2 chʌncol lojon c tsꞌijbubeñetla ili carta hermañujob ochemet bʌ la tiꞌ tꞌan Dios yaꞌ ti Corinto. I chaꞌañetla Dios como mi laꞌ tyem ajñel yicꞌot Cristo Jesús. Dios tiꞌ pʌyʌyetla chaꞌan mi laꞌ wajñel ti i chaꞌañoꞌ bʌ yicꞌot ti pejtyel muꞌ bʌ i pejcan lac yum Jesucristo baꞌical bʌ añob. I Yumobʌch. Lac Yumʌch jeꞌel.

3 Laꞌ i yʌqꞌueñetla i yutslel yicꞌot i ñʌchꞌtyʌlel tyʌlem bʌ ti Dios lac Tyat yicꞌot ti lac Yum Jesucristo.

4 Chʌncol c chʌc suben Dios wocox i yʌlʌ chaꞌañetla chaꞌan ti aqꞌuentiyetla i yutslel Dios chaꞌan ti Cristo Jesús.

5 Dios ti yʌqꞌueyetla pejtyel chʌ bʌ ñoj wen bʌ chaꞌan chʌncol laꞌ wajñel laꞌ wicꞌot Cristo. Chʌꞌʌch jeꞌel miꞌ cotyañetla ti jini muꞌ bʌ laꞌ wʌleꞌ yicꞌot jini muꞌ bʌ laꞌ ñaꞌtyan.

6 Tsaꞌix i luꞌ yʌqꞌueyetla jini ñoj wen bʌ cheꞌ bajcheꞌ tic wʌ subeyetla chaꞌan chꞌujbi i cotyañetla Cristo.

7 Chaꞌan laꞌ luꞌ tyajeꞌ pejtyel chʌ bʌ mi yʌqꞌueñetla Dios maꞌix chʌ bʌ yom laꞌ chaꞌan cheꞌ chʌncol laꞌ chʌc pijtyan i chaꞌ tyʌlel lac Yum Jesucristo.

8 Dios miꞌ cotyañetla laꞌ beleꞌ ajñel ti xucꞌul chaꞌan maꞌix laꞌ mul cꞌʌlʌ yaꞌ bʌ mi chaꞌ tyʌlel lac Yum Jesucristo.

9 Dios miꞌ luꞌ tsꞌʌctisan jini tsaꞌix bʌ yʌlʌ. Jini tiꞌ pʌyʌyetla chaꞌan mi laꞌ wajñel yicꞌot i Yalobil Jesucristo lac Yum.

10 Hermañujob, tiꞌ cꞌabaꞌ lac Yum mic subeñetla ti wocol tꞌan chaꞌan junlajal mi laꞌ pensalin chaꞌan machꞌan mi laꞌ contrajin laꞌ bʌ ti tꞌan. Pero yom junlajal mi laꞌ pensalin. Yom junlajal mi laꞌ chaꞌlen tꞌan chaꞌan mi laꞌ wajñel ti ñʌchꞌʌl.

11 Joñon Pablojon. Chʌꞌʌch chʌncox c subeñetla, quermañujob, como an jini añoꞌ bʌ ti yotyot jini xꞌixic Cloé bʌ i cꞌabaꞌ tiꞌ subon chʌncox laꞌ contrajin laꞌ bʌ ti tꞌan.

12 Chʌncox cʌleꞌ jini como ti chajp ti chajp chʌncol laꞌ wʌleꞌ. An jini chʌncol bʌ i yʌleꞌ: Joñon mic tsʌclen Pablo. Yambʌ mi yʌleꞌ: Joñon mic tsʌclen Apolos. Yambʌ mi yʌleꞌ: Joñon mic tsʌclen Pedro. Yambʌ mi yʌleꞌ: Joñon mic tsʌclen Cristo, cheꞌen.

13 ¿Pero mach ba lac Yumʌch Cristo ti lac pejtyelel? ¿Tsaꞌix ba sajtiyon ti cruz chaꞌañetla mi laꞌ wʌl? Machꞌan ti cʌcꞌʌyetla ti chꞌʌm jaꞌ tij cꞌabaꞌ.

14 Wocox i yʌlʌ Dios maꞌan mi juntiquileticla ti cʌcꞌʌ ti chꞌʌm jaꞌ. Jini jach Crispo yicꞌot Gayo bʌ i cꞌabaꞌob ti cʌcꞌʌ ti chꞌʌm jaꞌ.

15 Cheꞌ jini machꞌan majch chꞌujbi i yʌleꞌ ti cʌcꞌʌyetla ti chꞌʌm jaꞌ tij cꞌabaꞌ.

16 Aja, tsaꞌ tyo cʌcꞌʌ ti chꞌʌm jaꞌ jeꞌel jini añoꞌ bʌ ti yotyot Estéfanas. Pero maꞌan cꞌajal c chaꞌan mi junticlec yambʌ ti cʌcꞌʌ ti chꞌʌmjaꞌ.

17 Como Cristo machꞌan tiꞌ xiqꞌuiyon tyʌlel chaꞌan cʌcꞌ ti chꞌʌm jaꞌ quixtyañujob. Pero tiꞌ xiqꞌuiyon tyʌlel chaꞌan c subeꞌ majlel jini tꞌan chaꞌan laj cotyʌntyel. Machꞌan ti xijqꞌuiyon c subeꞌ ti cabʌl tsʌts bʌ tꞌan cheꞌ bajcheꞌ wen cujil ame sojquic i sujmlel chaꞌan ti sajti Cristo ti cruz.

