2 Jiñʌch jini wen bʌ tꞌan tsaꞌ bʌ i wʌ subu Dios ti ñoj oniyix ti jini tsꞌijbubil bʌ i tꞌan. Dios tiꞌ cꞌʌñʌ jini tsaꞌ bʌ i xiqꞌui i yʌleꞌ chaꞌan i tsꞌijbun ili tꞌan.

3 Jini wen bʌ tꞌan miꞌ subeñonla chaꞌan lac Yum Jesucristo i Yalobilʌch Dios. Miꞌ subeñonla chaꞌan ti chꞌocʌ wʌꞌ ti mulawil chaꞌan i chꞌʌmeꞌ i bʌcꞌtyal cheꞌ bajcheꞌ quixtyañu jach. Ti loqꞌui ti i jiñʌjlel ñuc bʌ yumʌl David bʌ i cꞌabaꞌ.

4 Chaꞌan ti chaꞌ tyejchi loqꞌuel baꞌan sajtyemoꞌ bʌ, ti tsictiyi chaꞌan mach quixtyañu jach Jesucristo pero yoque Yalobil Dios am bʌ i pꞌʌtyʌlel. Chꞌujulʌch i Chꞌujlel Cristo.

5 Chaꞌan jach ti yutslel i pusicꞌal, Dios ti yʌqꞌueyon lojon c toñel chaꞌan ti lac Yum Jesucristo chaꞌan mic sub majlel i tꞌan ti baꞌical jach an quixtyañujob ti pejtyelel pañimil tyac chaꞌan mi quejel i chꞌujbiñob lac Yum Jesucristo yicꞌot mi quejel i jacꞌob.

6 Jatyetla jeꞌel pʌybiletla ti Dios chaꞌan mi laꞌ wajñel ti i chaꞌan Jesucristo.

7 Chʌncol c tsꞌijbubeñetla jun ti pejtyelet bʌ la yaꞌ bʌ añetla ti Roma, pꞌuntyʌbilet bʌ la i chaꞌan Dios. Dios tiꞌ pʌyʌyetla chaꞌan laꞌ wacꞌ laꞌ bʌ Dios chaꞌan i chaꞌañetla. Laꞌ ajniquetla ti i yutslel i pusicꞌal Dios yicꞌot i ñʌchꞌtyʌlel tyʌlem bʌ ti Dios lac Tyat yicꞌot ti lac Yum Jesucristo.

8 Ñaxan mic suben Dios wocox i yʌlʌ chaꞌan ti Jesucristo chaꞌan ti laꞌ pejtyelel. Como ti pejtyelel mulawil chʌncol i luꞌ yubiñob bajcheꞌ ñoj xucꞌul chʌncol laꞌ chꞌujbin chaꞌan melelʌch jini wen bʌ tꞌan.

9 Mic chaꞌliben i toñel Dios ti jumpꞌej c pusicꞌal. Mic sub majlel jini wen bʌ tꞌan chaꞌan an laj cotyʌntyel cheꞌ mi lac chꞌujbin i Yalobil Dios. Dios yujil isujm cheꞌ mic chaꞌlen oración, mic bej tyajetla ti oración.

10 Mic bej cꞌajtiben Dios, mi chʌꞌʌch yom i pusicꞌal, chaꞌan mi an bajcheꞌ mi yʌqꞌueñon c majlel culaꞌañetla cheꞌ bajcheꞌ tic pensali c chaꞌlen cꞌʌlʌ wajali.

11 Como wersa com culaꞌañetla chaꞌan mij cʌntisañetla ti yambʌ i sujmlel tyac tsaꞌ bʌ i cʌntisʌyon Chꞌujul bʌ i Chꞌujlel Dios chaꞌan mi laꞌ más xucꞌchocon laꞌ pusicꞌal ti Dios.

12 Jini com bʌ cʌl, jiñʌch cheꞌ yaꞌ añon laꞌ wicꞌot mi lac motin ñuc isan lac pusicꞌal chaꞌan bajcheꞌ chʌncol lac motin chꞌujbin chaꞌan ajcotyaya lac chaꞌan Cristo.

13 Quermañujob, com mi laꞌ ñaꞌtyan chaꞌan cabʌl tic jopꞌo culaꞌañetla pero cꞌʌlʌ wale maꞌan ti mejliyon. Com c majlel ti cubi, chaꞌan Dios miꞌ cꞌʌñon chaꞌan mij cʌntisañob ti wen bʌ tꞌan yaꞌ baꞌañetla, chaꞌan miꞌ tyajob i cotyʌntyel ti Cristo lajal bajcheꞌ quixtyañujob ti yambʌ pañimil tyac jeꞌel cheꞌ tic subeyob i tꞌan Dios.

