2 Tiꞌ wen pꞌuntyʌyon lojon jini quixtyañujob yaꞌ bʌ chumulob yaꞌi. An jaꞌal yicꞌot cabʌl tsʌñal. Jin chaꞌan tiꞌ tsucꞌuyob cꞌajc. Ti yʌcꞌon lojon qꞌuixñisan lojon c bʌ yaꞌ ti cꞌajc.

3 Pablo ti queji i motyeꞌ tyʌquin bʌ siꞌ. Ti yotsʌ ti cꞌajc. Ti loqꞌui juncojt lucum chʌncol bʌ i putstyan i ticwʌjlel cꞌajc. Ti cꞌuxle tiꞌ cꞌʌb Pablo.

4 Cheꞌ ti yilʌyob yaꞌ tsꞌuyul lucum tiꞌ cꞌʌb Pablo jini yaꞌ bʌ chumuloꞌ tiꞌ subeyob i bʌ: Ajtsʌnsa ili winiqui, ti lolon yʌlʌyob. Aunque ti cojli ti jaꞌ wale maꞌix mi quej i colel, cheꞌob.

5 Pablo tiꞌ lijcʌ ochel ti cꞌajc jini lucum. Maꞌan chʌ bʌ tiꞌ saj chaꞌle Pablo.

6 Tiꞌ pijtyʌyob quixtyañujob bajcheꞌ ora mi quej i sitꞌojñel o mi quej i waꞌ sajtyel Pablo. Jal tiꞌ pijtyʌyob. Pero maꞌan chʌ bʌ tiꞌ chaꞌle i cꞌʌb Pablo. Jin chaꞌan tiꞌ qꞌuextyʌyob i pensal. Ti queji i lolon yʌlob diosʌch jini Pablo.

7 Publio bʌ i cꞌabaꞌ jini am bʌ ñuc bʌ yeꞌtyel yaꞌ ti jini lum. Lʌcꞌʌl an yotyot yaꞌ baꞌ chʌncol lojon ti qꞌuix. Tiꞌ pʌyʌyon lojon ochel ti yotyot. Uxpꞌej qꞌuin yaꞌ ti ajniyon lojon. Ti yʌqꞌueyon lojon pejtyel chʌ bʌ i cꞌʌjnibal lojon c chaꞌan.

8 Cꞌam i tyat Publio. Mi yubin cꞌajc yicꞌot tyaꞌ. Pablo ti majli i julaꞌan. Tiꞌ chaꞌle oración Pablo. Ti yʌcꞌʌ i cꞌab tiꞌ pam jini xcꞌamꞌan. Ti waꞌ lajmi.

9 Chaꞌan tiꞌ chaꞌle cheꞌ bajcheꞌ jini ti tyʌli yambʌ xcꞌamꞌañob yaꞌ bʌ chumulob ti jini joyol bʌ ti jaꞌ bʌ lum. Ti lajmiyob jeꞌel.

10-11 Ti yʌqꞌueyoñob lojon cabʌl lojon c majtyan. Yaꞌ ti lojon c ñusʌ uxpꞌej uw. Yaꞌan jumpꞌej barco yaꞌ bʌ tiꞌ ñusʌ i yorojlel tsʌñal jeꞌel. Cheꞌ jini ti ochiyon lojon ti jini barco. Yaꞌ ti loqꞌui tyʌlel ti Alejandría. Cheꞌ chaꞌ majlelix mucꞌon lojon ti barco ti yʌqꞌueyoñob lojon pejtyel chʌ bʌ i cꞌʌjnibal lojon c chaꞌan. Yaꞌan tiꞌ pat i jol barco i locꞌom jini lutyoꞌ bʌ chaꞌtiquil winic Cástor yicꞌot Pólux bʌ i cꞌabaꞌ muꞌ bʌ i diosiñob xnijca barcojob.

12 Ti cꞌotiyon lojon ti lum am bʌ ti lʌcꞌʌl tiꞌ jaꞌ Siracusa bʌ i cꞌabaꞌ. Yaꞌ ti cʌyleyon lojon uxpꞌej qꞌuin.

13 Ti loqꞌuiyon lojon majlel yaꞌi. Lʌcꞌʌl yaꞌ tiꞌ tiꞌ lum ti ñumiyon lojon majlel cꞌʌlʌl ti cꞌotiyon lojon ti lum Regio bʌ i cꞌaba. Ti yijcꞌʌlel ti queji icꞌ tyʌlem bʌ ti sur. Cheꞌ jini ti loqꞌuiyon lojon. Ti chaꞌpꞌejlel bʌ qꞌuin ti cꞌotiyon lojon ti mali lum Puteoli bʌ i cꞌabaꞌ. Ti loqꞌuiyon lojon ti barco.

14 Yaꞌ ti lojon c tyaja ochemoꞌ bʌ tiꞌ tꞌan Dios. Yaꞌ tiꞌ subon lojon cʌytyʌl jumpꞌej semana. Cheꞌ jini ti loqꞌuiyon lojon majlel ti bij cꞌʌlʌl ti Roma.

15 Jini ochemoꞌ bʌ tiꞌ tꞌan Dios yaꞌ ti Roma ti yubiyob ti alol cheꞌ añonix lojon ti bij. Ti majliyob i tyajon lojon tyʌlel ti bij. Cꞌʌlʌl ti loqꞌuiyob tyʌlel ti Foro de Apio yicꞌot Tres Tabernas bʌ i cꞌabaꞌ bʌ lum. Cheꞌ ñac Pablo ti yilʌyob tiꞌ sube Dios wocox i yʌlʌ. Ti chaꞌ tijicniyi i pusicꞌal Pablo.

