2 Cheꞌ ñac ti yubiyob muꞌ ti tꞌan tiꞌ tꞌan hebreojob ti más ñʌchꞌleyob. Cheꞌ jini Pablo tiꞌ subeyob.

3 Joñon israelon. Ti chꞌocʌyon ti Tarso yaꞌ ti Cilicia. Pero wʌꞌ ti coliyon ti Jerusalén. Jini Gamaliel tiꞌ cʌntisʌyon. Tiꞌ luꞌ cʌntisʌyon bajcheꞌ an ti i mandar tyac lac yumob ti ñoj oniyix. Tic beleꞌ chꞌujutisʌ Dios ti pejtyel c pusicꞌal lajal cheꞌ bajcheꞌetla wale iliyi.

4 Wajali tic wen tyʌcꞌlʌ ochemoꞌ bʌ tiꞌ tꞌan Dios. Ti cʌcꞌʌyob ti tsʌnsʌntyel. Tic chucu majlel ti chʌcol winicob xꞌixicob.

5 Jini ñoj ñuc bʌ cura yicꞌot añoꞌ bʌ yeꞌtyel yujilob isujm bajcheꞌ tic chaꞌle wajali como jiñob ti yʌcꞌoñob jun chaꞌan mic pʌsꞌen israeloꞌ bʌ lac piꞌʌlob yaꞌ ti Damasco. Yaꞌ majlel mucꞌon c sʌclan ochemoꞌ bʌ tiꞌ tꞌan Dios chaꞌan cʌchʌlob mic pʌyob tyʌlel wʌꞌ ti Jerusalén chaꞌan mi cʌqꞌuen i xotꞌob i mul.

6 Ti xinqꞌuinil cheꞌ ñac majlel tyo mucꞌon ti bij cheꞌ lʌcꞌʌlix mach cꞌotyon ti Damasco ti waꞌ tsꞌʌjyi pꞌʌtyʌl bʌ cꞌajc yaꞌ baꞌañon chꞌoyol bʌ ti chan.

7 Ti yajliyon ti lum. Cheꞌ jini ti cubi ajtꞌan. Ti yʌlʌ: Saulo, Saulo, ¿chucoch maꞌ tyʌcꞌlañon?

8 Cheꞌ jini tij cꞌajtibe: ¿Majchetqui, c Yum? choꞌon. Jini tiꞌ jacꞌʌ: Joñon Jesúson chꞌoyolon bʌ ti Nazaret. Joñoñʌch chʌncol bʌ a tyʌcꞌlan. Cheꞌ ti yʌlʌ jini ajtꞌan.

9 Jini yaꞌ bʌ añob quicꞌot ti yilʌyob jini cꞌajc. Pero maꞌan ti yubiyob jini ajtꞌan tsaꞌ bʌ i pejcʌyon.

10 Cheꞌ jini ti cʌlʌ: ¿Chuquiyes yom mic chaꞌlen? c Yum, choꞌon. Jini lac Yum tiꞌ subon: Tyejchen. Cucu cꞌʌlʌl yaꞌ ti Damasco. Yaꞌi mi quej a subentyel chʌ bʌ yes yom a chaꞌlen. Cheꞌ ti yʌlʌ jini ajtꞌan.

11 Jini pꞌʌtyʌl bʌ cꞌajc ti yotsʌyon ti xpojtsꞌ. Jin chaꞌan jini c piꞌʌlob ti xʌmbal tiꞌ chucuyon majlel ti j cꞌʌb chaꞌan cꞌoticon ti Damasco.

12 Yaꞌan juntiquil winic yaꞌ ti Damasco Ananías bʌ i cꞌabaꞌ. Jini miꞌ wen chꞌujbin i mandar Moisés. Pejtyelel israelob yaꞌ bʌ chumulob ti Damasco miꞌ qꞌuel ti ñuc jini Ananías.

13 Jini Ananías ti tyʌli i qꞌuelon. Cheꞌ ñac ti cꞌoti ti yʌlʌ: Hermañu Saulo, laꞌ chaꞌ cꞌotic a wut, cheꞌen. Ti jini jach bʌ ora ti chaꞌ cꞌoti c wut. Ti queji quilan jini winic.

14 Ananías tiꞌ subon: Jini Dios tsaꞌ bʌ i chꞌujbiyob lac yumob ti ñoj oniyix ti yajcʌyet ti ñoj oniyix chaꞌan miꞌ pʌsꞌeñet bajcheꞌ yom yʌqꞌueñet a chaꞌlen. Ti yʌqꞌuet a qꞌuel jini yoque tyoj bʌ. Ti yʌqꞌuet a wubin jini tꞌan tsaꞌ bʌ yoque loqꞌui ti tiꞌ.

15 Jatyet mi quej a sub majlel i tꞌan Jesús baꞌan pejtyelel quixtyañujob. Maꞌ subeñob jini tsaꞌ bʌ a wilʌ, tsaꞌ bʌ a wubi.

16 Ixcu wale, maꞌ maꞌ chʌc pijtyan. Tyejchen. Chꞌʌmʌ jaꞌ. Pejcan Jesús ti oración. Cꞌajtiben chaꞌan miꞌ ñusʌbeñet a mul. Cheꞌ tiꞌ subon Ananías, cheꞌ ti yʌlʌ Pablo.

