tiꞌ lolon ñaꞌtyʌyob.
11 Chʌꞌʌch tiꞌ chꞌujbibeyob i tꞌan Simón como cꞌʌlʌl wajali tyoj bʌcꞌñʌjel ti yubiyob chaꞌan ti wujtyʌntyel.
12 Felipe tiꞌ wen sube pejtyel quixtyañujob chaꞌan i yumintyel Dios yicꞌot chaꞌan Jesucristo. Cabʌl winicob xꞌixicob tiꞌ chꞌʌmʌyob jaꞌ cheꞌ ñac tiꞌ chꞌujbiyob ili tꞌan tiꞌ pusical.
13 Jinic tyo jini Simón tiꞌ chꞌujbi jeꞌel. Tiꞌ chꞌʌmʌ jaꞌ. Ti queji i piꞌlen ti xʌmbal Felipe. Tyoj bʌcꞌñʌjel ti yubi jeꞌel cheꞌ ñac ti yilʌ ñuc tyac bʌ i pꞌʌtyʌlel Dios tsaꞌ bʌ pʌsꞌenti ti Felipe.
14 Cheꞌ jini, cheꞌ ñac ti yubiyob jini yajcʌbiloꞌ bʌ ajsubtꞌañob ñumel yaꞌ ti Jerusalén chaꞌan tiꞌ chꞌujbiyob i tꞌan Dios yaꞌ baꞌañob ti Samaria tiꞌ chocoyob majlel Pedro yicꞌot Juan.
15 Cheꞌ ñac ti cꞌotiyob ti Samaria tiꞌ tyajayob ti oración jini ochemoꞌ bʌ tiꞌ tꞌan Dios yaꞌyaꞌi chaꞌan mi yʌqꞌuentyelob Chꞌujul bʌ i Chꞌujlel Dios.
16 Como max tyo baꞌan ti aqꞌuentiyob Chꞌujul bʌ i Chꞌujlel Dios jini añoꞌ bʌ ti Samaria. Cheꞌ jax tyo tiꞌ chꞌʌmʌyob jaꞌ chaꞌan tsiquil tiꞌ chꞌujbiyob Jesús.
17 Cheꞌ jini Pedro yicꞌot Juan ti yʌqꞌueyob i cꞌʌb tiꞌ pam i jol jini ochemoꞌ bʌ tiꞌ tꞌan Dios. Cheꞌ jini, ti aqꞌuentiyob Chꞌujul bʌ i Chꞌujlel Dios. Ti ochi tiꞌ pusicꞌalob.
18 Jini Simón ti yilʌ cheꞌ ti aqꞌuentiyob Chꞌujul bʌ i Chꞌujlel Dios cheꞌ ñac yajcʌbiloꞌ bʌ ajsubtꞌañob ñumel ti yʌcꞌʌyob i cꞌʌb tiꞌ pam i jol jini ochemoꞌ bʌ tiꞌ tꞌan Dios. Jin chaꞌan Simón tiꞌ jopꞌo i yʌqꞌuen tyaqꞌuin Pedro yicꞌot Juan.
19 Tiꞌ subeyob: Aqꞌueñon jeꞌel jini a pꞌʌtyʌlel chaꞌan cheꞌ mi cʌcꞌ j cꞌʌb tiꞌ pam i jol majchical jach, mi quej i yʌqꞌuentyel Chꞌujul bʌ i Chꞌujlel Dios jeꞌel. Cheꞌ ti lolon alʌ Simón.
20 Pedro tiꞌ sube: Jatyet yicꞌot a tyaqꞌuin mi quej i jilel como maꞌ lolon ñaꞌtyan chꞌujbi a mʌn jini ñuc bʌ i majtyan Dios.
