2 Yaꞌ tiꞌ cꞌajtibe jun chaꞌan aqꞌuentic i pꞌʌtyʌlel chaꞌan mi majlel yaꞌ ti i templo tyac israelob yaꞌ ti Damasco chaꞌan i chuc ochemoꞌ bʌ ti tꞌan Dios. Yom i cʌchob. Yom i pʌyob sujtyel ti Jerusalén. Junlajal yom i cʌchob winicob, xꞌixicob.

3 Pero cheꞌ ñac yaꞌ tyo an ti bij ti lʌcꞌʌlel Damasco ti waꞌ jubi tyʌlel cꞌajc tyʌlem bʌ ti chan tiꞌ joytyʌlel.

4 Cheꞌ jini Saulo ti yajli ti lum. Ti yubi ajtꞌan tsaꞌ bʌ yʌlʌ: Saulo, Saulo, ¿chucoch chʌncol a tyʌcꞌlañon? cheꞌ jini ajtꞌan.

5 Cheꞌ jini Saulo ti yʌlʌ: C Yum, ¿majchetqui? cheꞌen. Jini ajtꞌan tiꞌ jacꞌʌ: Joñon Jesúson. Joñoñʌch chʌncol bʌ a tyʌcꞌlan. Chʌncol a bajñel low a bʌ cheꞌ bajcheꞌ tyat wacax cheꞌ miꞌ botꞌtyeqꞌueꞌ jay bʌ i ñiꞌ tyeꞌ chucul bʌ i chaꞌan i yum. Cheꞌ tiꞌ jacꞌʌ jini ajtꞌan.

6 Tsitsilña ti bʌqꞌuen Saulo. Ti yʌlʌ: C Yum, ¿chuquiyes a wom mic chaꞌlen? cheꞌen. Cheꞌ jini, Jesús tiꞌ jacꞌʌ: Waꞌi. Cucu yaꞌ ti lum. Yaꞌi mi quej a subentyel chʌ bʌ yom maꞌ chaꞌlen, cheꞌen.

7 Jini winicob chʌncol bʌ i tsʌclen majlel Saulo ti wen quejiyob ti bʌqꞌuen cheꞌ ti yubiyob ajtꞌan pero machꞌan majch tsiquil.

8 Cheꞌ jini ti waꞌle Saulo. Tiꞌ lolon jopꞌo i qꞌuel pañimil. Pero xpojtsꞌix como ti waꞌ sujti ti xpojtsꞌ cheꞌ ñac ti yubi ajtꞌan. I piꞌʌlob ti xʌmbal tiꞌ chucbeyob i cꞌʌb. Tiꞌ pʌyʌyob ochel ti Damasco.

9 Xpojtsꞌʌch cꞌʌlʌl uxpꞌej qꞌuin. Maꞌ ti uchꞌi.

10 Yaꞌan ti Damasco juntiquil winic Ananías bʌ i cꞌabaꞌ. Ochem tiꞌ tꞌan Dios jini Ananías. Cheꞌ jini Jesús tiꞌ pejcʌ cheꞌ bajcheꞌ ti ñajal. Ti yʌlʌ: Ananías, cheꞌen. Ananías tiꞌ jacꞌʌ: Lʌchꞌañoni, c Yum, cheꞌen.

11 Cheꞌ jini Jesús ti yʌlʌ: Tyejchen. Cucu yaꞌ ti jini calle Derecha bʌ i cꞌabaꞌ. Yaꞌ maꞌ wochel ti yotyot Judas. Maꞌ cꞌajtibeñob baqui an juntiquil loqꞌuem bʌ ti Tarso, Saulo bʌ i cꞌabaꞌ. Chʌncol ti oración jini Saulo.

12 Cheꞌ bajcheꞌ ti ñajal ti yilʌyet. Cheꞌ bajcheꞌ ti ochiyet tiꞌ tꞌejl ti yilʌ. Cheꞌ bajcheꞌ ti a wʌqꞌue a cꞌʌb tiꞌ wut chaꞌan mi chaꞌ cꞌotyel i wut ti yubi. Chʌꞌʌch ti yilʌ cheꞌ bajcheꞌ ti ñajal. Cheꞌ ti subenti Ananías.