17 Pablo tiꞌ bej chaꞌle tꞌan. Ti yʌlʌ: Cheꞌ ñac ti chaꞌ tyʌliyon wʌꞌ ti Jerusalén ti ochiyon ti templo chaꞌan mic chaꞌlen oración. Cheꞌ jini an chʌ bʌ ti quilʌ cheꞌ bajcheꞌ ti ñajal.

18 Ti quilʌ lac Yum. Tiꞌ subon: Loqꞌuen majlel ti ora jach wʌꞌ ti Jerusalén como maꞌan mi quej i chꞌujbiñob bajcheꞌ mi quej a subeñob chaꞌan joñon. Cheꞌ tiꞌ subentiyon ti lac Yum cheꞌ mucꞌon ti oración.

19 Cheꞌ jini joñon ti cʌlʌ: C Yum, wen yujilob isujm chaꞌan joñon ti ochiyon ti pejtyelel i templo israelob chaꞌan mi catsꞌob chaꞌan mic pʌyob majlel ti cʌchol pejtyelel chʌncol bʌ i chꞌujbiñetyob.

20 Yicꞌot cheꞌ ñac tiꞌ tsʌnsʌyob Esteban ajtroñel bʌ a chaꞌan tsaꞌ bʌ i chaꞌle tꞌan chaꞌañet yaꞌ waꞌalon jeꞌel. Ti cʌcꞌʌ c tꞌan yubil como joñon tij cʌñʌtyʌbeyob i tsuts bujc jini tsaꞌ bʌ i tsʌnsʌyob Esteban.

21 Pero lac Yum tiꞌ subon: Cucu. Mi quej c xiqꞌuet majlel ti ñajt yaꞌ baꞌ mach bʌ israelob chaꞌan maꞌ subeñob c tꞌan.

22 Tiꞌ wen ñʌchꞌtyʌbeyob i tꞌan Pablo quixtyañujob jintyo ti yʌlʌ tsaꞌ bʌ ujti i yʌleꞌ. Cheꞌ jini jasʌl ti yubiyob. Ti chaꞌ quejiyob ti cꞌam bʌ tꞌan: Ti yʌlʌyob: Laꞌ sajtic jini winic. Mach yom cuxtiyic, cheꞌ ti yʌlʌyob.

23 Tiꞌ bej chaꞌleyob cꞌam bʌ tꞌan jini quixtyañujob. Cabʌl tiꞌ chaꞌle tsʌts bʌ tꞌan. Tiꞌ choco letsel tsꞌubejn chaꞌan i señʌjlel i michꞌlel.

24 Jini ñuc bʌ soldado tiꞌ xiqꞌui i pʌyob ochel Pablo ti yotyot soldadojob. Tiꞌ xiqꞌuiyob soldadojob i jatsꞌeꞌ ti pʌchij chaꞌan miꞌ sub i bʌ. Como jini ñuc bʌ soldado yom i yubin chucoch mucꞌob ti cꞌam bʌ tꞌan pejtyelel quixtyañujob tiꞌ contra Pablo.

25 Cheꞌ cʌchʌl Pablo chaꞌan i jatsꞌob, Pablo tiꞌ pejcʌ jini capitán yaꞌ bʌ waꞌal. ¿Am ba ti laꞌ wenta chaꞌan mi laꞌ jatsꞌ juntiquil romano bʌ winic? Yicꞌot jeꞌel max tyo laꞌ saj wʌcꞌon c mel c bʌ. Cheꞌ ti yʌlʌ Pablo.

26 Cheꞌ ñac ti yubibe i tꞌan Pablo jini capitán ti majli i suben jini ñuc bʌ soldado. Ti yʌlʌ: Wen qꞌuele a bʌ ame a niqꞌui chaꞌlen como romano bʌ winic jini Pablo.

27 Cheꞌ jini tiꞌ lʌcꞌʌ Pablo jini ñuc bʌ soldado. Tiꞌ cꞌajtibe: ¿Melel ba cheꞌ romanojet bʌ winic? cheꞌ jini ñuc bʌ soldado. Melelʌch, bajcheꞌ chʌncol a wʌleꞌ, cheꞌ Pablo.

28 Jini ñuc bʌ soldado ti yʌlʌ: Joñon yonlel tyaqꞌuin tic tyojo chaꞌan ochicon ti romano bʌ winic, cheꞌen. Pablo tiꞌ jacꞌʌ: Pero joñon romanojon ti chꞌocʌyon. Cheꞌ ti yʌlʌ Pablo.

29 Jini colel bʌ i jatsꞌob Pablo ti waꞌ loqꞌuiyob tiꞌ tꞌejl. Jini ñuc bʌ soldado, cheꞌ ñac tiꞌ chꞌʌmbe isujm chaꞌan romano bʌ winic Pablo, tiꞌ wen bʌcꞌñʌ chaꞌan tiꞌ cʌchʌ.

30 Jini ñuc bʌ soldado wersa yom yubin chʌ bʌ och miꞌ jopꞌbeñob i mul Pablo jini israelob. Ti yijcꞌʌlel tiꞌ ticbeyob i cadenajlel Pablo. Tiꞌ xiqꞌuiyob i muchꞌquiñob i bʌ jini ñuc bʌ curajob yicꞌot añoꞌ bʌ yeꞌtyel ti Junta Suprema. Cheꞌ jini tiꞌ pʌyʌ majlel Pablo yaꞌ baꞌañob.