14 An tic wenta mic sub majlel i tꞌan Dios baꞌan ti pejtyelel quixtyañujob baꞌical jach añob, mi cʌntisʌbil o mi machꞌan cʌntisʌbil, mi añob cabʌl i ñaꞌtyʌbal o mi machꞌan i ñaꞌtyʌbal.

15 Jin chaꞌan, ti jumpꞌej c pusicꞌal wersa com c subeñetla jini wen bʌ tꞌan chaꞌan laj cotyʌntyel jatyetla jeꞌel yaꞌ bʌ añetla ti Roma.

16 Como joñon machꞌan mij quisnin jini wen bʌ tꞌan chaꞌan laj cotyʌntyel. I chaꞌañʌch Dios jini wen bʌ tꞌan. Jin chaꞌan an i pꞌʌtyʌlel chaꞌan i cotyan majchical jach muꞌ bʌ i chꞌujbin tiꞌ pusicꞌal. Ti ñaxan jini jach ti subentiyon lojon israelon bʌ lojon. Pero wale mi subentyel majchical jach, mi israelob o mi mach israelobic.

17 Como jini wen bʌ tꞌan miꞌ tsictisʌbeñonla bajcheꞌ Dios miꞌ qꞌuel ti tyoj majchical jach bʌ quixtyañu. Mi qꞌuejlel ti tyoj chaꞌan jach miꞌ chꞌujbin tiꞌ pusicꞌal. Maꞌan yambʌ bajcheꞌ mi mejlel i qꞌuejlel ti tyoj. Ti Tsꞌijbubil bʌ i Tꞌan Dios mi yʌl: Majchical jach miꞌ chꞌujbin chaꞌan ajcotyaya i chaꞌan Jesucristo mi qꞌuejlel ti tyoj ti Dios. Mi quejel i yʌqꞌuentyel tsijiꞌ bʌ i cuxtyʌlel. Cheꞌ tsꞌijbubil.

18 Mi tsictiyel chaꞌan Dios yaꞌ bʌ an ti panchan mi quejel i yʌqꞌuen i xotꞌob i mul jini mach bʌ saj yom i chꞌujbin i tꞌan yicꞌot jini muꞌ bʌ i chaꞌlen i simaronlel. Chaꞌan ti caj jini muꞌ bʌ i chaꞌlen miꞌ mʌtyʌbeñob yañoꞌ bʌ i cañob jini melel bʌ tꞌan.

19 Chʌꞌʌch miꞌ chaꞌleñob aunque miꞌ wen ñaꞌtyañob chaꞌan an Dios, como Dios i bajñel miꞌ luꞌ aqꞌuen quixtyañu i ñaꞌtyañob.

20 Machꞌan mi laj qꞌueleꞌ Dios pero mi lac ñaꞌtyan chaꞌan añʌch Dios cheꞌ mi laj qꞌuel chʌ bʌ yes tiꞌ mele. Cꞌʌlʌ ti ñoj oniyix cheꞌ ti mejli mulawil cꞌʌlʌ wale iliyi, chaꞌan ti caj i chaꞌlibal tiꞌ wen tsictiyi chaꞌan Diosʌch am bʌ i pꞌʌtyʌlel machꞌʌ yujil jilel. Jin chaꞌan machꞌan majch chꞌujbi i yʌleꞌ chaꞌan machꞌan tiꞌ ñaꞌtyʌ mi an Dios.

21 Pero aunque tiꞌ cʌñʌyob chaꞌan jiñʌch Dios, machꞌan tiꞌ qꞌueleyob ti ñuc cheꞌ bajcheꞌ Dios, machꞌan ti yʌqꞌueyob wocox i yʌlʌ. Machꞌan sajlic i cꞌʌjnibal pejtyel chʌ bʌ yes tiꞌ pensaliyob. Ti luꞌ asiyi i pusicꞌal ti bibajax bʌ i pensal. An ti icꞌtyojñal i pusicꞌal yubil.

22 Tiꞌ lolon ñaꞌtyʌyob añob i ñaꞌtyʌbal. Pero ti i chaꞌlibal tiꞌ tsictiyi machꞌan i ñaꞌtyʌbal. Tontojob.

23 An i ñuclel jini Dios machꞌʌ saj yujil sajtyel. Pero quixtyañujob tiꞌ lolon qꞌuexeyob Dios ti i locꞌom tyac quixtyañujob yujil bʌ sajtyel. Jinic tyo tiꞌ cuyuyob ti Dios i locꞌom tyac xmaꞌtyeꞌmut, yicꞌot i locꞌom tyac lucum yicꞌot i locꞌom tyac chʌ bʌ animal tyac am bʌ chʌntsꞌijt i yoc.