13 Cheꞌ ñac ti yubi ili tꞌan, Ananías ti yʌlʌ: C Yum, cabʌl ti cubi ñoj simaron ili winiqui. Tsaꞌix cubi bajcheꞌ tiꞌ tyʌcꞌlʌ ochemoꞌ bʌ ti a tꞌan yaꞌ ti Jerusalén.

14 Ixcu wale iliyi añʌch yicꞌot jun tsaꞌ bʌ aqꞌuenti baꞌan ñuc bʌ curajob. Tsaꞌix tyʌli wʌꞌi chaꞌan miꞌ chucob chaꞌan miꞌ cʌchob pejtyel muꞌ bʌ i chꞌujbiñetyob. Cheꞌ ti yʌlʌ Ananías.

15 Pero Jesús ti yʌlʌ: Cucu. Chaꞌlen bajcheꞌ mic subeñet. Tsaꞌix c yajcʌ jini winic chaꞌan miꞌ sub ñumel j cꞌabaꞌ yaꞌ baꞌan pejtyel mach bʌ israelob yicꞌot i yumʌlob. Mux i sub c tꞌan jeꞌel yaꞌ baꞌan israeloꞌ bʌ.

16 Mux c pʌsꞌen Saulo pejtyel bajcheꞌ mi quej i ñusan wocol chaꞌan ti caj joñon. Cheꞌ ti subenti Ananías ti Jesús.

17 Cheꞌ jini Ananías ti majli yaꞌ ti yotyot Judas baꞌ tiꞌ tyaja Saulo. Ti ochi. Ti yʌcꞌʌ i cꞌʌb tiꞌ wut Saulo. Ti yʌlʌ: Hermano Saulo, jini lac Yum tsaꞌ bʌ i pʌsʌ i bʌ ti a tyojlel yaꞌ ti bij tiꞌ xiqꞌuiyon tyʌlel chaꞌan chaꞌ cꞌotic a wut, chaꞌan bujtꞌic a pusicꞌal ti Chꞌujul bʌ i Chꞌujlel Dios. Cheꞌ ti yʌlʌ Ananías.

18 Cheꞌ jini ti waꞌ yajli loqꞌuel tiꞌ wut Saulo cheꞌ bajcheꞌ i sujl i wentyʌlel. Tsaꞌix chaꞌ cꞌoti i wut. Ti tyejchi Saulo. Tsaꞌix ajqꞌui ti chꞌʌm jaꞌ.

19 Cheꞌ jini ti uchꞌi. Ti chaꞌ pꞌʌtyʌliyi. Yaꞌ ti ajni chaꞌpꞌej uxpꞌej qꞌuin ti Damasco yicꞌot ochemoꞌ bʌ tiꞌ tꞌan Dios.

20 Cheꞌ jini Saulo ti queji ti subtꞌan yaꞌ ti i templo tyac israelob. tiꞌ subeyob chaꞌan i yalobilʌch Dios jini Jesús.

21 Tyoj bʌcꞌñʌjelob jini tsaꞌ bʌ yubiyob i tꞌan. Ti yʌlʌyob: Jiñʌch jini tsaꞌ bʌ wen tyʌcꞌlʌ ochemoꞌ bʌ tiꞌ tꞌan Dios yaꞌ ti Jerusalén, cheꞌob. Jiñʌch jini tsaꞌ bʌ tyʌli wʌꞌwʌꞌi chaꞌan i cʌchob ochemoꞌ bʌ chaꞌan mi yʌqꞌueñob tiꞌ cꞌʌb ñuc bʌ curajob, cheꞌ ti yʌlʌyob.

22 Pero más chꞌejl tyo ti queji ti tꞌan Saulo. Tiꞌ wen tsictisʌbeyob pejtyel israelob yaꞌ ti Damasco chaꞌan Jesús jiñʌch yajcʌbil bʌ i chaꞌan Dios. Maꞌan tiꞌ ñaꞌtyʌyob bajcheꞌ yom i jacꞌob.