16 Cheꞌ ñac ti cꞌotiyon lojon ti Roma jini ñuc bʌ soldado ti yʌcꞌʌ xcʌcholob tiꞌ cꞌʌb jini am bʌ yeꞌtyel muꞌ bʌ i cʌñʌtyañob. Pero ti yʌcꞌʌyob ti bajñel chumtyʌl Pablo yicꞌot juntiquil soldado muꞌ bʌ i cʌñʌtyan.

17 Ti yuxpꞌejlelix qꞌuin i cꞌotyel Pablo tiꞌ xiqꞌui ti pʌyol jini israelob añoꞌ bʌ yeꞌtyel ti templo yaꞌ ti Roma. Cheꞌ ñac tiꞌ muchꞌquiyob i bʌ Pablo ti yʌlʌ: Piꞌʌlob, maꞌan chʌ bʌ tic chaꞌle tiꞌ contra israelob, mi tiꞌ contrajic bajcheꞌ i tyʌlel miꞌ chꞌujbiñob lac yumob ti ñoj oniyix. Yaꞌ tiꞌ chucuyoñob yaꞌ ti Jerusalén. Ti yʌcꞌʌyoñob tiꞌ cꞌʌb romanojob.

18 Pero cheꞌ ñac ti yʌcꞌoñob c mel c bʌ maꞌan tiꞌ tyajayob c mul. Yom i coloñob. Como maꞌan chʌ bʌ och mi yʌcꞌoñob ti tsʌnsʌntyel chaꞌan mic xotꞌ c mul.

19 Pero jini israelob maꞌ ti yʌcꞌʌyon ti colol. Jin chaꞌan tic wersa cꞌajtibe c mel c bʌ wʌꞌ baꞌan jini ñoj ñuc bʌ yeꞌtyel wʌꞌ ti Roma aunque maꞌan chʌ bʌ mic sub tiꞌ contra c piꞌʌlob tic lumal.

20 Tic pʌyʌyet tyʌlel chaꞌan mij qꞌueletla chaꞌan mic pejcañetla. Wʌꞌ mi laꞌ qꞌuelon cʌchʌlon ti cadena chaꞌan ti caj tic chꞌujbi jini chʌncol bʌ i pijtyan israelob. Chʌncol i pijtyañob chaꞌan Dios mi quej i tyech loqꞌuel sajtyemobix bʌ.

21 Cheꞌ jini tiꞌ subeyob Pablo yaꞌ bʌ muchꞌquibilob: Maꞌan baꞌ jul mi jumpꞌejlic jun tsaꞌ bʌ i choco tyʌlel quixtyañujob yaꞌ ti Judea muꞌ bʌ i tyajet ti tꞌan. Mi jinic lac hermañujob yaꞌ bʌ chꞌoyolob maꞌan chʌ bʌ mi yʌlob. Maꞌan baꞌ i niqꞌui suboñob ti a contra.

22 Lojon cujil isujm ti jujumpꞌej lum miꞌ tsꞌaꞌqꞌuelob muꞌ bʌ i chꞌujbin jini tsijiꞌ bʌ tꞌan. Jin chaꞌan com lojon cubin a tꞌan bajcheꞌ maꞌ pensalin jatyet. Cheꞌ tiꞌ subeyob Pablo jini ñucoꞌ bʌ yeꞌtyel ti templo israelob.

23 Cheꞌ jini ti yʌlʌyob chʌ bʌ ti qꞌuin mi quej i chaꞌ muchꞌquiñob i bʌ. Ti jim bʌ qꞌuin i yonlel tiꞌ muchꞌquiyob i bʌ yaꞌ baꞌan Pablo. Cꞌʌlʌl ti sʌcꞌan cꞌʌlʌl ti icꞌʌ Pablo tiꞌ sube chaꞌan i yumintyel Dios. Xucꞌul tiꞌ luꞌ subeyob chaꞌan i chꞌʌmeñob isujm bajcheꞌ mi yʌl ti mandar Moisés yicꞌot bajcheꞌ ti yʌlʌ jini tsaꞌ bʌ i xiqꞌui yʌleꞌ Dios ti ñoj oniyix chaꞌan Jesús.

24 Lamital tiꞌ chꞌujbi bajcheꞌ ti subentiyob. Yañoꞌ bʌ maꞌan tiꞌ chꞌujbiyob.

25 Mach junlajal yom i yubiñob. Ti queji i sujtyelob. Pero colex i sujtyelob, Pablo tiꞌ subeyob: Weñʌch tiꞌ subeyob lac yumob ti ñoj oniyix jini Chꞌujul bʌ i Chꞌujlel Dios ti tiꞌ jini tsaꞌ bʌ i xiqꞌui yʌleꞌ Dios Isaías bʌ i cꞌabaꞌ.

26 Dios tiꞌ sube Isaías:

28 Wale cꞌʌlʌ jalaj mi quej i subentyelob i tꞌan Dios jini mach bʌ israelob. Mi quej i ñʌchꞌtyañob. Cheꞌ ti yʌlʌ Pablo.

29 Cheꞌ ñac ti yʌlʌ Pablo cheꞌ bajcheꞌ jini, ti loqꞌuiyob majlel jini israelob. Ti quejiyob ti cabʌl tsʌts bʌ tꞌan.

30 Pablo ti cʌyle chaꞌpꞌej jab yaꞌ baꞌ ti ochi. Tijicña tiꞌ pejcʌyob majchical tsaꞌ bʌ cꞌoti i julaꞌan.

31 Maꞌan majch tiꞌ tiqꞌui i julaꞌantyel. Wen chꞌejl tiꞌ sube quixtyañujob chaꞌan i yumintyel Dios yicꞌot tiꞌ cʌntisʌyob chaꞌan lac Yum Jesucristo.