21 Mach chꞌujbi a wotsan a bʌ ti ili toñel. Mach a chaꞌanic como mach tyoj a pusicꞌal tiꞌ tyojlel Dios, cheꞌen.
22 Cʌyʌx leco bʌ a pensal. Cꞌajtiben Dios ti wocol tꞌan mi mux i ñusʌbeñet tsaꞌ bʌ a ñaꞌtyʌ ti a pusicꞌal.
23 Cheꞌ bajcheꞌ cʌchʌlet ti a simaronlel mij qꞌuelet. Cheꞌ bajcheꞌ butꞌul a pusicꞌal ti i mulʌntyel lojon c pꞌʌtyʌlel ti Dios. Cheꞌ ti yʌlʌ Pedro.
24 Cheꞌ jini Simón ti yʌlʌ: Pejcʌbeñon Dios chaꞌan mach saj ujtic bajcheꞌ ti a wʌlʌ. Cheꞌ ti yʌlʌ Simón.
25 Cheꞌ jini, Pedro yicꞌot Juan tiꞌ wen subuyob i tꞌan Dios. Cabʌl tiꞌ subeyob bajcheꞌ tiꞌ mele Jesús tsaꞌ bʌ i luꞌ ilʌyob. Cheꞌ jini, ti queji i chaꞌ sujtyelob majlel ti Jerusalén. Tiꞌ subuyob i tꞌan Dios yaꞌ ti cabʌl saj lum tyac yaꞌ ti bij.
Felipe yicꞌot chꞌoyol bʌ ti Etiopía
26 Cheꞌ jini, cheꞌ ñac sujtyemobix Pedro yicꞌot Juan, Dios tiꞌ choco tyʌlel yaꞌ baꞌan Felipe juntiquil ajtroñel i chaꞌan Dios chꞌoyol bʌ ti panchan. Jini tiꞌ sube Felipe: Tyejchen. Cucu yaꞌ ti sur ti bijlel Jerusalén muꞌ bʌ i jubel majlel yaꞌ ti Gaza. Jiñʌch jini bij muꞌ bʌ i ñumel ti tyʌquin bʌ joch lum. Cheꞌ ti subenti Felipe.
27 Felipe ti tyejchi. Ti loqꞌui majlel. Yaꞌ ti bij tiꞌ tyaja juntiquil winic chꞌoyol bʌ ti yambʌ colem pañimil Etiopía bʌ i cꞌabaꞌ. Eunuco jini winic. An ñuc bʌ yeꞌtyel chaꞌan miꞌ cʌñʌtyan pejtyel i tyaqꞌuin xꞌixic bʌ yumʌl ti Etiopía, Candace bʌ i cꞌabaꞌ. Tsajni ti Jerusalén chaꞌan i chꞌujutisan Dios jini winic.
28 Buchul ti cꞌotyajax bʌ carreta. Chʌncox i sujtyel majlel tiꞌ lumal. Chʌncox i qꞌuel tsaꞌ bʌ tsꞌijbu juntiquil tsaꞌ bʌ i xiqꞌui yʌleꞌ Dios ti ñoj oniyix Isaías bʌ i cꞌabaꞌ.
29 Jini Chꞌujul bʌ i Chꞌujlel Dios tiꞌ sube Felipe: Yom maꞌ lʌqꞌueꞌ jini carreta. Tyemel maꞌ majlel a wicꞌot.
30 Cheꞌ ñac tiꞌ lʌcꞌʌ Felipe ti yubi jini winic chʌncol i qꞌueleꞌ tsaꞌ bʌ i tsꞌijbu Isaías. Felipe tiꞌ cꞌajtibe jini am bʌ ti carreta: ¿Mu ba a chꞌʌmꞌen isujm jini chʌncol bʌ a qꞌueleꞌ? Cheꞌ tiꞌ cꞌajtibe.
31 Jini winic tiꞌ jacꞌʌ: Mach chꞌujbic chꞌʌmꞌen isujm mi maꞌan majch miꞌ wen subeñon. Cheꞌ jini tiꞌ cꞌajtibe Felipe chaꞌan letsic ti buchtyʌl yaꞌ ti carreta yicꞌot.