23 Cheꞌ ñac ti ñumi cabʌl qꞌuin jini israelob ti queji i lajob i tꞌan chaꞌan miꞌ tsʌnsañob Saulo.

24-25 Cheꞌ jini ti yubi Saulo bajcheꞌ chʌncol i ñaꞌtyañob. Joy corralibil ti wen chan bʌ corral melel bʌ ti tyun jini lum. Cꞌʌlʌl ti ñumi qꞌuin, ti ñumi acꞌbʌlel tiꞌ pijtyʌyob Saulo yaꞌ ti tiꞌ corral baꞌ mi yochelob mi loqꞌuelob. Yom i tsʌnsañob. Pero jini ochemoꞌ bʌ tiꞌ tꞌan Dios ti yotsʌyob Saulo ti colem chiquib. Ti acꞌbʌlel tiꞌ ñusʌyob ti jumpatlel jini corral. Chʌꞌʌch bajcheꞌ jini ti putsꞌi Saulo.

26 Cheꞌ ñac ti cꞌoti Saulo yaꞌ ti Jerusalén yom i yochel baꞌan jini ochemoꞌ bʌ tiꞌ tꞌan Dios. Pero añobʌch i bʌqꞌuen. Maꞌan tiꞌ chꞌujbiyob mi ochem tiꞌ tꞌan Dios Saulo.

27 Cheꞌ jini Bernabé tiꞌ pʌyʌ ochel Saulo baꞌan yajcʌbiloꞌ bʌ ajsubtꞌañob ñumel. Tiꞌ wen subeyob pejtyel bajcheꞌ ti ujti yaꞌ ti bij, bajcheꞌ ti yilʌ Jesús yaꞌ ti bij jini Saulo. Tiꞌ subeyob bajcheꞌ ti pejcʌnti Saulo ti Jesús. Tiꞌ wen tsictisʌbeyob jeꞌel bajcheꞌ tiꞌ wen chaꞌle subtꞌan Saulo chaꞌan Jesús yaꞌ ti Damasco.

28 Cheꞌ jini Saulo ti tyem ajni yicꞌot ochemoꞌ bʌ tiꞌ tꞌan Dios yaꞌ ti Jerusalén. Tiꞌ piꞌleyob ti xʌmbal cheꞌ ñac ti loqꞌuiyob ti subtꞌan.

29 Wen chꞌejl tiꞌ subu tꞌan chaꞌan Jesús jini Saulo. Tiꞌ wen pejcʌ israelob muꞌ bʌ i chaꞌlen tꞌan tiꞌ tꞌan griegojob. Pero jiñob tiꞌ wen sʌclʌ bajcheꞌ chꞌujbi i tsʌnsañob.

30 Cheꞌ ñac jini ochemoꞌ bʌ tiꞌ tꞌan Dios ti yubiyob bajcheꞌ chʌncol i ñaꞌtyañob jini griegojob tiꞌ pʌyʌyob loqꞌuel Saulo chaꞌan majlic i yʌcꞌob ti Cesarea. Yaꞌi tiꞌ xiqꞌuiyob sujtyel ti lum Tarso bʌ i cꞌabaꞌ.

31 Cheꞌ jini ñʌchꞌʌl ti cʌyleyob pejtyel ochemoꞌ bʌ tiꞌ tꞌan Dios yaꞌ ti pañimil Judea bʌ i cꞌabaꞌ yicꞌot Galilea yicꞌot Samaria. Tiꞌ wen xucꞌchocoyob i pusicꞌal tiꞌ tꞌan Dios. Tiꞌ chꞌujbiyob Dios ti jumpꞌej jach i pusicꞌal. Jini Chꞌujul bʌ i Chꞌujlel Dios tiꞌ chʌc cotyʌyob. Ti wen ocꞌʌyob ochemoꞌ bʌ tiꞌ tꞌan Dios.