18 Cheꞌ mi yubin ti sajti ti cruz Cristo chaꞌan laj cotyʌntyel tonto tꞌan jach mi lolon ubin jini muꞌ bʌ i majlel ti xotꞌmulil. Pero ñoj i cꞌʌjnibal i tꞌan Dios mi la cubin joñon bʌ la chʌncox bʌ laj cotyʌntyel.

19 Mi yʌleꞌ ti Tsꞌijbubil bʌ i Tꞌan Dios:

20 Cheꞌ bajcheꞌ maꞌix i cꞌʌjnibal wale i ñaꞌtyʌbalob, mi i cꞌʌjnibalic i yajcʌntisajob, mi jinic muꞌ bʌ i wen chaꞌlen tꞌan chaꞌan i chaꞌan bʌ mulawil chaꞌan lac tyajeꞌ laj cotyʌntyel. Dios tiꞌ pʌsꞌe tonto jach jini i ñaꞌtyʌbalob i chaꞌan jach bʌ mulawil.

21 Como Dios yujil bajcheꞌ miꞌ chaꞌlen. Maꞌan ti yʌcꞌʌ i cʌmbeñob Dios jini añoꞌ bʌ ti mulawil chaꞌan jach ti cabʌl i ñaꞌtyʌbal i chaꞌan jach bʌ mulawil. Pero yom i cotyañob jini chʌncol bʌ i chꞌujbin chaꞌan ti i tꞌan Dios muꞌ bʌ lojon c subeꞌ aunque tonto tꞌan jach mi lolon yubiñob jini yañoꞌ bʌ.

22 Jini lojon c piꞌʌlob jini israeloꞌ bʌ yomob i qꞌuelob i señʌjlel tyac i pꞌʌtyʌlel Dios. Jini laꞌ piꞌʌlob jini mach bʌ israelob yom jach i cʌñeꞌ cabʌl ñuc bʌ i ñaꞌtyʌbal i chaꞌan jach bʌ mulawil.

23 Pero joñon lojon chʌncol lojon c subeꞌ i tꞌan Cristo tsaꞌ bʌ jocꞌle ti cruz. Jini lojon c piꞌʌlob jini israeloꞌ bʌ quisintic mi yubiñob jini tꞌan. Jini laꞌ piꞌʌlob jini mach bʌ israelob tonto tꞌan jach mi lolon ubiñob.

24 Pero ti lac pejtyelel tsaꞌ bʌ pʌjyiyonla ti Dios chaꞌan lac chꞌujbin mi israelon bʌ la yicꞌot mach bʌ israelonla mi lac chꞌʌmꞌen isujm chaꞌan Cristo i pꞌʌtyʌlelʌch Dios yicꞌot i ñaꞌtyʌbal Dios.

25 I ñaꞌtyʌbal Dios muꞌ bʌ i lolon ajlel ti tonto yoque más ñuc bajcheꞌ i ñaꞌtyʌbal quixtyañujob. I chaꞌlibal Dios mach bʌ pꞌʌtyʌlic miꞌ lolon qꞌuelob quixtyañujob yoque más pꞌʌtyʌl bajcheꞌ i pꞌʌtyʌlel quixtyañujob.

26 Yom mi laꞌ chꞌʌmꞌen isujm hermañujob, Dios ti yajcʌyonla aunque maꞌix cabʌlonla am bʌ cabʌl lac ñaꞌtyʌbal i chaꞌan jach bʌ mulawil. Maꞌix cabʌlonla am bʌ cabʌl lac pꞌʌtyʌlel chaꞌan lac chaꞌlen xicꞌojel. Maꞌix cabʌlonla mi laj qꞌuejlel ti ñuc ti quixtyañu ti mulawil.

27 Como Dios ti yajcʌ jini machꞌʌ baꞌan mi qꞌuejlel ti ñuc ti quixtyañujob chaꞌan i yʌcꞌ ti quisnil jini am bʌ cabʌl i ñaꞌtyʌbal i chaꞌan jach bʌ mulawil. Dios tiꞌ yajcʌ jini machꞌʌ baꞌan i cꞌʌjnibal mi qꞌuejlel chaꞌan mi yʌjqꞌuel ti quisnil jini pꞌʌtyʌloꞌ bʌ.

28 Dios ti yajcʌ jini machꞌʌ baꞌan i ñuclel wʌꞌ ti mulawil yicꞌot jini muꞌ bʌ i qꞌuejlel ti tonto. Ti yajcʌ jini machꞌʌ baꞌan sajlic i ñuclel wʌꞌ ti mulawil chaꞌan miꞌ tsictisan maꞌix yoque i ñuclel jini muꞌ bʌ i lolon qꞌuejlel ti ñuc wʌ ti mulawil.

29 Cheꞌ jini machꞌan majch chꞌujbi i chan isan i bʌ tiꞌ tyojlel Dios.

30 Pero Dios ti yʌcꞌʌyonla lac tyem ajñel la quicꞌot Cristo Jesús. Dios ti yʌqꞌueyonla Cristo chaꞌan mi yajñel ti lac ñaꞌtyʌbal. Miꞌ qꞌuelonla ti wen Dios chaꞌan ti Cristo. I chaꞌañonixla Cristo. Cristo tiꞌ cotyʌyonla.

31 Cheꞌ jini cheꞌ bajcheꞌ mi yʌleꞌ jini Tsꞌijbubil bʌ i Tꞌan Dios: Mi an majch yom i subeꞌ i ñuclel, laꞌ i subeꞌ i ñuclel Lac Yum, cheꞌ mi yʌleꞌ tiꞌ tꞌan Dios.