32 Chʌncol i qꞌuel jini Tsꞌijbubil bʌ i Tꞌan Dios yaꞌ baꞌ mi yʌleꞌ:
Cheꞌ bajcheꞌ miꞌ pʌy majlel tiñʌmeꞌ chaꞌan miꞌ tsʌnsan, chʌꞌʌch tiꞌ pʌyʌyob majlel jini winic.
Cheꞌ bajcheꞌ saj tiñʌmeꞌ ñʌchꞌʌl tiꞌ tyojlel jini muꞌ bʌ i tsepben loqꞌuel i tsutsel,
chʌꞌʌch jeꞌel maꞌ tiꞌ chaꞌle tꞌan jini winic.
33 Tiꞌ peqꞌuisʌ i bʌ tiꞌ tyojlelob. Ti wajlenti. Mach tyoj bʌ melojel tiꞌ chaꞌleyob.
Maꞌ majch chꞌujbi i tyaj ti tꞌan i jiñʌjlel
como ti tsʌnsʌnti.
Cheꞌ tsꞌijbubil.
34 Jini ajcʌñʌtya tyaqꞌuin chꞌoyol bʌ ti Etiopía tiꞌ cꞌajtibe Felipe: A wocolic maꞌ subeñon, ¿majchqui chʌncol i tyaj ti tꞌan jini tsaꞌ bʌ i xiqꞌui yʌleꞌ Dios? ¿Jim ba i bajñel i bʌ o yambʌ winic? Cheꞌ tiꞌ cꞌajtibe.
35 Cheꞌ jini Felipe tiꞌ wen subu tꞌan chaꞌan Jesús. Ti queji i tsictisʌben i sujmlel jini Tsꞌijbubil bʌ i Tꞌan Dios ujtyel bʌ i qꞌuelob.
36 Cheꞌ ñac ti ñumiyob baꞌan jaꞌ jini winic tiꞌ sube Felipe: Qꞌuele, wʌꞌ an jaꞌ. ¿Max tyo ba chꞌujbi c chꞌʌmeꞌ jaꞌ? Cheꞌ ti cꞌajtibe.
37 Felipe tiꞌ jacꞌʌ: Machꞌan chʌ bʌ miꞌ mʌctyʌbeñet mi tsaꞌix a chꞌujbi Jesús ti pejtyel a pusicꞌal cheꞌen. Jini winic ti yʌlʌ: Tsaꞌix chꞌujbi chaꞌan i yalobilʌch Dios jini Jesucristo, cheꞌen.
38 Cheꞌ jini tiꞌ xiqꞌui i poj cʌy xʌmbal jini carreta. Ti jubiyob. Ti ochiyob ti jaꞌ tiꞌ chaꞌticlelob. Felipe ti yʌcꞌʌ ti chꞌʌm jaꞌ.
39 Cheꞌ ñac ti loqꞌuiyob majlel ti jaꞌ jini ajcʌñʌtya tyaqꞌuin maꞌ tiꞌ chaꞌ qꞌuele Felipe como ti pʌjyi majlel Felipe ti Chꞌujul bʌ i Chꞌujlel Dios. Pero cꞌajacña i yoj ti sujti majlel tiꞌ lumal jini ajcʌñʌtya tyaqꞌuin.
40 Cheꞌ ñac ti pʌjyi majlel Felipe ti Chꞌujul bʌ i Chꞌujlel Dios cꞌʌlʌ ti cꞌoti yaꞌ ti lum Azoto bʌ i cꞌabaꞌ. Tiꞌ bej chaꞌle xʌmbal majlel cꞌʌlʌl ti cꞌoti ti lum Cesarea bʌ i cꞌabaꞌ. Tiꞌ chaꞌle subtꞌan ti jujumpꞌej saj lum baꞌ ti ñumi ti bij.