32 Ti loqꞌui majlel Pedro i julaꞌan pejtyel ochemoꞌ bʌ tiꞌ tꞌan Dios. Cꞌʌlʌ ti majli ti jumpꞌej lum Lida bʌ i cꞌabaꞌ.

33 Yaꞌ ti Lida tiꞌ tyaja juntiquil winic mach bʌ mejl i ñijcan yoc i cꞌʌb. An jach ti wʌyib cꞌʌlʌl ocho jab. Eneas i cꞌabaꞌ bʌ winic.

34 Pedro tiꞌ sube: Eneas, Jesucristo miꞌ lajmisañet. Tyejchen. Muchꞌquin a mosil. Cheꞌ ti yʌlʌ Pedro. Cheꞌ jini, ti waꞌ tyejchi Eneas.

35 Pejtyel jini am bʌ ti Lida yicꞌot ti yambʌ lum Sarón bʌ i cꞌabaꞌ ti yilʌyob bajcheꞌ ti ujti. Tiꞌ cʌyʌyob i chꞌujbiñob jini oniyix bʌ tꞌan. Tiꞌ chꞌujbiyob Jesús.

36 Ti jin jach bʌ qꞌuin tyac yaꞌ ti jumpꞌej lum Jope bʌ i cꞌabaꞌ an juntiquil ꞌixic Tabita bʌ i cꞌabaꞌ. Ochem tiꞌ tꞌan Dios jini ꞌixic. Dorcas bʌ i cꞌabaꞌ jini ꞌixic tiꞌ tꞌan griegojob. Jini tiꞌ chʌc chaꞌle wen tyac bʌ. Tiꞌ chʌc cotyʌ jini pꞌumpꞌuñoꞌ bʌ.

37 Cheꞌ jini ti cꞌamꞌʌ jini Dorcas. Ti sajti. Tiꞌ tsꞌʌnsʌyob jini chꞌujlelʌl. Tiꞌ sʌtsꞌ chocoyob yaꞌ ti chaꞌlajm bʌ i mali otyot.

38 Lʌcꞌʌl an ti Jope jini Lida. Jini ochemoꞌ bʌ tiꞌ tꞌan Dios tiꞌ ñaꞌtyʌyob yaꞌan ti Lida jini Pedro. Jin chaꞌan tiꞌ chocoyob majlel chaꞌtiquil winic yaꞌi chaꞌan miꞌ pʌy tyʌlel. Tiꞌ subeyob: Coxla ti Jope ti ora jach, cheꞌob.

39 Cheꞌ jini, ti majli Pedro yicꞌotyob. Cheꞌ ñac ti cꞌoti tiꞌ pʌyʌyob letsel yaꞌ baꞌ sʌtsꞌʌl jini chꞌujlelʌl. Mucꞌob ti uqꞌuel cabʌl mebaꞌ ꞌixicob. Tiꞌ pʌsbeyob Pedro pejtyel bujcʌl tyac tsaꞌ bʌ i tsꞌisi Dorcas cheꞌ ñac cuxul tyo.

40 Cheꞌ jini Pedro tiꞌ xiqꞌui loqꞌuel ti pejtyelel. Ti ñocle. Tiꞌ chaꞌle oración. Tiꞌ chꞌuj qꞌuele jini chꞌujlelʌl Dorcas. Tiꞌ pejcʌ. Ti yʌlʌ: Tabita, tyejchen. Cheꞌ jini, Dorcas ti pꞌixi i wut. Cheꞌ ñac ti yilʌ Pedro, ti buchle.

41 Pedro tiꞌ chucbe i cꞌʌb. Tiꞌ chꞌuyu tyejchel. Tiꞌ chaꞌ pʌyʌ ochel jini mebaꞌ ꞌixicob yicꞌot yañoꞌ bʌ ochemoꞌ bʌ tiꞌ tꞌan Dios. Tiꞌ luꞌ pʌsbeyob chaꞌ cuxulix Dorcas.

42 Pejtyelel yaꞌ ti Jope ti yubiyob chʌ bʌ ti ujti. Cabʌl tiꞌ chꞌujbiyob Jesús.

43 Yaꞌ ti cʌyle Pedro chaꞌpꞌej uxpꞌej qꞌuin. Ti ajni ti yotyot Simón. An i toñel Simón ti tsꞌaj pʌchij.