24 Chaꞌan ti caj cheꞌ tiꞌ chaꞌliyob, Dios tiꞌ cʌyʌ jini quixtyañujob chaꞌan i chaꞌleñob chʌ bʌ jach bʌ i tsuculel bajcheꞌ miꞌ bajñel pensaliñob tiꞌ pusicꞌal. Ñoj quisintic jini tsaꞌ bʌ i chaꞌleyob yicꞌot i piꞌʌlob.

25 Como jini quixtyañujob mach yom i chꞌujbiñob jini melel bʌ tꞌan chaꞌan miꞌ cʌñob Dios, pero miꞌ chꞌujbiñob lot bʌ tꞌan. Tiꞌ chꞌujutisʌyob i melbal Dios. Tiꞌ qꞌueleyob ti ñuc. Pero machꞌan tiꞌ chꞌujutisʌyob Dios tsaꞌ bʌ i luꞌ mele pejtyelel chʌ bʌ an tyac. Jiñʌch jini yom bʌ mi sujbel ti ñuc ti beleꞌ ora. Amén.

26 Pero chaꞌan machꞌan tiꞌ chꞌujutisʌyob Dios pero tiꞌ chꞌujutisʌyob i melbal jach, Dios tiꞌ cʌyʌ chaꞌan i chaꞌleñob ñoj bibajax bʌ i tsuculel. Xꞌixicob machꞌan ti ajniyob yicꞌot i ñoxiꞌal. Pero ti ajniyob yicꞌot lajal xꞌixicoꞌ bʌ.

27 Yicꞌot winicob jeꞌel machꞌan ti ajniyob yicꞌot i yijñam, pero ti laja ajniyob yicꞌot lajal winicob bʌ. Ñoj quisintic bajcheꞌ tiꞌ chaꞌleyob. Pero ti aqꞌuentiyob i xotꞌeꞌ ti i bʌcꞌtyal jini bibajax bʌ tsaꞌ bʌ i chaꞌleyob.

28 Chaꞌan mach yom i pensalin mi an Dios, Dios tiꞌ cʌyʌ chaꞌan i pensaliñob chʌ bʌ jach bʌ i tsuculel yicꞌot i chaꞌleñob jini mach bʌ yom i chaꞌleñob.

29 Butꞌul i pusicꞌal ili quixtyañujob ti pejtyelel chʌ bʌ machꞌʌ wen tyac. An tꞌan yicꞌot yambʌ winic yambʌ xꞌixic. Simaroñob. Más on yom chʌ bʌ yes an i chaꞌan. Baꞌic jach bʌ i tsuculel miꞌ chaꞌlen. Miꞌ michꞌqꞌuel chʌ bʌ an i chaꞌan yambʌ quixtyañujob. Ajtsʌnsayob. Beleꞌ periyal bʌ tꞌan yom. Miꞌ lotin i piꞌʌlob. Miꞌ ñajti tyajob ti leco bʌ tꞌan i piꞌʌlob. Miꞌ chaꞌlen jopꞌtꞌan.

30 Miꞌ sub ti mach bʌ wen bʌ tꞌan yañoꞌ bʌ. Miꞌ tsaꞌqꞌuel Dios. Miꞌ qꞌuel ti pecꞌ i piꞌʌlob. Miꞌ lolon chan isan i bʌ tiꞌ tyojlel i piꞌʌlob. Miꞌ lolon bajñel sub i ñuclel. Miꞌ bej pensalin bajcheꞌ chꞌujbi i chaꞌlen yambʌ simaronlel. Machꞌan miꞌ jacꞌben i tꞌan i tyat i ñaꞌ.

31 Machꞌan miꞌ chꞌʌmbeñob isujm chʌ bʌ wen, chʌ bʌ mach wen. Machꞌan miꞌ tsꞌʌctisan chʌ bʌ miꞌ lolon alob. Machꞌan miꞌ chaꞌlen pꞌuntyaya. Machꞌan miꞌ ñusʌben i mul i piꞌʌlob. Machꞌan miꞌ pꞌuntyan yañoꞌ bʌ chaꞌan i cotyañob.

32 Miꞌ ñaꞌtyañob chaꞌan Dios ti yʌlʌ chaꞌan majchical miꞌ chaꞌlen cheꞌ bajcheꞌ jini yom sajtyel chaꞌan i xotꞌeꞌ i mul. Aunque miꞌ ñaꞌtyan chaꞌan chʌꞌʌch ti yʌlʌ Dios, miꞌ bej chaꞌlen jini mach bʌ wen yicꞌot jeꞌel miꞌ mulan i qꞌuel cheꞌ yaño bʌ miꞌ chaꞌleñob.